1 Korintobii 5 - ŊMALƐ KRƆŊKRƆŊ LƐ

Ajwamãŋbɔɔ yɛ asafo lɛ mli

¹ Aakɛɛ kwraa po akɛ ajwamãŋbɔɔ yɛ nyɛteŋ, ajwamãŋbɔɔ ni bɛ jemajiaŋbii ateŋ tete akɛ mɔ ko kɛ etsɛ ŋa wɔɔ lɛ.

² Ni nyɛ lɛ, nyɛhe nyɛwoɔ, ni nyɛyeee ŋkɔmɔ moŋ, bɔ ni afee ni ajie mɔ ni tsu nɛkɛ nii nɛɛ yɛ nyɛteŋ?

³ Mi ni mibɛ nyɛŋɔɔ yɛ gbɔmɔtso mli, shi mumɔ mli miyɔɔ yɛ lɛ, mikojo mɔ ni tsu nɛkɛ nii nɛɛ momo, tamɔ nɔ ni miyɛ nyɛŋɔɔ nɔŋŋ.

⁴ Kɛji nyɛnaa kpe shi yɛ Nuŋtsɔ Yesu gbɛi mli ni miyɛ nyɛteŋ yɛ mumɔ mli, ní Nuŋtsɔ Yesu hewalɛ fata he lɛ,

⁵ wɔkɛ gbɔmɔ ni tamɔ nɛkɛ nɛɛ awo Satan dɛŋ, koni epiŋ egbɔmɔtso lɛ ni ahere mumɔ lɛ yiwala yɛ Nuŋtsɔ Yesu Gbi lɛ nɔ.

⁶ Nyɛshwãa lɛ bɛ fɛo. Nyɛleee akɛ masha bibioo shaa ma sui lɛ fɛɛ?

⁷ No hewɔ lɛ, nyɛjiea masha momo lɛ, koni nyɛtsɔ̃mɔ ma hee, tamɔ bɔ ni akpiti ji nyɛ lɛ; ejaakɛ agbe wɔHehoo Toobi ni ji Kristo lɛ.

⁸ No hewɔ lɛ, nyɛhãa wɔyea Hehoo Gbijurɔ lɛ, jeee kɛ masha momo, ni asaŋ jeee kɛ efɔŋ loo nɔshafeemɔ masha, shi moŋ kɛ anɔkwale akpiti ŋmiiŋmi.

⁹ Miŋma nyɛ yɛ wolo lɛ mli akɛ nyɛkɛ ajwamãŋbɔlɔi akabɔ;

¹⁰ jeee jeŋbii ateŋ ajwamãŋbɔlɔi loo hiɛjoolɔi loo amimyelɔi loo wɔŋjalɔi ahe kwraa miwieɔ nɛɛ, ejaakɛ nakai ni kulɛ ja nyɛje je lɛ mli.

¹¹ Shi agbɛnɛ miŋma nyɛ akɛ kɛji mɔ ko ni atsɛɔ lɛ nyɛmi lɛ ji ajwamãŋbɔlɔ loo hiɛjoolɔ loo wɔŋjalɔ loo mɔjɛlɔ loo dãatɔlɔ loo amimyelɔ lɛ, nyɛkɛ lɛ akabɔa, nyɛkɛ lɛ akayea nii tete.

¹² Shi mɛi ni yɔɔ sɛɛ lɛ, mɛɛ amɛkojomɔ hu mina? Ani jeee mɛi ni yɔɔ asafo lɛ mli lɛ nyɛkojoɔ,

¹³ shi mɛi ni yɔɔ sɛɛ lɛ, Nyɔŋmɔ ji mɔ ni kojoɔ amɛ? Nyɛjiea mɔ fɔŋ lɛ yɛ nyɛteŋ.