1 Kronika 18 - ŊMALƐ KRƆŊKRƆŊ LƐ

Tai amli kunim ni David ye

¹ Enɛ sɛɛ lɛ David kɛ Filistibii lɛ wu, ni eye amɛnɔ kunim, ni eshɔ̃ Gat maŋ lɛ kɛ akrowai ni bɔle lɛ lɛ yɛ Filistibii lɛ adɛŋ.

² No sɛɛ lɛ, David ye Moabbii lɛ hu anɔ kunim, ni amɛtsɔ̃mɔ etsuji, ni amɛtsuɔ onia amɛbahãa lɛ.

³ Asaŋ David fã ta ewo Siria Zoba Maŋtsɛ Hadadezer hu, ni eye enɔ kunim kɛyashwie Hamat tɔ̃ɔ, ejaakɛ Hadadezer nɛɛ fã kɛtee akɛ eyaaŋɔ Eufrate Faa lɛ he shikpɔŋ lɛ ekɛwo eshishi.

⁴ David shɔ̃ Maŋtsɛ Hadadezer tayaa shwiilii akpe, ni emɔmɔ tabilɔi okpɔŋɔnɔtalɔi akpei kpawo kɛ nanenɔnyiɛlɔi akpei nyɔŋmai enyɔ. David folɔ shwiili naa okpɔŋɔi lɛ fɛɛ anaji asɛɛ fãi; shi eshi amɛteŋ bɔ ni baahia ahã shwiilii oha.

⁵ Kɛkɛ ni Siriabii ni yɔɔ Damasko lɛ fã kɛba koni amɛbawa Zoba Maŋtsɛ Hadadezer yɛ ta lɛ mli, shi David gbe Siriabii lɛ ateŋ gbɔmɛi akpei nyɔŋmai enyɔ kɛ enyɔ.

⁶ Kɛkɛ ni David jara asraafoi kuikui eto Siriabii ashikpɔŋ lɛ nɔ yɛ Damasko, ni Siriabii lɛ tsɔ̃ David tsuji, ni amɛtsuɔ onia amɛbahãa David. Yehowa hã David ye kunim yɛ he fɛɛ he ni etsɔ̃.

⁷ David shɔ̃shɔ̃ɔ shika tsɛŋi ni Hadadezer tsuji lɛ hiɛhiɛ lɛ, ni ekɛba Yerusalɛm.

⁸ David loo akɔɔble babaoo hu diɛŋtsɛ yɛ Tibehat kɛ Kun, ni ji maji ni yɔɔ Hadadezer shishi lɛ, ni ekɛtee. Solomon kɛ akɔɔble nɛɛ fee Sɔlemɔ we nutoo gbudugbaŋ kpeteŋkple lɛ kɛ akulashiŋi lɛ kɛ tsɛnsii krokomɛi.

⁹ Be ni Hamat Maŋtsɛ Tou nu akɛ David eye Hadadezer ta tso muu lɛ fɛɛ nɔ kunim lɛ,

¹⁰ etsu ebinuu Yoram lɛ Maŋtsɛ David ŋɔɔ koni ebaŋa lɛ, ni ehã lɛ aekoo ehã lɛ, yɛ Hadadezer nɔ kunim ni eye lɛ hewɔ, ejaakɛ Hadadezer kɛ Tou kɛ amɛhe ewuwuu tai saŋŋ. Yoram hiɛ shika nibii kɛ jwiɛtɛi nibii kɛ akɔɔble nibii srɔtoi babaoo kɛba ekɛbake maŋtsɛ David.

¹¹ Maŋtsɛ David jɔɔ nibii nɛɛ anɔ eke Yehowa, ni ekɛfata jwiɛtɛi kɛ shika ni eloo momo sa yɛ majimaji fɛɛ ni eye amɛnɔ kunim lɛ amli kɛba lɛ he. Maji nɛɛ ji Edom kɛ Moab kɛ Amon kɛ Filistia kɛ Amalek.

¹² Abishai ni atsɛɔ enyɛ Zeruia lɛ, gbe Edombii akpei nyɔŋma kɛ kpaanyɔ yɛ Ŋoo Jɔɔ lɛ mli.

¹³ Nii nɛɛ sɛɛ lɛ Abishai jara asraafoi kuikui eto Edom shikpɔŋ lɛ nɔ, ni Edombii fɛɛ tsɔ̃ David tsuji. He fɛɛ he ni David tsɔ̃ lɛ Yehowa hã eye kunim.

¹⁴ David ye Israel fɛɛ nɔ maŋtsɛ, ni eye jalɛ sane ehã mɔ fɛɛ mɔ.

¹⁵ Yoab, ni atsɛɔ enyɛ Zeruia lɛ, ji etatsɛnukpa fe fɛɛ; ni Yehoshafat, Ahilud bi lɛ, ji maŋtsɛ tuuŋtu woloŋmalɔ;

¹⁶ ni Zadok, Ahitub bi lɛ, kɛ Ahimelek, Abiatar bi lɛ, amɛ ji osɔfoi; ni Shawesha ji woloŋmalɔ.

¹⁷ Benaia, Yehoiada bi lɛ, ji tabilɔi ni yɔɔ Maŋtsɛ David he kpaakpa lɛ atsɛ, ni David bihii lɛ ji maŋtsɛ sɔ̃ɔlɔi lɛ ateŋ onukpai.