1 Kronika 20 - ŊMALƐ KRƆŊKRƆŊ LƐ

David yaŋɔ Raba maŋ lɛ

¹ Sane nɛɛ sɛɛ afi, be mli ni maŋtsɛmɛi fãa ta lɛ, Yoab ŋɔ Israel ta lɛ ni efã ta ewo Amonbii lɛ, ni ekpãtã amɛshikpɔŋ lɛ hiɛ. Shi Maŋtsɛ David hi shi yɛ sɛɛ yɛ Yerusalɛm. Yoab yagba ta kɛbɔle Raba maŋ lɛ, kɛkɛ ni etua maŋ lɛ, ni eye maŋ lɛ nɔ kunim.

² Maŋtsɛ shika fai ko yɛ ni akɛbuɔ Amonbii anyɔŋmɔ Molek lɛ shiu lɛ yitso. Maŋtsɛ fai nɛɛ tsiimɔ ji shika ŋmiiŋmi talenta kome, ni ojarawatɛ ko yɛ maŋtsɛ fai lɛ he. David jie ojarawatɛ nɛɛ ni ekɛwo lɛ diɛŋtsɛ emaŋtsɛ fai lɛ he. No sɛɛ lɛ, David loo Raba maŋ lɛ nibii babaoo diɛŋtsɛ kɛtee.

³ Asaŋ ekpala maŋbii lɛ kɛtee, ni ehã amɛ nitsumɔ ni amɛtsu amɛhã lɛ kɛ saalai kɛ kɔi kɛ lema lɛ. Bɔ ni David fee Amonbii amaji lɛ fɛɛ nɛ. Kɛkɛ ni David kɛ etabilɔi lɛ ku amɛsɛɛ kɛba Yerusalɛm.

Tai ni David kɛ Filistibii gojogojoo lɛ wu

⁴ Fee sɛɛ lɛ ta te shi ekoŋŋ yɛ Gezer yɛ Israelbii lɛ kɛ Filistibii lɛ ateŋ. Sibekai, Hushanyo lɛ, gbe Sipai ni ji hii oblaŋi gojogojoo lɛ ashwiei lɛ ateŋ mɔ kome yɛ ta nɛɛ mli, ni ekɛjɔɔ Filistibii lɛ ahe.

⁵ Ta te shi ekoŋŋ yɛ Israelbii lɛ kɛ Filistibii lɛ ateŋ; ni Elhanan, ni ji Yair bi lɛ, gbe Lahemi ni enyɛmi ji Goliat, Gatnyo lɛ ni ekpɔlɔ tso tilɛ tamɔ mamalolɔ agba tso tilɛ lɛ.

⁶ Awu ta ekoŋŋ yɛ Gat. Nuu nyɛnyereŋŋ ko kɛ ewaabii nyɔŋmai enyɔ kɛ ejwɛ, enine waobii ekpaaekpaa kɛ enane waobii hu ekpaaekpaa, ba ta lɛ. Hii oblaŋi gojogojoo lɛ ashwiei lɛ eko ji lɛ.

⁷ Gbɔmɔ nɛɛ tswa Israelbii lɛ mpoa. Kɛkɛ ni Yonatan, ni ji David nyɛmi Shimea bi lɛ, tswa nuu lɛ nɔ ni egbe lɛ.

⁸ Hii oblaŋi gojogojoo ni hi shi yɛ Gat lɛ ashwiei ji gbɔmɛi nɛɛ, ni amɛnyɔnyɔi yɛ David kɛ etsuji lɛ anine naa.