1 Kronika 17 - ŊMALƐ KRƆŊKRƆŊ LƐ

Natan kɛ David bawie

¹ Maŋtsɛ David tsu atsɛ gbalɔ Natan ahã lɛ yɛ emaŋtsɛ mɔɔ lɛ mli, ni ekɛɛ Natan akɛ, “Bɛ oona, mi lɛ mina tsenedrutso tsu mli mikã be mli ni Yehowa Kpãŋmɔ Adeka lɛ moŋ yɛ buu mli.”

² Natan kɛɛ David akɛ, “Feemɔ nɔ ni kã otsui nɔ akɛ ofee lɛ, ejaakɛ Nyɔŋmɔ fi osɛɛ.”

³ Shi nakai gbi lɛ nɔŋŋ nyɔɔŋ lɛ Nyɔŋmɔ kɛɛ Natan akɛ,

⁴ “Yaa ni oyakɛɛ David akɛ, ‘Yehowa kɛɛ, jeee bo obaama tsu ohã mi koni mahi mli.

⁵ Ejaakɛ kɛjɛ beyinɔ ni miyakpala Israel kɛjɛ Ijipt kɛbashi ŋmɛnɛ gbi nɛɛ nɔ lɛ, mihiko tsu mli dã, fe akɛ buui amli mihi kɛjɛ he kome kɛtee he kroko.

⁶ Hei fɛɛ ni mi kɛ Israel fɛɛ enyiɛ lɛ, mibiko Israel maŋ hiɛnyiɛlɔi ni mifã amɛ akɛ amɛkura mimaŋ Israel lɛ ateŋ mɔ ko mɔ ko yɛ he ko he ko pɛŋ akɛ, mɛɛba ni nyɛmako tsenedrutsu nyɛhako mi?’

⁷ “No hewɔ lɛ, kɛɛmɔ mitsulɔ David akɛ, mi, Yehowa Taiatsɛ lɛ, miikɛɛ lɛ akɛ, ‘Mi miŋɔ bo yɛ toi asɛɛ yɛ ŋa nɔ, ni mifee bo mimaŋ Israel nɔyelɔ,

⁸ ni he fɛɛ he ni otee lɛ mifata ohe, ni miplenee ohenyɛlɔi fɛɛ yɛ ohiɛ, ni mihã ona gbɛi kpeteŋkple tamɔ gbɔmɛi wuji ni yɔɔ shikpɔŋ lɛ nɔ lɛ.

⁹ Asaŋ mito he ko mihã mimaŋ Israel koni amɛyahi jɛi akɛ amɛ diɛŋtsɛ amɛnɔ mli, he ni agbaŋ amɛnaa yɛ dɔŋŋ, ni basabasa gbɔmɛi haoŋ amɛ dɔŋŋ tamɔ sa lɛ,

¹⁰ be mli ni mito hiɛnyiɛlɔi koni amɛkura mimaŋ Israel lɛ. Maha ohenyɛlɔi lɛ fɛɛ ahe ajɔ, ni asaŋ miiwo bo shi akɛ mibahã oshwiei ahe shi.

¹¹ Ogbele sɛɛ lɛ matee mɔ ni jɛ omli shi akɛ maŋtsɛ, ni mahã emaŋtsɛyeli ama shi.

¹² Lɛ ji mɔ ni baama tsu ehã mi lɛ, ni mahã emaŋtsɛ sɛi lɛ ama shi shiŋŋ kɛya naanɔ.

¹³ Mibatsɔ̃ etsɛ, ni lɛ hu ebaatsɔ̃ mibi. Mifoŋ suɔmɔ ni mikɛbaasumɔ lɛ sɛɛ tamɔ mifo misuɔmɔ lɛ sɛɛ yɛ Saul, mɔ ni mikpa lɛ ni oba oyeɔ esɛɛ nɛɛ lɛ gbɛfaŋ.

¹⁴ Shi mahã ekura mimaŋ Israel, ni emaŋtsɛyeli lɛ baama shi shiŋŋ kɛaatee naanɔ.’ ”

¹⁵ Natan kɛɛ David nɔ fɛɛ nɔ ni ba yɛ ninaa lɛ mli lɛ pɛpɛɛpɛ.

David sɔle ekɛda Nyɔŋmɔ shi

¹⁶ Kɛkɛ ni Maŋtsɛ David tee Yehowa Kpee Buu lɛ mli, ni eyata shi ni esɔle ekɛɛ akɛ, “Yehowa, Nyɔŋmɔ, namɔ ji mi, ni mɛni po mli miwe yɔɔ hewɔ ni okura mi kɛbashi benɛ nɛɛ?

¹⁷ Kɛ̃lɛ enɛ jeee nɔ srɔto ko hã bo, Nyɔŋmɔ. Otsɔ̃ɔ wɔsɛɛ shɔŋŋ hu nibii ni baaba miwe lɛ nɔ, Yehowa, Nyɔŋmɔ; ni oobu mi tamɔ gbɔmɔ wulu ko.

¹⁸ Mɛni dɔŋŋ po yɔɔ minaa ni makɛɛ yɛ mihiɛ nyam ni owo nɛɛ hewɔ, ejaakɛ ole mi, otsulɔ momo.

¹⁹ Yehowa, gbɔmɔ he ni odɔɔ, kɛ bo diɛŋtsɛ osuɔmɔ naa ofee nibii nɛɛ fɛɛ koni ohã male nibii wuji ni oto ohã mi.

²⁰ Yehowa, yɛ nibii fɛɛ ni wɔnu naa lɛ, mɔ ko mɔ ko bɛ ni kɛ bo ye egbɔ, ni asaŋ osɛɛ lɛ mɔ ko bɛ ni ji nyɔŋmɔ ko.

²¹ Mɛɛ shikpɔŋ lɛ nɔ maŋ kɛ omaŋ Israel ye egbɔ akɛ maŋ ni Nyɔŋmɔ, oyakpɔ̃ yɛ nyɔŋyeli mli yɛ Ijipt ni ofee lɛ bo diɛŋtsɛ omaŋ koni okɛ nibii wuji ni yɔɔ gbeyei ni otsu ohã amɛ lɛ ahe gbɛi?

²² Ofee Israel bo diɛŋtsɛ omaŋ kɛmiiya naanɔ, ni bo, Yehowa, otsɔ̃ amɛNyɔŋmɔ.

²³ “No hewɔ lɛ, agbɛnɛ, Yehowa, hã shi ni owo yɛ mi, otsulɔ kɛ miwe lɛ, he lɛ aba mli bɔ ni okɛɛ lɛ shishiishi kɛya naanɔ;

²⁴ ni ogbɛi lɛ aaada kpeteŋkple, ni aaakɛɛ kɛya naanɔ akɛ, ‘Yehowa Taiatsɛ lɛ, lɛ ji Israel Nyɔŋmɔ lɛ.’ Ni ooohã miwe lɛ ahe shi shiŋŋ yɛ yinɔi fɛɛ mli.

²⁵ MiNyɔŋmɔ, mi otsulɔ, toi nɔ ni owo akɛ obaahã ewe lɛ atsɔ̃ maŋtsɛmɛi awe lɛ, no hewɔ ni mina ekãa kɛsɔleɔ nɛkɛ yɛ ohiɛ nɛɛ.

²⁶ Yehowa, bo nɔŋŋ ji Nyɔŋmɔ, ni okɛ nɛkɛ nɔ kpakpa nɛɛ ewo mi shi.

²⁷ No hewɔ lɛ, ofainɛ, ni ojɔɔ mishwiei koni amɛsane asa ohiɛ kɛya naanɔ, ejaakɛ mɔ ni bo, Yehowa, ojɔɔ lɛ lɛ, ajɔɔ lɛ kɛmiiya naanɔ.”