1 Kronika 14 - ŊMALƐ KRƆŊKRƆŊ LƐ

Nibii ni David fee yɛ Yerusalɛm

¹ Maŋtsɛ Hiram, Tiro maŋtsɛ, wo kapintafoi kɛ gbogbotswalɔi agbɛ, ni amɛkɛ tsenedrutsei ba koni amɛbama maŋtsɛ we amɛhã David.

² Enɛ hã David na akɛ Yehowa ehã ehe shi akɛ Israel fɛɛ maŋtsɛ lɛɛlɛŋ, ni asaŋ Yehowa ewo emaŋtsɛyeli lɛ nɔ gojoo yɛ Yehowa maŋ Israel.

³ David ŋɔŋɔɔ yei hei efata eŋãmɛi lɛ ahe yɛ Yerusalɛm, ni David fɔ bihii kɛ biyei efata ebii lɛ ahe.

⁴ Bii ni David fɔ yɛ Yerusalɛm lɛ ji Shamua kɛ Shobab kɛ Natan kɛ Solomon;

⁵ kɛ Ibhar kɛ Elishua kɛ Elpelet.

⁶ Mɛi komɛi hu ji Noga kɛ Nefeg kɛ Yafia,

⁷ kɛ Elishama kɛ Beeliada kɛ Elifelet.

David ye Filistibii lɛ anɔ kunim

⁸ Be ni Filistibii lɛ nu akɛ afɔ David mu awo lɛ Israel muu lɛ fɛɛ maŋtsɛ lɛ, amɛfã ta kɛba akɛ amɛmiiba amɛbatua David. Be ni David nu lɛ, efã ni ekɛ Filistibii lɛ yakpe.

⁹ Filistibii lɛ baye ofɔ̃ yɛ Refaim Jɔɔ lɛ mli.

¹⁰ Kɛkɛ ni David tee ni eyabi Nyɔŋmɔ nii akɛ, “Mifã ta kɛyanina Filistibii lɛ lo? Ooohã maye amɛnɔ kunim lo?” Yehowa here David nɔ akɛ, “Fãa ta lɛ kɛyanina amɛ ni mahã oye amɛnɔ kunim.”

¹¹ No hewɔ lɛ, David fã ta kɛyanina Filistibii lɛ yɛ Baal-Perazim, ni eye amɛnɔ kunim yɛ jɛi. Ni David kɛɛ akɛ, “Yehowa etsɔ̃ minine nɔ egba kɛtsɔ̃ mihenyɛlɔi lɛ ateŋ tamɔ nu ni eyi kɛsram nɔ.” No hewɔ lɛ, atsɛ jɛi akɛ Baal-Perazim.

¹² Filistibii lɛ shi amɛmãgãi lɛ yɛ jɛi ni amɛjo foi, ni David fã, ni ashã amãgãi lɛ.

¹³ Shi Filistibii lɛ fã ta kɛba ekoŋŋ, ni amɛbagba ta yɛ Refaim Jɔɔ lɛ mli.

¹⁴ David bi Nyɔŋmɔ nii ekoŋŋ, ni Nyɔŋmɔ kɛɛ lɛ akɛ, “Kaafã ta kɛyatua amɛ kɛjɛ biɛ; shi moŋ lɔgɔmɔ amɛ kɛyaje amɛsɛɛgbɛ koni ojɛ Balsam tsei lɛ aŋlɛnɔ obatua amɛ.

¹⁵ Kɛ onu gbɛɛmɔ yɛ Balsam tsei lɛ ayiteŋ tamɔ naneshigbɛɛmɔ pɛ koni ofã kɛyashwie amɛnɔ, ejaakɛ no tsɔ̃ɔ akɛ Nyɔŋmɔ eyi ohiɛ kɛmiiya ayatswia Filistibii ata lɛ nii.”

¹⁶ David fee bɔ ni Nyɔŋmɔ fã lɛ lɛ, ni Israelbii lɛ gbe Filistibii lɛ kɛjɛ Gibeon aahu kɛyashwie Gezer.

¹⁷ Ni David gbɛi hehe kɛtee shikpɔŋ lɛ nɔ hei fɛɛ; ni Yehowa hã David he ŋmiŋmi mɔmɔ maji lɛ fɛɛ.