Luk 8 - Nde-Nsele-Nta LP NT Portions

Abaka ba ajɔ na Jisɔs

¹ Sa akan na mbe bifa Jisɔs ajɛn amo ka ebe baka, bɛ ɛfangfang na bɛ ɛsɛbsɛb, arag nyɛbɛ ɔka oton Ɔsɔwɔ. Asɔgba ɛyɛ wobo na aba ajɔ fa nanɛ,

² na abaka bantingi ba Jisɔs atab mbɔ ka abibi atughu na aya: Meri ya abengɛ si Magdalin yi Jisɔs ayighɛ abibi atughu asimma;

³ Jɔana nka Kusa, nnɛ a isi ka ɛbɔngɔ abɔanju a Ɛrɔd Susana na ebe anɛ baga. Abaka ba ajɔ akɔ akpugha mbɔ ago mbe bi Jisɔs na asɔgba ɛyɛ asɛbɛ.

Ɛbɛɛ Mbɔmmɛ Ɛgbɛ

⁴ Anɛ aru ka baka baka amayɛ Jisɔs tɛtɛ anɛ atuu, atuu ɛbɛɛ ji:

⁵ “Ofo bibi mbɔmmɛ ɛgbɛ amo sa ama wuru amog a mbe, sa awuru, yantingi agbɔ ka mba anɛ anyɛggɛ ka ajaa, ososok ɛsang ɛnɛ.

⁶ Yamɔng agbɔ akomo ka atan, nsɛrɛ si ɛtam narama, eko akpab akpɔ atebsi arifɔ alab abenge mbɔ.

⁷ Yantingi agbɔ anam ka ajɔjɔngɔ, ajɔjɔngɔ aram na mbe bi ama akpa na atɛ.

⁸ Ka yamɔng agbɔ ka nnɔbɔ a nsisi. Aram ama kab ebe amog, ka mkpɛ atanarɔn aga ya abɔmmɔ.” Ngara yi Jisɔs arag wɔɔ atɔ mbɔ gbogbo “Nnɛ ya akpe atɔng ayog.”

⁹ Asɔgba ɛyɛ abɔmmɛ ɛbɛɛ jifa erunang.

¹⁰ Jisɔs atɔ mbɔ, “Ɔsɔwɔ amiribi mbe abibi atɔngɔ war sa ɛjɛn afe anɛ a ɛbɛ, ka anɛ baga ntuu ɛbɛɛ, ‘ɛjɔghafa aragha yɛ, na wɔ si arama yɛ; Aragha yogho ka mbɔ erimiribi.’

¹¹ “Ɛbɛɛ ji erusi: Amog ayim akɛ ano Ɔsɔwɔ.

¹² Amog ya agbɔ ka mba ayim akɛ anɛ ba ayog nono Ɔsɔwɔ, ka nnam amayu ano ya ka nte mbɔ, sɔng aki tama afɛnɛ afɔ nanagha.

¹³ Amog ya agbɔ ka atan ayim akɛ anɛ ba ayog nono Ɔsɔwɔ na ɛyɛbɛ nete ka aruk arifɔ. Atama ano Ɔsɔwɔ ka nkokoma ngara, si nagara ɛba agbɔ.

¹⁴ Amog ya agbɔ ka ajɔjɔngɔ ayim akɛ anɛ ba ayog ano Ɔsɔwɔ, ka si nekpen emogho isi efegheayɔ eying, afang na bɔnɔb ene mbɔ ariyimi nkoronkoro.

¹⁵ Ka amog ya agbɔ ka nnɔbɔ a nsisi ayim akɛ anɛ ba ayog ano Ɔsɔwɔ akag ka nete mbɔ ka nnɔbɔ na ɛdɛdɛghɛ, ka ayimi nkoronkoro ka ano Ɔsɔwɔ. Ajɔ ka nekpen nɛkɔrɔ Ɔsɔwɔ.

Ɔmɔnɔ Ka Ɛkono Ɔmɔnɔ

¹⁶ “Nnɛ wawi arem ya amɔnɔ ɔmɔnɔ akag ka nsɛ sɛ abar ka nɔyɔ ntefeghe. Erising, akono ka ɛkono ɔmɔnɔ, sɔng kpere nnɛ ya aba ayɛ ɛfɔngɔ.

¹⁷ Ejo abibi jaji erem ji Ɔsɔwɔ arijɔ aribi, jaji erem ji abonobono ji anɛ arighi gbɛrɛ.

¹⁸ Ba gbɛrɛ sɛ eyongo atɔng nnɔbɔnnɔbɔ. Nnɛ ya akpekpe akiɛ agana; ka nnɛ ya ari fɔ, araggasi ji akana sa akpe ataba mbɔ taba.”

Nnyɛ na Abɔannyɛ Jisɔs

¹⁹ Munu nnyɛ Jisɔs na abɔannyɛ aba amayiɛ, ka arima akperɛ ateb ɛbɔngɔ.

²⁰ Nnɛ wiwi ama tɔɛ, “Nnaja na abɔannaja ayim ga ka ifi asɛb si ayia.”

²¹ Jisɔs akpɛ, “Nnajaa na abɔannajaa are anɛ ba ayog nono Ɔsɔwɔ afɛnɛ anene.”

Jisɔs Ane Ebɔk ɛnaa

²² Ofo bibi Jisɔs atɔ asɔgba ɛyɛ, “Nɔngɔ emo ka njam ɛtɔ yiga.” Ka anam ka ɔgbaa amogho.

²³ Sa amogho, Jisɔs anan. Nkora nsɛmmɛ aba, alab ajam nanama ka ɔgbaa, ɔbɔn ene mbɔ si ɔgbaa ɛkpɛsɛmɛ.

²⁴ Ka amo ama nyimɛ, atɔɛ, “Ntaa, Ntaa, ɛkpatan:” Atam ayimi agbanga nsɛmmɛ na ebɔk, ebɔk ɛsɛnɛ, mfo anaa.

²⁵ “Ntama ɛyɛrɛ ma?” Abɔmmɔ asɔgba ɛyɛ. Ɔbɔn ene mbɔ biji ɛkpɔ mbɔ abɔmmɔ nimbɔ, “Bagha nagana nnɛ yɔna.? Atɔ nsɛmmɛ na alab ayoghɛ.”

Jisɔs Ayighi nnɛ abibi Atughu

²⁶ Jisɔs na asɔgba ɛyɛ afii amasi ka ɛjɛbɛ ja abeng si Garasa, ka njam ɛtɔ yakɔn na Galili.

²⁷ Ngara yi Jisɔs aru ka egbok nnɛ ya akpe abibi atughu ya aru ka ɛjɛbɛ ji. Ka munnu yɔ ɛnɛmɛ arijɔ yɔbɔ, ajɛn ejughu mba arab, si ka nju arama jɔ, ajɔ ka anam.

²⁸ Ngara ya ayɛ Jisɔs anan gbogbo agbɔɛ ka ata, abengɛ ka nyara ntɔng, “Jisɔs, Mmɔ a Ɔsɔwɔ bi Agagaga, ɔsɛbjɛ ka biji ɛba? Mmagɔrɔ, kim kɛ niyiri!”

²⁹ Ka Jisɔs amɔtɔghɔ tɔ abibi atughu sa aru ka biji munnu yɔ. Ebe ngara ebibi etughu ɛboɛ, ka afanggasi agbangɛ mgbɔkɔbɔ ka abɔ na ata anɔngɔ yababɛ, akɛbbɛ agbɔkɔbɔ abibi atughu akamɛ akag ka awɛn.

³⁰ Jisɔs abɔmmɛ, “Wɔ abenga nang?” “Etutu,” akpɛ, atebsi ebe abibi atughu amɛ nam.

³¹ Ka abibi atughu ajɔ agɔrɔ Jisɔs si aki mbɔ kama akag ka nsɛbɛ a nebe ya arifɔ nkannisi.

³² Ɛwɛmɛ si ebe akok ajɔ anɛ mbenɛnɛghɛ akpere ata nkonkon. Abibi atughu agɔrɔ Jisɔs si anɔngɔ mbɔ anam akok, ka anɔngɔ mbɔ anam.

³³ Ngara yi abibi atughu aru asighi munnu yɔ, amanam akok, ka akok abɛ asɛnɛ anam ka ɛtɔ atan.

³⁴ Anɛ ba ababa akok ayɛ ji ɛwɛmɛ abɛ ama tɔrɔ atɔ anɛ ka ɛjɛbɛ Garasa na akpeghe ya re akpere Garasa,

³⁵ ka anɛ aru amayɛ ji ɛmɛwɛmɛ. Ngara ya aba ka mfo a Jisɔs, ayɛ munnu ya abibi atughu amɛ ru ka biji, ajig alagha Jisɔs, alebe si nnɛ a mber; ka ɔbɔn ene mbɔ.

³⁶ Anɛ ba ayɛ ji ɛwɛmɛ atɔ anɛ baga si munnu ya akpe abibi atughu amɔnɔb.

³⁷ Anɛ wɔɔ ba aru ka Garasa atɔ Jisɔs si atamasighi mbɔ, ateb ɔbɔn. Ka Jisɔs anam ka ɔgbaa amo.

³⁸ Ka munnu ya ayighɛ abibi atughu ka biji agɔrɔ sa atɔngɛ, ka Jisɔs atɛn, atɔɛ,

³⁹ “Sɔng kru ka etek ɔmɔtɔ anɛ ji Ɔsɔwɔ ame ne akia.” Ka munnu yɔ akru ka etek ama tɔ anɛ wɔɔ ji Jisɔs ame ne akiɛ.

Iku Ngɔnganɛ na Manka ya Ayaya

⁴⁰ Ngara si Jisɔs akru, ɛbɔngɔ ekperɛ, atebsi amar mbɔ are ka mba.

⁴¹ Ka munnu wiwi ya abengɛ si Jarus, nnɛ isi ka nju a mfa Jus, aba amagbɔ Jisɔs ka ata, agɔrɛ sa aba ka nju ɛyɛ

⁴² atebsi mmɔ a nka wiwi nanting ya akpe, ngɔnganɛ ya amisi nnya wobo na ɛba, akpɔkpɔ. Si Jisɔs are ka mba amogho, ɛbɔngɔ ɛtɔɔngɛ ka kpɛjara.

⁴³ Manka ajɔ ka ɛbɔngɔ ya anɔng ajɔ aruɛ ka nnya wobo na ɛba, nnɛ wawi arima atabɛ.

⁴⁴ Aruɛ ka njam akɔmɔ nnyɔ iwuru, naosunosu anɔng akɛbɛ.

⁴⁵ “Yɛnnɛ akɔmɔm”? Jisɔs abɔmmɔ. Mbɔ wɔɔ agɛbbɛ, Fita akpɛ, “Ntaa, ɛbɔngɔ ɛmabono esibi ya jara.”

⁴⁶ Ka Jisɔs arag, “Nnɛ akɔmɔm ateb ejo; Nnyinyi si nsam ɛmimru ka biji.”

⁴⁷ Ngara si eribi manka yɔ si Jisɔs amɛ gbɛrɛ ja ane akam amagbɔɛ ka ata. Ka nibri anɛ kpakpa, atɔrɔ jɛsɛrɛ ka akɔmɛ, na si anɔb naosunosu.

⁴⁸ Jisɔs atɔɛ, “Mmɔwaayɔka, ntama ɛya ama tab. Sɔng ka nanaa.”

⁴⁹ Si Jisɔs akpagha aragha na manka yɔ, nrɔghanoto ya aru ka nju a Jarus, nnɛ isi ka nju a mfa Jus aba. “Mmɔwayɔka amɔkpɔ,” atɔɛ. “Kikpɛ feghe nkpekpene ayɔ.”

⁵⁰ Ngara yi Jisɔs ayog oteb bi, atɔ Jarus. “Ɔbɔn ekia ne; tama, si ɛnɔnɔb.”

⁵¹ Ngara yi Jisɔs asi ka nju, aritama nnɛ wawi atɔngɛ anam, erising Fita, Jɔn, Jemsi, Nsɛ na nnyɛ mmɔ,

⁵² Anɛ wɔɔ ba ajɔ ka nju anan mmɔ ya akpɔ. Jisɔs atɔ mbɔ, “Ba kikpɛ nan, akaghakpɔ, anannan.”

⁵³ Ayɔnɛ, atebsi anyinyi sa amɔkpɔ.

⁵⁴ Jisɔs afenɛ ka ɔbɔ arag gbogbo, “Mmɔwaa, tam yimi:”

⁵⁵ Etughu ɛjɛ ɛfɛnɛ, naosunosu atam. Atɔ mbɔ sa akiɛ ejonɛnɛghɛ ya anɛ.

⁵⁶ Nnyɛ na nsɛ ɛkpɔ mbɔ biji, ka atɔ mbɔ si aki tɔ nnɛ wawi ji ɛmɛwɛmɛ.