1 Kronika 22 - ŊMALƐ KRƆŊKRƆŊ LƐ

¹ Kɛkɛ ni David kɛɛ akɛ, “Biɛ etsɔ̃ Yehowa Nyɔŋmɔ lɛ We; ni biɛ Israel fɛɛ afɔleshãa latɛ lɛ baahi.”

Bɔ ni asaa he ahã Sɔlemɔtsu lɛ maa

² David fã akɛ abua gbɔi fɛɛ ni yɔɔ Israel shikpɔŋ lɛ nɔ lɛ naa. Ejara nitsumɔi ehã amɛ. Tɛgbalɔi lɛ ehã amɛko tɛi ni akɛma Sɔlemɔtsu lɛ.

³ David hã nitsulɔi lɛ dade babaoo koni akɛfolɔ plɛkoobii kɛ klampii ahã agboi lɛ anaa shinai lɛ. Ehã amɛ akɔɔble hu babaoo ni anyɛɛɛ aŋmɛ.

⁴ Asaŋ ehe tsenedrutsei babaoo ni anyɛɛɛ akane ejaakɛ Sidonbii lɛ kɛ Tirobii lɛ baha Maŋtsɛ David tsenedru tsei babaoo diɛŋtsɛ.

⁵ David kɛɛ ehe akɛ, “Mibi Solomon hiɛ fãko, asaŋ ehiɛ esako, ni tsu ni ebaama eha Yehowa lɛ, esa akɛ efee tsu kpeteŋkple diɛŋtsɛ bɔ ni ehenɔ kɛ enyam bɛ shikpɔŋ lɛ nɔ he ko he ko. No hewɔ lɛ, mato tsu lɛ maa he nibii mashwie shi mato lɛ.” No hewɔ lɛ, David to tsu lɛ he nibii babaoo diɛŋtsɛ eto dani egbo.

⁶ Kɛkɛ ni David tsu atsɛ ebi Solomon ahã lɛ, ni efã lɛ akɛ ema tsu eha Yehowa, Israel Nyɔŋmɔ lɛ.

⁷ Ekɛɛ Solomon, ebi lɛ, akɛ, “Kulɛ mito miyiŋ akɛ mama tsu koni mikɛwo Yehowa, miNyɔŋmɔ lɛ, gbɛi hiɛ nyam.

⁸ Shi Yehowa kɛɛ mi akɛ, ‘Oshwie lá shi tsɔ̃, ni owuwuu tai wuji. Kaama tsu ni okɛmiiwo migbɛi lɛ hiɛ nyam ejaakɛ oshwie lá shi babaoo yɛ mihiɛ yɛ shikpɔŋ lɛ nɔ tsɔ̃.

⁹ Naa, obaafɔ binuu ko. Toiŋjɔlɛ baaba yɛ eyinɔ, ejaakɛ maha ehenyɛlɔi fɛɛ ni bɔle lɛ lɛ ahã ena toiŋjɔlɛ. Abaatsɛ lɛ Solomon, ni mahã Israel ana toiŋjɔlɛ yɛ eyinɔ.

¹⁰ Lɛ ji mɔ ni baama shihilɛhe kɛwo migbɛi lɛ hiɛ nyam lɛ. Ebaatsɔ̃ mibi, ni matsɔ̃ etsɛ; ni maha emaŋtsɛyeli ahe shi yɛ Israel kɛya naanɔ.’ ”

¹¹ “No hewɔ lɛ, mibi, Yehowa ajɔɔ bo koni onyɛ shihilɛhe lɛ oma oha Yehowa, oNyɔŋmɔ lɛ, bɔ ni ekɛɛ yɛ ohe lɛ.

¹² Yehowa aduro bo nilee kɛ jwɛŋmɔ kɛkɛ, bɔ ni afee ni kɛji etu Israel ewo odɛ̃ŋ lɛ, onyɛ maŋ lɛ nɔ okwɛ yɛ Yehowa, oNyɔŋmɔ lɛ, mla naa.

¹³ Kɛji ojwɛŋ nɔ ni oye akpɔi kɛ mlai ni Yehowa tsɔ̃ Mose nɔ ewo Israel lɛ anɔ lɛ, no lɛ oooshwere. Ohe awa, ni ofee ekãa. Okashe gbeyei, ni otsui akafã hu.

¹⁴ Naa, migbo deŋme misaa nibii nɛɛ mito miha Yehowa Shihilɛhe lɛ maa: shika ŋmiiŋmi ni tsiimɔ ji talentai akpei oha, kɛ jwiɛtɛi hu ni tsiimɔ ji talentai akpe toi akpe, kɛ akɔɔble kɛ dade ni anyɛɛɛ aŋmɛ tete, ejaakɛ amɛfa fe nine; tsei kɛ tɛi hu yɛ. Shi obaatao nibii nɛɛ eko ogbe yi.

¹⁵ Oyɛ ŋaalɔi hu babaoo: tɛgbalɔi kɛ tsu tswalɔi kɛ kapintafoi kɛ ŋaalɔi krokomɛi babaoo ni anyɛɛɛ akane,

¹⁶ ni ji shika ŋmiiŋmi kɛ jwiɛtɛi kɛ akɔɔble kɛ dade. Tee shi ni owo nitsumɔ lɛ nɔ! Yehowa aaaye abua bo!”

¹⁷ Kɛkɛ ni David wo Israel lumɛi fɛɛ kitã akɛ amɛye amɛbua ebi Solomon.

¹⁸ Ekɛɛ amɛ akɛ, “Yehowa, nyɛNyɔŋmɔ lɛ, kɛ nyɛ yɛ, ni eha nyɛtoiŋ ejɔ nyɛ yɛ he fɛɛ he, ejaakɛ ehã miye majimaji lɛ fɛɛ anɔ bii anɔ kunim, ni no hewɔ lɛ, amɛyɛ nyɛshishi.

¹⁹ No hewɔ lɛ, agbɛnɛ nyɛkɛ nyɛtsuii kɛ nyɛnyɛmɔ fɛɛ asɔmɔa Yehowa. Nyɛtea shi ni nyɛmaa Yehowa Nyɔŋmɔ lɛ Sɔlemɔ we lɛ koni akɛ Yehowa Kpãŋmɔ Adeka lɛ kɛ tsɛnsii kɛ nibii krɔŋkrɔŋi ni akɛjaa lɛ lɛ fɛɛ abamamɔ tsu ni ama ni aja Yehowa yɛ jɛi lɛ mli.”