1 Korintobii 11 - ŊMALƐ KRƆŊKRƆŊ LƐ

Yiteŋhaa he ŋaawoo

¹ Nyɛkasea mi, tamɔ bɔ ni mi hu mikaseɔ Kristo lɛ.

² Shi, anyɛmimɛi, miijie nyɛyi akɛ nyɛkaiɔ mi yɛ nibii fɛɛ mli, ni nyɛhiɛ tsɔ̃ɔmɔi ni mikɛhã nyɛ lɛ mli bɔ pɛ ni mikɛhã nyɛ lɛ.

³ Shi miisumɔ akɛ nyɛle akɛ nuu fɛɛ nuu yitso ji Kristo, ni yoo fɛɛ yoo hu yitso ji nuu, ni Kristo yitso ji Nyɔŋmɔ.

⁴ Nuu fɛɛ nuu ni sɔleɔ loo egbaa ni ekɛ nɔ ko eha eyiteŋ lɛ, eegbe eyitso lɛ he guɔ.

⁵ Shi yoo fɛɛ yoo ni sɔleɔ loo egbaa ni ehiɛ eyitso folo lɛ, lɛ hu eegbe eyitso lɛ he guɔ; ejaakɛ etamɔ nɔ ni eshɛ eyi nɔŋŋ pɛ.

⁶ Kɛ yoo lɛ ehaaa eyi nɔ lɛ, eku eyi mɔ; shi akɛni eji hiɛgbele sane hã yoo akɛ eeeku eyi loo eeeshɛ eyi lɛ, eha eyi nɔ.

⁷ Shi nuu lɛ, esaaa akɛ ehaa eyiteŋ, ejaakɛ Nyɔŋmɔ subaŋ kɛ anunyam ji lɛ.

⁸ Ejaakɛ nuu jɛɛɛ yoo mli, shi yoo moŋ jɛ nuu mli.

⁹ Ni asaŋ abɔɔɔ nuu yɛ yoo hewɔ; shi yoo moŋ abɔ yɛ nuu hewɔ.

¹⁰ No hewɔ lɛ, yɛ ŋwɛi bɔfoi lɛ ahewɔ lɛ, esa akɛ ana hewalɛ he okadi ko yɛ yoo lɛ yiteŋ.

¹¹ Kɛ̃lɛ yɛ Nuŋtsɔ lɛ mli lɛ, nuu nyɛŋ ashi yoo sɛɛ, ni yoo hu nyɛŋ ashi nuu sɛɛ.

¹² Ejaakɛ tamɔ bɔ ni yoo jɛ nuu mli lɛ, nakai nɔŋŋ nuu hu tsɔ̃ yoo nɔ kɛba; shi nii fɛɛ jɛ Nyɔŋmɔ mli.

¹³ Nyɛ diɛŋtsɛ nyɛhalaa mli yɛ nyɛteŋ. Ani eyɛ fɛo akɛ yoo aaasɔle yɛ Nyɔŋmɔ hiɛ ni ehaaa eyi nɔ lo?

¹⁴ Ani adebɔɔ diɛŋtsɛ etsɔ̃ɔ nyɛ akɛ, kɛji nuu ŋmɛ eyi kusuu lɛ, eyɛ hiɛgbele hã lɛ,

¹⁵ shi yoo lɛ, kɛji eŋmɛ eyi kusuu lɛ, eji anunyam hã lɛ? Ejaakɛ akɛ yitsɔi lɛ hã lɛ akɛ hehaanɔ.

¹⁶ Shi kɛji mɔ ko miisumɔ akɛ efee ehe naataalɔ yɛ enɛ he lɛ, wɔ lɛ jeee wɔkusum ji no, ni Nyɔŋmɔ asafoi lɛ hu nakai nɔŋŋ.

Nuŋtsɔ Niyenii lɛ

¹⁷ Shi agbɛnɛ nibii ni mibatsɔ̃ɔ nyɛ ni nyɛfee nɛɛ, jeee nyɛyi mikɛjieɔ lɛ, ejaakɛ kɛ nyɛkpe lɛ, jeee ekpakpa jɛɔ mli, shi moŋ efɔŋ.

¹⁸ Klɛŋklɛŋ lɛ, minu akɛ, kɛ nyɛyabua nyɛhe naa yɛ asafo lɛ mli lɛ, mligbalamɔi yɛ nyɛteŋ, ni miheɔ miyeɔ fã kɛ fã.

¹⁹ Ejaakɛ sa akɛ mligbalamɔi aba nyɛteŋ koni mɛi kpakpai lɛ ajie amɛhe shi faŋŋ yɛ nyɛteŋ.

²⁰ Agbɛnɛ, kɛ nyɛnaa bakpe shi yɛ he kome lɛ, jeee Nuŋtsɔ Niyenii lɛ yeli nyɛba lɛ,

²¹ ejaakɛ nyɛniyeli nɛɛ mli lɛ, mɔ fɛɛ mɔ tsɔ̃ɔ hiɛ yeɔ lɛ diɛŋtsɛ eniyenii, ni be ni hɔ̃mɔ miiye mɔ ko lɛ, belɛ mɔ ko etɔ dãa.

²² Aso nyɛbɛ shĩai ni nyɛaaye nii ni nyɛaanu yɛ jɛi? Aloo Nyɔŋmɔ asafo lɛ nyɛbuuu, ni nyɛwoɔ mɛi ni bɛ nɔ ko lɛ ahiɛgble? Te makɛɛ nyɛ tɛŋŋ? Ani mijie nyɛyi? Enɛ lɛ, mijieee nyɛyi yɛ he.

²³ Ejaakɛ nɔ ni mikɛhã nyɛ lɛ mina kɛjɛ Nuŋtsɔ lɛ dɛŋ, akɛ, Nuŋtsɔ Yesu lɛ, nakai nyɔɔŋ lɛ mli nɔŋŋ ni atsɔ̃ɔ esɛɛgbɛ lɛ, ekɔ aboloo,

²⁴ ni eda shi, ni ekumɔ mli, ni ekɛɛ, “Nyɛhea nyɛyea, enɛ ji migbɔmɔtso ni akɛhã yɛ nyɛhewɔ; nyɛfea enɛ ni nyɛkɛkaia mi.”

²⁵ Nakai nɔŋŋ ewo kpulu lɛ hu yɛ niyenii lɛ asɛɛ, ni ekɛɛ, “Nɛkɛ kpulu nɛɛ ji kpãŋmɔ hee lɛ yɛ milá lɛ mli; nyɛfea enɛ, shii abɔ ni nyɛaanu lɛ ni nyɛkɛkaia mi.”

²⁶ Ejaakɛ shii abɔ ni nyɛyeɔ nɛkɛ aboloo nɛɛ ni nyɛnuɔ nɛkɛ kpulu nɛɛ hu lɛ, nyɛmiijaje Nuŋtsɔ lɛ gbele lɛ nyɛmiitsɔ̃ɔ kɛyashi beyinɔ ni eeeba.

²⁷ No hewɔ lɛ, mɔ fɛɛ mɔ ni yeɔ nɛkɛ aboloo nɛɛ ni enuɔ Nuŋtsɔ lɛ kpulu lɛ bɔ ni esaaa lɛ, eetɔ̃ Nuŋtsɔ lɛ gbɔmɔtso lɛ kɛ elá lɛ nɔ.

²⁸ Shi gbɔmɔ aka lɛ diɛŋtsɛ ehe ekwɛ dani eye aboloo nɛɛ eko ni enu kpulu nɛɛ eko.

²⁹ Ejaakɛ mɔ ni yeɔ ni enuɔ bɔ ni esaaa lɛ, kojomɔ moŋ eyeɔ ni enuɔ ehãa ehe lɛ, ejaakɛ ebuuu Nuŋtsɔ lɛ gbɔmɔtso lɛ.

³⁰ No hewɔ hu ni nyɛteŋ mɛi pii egbɔjɔ ni amɛhe yeɔ, ni mɛi babaoo hu egboi nɛɛ.

³¹ Shi kɛji wɔka wɔ diɛŋtsɛ wɔhe wɔkwɛ lɛ, Nyɔŋmɔ ekojoŋ wɔ.

³² Shi kɛji Nuŋtsɔ lɛ miikojo wɔ lɛ, ekɛmiitsɔse wɔ, bɔ ni afee ni akabu wɔ kɛ je lɛ fɛɛ fɔ.

³³ No hewɔ lɛ, minyɛmimɛi, kɛ nyɛnaa bakpe shi ni nyɛbaaye nii lɛ, nyɛmɛmɛa nyɛhe.

³⁴ Shi kɛ hɔ̃mɔ miiye mɔ ko lɛ, eye nii yɛ shĩa dã, bɔ ni afee ni nyɛkpee lɛ akatsɛ kojomɔ miihã nyɛ. Shi nii ni eshwɛ lɛ, kɛ miba lɛ, mato amɛ gbɛjianɔ.