1 Kronika 15 - ŊMALƐ KRƆŊKRƆŊ LƐ

Asaa he ahã Kpãŋmɔ Adeka lɛ womɔ

¹ David mamɔ tsui yɛ David Maŋ lɛ mli ehã ehe, asaŋ esaa he ko hu, ni eshi bui yɛ jɛi ehã Nyɔŋmɔ Kpãŋmɔ Adeka lɛ.

² Kɛkɛ ni David kɛɛ akɛ, “Levibii lɛ pɛ ji mɛi ni baatere Nyɔŋmɔ Kpãŋmɔ Adeka lɛ ejaakɛ amɛ ji mɛi pɛ ni Yehowa ŋɔ̃ akɛ amɛ amɛta Yehowa Kpãŋmɔ Adeka lɛ he, asaŋ akɛ amɛsɔmɔ lɛ kɛya naanɔ.”

³ David kpee Israelbii fɛɛ, ni amɛnaa bakpe shi yɛ Yerusalɛm koni ayawo Yehowa Kpãŋmɔ Adeka lɛ kɛba he ni asaa ato lɛ lɛ.

⁴ Enɛ sɛɛ lɛ David kpee Aaron bii lɛ kɛ Levibii lɛ hu kɛba.

⁵ Uriel nyiɛ enyɛmimɛi ni ji Kohatbii oha kɛ nyɔŋmai enyɔ ahiɛ kɛba.

⁶ Asaia nyiɛ enyɛmimɛi Meraribii ohai enyɔ kɛ nyɔŋmai enyɔ ahiɛ kɛba;

⁷ Yoel nyiɛ enyɛmimɛi Gershonbii oha kɛ nyɔŋmai etɛ̃ ahiɛ kɛba;

⁸ Shemaia nyiɛ enyɛmimɛi Elizafanbii ohai enyɔ ahiɛ kɛba;

⁹ Eliel nyiɛ enyɛmimɛi Hebronbii nyɔŋmai kpaanyɔ ahiɛ kɛba;

¹⁰ ni Aminadab nyiɛ enyɛmimɛi Uzielbii oha kɛ nyɔŋma kɛ enyɔ ahiɛ kɛba.

¹¹ Kɛkɛ ni David tsɛ Osɔfo Abiatar kɛ Levibii lɛ ahiɛnyiɛlɔi ekpaa lɛ, ni ji Uriel kɛ Asaia kɛ Yoel kɛ Shemaia kɛ Eliel kɛ Aminadab,

¹² ni ekɛɛ amɛ akɛ, “Nyɛ nyɛ ji Levibii lɛ atsɛmɛi lɛ ashĩai lɛ amli onukpai, no hewɔ lɛ, nyɛ kɛ nyɛnyɛmimɛi Levibii lɛ fɛɛ, nyɛtsuua nyɛhe nyɛfea nyɛhe krɔŋkrɔŋ koni nyɛyawo Yehowa, Israel Nyɔŋmɔ lɛ, Kpãŋmɔ Adeka lɛ kɛba he ni misaa mito lɛ lɛ.

¹³ Akɛni tsutsu lɛ jeee nyɛ nyɛtere Kpãŋmɔ Adeka lɛ, ni jeee nakai ji ehe gbɛjianɔtoo lɛ, Yehowa, wɔNyɔŋmɔ lɛ mli fu wɔ.”

¹⁴ Kɛkɛ ni osɔfoi lɛ kɛ Levibii lɛ tsuu amɛhe amɛfee amɛhe krɔŋkrɔŋ koni amɛyawo Yehowa, Israel Nyɔŋmɔ lɛ, Kpãŋmɔ Adeka lɛ.

¹⁵ Levibii lɛ kɛ tsei bloblobii lɛ wo adeka lɛ amɛtswa amɛkɔŋ bɔ ni Yehowa ewo kitã yɛ he kɛtsɔ̃ Mose nɔ lɛ.

¹⁶ David fã Levibii lɛ anukpai lɛ akɛ amɛhala amɛnyɛmimɛi lɛ ateŋ jooshwɛlɔi lɛ ateŋ mɛi komɛi koni amɛla, kɛ mɛi komɛi hu koni amɛkɛ obentai kɛ saŋkui kɛ ŋmɛji ashwɛ joo kɛwo nifeemɔ lɛ he sɔlɛ.

¹⁷ No hewɔ lɛ, Levibii lɛ famɔ Heman, Yoel bi lɛ, kɛ ewekunyo Asaf, Berekia bi lɛ, kɛ Etan, Kushaia bi lɛ hu yɛ Meraribii lɛ ateŋ;

¹⁸ ni amɛfamɔ amɛnyɛmimɛi Levibii nɛɛ hu koni amɛwa amɛ. Gbɔmɛi nɛɛ ji Zakaria kɛ Yaaziel kɛ Shemiramot kɛ Yehiel kɛ Uri kɛ Eliab kɛ Benaia, kɛ Maaseia kɛ Matitia kɛ Elifelehu kɛ Mikneia kɛ agbonaabulɔi Obed-Edom kɛ Yeiel.

¹⁹ Afamɔ Heman kɛ Asaf kɛ Etan lalawolɔi lɛ akɛ amɛ amɛtswa akɔɔble ŋmɛji,

²⁰ ni Zakaria kɛ Aziel kɛ Shemiramot kɛ Yehiel kɛ Uni kɛ Eliab kɛ Maaseia kɛ Benaia atswa obentai kɛ amɛgbee ŋlɛ̃ŋlɛ̃;

²¹ ni Mititia kɛ Elifelehu kɛ Mikneia kɛ Obed-Edom kɛ Yeiel kɛ Azazia atswa saŋkui kɛ amɛgbee wulu lɛ.

²² Aŋɔ Kenania ni lɛ ji Levibii lɛ anukpa yɛ lala gbɛfaŋ lɛ akɛ ekwɛ joobilɔi lɛ kɛ lala lɛ nɔ; ejaakɛ ele no mli fe mɔ fɛɛ mɔ;

²³ ni afãmɔ Berekia kɛ Elkana akɛ Kpãŋmɔ Adeka lɛ hebulɔi.

²⁴ Ahala Shebania kɛ Yoshafat kɛ Netanel kɛ Amasai kɛ Zakaria kɛ Benaia kɛ Eliezer, ni ji osɔfoi lɛ, koni amɛkpã tɛtɛrɛmantɛrɛ kɛnyiɛ Nyɔŋmɔ Kpãŋmɔ Adeka lɛ hiɛ. Aha Obed-Edom kɛ Yehia hu fata Kpãŋmɔ Adeka lɛ hebulɔi lɛ ahe.

Awo Kpãŋmɔ Adeka lɛ kɛtee Yerusalɛm

²⁵ Kɛkɛ ni Maŋtsɛ David kɛ Israel onukpai lɛ kɛ tabilɔi akpe kuikui anɔ asafoiatsɛmɛi lɛ yiŋ amɛtee koni amɛyawo Yehowa Kpãŋmɔ Adeka lɛ yɛ Obed-Edom we lɛ kɛba kɛ nyamɔ.

²⁶ Ni akɛni Nyɔŋmɔ ye bua Levibii ni tere Yehowa Kpãŋmɔ Adeka lɛ hewɔ lɛ, agbe tsina hii kpawo akɛshã afɔle.

²⁷ David wo klala kpakpa atade, ni no eko atade nɔŋŋ Levibii ni tere Yehowa Kpãŋmɔ Adeka lɛ kɛ joobilɔi lɛ kɛ Kenania, ni ji joobilɔi lɛ atsɛ lɛ, hu wowoo. David wo klala tsitsinɔhaanii hu.

²⁸ Israel muu fɛɛ wo Yehowa Kpãŋmɔ Adeka lɛ kɛba Yerusalɛm be mli ni aabɔ oshe hoo ni aakpã koŋ bɛji kɛ tɛtɛrɛmantɛrɛ, ni aatswia ŋmɛji kɛ saŋkui hu waa diɛŋtsɛ lɛ.

²⁹ Be ni Yehowa Kpãŋmɔ Adeka lɛ shɛ Yerusalɛm maŋ lɛ mli lɛ, Mikal, ni ji Saul biyoo lɛ, yabu samflɛ naa; ni be ni ena David ni eejo, ni eehuru lɛ David he fee lɛ hiɛgbele.