1 Kronika 24 - ŊMALƐ KRƆŊKRƆŊ LƐ

Nitsumɔi ni ahã osɔfoi lɛ

¹ Shĩaishĩai ni feɔ Aaron shwiei lɛ agbɛii baa nɛɛ: Aaron fɔ bihii ejwɛ: Nadab kɛ Abihu kɛ Eleazar kɛ Itamar.

² Nadab kɛ Abihu gboi yɛ amɛtsɛ hiɛ, ni amɛshiii bii. No hewɔ lɛ, amɛnyɛmimɛi Eleazar kɛ Itamar baye osɔfo lɛ.

³ Zadok ni jɛ Eleazar shwiei lɛ ateŋ lɛ kɛ Ahimelek ni jɛ Itamar shwiei lɛ ateŋ lɛ wa Maŋtsɛ David ni ejara Aaron shwiei lɛ amli kuikui yɛ nitsumɔi ni ahã amɛ lɛ anaa.

⁴ Ana akɛ Eleazarbii lɛ ateŋ hii shĩaiaŋ onukpai lɛ ayi fa fe Itamarbii lɛ ateŋ hii shĩaiaŋ onukpai lɛ. No hewɔ lɛ, ajara Eleazarbii lɛ amli kui nyɔŋma kɛ ekpaa, ni ajara Itamarbii lɛ mli kui kpaanyɔ.

⁵ Akɛni Sɔlemɔ we lɛ mli lumɛi kɛ mumɔŋ lumɛi fɛɛ yɛ Eleazarbii lɛ kɛ Itamarbii lɛ ateŋ biɛ kɛ biɛ hewɔ lɛ, afɔ̃ oshiki ni akɛja nitsumɔi lɛ ahã amɛ.

⁶ Kɛji afɔ̃ shi kome ahã Eleazarwe lɛ, kɛkɛ lɛ afɔ̃ shi kome hu ahã Itamar we lɛ. Ni Shemaia, Netanel bi lɛ, ni jɛ Levibii lɛ ateŋ lɛ, ji woloŋmalɔ mɔ ni ŋmala bɔ ni oshikifɔ̃ɔ lɛ fɛɛ tee nɔ hã. Eŋmala nii nɛɛ yɛ Maŋtsɛ David kɛ lumɛi lɛ kɛ Osɔfo Zadok kɛ Abiatar bi Ahimelek kɛ osɔfoi lɛ kɛ Levibii ashĩaiaŋ onukpai lɛ fɛɛ ahiɛ.

⁷ Klɛŋklɛŋ oshiki lɛ gbee Yehoiarib nɔ; ni nɔ ni ji enyɔ lɛ gbee Yedaia nɔ.

⁸ Oshiki ni ji etɛ̃ lɛ gbee Harim nɔ, ni ejwɛ lɛ gbee Seorim nɔ;

⁹ nɔ ni ji enumɔ lɛ gbee Malkiya nɔ, ni ekpaa lɛ gbee Miyamin nɔ.

¹⁰ Oshiki ni ji kpawo lɛ gbee Hakoz nɔ, ni kpaanyɔ lɛ gbee Abia nɔ.

¹¹ Nɔ ni ji nɛɛhu lɛ gbee Yeshua nɔ, ni nyɔŋma lɛ gbee Shekania nɔ.

¹² Oshiki ni ji nyɔŋma kɛ ekome lɛ gbee Eliashib nɔ, ni nyɔŋma kɛ enyɔ lɛ gbee Yakim nɔ;

¹³ nɔ ni ji nyɔŋma kɛ etɛ̃ lɛ gbee Hupa nɔ, ni nyɔŋma kɛ ejwɛ lɛ gbee Yeshebeab nɔ.

¹⁴ Oshiki ni ji nyɔŋma kɛ enumɔ lɛ gbee Bilga nɔ, ni nyɔŋma kɛ ekpaa lɛ gbee Imer nɔ;

¹⁵ nɔ ni ji nyɔŋma kɛ kpawo lɛ gbee Hezir nɔ, ni nyɔŋma kɛ kpaanyɔ lɛ gbee Hapizez nɔ.

¹⁶ Oshiki ni ji nyɔŋma kɛ nɛɛhu lɛ gbee Petahia nɔ, ni nyɔŋmai enyɔ lɛ gbee Yehekel nɔ.

¹⁷ Nɔ ni ji nyɔŋmai enyɔ kɛ ekome lɛ gbee Yakin nɔ, ni nyɔŋmai enyɔ kɛ enyɔ lɛ gbee Gamul nɔ.

¹⁸ Oshiki ni ji nyɔŋmai enyɔ kɛ etɛ̃ lɛ gbee Delaia nɔ, ni nɔ ni ji nyɔŋmai enyɔ kɛ ejwɛ lɛ gbee Maazia nɔ.

¹⁹ Bɔ ni ato gbɛjianɔ lɛ ahã gbɔmɛi nɛɛ nɛ: amɛyaa Yehowa we lɛ amɛyasɔmɔɔ bɔ ni amɛtsɛ Aaron to he gbɛjianɔ yɛ Yehowa, Israel Nyɔŋmɔ lɛ, fãmɔ naa lɛ.

Levibii krokomɛi hu agbɛii

²⁰ Levibii lɛ ekomɛi hu amli onukpai lɛ agbɛii baa nɛ: Yehedeia ni jɛ Amram bi Shebael mli lɛ,

²¹ Ishia, Rehabia shwiei lɛ ateŋ onukpa lɛ,

²² Yahat, ni jɛ Izhar bi Shelomit mli lɛ.

²³ Hebron bihii ejwɛ lɛ: Yeria, ni ji onukpa lɛ, kɛ Amaria mɔ ni ji enyɔ lɛ kɛ Yahaziel mɔ ni ji etɛ̃, kɛ Yekameam mɔ ni ji ejwɛ lɛ.

²⁴ Shamir, ni jɛ Uziel bi Mika mli lɛ.

²⁵ Zakaria, ni jɛ Uziel bi Mika nyɛmi Ishia mli lɛ.

²⁶ Mahli kɛ Mushi, Merari shwiei lɛ.

²⁷ Beno kɛ Shoham kɛ Zakur kɛ Ibri, ni ji Merari shwiei ni jɛ Yaazia mli lɛ.

²⁸ Eleazar, Mahli bi lɛ; shi lɛ lɛ ebɛ bihii.

²⁹ Yerameel, Kish bi lɛ.

³⁰ Mahli kɛ Eder kɛ Yerimot, Mushibii lɛ. Mɛnɛɛmɛi ji Levibii abihii lɛ yɛ amɛtsɛmɛi awei lɛ anaa.

³¹ Shĩa fɛɛ shĩa mli onukpa lɛ fã enyɛmimɛi gbekɛbii lɛ ateŋ mɔ kome efata ehe kɛfɔ̃ oshiki, ni amɛkɛkɔlɔ amɛgbɛfaŋ nitsumɔi lɛ tamɔ amɛnyɛmimɛi Aaronbii lɛ fee lɛ nɔŋŋ. Amɛ hu amɛfee nii nɛɛ yɛ Maŋtsɛ David kɛ Osɔfo Zadok kɛ Ahimelek kɛ Osɔfoi lɛ kɛ Levibii lɛ atsɛmɛi awei lɛ amli onukpai lɛ fɛɛ ahiɛ.