1 Kronika 23 - ŊMALƐ KRƆŊKRƆŊ LƐ

¹ Be ni David egbɔ kotokoto lɛ, ewo ebi Solomon Israel maŋtsɛ.

Nitsumɔ ni ahã Levibii lɛ

² Maŋtsɛ David tsɛ Israel lumɛi lɛ kɛ osɔfoi lɛ kɛ Levibii lɛ fɛɛ kɛbakpe.

³ Ehã akane Levibii lɛ ateŋ hii ni eye kɛjɛ afii nyɔŋmai etɛ̃ kɛyaa fɛɛ. Amɛyibɔ ni ana lɛ fee akpei nyɔŋmai etɛ̃ kɛ kpawo.

⁴ Maŋtsɛ David kɛ Yehowa Sɔlemɔ we lɛ mli nitsumɔi lɛ wo amɛteŋ mɛi akpei nyɔŋmai enyɔ kɛ ejwɛ adɛŋ.

⁵ Eto mɛi akpei ejwɛ akɛ agbonaabulɔi, ni eto mɛi akpei ejwɛ hu akɛ amɛ jie Yehowa yi kɛ jooshwɛmɔ nibii ni esaa eto koni akɛjie Yehowa yi lɛ.

⁶ David jara amɛmli kuikui yɛ Levi bihii ni ji Gershon kɛ Kohat kɛ Merari lɛ anaa.

⁷ Gershon fɔ bihii enyɔ: Ladan kɛ Shimei.

⁸ Ladan fɔ bihii etɛ̃: Yehiel kɛ Zetam kɛ Yoel.

⁹ Mɛnɛɛmɛi ji Ladan shwiei awei lɛ anɔ onukpai lɛ. (Shimei fɔ bihii etɛ̃: Shelomot kɛ Haziel kɛ Haran.)

¹⁰ Shimei fɔ bihii ejwɛ: Yahat kɛ Zina kɛ Yeush kɛ Beria.

¹¹ Yahat ji kromɔbi, ni esɛɛho ji Zina; akɛni Yeush kɛ Beria eyafɔɔɔ bihii pii hewɔ lɛ akane amɛshwiei lɛ akɛ tsɛwe komeŋ bii.

¹² Kohat fɔ bihii ejwɛ: Amram kɛ Ishar kɛ Hebron kɛ Uziel.

¹³ Amram, Kohat kromɔbi lɛ, fɔ Aaron kɛ Mose. Ajie Aaron kɛ eshwiei lɛ ato akɛ mɛi krɛdɛɛ ni akwɛ nibii krɔŋkrɔŋi ni akɛjaa lɛ anɔ kɛya naanɔ; asaŋ akɛ amɛ amɛshã tsofakɛŋma be mli ni ajaa Yehowa; ni amɛsɔmɔ Yehowa, ni amɛjɔɔ mɛi yɛ Yehowa gbɛi mli.

¹⁴ Shi akane Mose, Nyɔŋmɔ gbɔmɔ lɛ, shwiei lɛ ashi Levibii lɛ anɔ.

¹⁵ Mose fɔ bihii enyɔ, Gershom kɛ Eliezer.

¹⁶ Gershom shwiei lɛ ateŋ onukpa ji Shebuel.

¹⁷ Eliezer fɔ binuu kometoo pɛ ni ji Rehabia; shi Rehabia fɔ babaoo.

¹⁸ Izhar, Kohat binuu ni ji enyɔ lɛ, fɔ Shelomit. Lɛ etsɔ̃ Izhar shwiei lɛ ateŋ onukpa.

¹⁹ Hebron, Kohat binuu ni ji etɛ̃ lɛ, fɔ bihii ejwɛ: Ekromɔbi lɛ ji Yeria; mɔ ni ji enyɔ lɛ ji Amaria; mɔ ni ji etɛ̃ lɛ ji Yahaziel, ni mɔ ni ji ejwɛ lɛ ji Yekameam.

²⁰ Uziel, Kohat binuu ni ji ejwɛ lɛ fɔ bihii enyɔ: Mika, kromɔbi lɛ, kɛ Yeshia, mɔ ni ji enyɔ lɛ.

²¹ Merari fɔ bihii enyɔ: Mahli kɛ Mushi. Mahli hu fɔ bihii enyɔ: Eleazar kɛ Kish;

²² shi Eleazar gbo ni ebɛ binuu fe biyei kɛkɛ. Kish bihii lɛ ŋɔ Eleazar biyei lɛ akɛ ŋamɛi.

²³ Mushi, Merari binuu ni ji enyɔ lɛ, fɔ bihii etɛ̃: Mahli kɛ Eder kɛ Yeremot.

²⁴ Levi shwiei ni akane amɛ yɛ amɛwei kɛ amɛshiãishiãi anaa lɛ nɛ. Aŋmãla amɛgbɛii ekomekome; ni nuu fɛɛ nuu ni eye kɛjɛ afii nyɔŋmai enyɔ kɛyaa lɛ, akɛ lɛ shi Yehowa Sɔlemɔ we lɛ mli sɔ̃ɔlɔi lɛ anɔ.

²⁵ Ejaakɛ David kɛɛ nɔ ko akɛ, “Yehowa, Israel Nyɔŋmɔ lɛ, ehã emaŋ lɛ he ejɔ lɛ, ni ekɛ amɛaahi Yerusalɛm kɛya naanɔ.

²⁶ Ni no hewɔ lɛ, ehe ehĩaaa akɛ Levibii lɛ atere Yehowa Kpee Buu Krɔŋkrɔŋ lɛ kɛ ehe nibii ni akɛjaa lɛ lɛ dɔŋŋ.”

²⁷ Yɛ Maŋtsɛ David naagbee gbɛjianɔtoi anaa lɛ, aŋmãla Levibii ni eye kɛjɛ afii nyɔŋmai enyɔ kɛyaa agbɛii,

²⁸ ni ahã amɛ nitsumɔi ni baa nɛɛ akɛ amɛtsu: amɛwaa Aaron shwiei ni ji osɔfoi lɛ kɛji aaja yɛ Yehowa we lɛ; amɛsaa kpoi lɛ anɔ kɛ piai lɛ amli; amɛtsumɔɔ nibii krɔŋkrɔŋi lɛ fɛɛ ahe; amɛtsuɔ nitsumɔi krokomɛi fɛɛ ni kɔɔ Yehowa we lɛ mli sɔɔmɔ he;

²⁹ amɛkwɛɔ aboloo ni akɛmaa Nyɔŋmɔ hiɛ lɛ he saji anɔ, kɛ mamu ni akɛbashãa niyenii afɔle lɛ, kɛ kaka ni akɛ ma akpiti shã lɛ, kɛ nibii ni ashã ni akɛbashãa afɔle lɛ, kɛ mamu ni akɛ mu efutu mli ni akɛbaashã afɔle lɛ. Agbɛnɛ amɛ amɛŋmɛɔ ni amɛsusuɔ nibii srɔtoi fɛɛ ni akɛbaa afɔleshãa lɛ.

³⁰ Agbɛnɛ daa leebi kɛ gbɛkɛ lɛ amɛlaa kɛdaa Yehowa shi; ni amɛkɛjieɔ eyi hu.

³¹ Be fɛɛ be ni aashã afɔle ahã Yehowa yɛ hejɔɔmɔ gbii anɔ loo yɛ nyɔji hei ajee mli kɛ gbii juji anɔ hu amɛ amɛlaa. Ato Levibii ni be fɛɛ be lɛ amɛ amɛbaatsu nitsumɔi nɛɛ ateŋ eko fɛɛ eko kɛsɔmɔ Yehowa.

³² Belɛ Levibii lɛ ji mɛi ni kwɛ Yehowa Kpee Buu lɛ kɛ Sɔlemɔ we lɛ nɔ; ni amɛ amɛwa Aaron shwiei ni ji amɛnyɛmimɛi osɔfoi lɛ, ni akɛsɔmɔ yɛ Yehowa we lɛ.