1 Kronika 10 - ŊMALƐ KRƆŊKRƆŊ LƐ

Maŋtsɛ Saul gbele

¹ Filistibii lɛ kɛ Israelbii lɛ wu, ni Filistibii lɛ anine tsɔ̃ Israelbii lɛ anɔ, ni amɛgbe Israelbii lɛ amɛshwie Gilboa Gɔŋ lɛ nɔ. Israelbii lɛ jo foi yɛ Filistibii lɛ ahiɛ;

² shi Filistibii lɛ tiu Israelbii lɛ kɛ Saul kɛ ebihii lɛ. Amɛnine shɛ Saul bihii Yonatan kɛ Abinadab kɛ Malkishua nɔ, ni amɛgbe amɛ.

³ Akɛ ta lɛ nina Saul kpaakpa. Henyɛlɔi lɛ ateŋ gãitsɛ̃lɔi lɛ ateŋ mɔ ko yoo Saul, ni etsɛ̃ lɛ gãi, ni epila lɛ ablaŋ.

⁴ Kɛkɛ ni Saul kɛɛ oblanyo ni hiɛɔ etawuu nii lɛ akɛ, “Gbalamɔ oklante lɛ ni okɛdu mi bɔ ni afee ni foolɔi nɛɛ akaba amɛbagbe mi, ni amɛye mihe fɛo.” Shi oblanyo lɛ emiii nakai feemɔ, ejaakɛ gbeyei emɔ lɛ naakpa. Enɛ hewɔ lɛ, Saul gbala lɛ diɛŋtsɛ eklante lɛ ni eho egbee nɔ.

⁵ Be ni oblanyo lɛ na akɛ Saul egbo lɛ, lɛ hu eho egbee eklante lɛ nɔ, ni egbo.

⁶ Belɛ Saul kɛ ebihii etɛ̃ lɛ fɛɛ gboi shi kome, kɛkɛ ni emaŋtsɛyeli lɛ sɛɛ fo.

⁷ Be ni Israelbii ni yɔɔ Yezreel Jɔɔ lɛ mli lɛ nu akɛ Israelbii lɛ ejo foi yɛ Filistibii lɛ ahiɛ, ni asaŋ Saul kɛ ebihii etɛ̃ lɛ enyɔnyɔi lɛ, amɛjojoo foi amɛshishii amɛmaji lɛ amɛshwie shi. Filistibii lɛ baŋɔ maji lɛ ni amɛhi mli.

⁸ Enɔ jetsɛremɔ be ni Filistibii lɛ ba gbohii lɛ ahe nibii kpɔlɔmɔ lɛ, amɛna Saul kɛ ebihii etɛ̃ lɛ agbohii lɛ jwere Gilboa Gɔŋ lɛ nɔ.

⁹ Amɛfo Saul yi, ni amɛkpɔlɔ edama lɛ yɛ ehe, ni atsu bɔfoi koni amɛyakpa Filistibii lɛ ashikpɔŋ lɛ nɔ kpula, koni amɛyashiɛ ta lɛ mli omanye sane lɛ yɛ amɛwɔji fɛɛ anaa, ni asaŋ amɛshiɛ amɛtsɔ̃ɔ maŋbii lɛ hu.

¹⁰ Filistibii lɛ kɛ Saul tawuu nii lɛ tee yato amɛjemawɔŋ lɛ eko we, ni akɛ eyitso lɛ yatsotsoro amɛjemawɔŋ Dagon we lɛ mli.

¹¹ Shi be ni Yabesh-Gileadbii lɛ fɛɛ nu bɔ ni Filistibii lɛ efee Saul lɛ,

¹² amɛteŋ hii kãkãlɔi lɛ tee ni amɛyawo Saul gbonyo lɛ kɛ ebihii lɛ hu agbohii lɛ kɛba Yabesh, ni amɛbafu amɛ yɛ tso ko shishi, ni amɛhi ŋmãa gbii kpawo.

¹³ Anɔkwa ni Saul eyayeee lɛ hewɔ ni egbo lɛ. Saul eyayeee Yehowa anɔkwa ejaakɛ eyayeee Yehowa kitãi lɛ anɔ ejaakɛ etee eyafee nii yɛ sisatsɛlɔ ŋɔɔ ekɛbi nii,

¹⁴ be mli ni Yehowa moŋ nii esa akɛ ebi lɛ. No hewɔ lɛ, Yehowa fo ewala sɛɛ, ni edãi maŋtsɛyeli lɛ ehã Yeshai bi David.