1 Kronika 13 - ŊMALƐ KRƆŊKRƆŊ LƐ

Awo Kpãŋmɔ Adeka lɛ kɛshi Kiriat-Yearim

¹ Kɛkɛ ni David kɛ tabilɔi akpe akuikui anɔ asafoiatsɛmɛi lɛ kɛ tabilɔi oha kui anɔ asafoiatsɛmɛi lɛ, kɛ lumɛi lɛ fɛɛ tee ajina.

² No sɛɛ lɛ, David kɛɛ Israel gwabɔɔ muu lɛ akɛ, “Kɛji esa nyɛhiɛ, ni Yehowa wɔNyɔŋmɔ lɛ suɔmɔ naa ni lɛ, no lɛ nyɛhãa wɔtsua kɛya wɔnyɛmimɛi ni eshwɛ yɛ Israel shikpɔji lɛ anɔ he fɛɛ he lɛ aŋɔɔ, kɛ osɔfoi lɛ kɛ Levibii ni kɛ amɛyɔɔ yɛ amɛmaji kɛ amɛhe shikpɔji lɛ anɔ lɛ hu aŋɔɔ, akɛ: amɛbua amɛhe naa kɛbashi wɔnɔ,

³ koni wɔya wɔyawo wɔNyɔŋmɔ lɛ Kpãŋmɔ Adeka lɛ ni Saul yinɔ lɛ wɔshi lɛ sɛɛ lɛ.”

⁴ Gwabɔɔ muu lɛ fɛɛ kpɛlɛ̃ nɔ akɛ afee nakai ejaakɛ sane lɛ sa amɛhiɛ.

⁵ No hewɔ lɛ, David bua Israel muu lɛ fɛɛ naa kɛbakpe, kɛjɛ Ijipt husu lɛ naa, yɛ wuoyigbɛ, aahu kɛyashwie he ni atsɔ̃ɔ kɛyaa Lebo-Hamat lɛ, yɛ kooyigbɛ, koni ayawo Kpãŋmɔ Adeka lɛ yɛ Kiriat-Yearim kɛya Yerusalɛm.

⁶ Kɛkɛ ni David kɛ Israel muu lɛ fɛɛ yiŋ kɛtee Baala maŋ lɛ mli ni ji Kiriat-Yearim yɛ Yuda shikpɔŋ lɛ nɔ, koni amɛyawo Nyɔŋmɔ Kpãŋmɔ Adeka lɛ ni akɛ Yehowa, mɔ ni elumɔyeli sɛ̃i lɛ ma kerubim lɛ anɔ lɛ, gbɛi ewo lɛ lɛ yɛ jɛi kɛba.

⁷ Amɛyawo Nyɔŋmɔ Kpãŋmɔ Adeka lɛ yɛ Abinadab we lɛ, ni amɛkɛma shwiili hee ko nɔ, ni Uza kɛ Ahio ji mɛi ni kudɔ shwiili nɛɛ.

⁸ Ni David kɛ Israel muu fɛɛ nya kɛ amɛnyɛmɔ fɛɛ kɛ lalai kɛ saŋkui kɛ bɛji kɛ miji kɛ ŋmɛji kɛ tɛtɛrɛmantɛrɛi amɛkɛwo Nyɔŋmɔ hiɛ nyam.

⁹ Be ni amɛshɛ Kidon ŋmãagbeemɔhe lɛ, tsinai lɛ tɛ ni eha Kpãŋmɔ Adeka lɛ kpa kɛyaagbee shi. No hewɔ lɛ, Uza kpã enine mli ni emɔ Kpãŋmɔ Adeka lɛ mli.

¹⁰ Yehowa mli fu Uza akɛ ekpã enine mli emɔ Kpãŋmɔ Adeka lɛ mli, ni Yehowa tswa Uza nɔ, ni egbo yɛ enajiaŋ yɛ Kpãŋmɔ Adeka lɛ masɛi.

¹¹ Sane lɛ dɔ David akɛ Yehowa kɛ Uza ye kɛ joomɔ nakai. Atsɛɔ he ni sane lɛ ba yɛ lɛ akɛ Perez-Uza kɛbashi ŋmɛnɛ.

¹² David she Nyɔŋmɔ gbeyei nakai gbi lɛ, ni ekɛɛ akɛ, “Te mafee tɛŋŋ mato Nyɔŋmɔ Kpãŋmɔ Adeka lɛ hu?”

¹³ Enɛ hewɔ lɛ, David hãaa akɛ Kpãŋmɔ Adeka lɛ aya Yerusalɛm maŋ lɛ mli; shi moŋ eha awo Adeka lɛ kɛtsɔ̃ afã kɛtee Obed-Edom, Gitnyo lɛ, we lɛ mli.

¹⁴ Nyɔŋmɔ Kpãŋmɔ Adeka lɛ hi Obed-Edom bii lɛ aŋɔɔ yɛ eshĩa lɛ mli nyɔji etɛ̃; ni Yehowa jɔɔ Obed-Edom we lɛ kɛ nɔ fɛɛ nɔ ni eyɔɔ.