1 Korintobii 9 - ŊMALƐ KRƆŊKRƆŊ LƐ

Paulo fa ebɔfo ni eji lɛ he

¹ Ani mihiɛɛɛ mihe? Ani jeee bɔfo ji mi? Ani minako Yesu, wɔNuŋtsɔ lɛ? Jeee minine naa nitsumɔ ji nyɛ yɛ Nuŋtsɔ lɛ mli lo?

² Kɛji mijeee bɔfo mihãaa mɛi krokomɛi lɛ, nyɛ lɛ mi ji bɔfo mihã nyɛ, ejaakɛ nyɛ ji mibɔfo nitsumɔ lɛ naasɔomɔnɔ yɛ Nuŋtsɔ lɛ mli.

³ Enɛ ji nɔ ni mikɛfãa mihe yɛ mɛi ni kojoɔ mi lɛ ahiɛ.

⁴ Ani wɔbɛ hegbɛ akɛ wɔyeɔ nii ni wɔnuɔ?

⁵ Ani wɔbɛ hegbɛ akɛ wɔhiɛɔ nyɛmi yoo Kristofonyo ni ji wɔŋa lɛ kɛnyiɛɔ, tamɔ bɔfoi krokomɛi lɛ hu kɛ Nuŋtsɔ lɛ nyɛmimɛi lɛ kɛ Kefa?

⁶ Aloo mi kɛ Barnaba kɛkɛ bɛ hegbɛ akɛ wɔhiɔ shi ni wɔtsuuu nii?

⁷ Namɔ yaa ta ni lɛ diɛŋtsɛ ewoɔ ehe nyɔmɔ? Namɔ feɔ waintrom ni eyeee emli yibii lɛ eko? Aloo namɔ lɛɔ kooloi ni enuuu amɛfufɔ lɛ eko?

⁸ Nɔ ni miwieɔ nɛɛ, ani gbɔmɛi kɛkɛ wieɔ nakai? Ani Mla lɛ hu ekɛɛɛ nakai nɔŋŋ?

⁹ Ejaakɛ aŋma yɛ Mose Mla lɛ mli akɛ, “Kaawo tsina ni gbɛlɛɔ abele lɛ naabu kotoku.” Ani tsinai ahe ni dɔɔ Nyɔŋmɔ,

¹⁰ aloo wɔhewɔ kwraa moŋ ewieɔ nɛɛ? Wɔhewɔ nɔŋŋ aŋma, ejaakɛ esa akɛ mɔ ni huɔ lɛ, ekɛ hiɛnɔkãmɔ ahu, ni mɔ ni kpalaa abele hu hiɛ akã nɔ akɛ ebaaye eko.

¹¹ Kɛ wɔdu mumɔŋnii wɔhã nyɛ lɛ, ani eji nɔ ko wulu akɛ wɔɔkpa nyɛheloŋnii lo?

¹² Kɛ maji krokomɛi yɛ nɛkɛ hegbɛ yɛ nyɛnɔ lɛ, ani wɔbɛ hegbɛ fe amɛ? Shi kɛ̃lɛ wɔfeee nɛkɛ hegbɛ nɛɛ he nɔ ko, shi moŋ wɔmiɔ ŋɔɔ yɛ nii fɛɛ mli, koni wɔkatsi Kristo Sanekpakpa lɛ gbɛ.

¹³ Ani nyɛleee akɛ mɛi ni tsuɔ nii yɛ Sɔlemɔ we lɛ, Sɔlemɔ wenii lɛ eko nɔŋŋ amɛyeɔ? Ni mɛi ni sɔmɔɔ yɛ afɔleshãa latɛ lɛ he lɛ, afɔleshãa latɛ lɛ nɔ nii lɛ eko nɔŋŋ amɛnaa?

¹⁴ Nakai nɔŋŋ kɛ Nuŋtsɔ lɛ to akɛ mɛi ni jajeɔ Sanekpakpa lɛ aye Sanekpakpa lɛ mli nii.

¹⁵ Shi mi lɛ, mifeko nɛkɛ nibii nɛɛ ekome flo he nɔ ko. Ni miŋmaaa enɛ koni afee nakai ahã mi; ejaakɛ kɛ ka nɔ ni mɔ ko aaahã mishwãa lɛ afee yaka lɛ, faŋ nɔ ni migbo moŋ.

¹⁶ Ejaakɛ kɛji miijaje Sanekpakpa lɛ po jiŋŋ, ejeee shwãanɔ hã mi; ejaakɛ akɛfi minɔ akɛ mijaje; kɛ mijajeee Sanekpakpa lɛ, kpoo hã mi!

¹⁷ Ejaakɛ kɛ mitsu yɛ suɔmɔ naa lɛ, miyɛ nyɔmɔwoo; shi kɛjeee suɔmɔ naa tete lɛ, kɛ̃lɛ atu tsulɔnukpayeli awo midɛŋ.

¹⁸ Agbɛnɛ mɛni ji minyɔmɔwoo mɔ? No ji akɛ, kɛ miijaje Sanekpakpa lɛ, majaje lɛ yaka ni miheee nɔ ko, bɔ ni afee ni mikafee nɔ ko tuutu yɛ mihegbɛ ni miyɔɔ yɛ Sanekpakpa lɛ mli lɛ he.

Bɔ ni Paulo fee etao mɛi ehã Kristo

¹⁹ Mihiɛ mihe ni mijeee mɔ ko mɔ ko nyɔŋ, kɛ̃lɛ mifee mihe mɛi fɛɛ anyɔŋ, bɔ ni afee ni minine ashɛ mɛi babaoo anɔ.

²⁰ Yudafoi lɛ, mitsɔ̃ tamɔ Yudanyo mihã amɛ, bɔ ni afee ni minine ashɛ Yudafoi anɔ; mɛi ni yɔɔ Mla shishi lɛ, mitsɔ̃ tamɔ mɔ ko ni yɔɔ Mla shishi mihã amɛ, tsɛ mi diɛŋtsɛ mibɛ Mla shishi, bɔ ni afee ni minine ashɛ mɛi ni yɔɔ Mla shishi lɛ anɔ.

²¹ Mɛi ni bɛ Mla lɛ, mitsɔ̃ tamɔ mɔ ko ni bɛ Mla mihã amɛ, bɔ ni afee ni minine ashɛ mɛi ni bɛ Mla lɛ anɔ, tsɛ mijeee mɔ ko ni bɛ Nyɔŋmɔ Mla, shi moŋ miyɛ Kristo mla shishi.

²² Mitsɔ̃ tamɔ gbedelɔ mihã gbedelɔi lɛ, bɔ ni afee ni minine ashɛ gbedelɔi lɛ anɔ; mitsɔ̃ mihe nɔ fɛɛ nɔ mihã mɛi fɛɛ, koni bɔ fɛɛ bɔ ni fee lɛ mikɛhere mɛi komɛi ayiwala.

²³ Sanekpakpa lɛ hewɔ mifeɔ enɛɛmɛi fɛɛ, bɔ ni afee ni mi hu mana emli jɔɔmɔi lɛ eko.

Kristofoi akaŋshii

²⁴ Ani nyɛleee akɛ foidamɔ mli lɛ, foidalɔi lɛ fɛɛ daa moŋ, shi mɔ kome kɛkɛ naa emli juromɔ nɔ lɛ? Nyɛdaa foi lɛ nakai, koni nyɛnine ashɛ nɔ.

²⁵ Shi mɔ fɛɛ mɔ ni shiɔ akaŋ lɛ, eyeɔ ehe nɔ yɛ nibii fɛɛ mli. Agbɛnɛ amɛ lɛ amɛfeɔ nakai, koni amɛna akekre ni fiteɔ, shi wɔ lɛ, koni wɔna nɔ ni fiteee.

²⁶ No hewɔ lɛ, foi ni midaa nɛɛ, midaaa lɛ kɛkɛ ni oti emaaa mihiɛ; nɔmɔ ni minɔɔ nɛɛ, jeee kɔɔyɔɔ mikɛnɔɔ;

²⁷ shi moŋ mitswiaa migbɔmɔtso lɛ nii, ni miyeɔ lɛ nyɔŋ, koni mi ni mishiɛɔ mitsɔ̃ɔ mɛi krokomɛi lɛ, mi diɛŋtsɛ lɛ akashɛ mi afɔ̃.