1 Kronika 12 - ŊMALƐ KRƆŊKRƆŊ LƐ

Benyaminbii ni yafata David he tsutsu

¹ Be ni David yɔɔ Ziklag he ni eyatee ehe yɛ yɛ Saul, Kish bi lɛ, hewɔ lɛ, hii tabilɔi komɛi tee ni amɛyafata David he. Hii nɛɛ shi tabilɔi kakabãi ni wa David yɛ ta mli lɛ anɔ. Gbɔmɛi nɛɛ jɛ Benyamin akutso lɛ mli he ni David hu jɛ lɛ.

² Amɛhe esa bɔ ni amɛkɛ ninejurɔ kɛ abɛku fɛɛ tsɛ̃ɔ gãi, ni amɛkɛtswaa aklomia hu.

³ Amɛnukpai ni kɛ amɛ ba ji Ahiezer, kɛ enyɛmi Yoash, ni ji Shemaa ni jɛ Gibea lɛ bihii lɛ. Mɛi ni shi amɛnɔ lɛ ji Yeziel kɛ Pelet ni ji Azmavetbii; kɛ Beraka kɛ Yehu ni jɛ Anatot;

⁴ kɛ Ishmaia ni jɛ Gibeon, nuu kãkãlɔ kpanaa ni eshi kãkãlɔi nyɔŋmai etɛ̃ lɛ anɔ akɛ amɛnukpai lɛ eko lɛ, kɛ Yeremia kɛ Yahaziel kɛ Yohanan kɛ Yozabad ni amɛjɛ Gedera lɛ.

⁵ Fãbii hu ji Eluzai kɛ Yerimot kɛ Bealia kɛ Shemaria kɛ Shefatia ni jɛ Harof lɛ,

⁶ kɛ Elkana kɛ Ishia kɛ Azareel kɛ Yoezer kɛ Yashobeam, Korabii lɛ,

⁷ kɛ Yoela kɛ Zebadia, Yeroham ni jɛ Gedor lɛ bii lɛ.

Gadbii ni yafata David he

⁸ Gadbii lɛ ateŋ hii tabilɔi kãkãlɔi komɛi tse amɛhe kɛtee amɛyafata mɛi ni nyiɛ David sɛɛ lɛ tabilɔi lɛ ahe be mli ni David yɔɔ shiaŋa lɛ nɔ mɔɔ lɛ mli lɛ. Hii nɛɛ ahe esa kɛ tsɛŋ kɛ akplɔ kɛ nɔmɔ, ni amɛhiɛ yɛ kramakrama tamɔ jata hiɛ, ni amɛhe yɛ oya tamɔ gɔji anɔ soŋai.

⁹ Amɛnukpa ni kɛ amɛba ji Ezer; esɛɛmɔ ji Obadia; ni mɔ ni ji etɛ̃ lɛ ji Eliab.

¹⁰ Mɔ ni ji ejwɛ lɛ ji Mishmana, ni mɔ ni ji enumɔ lɛ ji Yeremia;

¹¹ mɔ ni ji ekpaa lɛ ji Atai; mɔ ni ji kpawo lɛ ji Eliel.

¹² Mɔ ni ji kpaanyɔ lɛ ji Yohanan; mɔ ni ji nɛɛhu lɛ ji Elzabad;

¹³ mɔ ni ji nyɔŋma lɛ ji Yeremia; ni mɔ ni ji nyɔŋma kɛ ekome lɛ ji Makbanai.

¹⁴ Tabilɔi lɛ amli asafoiatsɛmɛi ji Gadbii nɛɛ fɛɛ. Amɛteŋ mɔ ni ji bibioo lɛ enyɛɔ ekɛ mɛi oha kpeɔ; ni mɔ ni ji mɔ wulu lɛ ekɛ mɛi akpe kpeɔ.

¹⁵ Afi lɛ klɛŋklɛŋ nyɔŋ lɛ nɔ, be mli ni Yordan Faa lɛ eyi ni eje ŋa lɛ, gbɔmɛi nɛɛ fo faa lɛ ni amɛyawo jɔi lɛ amli bii lɛ foi yɛ faa lɛ bokãgbɛ kɛ anaigbɛ fɛɛ lɛ.

Benyaminbii krokomɛi kɛ Yudabii yafata David he

¹⁶ Asaŋ Benyaminbii kɛ Yudabii lɛ ateŋ mɛi krokomɛi hu ba David ŋɔɔ yɛ mɔɔ lɛ mli he ni eyɔɔ lɛ.

¹⁷ Ni David je kpo kɛba, ni ekɛɛ amɛ akɛ, “Kɛji hejɔlɛ nyiɛmɔ nyɛnyiɛ kɛba koni nyɛbaye nyɛbua mi lɛ, no lɛ miyɛ he tsui akɛ mi kɛ nyɛ aaafee ekome. Shi kɛji nyɛba koni nyɛbatsɔ̃ɔ mihenyɛlɔi lɛ misɛɛgbɛ lɛ, akɛni miyeko mɔ ko sane fɔŋ ko lɛ, wɔtsɛmɛi aNyɔŋmɔ lɛ aaaye misane lɛ eha mi.”

¹⁸ Kɛkɛ ni Nyɔŋmɔ Mumɔ lɛ ba mɛi ni ba lɛ ateŋ mɔ kome nɔ. Egbɛi ji Amasai, mɔ ni fee sɛɛ ni etsɔ̃ hii Kakabãi Nyɔŋmai etɛ̃ lɛ asafoiatsɛnukpa lɛ. Ekɛɛ akɛ, “Bo onii ji wɔ, David, ni ogbɛfaŋ wɔyɔɔ, Yeshai bi. Omanye! Hɛɛ, omanye aaabla bo; ni obualɔi lɛ anɔ̃ ji omanye: Ejaakɛ oNyɔŋmɔ lɛ yeɔ ebuaa bo!” David here amɛ atuu, ni ewo amɛ asafoiatsɛmɛi yɛ etabilɔi lɛ anɔ.

Manasebii ni yafata David he

¹⁹ Manasebii lɛ ateŋ hii tabilɔi komɛi tse amɛhe ni amɛbafata David he, be ni David kɛ Filistibii lɛ yaa koni amɛkɛ Saul ayawu lɛ. Moŋ David naaa ewa Filistibii lɛ ta nɛɛ wuu, ejaakɛ Filistibii lɛ alumɛi lɛ tee ajina, ni amɛwo David gbɛ akɛ eku esɛɛ kɛya Ziklag ejaakɛ amɛkɛɛ, “Kɛji wɔleee feemɔ lɛ ekɛ wɔyitsei baaya ekɛyakpãtã enuŋtsɔ Saul.”

²⁰ Manase hii lɛ ni bafata David he be ni eku esɛɛ kɛyaa Ziklag lɛ ji Adna kɛ Yosabad kɛ Yediael kɛ Mikael kɛ Yozabad kɛ Elihu kɛ Ziletai. Tabilɔi akpe kuikui asafoiatsɛmɛi ji amɛteŋ mɔ fɛɛ mɔ yɛ Manasebii ateŋ.

²¹ Amɛye amɛbua David ni ekɛ ojoyelɔi aku lɛ wu. Hii kãkãlɔi saŋŋ ji amɛ, ni fee sɛɛ lɛ awo amɛ tatsɛmɛi.

²² Gbi fɛɛ gbi lɛ mɛi baa amɛbafataa David he. Kɛkɛ ni David bana ta kpeteŋkple ni anyɛɛɛ akane.

David tabilɔi lɛ

²³ Be ni David yɔɔ Hebron lɛ, tabilɔi fɛɛ ni bafata he koni, tamɔ bɔ ni Yehowa ewo shi eto lɛ, atsɔ̃ amɛnɔ aŋɔ Saul maŋtsɛyeli lɛ ahã David lɛ ayikulɛ nɛ yɛ akutsei anaa:

²⁴ Yudabii ateŋ lɛ akpei ekpaa kɛ ohai kpaanyɔ kɛ amɛtsɛŋi kɛ akplɔi.

²⁵ Simeonbii ateŋ lɛ hii kãkãlɔi akpei kpawo kɛ oha,

²⁶ Levibii lɛ ateŋ lɛ hii akpei ejwɛ kɛ ohai ekpaa.

²⁷ Yehoiada, ni ji Aaron we lɛ lumɔ lɛ, kɛ hii akpei etɛ̃ kɛ ohai kpawo ba;

²⁸ ni Zadok, oblanyo kãkãlɔ ko kɛ etsɛ we asafoiatsɛmɛi nyɔŋmai enyɔ kɛ enyɔ ba.

²⁹ Benyaminbii, ni ji Saul nyɛmimɛi, ni bafata David he ji hii akpei etɛ̃, ejaakɛ Benyaminbii lɛ tsiimɔ yɛ Saul sɛɛ.

³⁰ Efraimbii lɛ fee hii akpei nyɔŋmai enyɔ kɛ ohai kpaanyɔ, amɛba lɛ kuikui yɛ amɛtsɛmɛi awei anaa.

³¹ Anaigbɛ Manasebii lɛ fee hii akpei nyɔŋma kɛ kpaanyɔ ni aje gbɛ awo amɛ gbɛ akɛ amɛba ni amɛbawo David maŋtsɛ.

³² Isakarbii akutso lɛ mli onukpai ohai enyɔ kɛ amɛshishibii onukpai nɛɛ ji mɛi ni le nii ni sa akɛ Israel afee kɛ beyinɔ hu ni sa akɛ efee.

³³ Zebulonbii afalɛ fee hii akpei nyɔŋmai enumɔ ni le tawuu jogbaŋŋ, asaŋ amɛle nibii srɔtoi kɛ tawuu hu.

³⁴ Naftalibii lɛ fee asafoiatsɛmɛi tabilɔi onukpai akpe, kɛ amɛshishibii akpei nyɔŋmai etɛ̃ kɛ kpawo ni hiɛ tsɛŋi kɛ akplɔi.

³⁵ Danbii lɛ fee hii akpei nyɔŋmai enyɔ kɛ kpaanyɔ kɛ ohai ekpaa ni emia hã ta.

³⁶ Asherbii lɛ fee hii akpei nyɔŋmai ejwɛ ni ewula hã ta.

³⁷ Akutsei lɛ ni yɔɔ Yordan bokãgbɛ lɛ, ni ji Rubenbii lɛ kɛ Gadbii lɛ kɛ Bokãgbɛ Manasebii lɛ, ni bafata David he lɛ fee hii akpei oha kɛ nyɔŋmai enyɔ ni le tawuu nibii srɔtoi fɛɛ hiɛmɔ kɛ tawuu.

³⁸ Tabilɔi nɛɛ fɛɛ emia hã ta, ni amɛto kɛba Hebron kɛ yiŋtoo kome koni amɛbawo David Israel fɛɛ maŋtsɛ.

³⁹ Amɛye gbii etɛ̃ yɛ David ŋɔɔ; ni amɛyeyee nii, ni amɛnunuu dãa, ejaakɛ amɛnyɛmimɛi lɛ esara amɛsɛɛ.

⁴⁰ Israelbii lɛ ananemɛi ni amɛkɛ amɛ bɛŋkɛ bake amɛ nii. Ni ajɛ aahu ajɛ Isakar kɛ Zebulon kɛ Naftali niiaŋ tɔ̃ɔ aba kɛ tejii kɛ yoomai kɛ tejiokpɔŋɔi kɛ tsinai ni akɛ niyenii srɔtoi etere amɛ: mã kɛ agbãmi kɛ wain kɛ mu. Amɛbake tsinai kɛ toi hu, ni agbe ni aye. Amɛfee enɛɛmɛi fɛɛ ejaakɛ miishɛɛ eba Israel shikpɔŋ lɛ nɔ.