1 Korintobii 14 - ŊMALƐ KRƆŊKRƆŊ LƐ

Wiemɔi srɔtoi kɛ gbalɛ

¹ Nyɛdia suɔmɔ sɛɛ. Ni nyɛhiɛ adɔa yɛ mumɔŋnii lɛ ahe, shi titri lɛ, gbalɛ.

² Ejaakɛ mɔ ni wieɔ wiemɔ srɔto ko lɛ, jeee gbɔmɛi ekɛwieɔ shi Nyɔŋmɔ moŋ; ejaakɛ mɔ ko mɔ ko nuuu, akɛni mumɔ mli ewieɔ teemɔ saji yɛ lɛ.

³ Shi mɔ ni gbaa lɛ, gbɔmɛi ekɛwieɔ ni ekɛhã amɛnane amɔ shi, ni ekɛwo amɛ hewalɛ, ni ekɛshɛje amɛmii.

⁴ Mɔ ni wieɔ wiemɔ srɔto ko lɛ, lɛ diɛŋtsɛ enane ehãa mɔɔ shi; shi mɔ ni gbaa lɛ, asafo lɛ nane ehãa mɔɔ shi.

⁵ Miisumɔ ni nyɛ fɛɛ nyɛwie wiemɔi srɔtoi; shi nɔ ni misumɔɔ titri ji akɛ nyɛgba; ejaakɛ mɔ ni gbaa lɛ, efe mɔ ni wieɔ wiemɔi srɔtoi, belɛ ja mɔ ni wieɔ wiemɔi srɔtoi lɛ etsɔ̃ɔ shishi bɔ ni afee ni asafo lɛ nane amɔ̃ shi.

⁶ Shi agbɛnɛ, anyɛmimɛi, kɛji miba nyɛŋɔɔ mibawie wiemɔi srɔtoi ni jeee kpojiemɔ loo nilee loo gbalɛ loo nitsɔɔmɔ ko ni lɛ, mɛɛ sɛɛ mibahã nyɛna?

⁷ Tamɔ bɔ ni nii ni bɛ wala lɛ agbɛɛmɔ yɔɔ lɛ, blɛ jio, saŋku jio, kɛji egbɛɛɛ kɛ gbei srɔtoisrɔtoi lɛ, te aaafee tɛŋŋ ni aaale nɔ ni akpãa loo nɔ ni atswaa lɛ?

⁸ Ejaakɛ kɛji tɛtɛrɛmantɛrɛ egbɛɛɛ gbɛɛmɔ ni yɔɔ faŋŋ lɛ, namɔ aaasaa ehe ato ta?

⁹ Nakai nɔŋŋ kɛ nyɛ hu, yɛ wiemɔ srɔto wiemɔ mli lɛ, kɛji nyɛwieee nɔ ni shishi yɔɔ faŋŋ lɛ, te aaafee tɛŋŋ ni aaale nɔ ni akɛɔ lɛ? Ejaakɛ no lɛ nyɛbaafee tamɔ mɛi ni wieɔ tsɔ̃ɔ kɔɔyɔɔ.

¹⁰ Wiemɔi srɔtoi pii yɛ je lɛ mli moŋ, shi ekome flo bɛ ni bɛ shishi.

¹¹ Shi kɛji minaaa wiemɔ lɛ shishi lɛ, belɛ mibatsɔ̃ mɔkpɔŋ yɛ mɔ ni wieɔ lɛ hiɛ, ni mɔ ni wieɔ lɛ hu baatsɔ mɔkpɔŋ yɛ mihiɛ.

¹² Nakai nɔŋŋ nyɛ hu, akɛni nyɛhiɛ dɔɔ yɛ mumɔŋ nii ahe lɛ, nyɛbɔa mɔdɛŋ ni nyɛtekea nɔ ni asafo lɛ nane amɔ shi.

¹³ No hewɔ lɛ, mɔ ni wieɔ wiemɔ srɔto ko lɛ, esɔle koni enyɛ etsɔ̃ɔ shishi hu.

¹⁴ Ejaakɛ kɛji misɔle kɛ wiemɔ srɔto lɛ, mimumɔ miisɔle nɛ, shi mijwɛŋmɔ lɛ, ewooo yibii.

¹⁵ Belɛ mɛni sa akɛ mafee? Mikɛ mumɔ aaasɔle, shi mikɛ jwɛŋmɔ hu aaasɔle; mala lala kɛ mumɔ, shi mala kɛ jwɛŋmɔ hu.

¹⁶ Ejaakɛ kɛ okɛ mumɔ miijɔɔ lɛ, te aaafee tɛŋŋ ni mɔ ni leee mli eko lɛ aahere oshidaa lɛ nɔ akɛ “Amen”, akɛni eleee nɔ ni okɛɔ lɛ?

¹⁷ Bo lɛ, ooda shi jogbaŋŋ nɛ, shi kɛ̃lɛ mɔ kroko lɛ nane mɔɔɔ shi.

¹⁸ Midaa miNyɔŋmɔ lɛ shi akɛ mife nyɛ fɛɛ yɛ wiemɔi srɔtoi awiemɔ mli;

¹⁹ shi kɛ̃lɛ asafo lɛ mli lɛ, miisumɔ akɛ mikɛ mijwɛŋmɔ awie wiemɔi komekomei enumɔ, koni mikɛtsɔ̃ɔ mɛi krokomɛi anii moŋ, fe nɔ ni mawie wiemɔi komekomei akpei nyɔŋma yɛ wiemɔi srɔtoi amli.

²⁰ Anyɛmimɛi, nyɛkafea nyɛhe gbekɛbii yɛ jwɛŋmɔ gbɛfãŋ. Efɔŋ gbɛfãŋ lɛ, nyɛfea nyɛhe abifabii; shi jwɛŋmɔ gbɛfãŋ lɛ, nyɛfea nyɛhe mɛi ni edara.

²¹ Aŋma yɛ Mla lɛ mli akɛ, “Wiemɔi krokomɛi kɛ naabui krokomɛi anɔ matsɔ̃ mikɛ nɛkɛ maŋ nɛɛ aaawie, Shi no hu tete amɛboŋ mi toi, Nuŋtsɔ lɛ kɛɛ.”

²² No hewɔ lɛ, wiemɔi srɔtoi lɛ ejeee okadi hã heyelɔi, shi moŋ eji okadi hã mɛi ni heee yeee; ni gbalɛ lɛ, ejeee mɛi ni heee yeee lɛ anɔ, shi moŋ heyelɔi anɔ.

²³ No hewɔ lɛ, agbɛnɛ kɛji asafo muu lɛ fɛɛ naa bakpe shi yɛ he kome, ni mɛi lɛ fɛɛ miiwie wiemɔi srɔtoi, ni mɛi ni leee mli eko aloo mɛi ni heee yeee lɛ ateŋ mɛi komɛi hu ba jɛi lɛ, ani amɛkɛŋ akɛ nyɛmiiye sɛkɛ?

²⁴ Shi kɛji mɛi lɛ fɛɛ miigba, ni mɔ ko ni heee yeee aloo eleee mli eko lɛ ba jɛi lɛ, mɛi lɛ fɛɛ agbalɛ wiemɔi lɛ, ni aaakã lɛ, ni nomɛi nɔŋŋ aaakojo lɛ,

²⁵ aaajie etsuiŋ teemɔnii akpo faŋŋ, ni no aaahã ekɛ ehiɛ abu shi eja Nyɔŋmɔ, ni eeejaje akɛ, “Nyɔŋmɔ yɛ nyɛteŋ lɛɛlɛŋ.”

Mumɔŋ dromɔ keenii ahe gbɛjianɔtoo

²⁶ Belɛ te tɛŋŋ, anyɛmimɛi? Kɛ nyɛnaa bakpe shi ni nyɛteŋ mɔ ko yɛ lala ko, mɔ ko hu yɛ tsɔ̃ɔmɔ ko, mɔ ko yɛ kpojiemɔ ko, mɔ ko yɛ wiemɔ srɔto ko, mɔ ko yɛ shishitsɔɔmɔ ko lɛ, afee fɛɛ bɔ ni mɛi anane aaamɔ shi.

²⁷ Kɛji aawie wiemɔ srɔto lɛ, daa nɛɛ mɛi enyɔ loo, kɛ efa aahu lɛ, mɛi etɛ̃ pɛ awie, mɔ kome mɔ kome, ni mɔ kome hu atsɔ̃ɔ shishi;

²⁸ shi kɛji shishitsɔ̃ɔlɔ ko bɛ lɛ, mɔ ni wieɔ lɛ afee dioo yɛ asafo lɛ mli, shi ewie ehã lɛ diɛŋtsɛ ehe kɛ Nyɔŋmɔ.

²⁹ Shi gbalɔi lɛ, mɛi enyɔ loo mɛi etɛ̃ awie, ni mɛi ni eshwɛ lɛ ahala mli.

³⁰ Shi kɛji ajie nɔ ko kpo atsɔ̃ɔ mɔ ko ni ta shi lɛ, mɔ ni ebɔ̃i wiemɔ momo lɛ afee dioo.

³¹ Ejaakɛ kɛ afee lɛ mɔ kome mɔ kome lɛ, nyɛ fɛɛ nyɛaanyɛ nyɛgba, koni mɛi fɛɛ akase nii, ni awo mɛi fɛɛ hewalɛ.

³² Gbalɔi amumɔi lɛ baa amɛhe shi amɛhãa gbalɔi lɛ;

³³ ejaakɛ Nyɔŋmɔ lɛ, ejeee sakasakafeemɔ Nyɔŋmɔ, shi moŋ hejɔlɛ Nyɔŋmɔ ji lɛ. Tamɔ bɔ ni eyɔɔ yɛ hetselɔi asafoi lɛ fɛɛ mli lɛ,

³⁴ yei lɛ afee dioo yɛ asafoi lɛ amli, ejaakɛ aŋmɛɛɛ amɛ gbɛ ni amɛwie, shi moŋ amɛba amɛhe shi, tamɔ bɔ ni Mla lɛ kɛɔ lɛ.

³⁵ Shi kɛ amɛmiisumɔ akɛ amɛkase nɔ ko lɛ, amɛbi amɛ diɛŋtsɛ amɛwumɛi yɛ shĩa. Ejaakɛ eyɛ hiɛgbele hã yei akɛ amɛaawie yɛ asafo mli.

³⁶ Aloo nyɛŋɔɔ Nyɔŋmɔ wiemɔ lɛ jɛ? Aloo nyɛ kɛkɛ nyɛŋɔɔ eba?

³⁷ Kɛ efeɔ mɔ ko akɛ gbalɔ loo mumɔŋ gbɔmɔ ji lɛ lɛ, sa akɛ ele akɛ nɔ ni miŋma nyɛ nɛɛ, Nuŋtsɔ lɛ kitã ni.

³⁸ Shi kɛ mɔ ko enaaa enɛ lɛ, ashi lɛ.

³⁹ No hewɔ lɛ, anyɛmimɛi, nyɛhiɛ adɔa yɛ gbalɛ he, ni wiemɔi srɔtoi awiemɔ lɛ hu nyɛkatsĩa naa.

⁴⁰ Afee nii fɛɛ bɔ ni yɔɔ fɛo kɛ gbɛnaagbɛnaa.