1 Kronika 21 - ŊMALƐ KRƆŊKRƆŊ LƐ

David hã akane maŋbii ayikulɛ

¹ Yɛ mli aahu lɛ, satan te shi ewo Israel, ni ewo David yiŋ akɛ ekane Israel yikulɛ.

² Kɛkɛ ni David kɛɛ Yoab kɛ tabilɔinukpai lɛ akɛ, “Nyɛyaa nyɛyakanea Israel maŋ muu fɛɛ, kɛjɛa Beersheba kɛyashia Dan nyɛhãa mi ni nyɛbakɛa mi koni male maŋbii lɛ ayikulɛ.”

³ Shi Yoab kɛɛ David akɛ, “Yehowa ahã bɔ ni maŋ lɛ yifalɛ yɔɔ amrɔ nɛɛ lɛ aku abɔ he toi oha! Shi minuŋtsɔ Maŋtsɛ, kwɛ jeee mikɛɛ bekɛ otsuji ji amɛ fɛɛ? Mɛɛba mɔ ni minuŋtsɔ taoɔ akɛ afee nɛkɛ nɔ ko ni baahã Israel fɛɛ atɔ̃ nɛɛ?”

⁴ Shi Maŋtsɛ David eŋɔɔɔ nɔ ehãaa Yoab. No hewɔ lɛ, Yoab yiŋ etee, ni eyakpa Israel fɛɛ, ni eku esɛɛ eba Yerusalɛm,

⁵ ni ekɛ maŋbii lɛ ayibɔ lɛ bahã David. Ana hii ni eshɛ tayaa akpe toi akpe kɛ akpei oha yɛ Israel; ni ana hii ni eshɛ tayaa akpei ohai ejwɛ kɛ nyɔŋmai kpawo yɛ Yuda.

⁶ Shi Yoab kaneee Levibii lɛ kɛ Benyaminbii lɛ eshiii nɔ, ejaakɛ nɔ ni Maŋtsɛ David ehã afee lɛ eŋɔɔɔ enaa.

⁷ Nɔ ni afee lɛ eŋɔɔɔ Nyɔŋmɔ naa, ni no hewɔ lɛ, egbala Israel toi.

⁸ Kɛkɛ ni David kɛɛ Nyɔŋmɔ akɛ, “Mitɔ̃ tɔ̃mɔ kpele kɛ nii nɛɛ ni mifee lɛ. No hewɔ lɛ, miikpa bo fai ni okɛ tɔ̃mɔ lɛ afa mi, ejaakɛ miye kwashiai asane naakpa.”

⁹ Yehowa kɛɛ Gad ni ji gbalɔ ni yɔɔ David he lɛ akɛ,

¹⁰ “Yaa ni oyakɛɛ David akɛ, mi Yehowa, mikɛ nibii etɛ̃ miishwie ehiɛ; ekɔ amɛmli ekome, ni mafee mahã lɛ.”

¹¹ No hewɔ lɛ, Gad ba David ŋɔɔ ni ebakɛɛ lɛ akɛ, “Bɔ ni Yehowa kɛɛ nɛ. Okɔ amɛmli nɔ ni osumɔɔ:

¹² Kɛji hɔmɔ afii etɛ̃ ni jio, loo akɛ ohenyɛlɔi baanyiɛ osɛɛ, ni obaajo amɛnaa foi nyɔji etɛ̃ ni jio, loo akɛ Yehowa baawo etsi nɔ gbii etɛ̃ yɛ Israel nɔ, ni ehã gbele hela aba shikpɔŋ lɛ nɔ gbii etɛ̃ koni Yehowa bɔfo lɛ akpãtã mɛi ahiɛ yɛ Israel shikpɔŋ tso muu lɛ fɛɛ nɔ ni jio. No hewɔ lɛ, feemɔ oyiŋ, ni ohã mi hetoo mikɛyahã mɔ ni tsu mi lɛ.”

¹³ David to he eha Gad akɛ, “Sane lɛ wa hã mi naakpa. Shi fɛɛ sɛɛ lɛ misumɔŋ ni mayaje gbɔmɔ adesã dɛŋ. Miyɛ Yehowa dɛŋ, ejaakɛ lɛ lɛ emɔbɔnalɛ fa.”

¹⁴ No hewɔ lɛ, Yehowa hã gbele hela ba shikpɔŋ lɛ nɔ, ni Israelbii ateŋ mɛi akpei nyɔŋmai kpawo gboi.

¹⁵ Ni Nyɔŋmɔ tsu bɔfo kɛba koni ebafite Yerusalɛm. Shi be ni bɔfo lɛ baabɔ̃i nifitemɔ lɛ, Yehowa musuŋ tsɔ̃ lɛ yɛ efɔŋ ni abaafee maŋ lɛ hewɔ, kɛkɛ ni ekɛɛ bɔfo ni kpãtãa nii ahiɛ lɛ akɛ, “Efa, agbɛnɛ suu onine.” Be nɛɛ mli lɛ Yehowa bɔfo lɛ damɔ Ornan, Yebusnyo lɛ, ŋmãagbeemɔhe lɛ masɛi.

¹⁶ David yaawo ehiɛ nɔ lɛ naa Yehowa bɔfo lɛ damɔ ŋwɛi kɛ shikpɔŋ teŋ, ni klante hiɛ edɛŋ, ni ekpã enine mli yɛ Yerusalɛm nɔ. Kɛkɛ ni David kɛ maŋ onukpai ni ekɛ amɛ bumɔ kpekpe lɛ kɛ amɛhiɛ bu shi.

¹⁷ Ni David kɛɛ Nyɔŋmɔ akɛ, “Ataa, mi mifã akɛ ayakane maŋbii lɛ. Mi ji mɔ ni etɔ̃ ni efee efɔŋ naakpa lɛ, shi jeee maŋbii nɛɛ; amɛleee he eko, ni amɛhe bɛ mli. No hewɔ lɛ, Yehowa, miNyɔŋmɔ, toigbalamɔ lɛ kɛgbala mi kɛ mitsɛwe lɛ toi koni omaŋbii lɛ aye amɛhe.”

¹⁸ Kɛkɛ ni Yehowa bɔfo lɛ kɛɛ Gad akɛ ekɛɛ David akɛ eya koni eyama afɔleshãa latɛ ema he ni Ornan, Yebusnyo lɛ, ŋmãagbeemɔhe lɛ yɔɔ lɛ ehã Yehowa.

¹⁹ No hewɔ lɛ, David yiŋ etee yɛ Yehowa fãmɔ ni ekɛtsɔ̃ Gad nɔ lɛ naa.

²⁰ Ornan kɛ ebihii ejwɛ lɛ miigbee ŋmãa yɛ ŋmãagbeemɔhe lɛ. Be ni Ornan fo ehe ni ehiɛ gba bɔfo lɛ nɔ lɛ, ebihii lɛ yatee.

²¹ David miiba Ornan ŋɔɔ, ni Ornan fo ehe ni ena David. No hewɔ lɛ, eje kpo yɛ ŋmãagbeemɔhe lɛ ni ekoto David, ni ekɛ ehiɛ bu shi.

²² Ni David kɛɛ Ornan akɛ, “Okɛ oŋmãagbeemɔhe nɛɛ ahã mi mahe, koni mama afɔleshãa latɛ yɛ jɛi maha Yehowa, bɔ ni afee ni afo gbele hela lɛ sɛɛ ahã wɔ. Mibawo bo nyɔmɔ shishiishi.”

²³ Ornan kɛɛ David akɛ, “Minuŋtsɔ Maŋtsɛ, ŋɔɔ ni ofee nɔ ni sa ohiɛ. Naa, mikɛ tsinai lɛ miihã koni akɛshã afɔlei lɛ, ni mikɛ ŋmãagbeemɔhe tsei lɛ hu miiha koni akɛfee lai; ni naa ŋmãa hu koni akɛfee niyenii afɔle. Mikɛ fɛɛ miike!”

²⁴ Shi Maŋtsɛ David here Ornan nɔ akɛ, “Dabida! Mahe mawo nyɔmɔ bɔ ni ji enaa pɛpɛɛpɛ. Miŋɔŋ nii ni ji onɔ mihaŋ Yehowa, ni asaŋ mikɛ nɔ ko ni mina lɛ yaka hu eshaŋ afɔle.”

²⁵ No hewɔ lɛ, David wo Ornan ŋmãagbeemɔhe shikpɔŋ lɛ he nyɔmɔ ni naa feɔ shika ŋmiiŋmi shekeli ohai ekpaa, ni ehe jɛi.

²⁶ Kɛkɛ ni David ma afɔleshãa latɛ yɛ ŋmãagbeemɔhe lɛ. Be ni ekɛ shãa afɔlei kɛ shidaa afɔlei eba sɛɛ lɛ, esɔle etsɛ Yehowa, ni Yehowa here David nɔ, ni ehã la jɛ ŋwɛi ba, ni ebasɔo afɔlei lɛ anaa la yɛ afɔleshãa latɛ lɛ nɔ.

²⁷ Kɛkɛ ni Yehowa fã bɔfo lɛ, ni ekɛ klante lɛ wo ehebo lɛ mli.

²⁸ David na nakai ŋmɛlɛtswaa lɛ mli akɛ Yehowa ehere lɛ nɔ, ni no hewɔ lɛ, eshã afɔlei yɛ Ornan, Yebusnyo lɛ, ŋmãagbeemɔhe lɛ.

²⁹ No mli lɛ Gibeon ji he ni Yehowa Kpee Buu Krɔŋkrɔŋ ni Mose fee yɛ shiaŋa lɛ nɔ lɛ kɛ afɔleshãa latɛ lɛ yɔɔ, ni jɛi ayajaa yɛ.

³⁰ David nyɛɛɛ jɛi eya koni eyabi Nyɔŋmɔ nii ejaakɛ ŋmiŋmi emɔ lɛ yɛ Yehowa bɔfo lɛ klante lɛ hewɔ.