Luk 6 - Nde-Nsele-Nta LP NT Portions

Nton a ofo Esiayɔ

¹ Ofo esiayɔ bibi Jisɔs ajɔ asing ka ɛgbɛ, asɔgba ɛyɛ abɔng atajɔghɔ mbe bi abɔm ka ɛgbɛ ji, afere ka abɔ a mbɔ anɛ amog.

² Bafarisi bantingi abɔmmɔ, “Nang ka one ejo ejighi ka ofo esiayɔ?”

³ Jisɔs akpɛ mbɔ, “War ɛkagha beng ji Debid ane na anɛ ɛbɛ ka ngara yi njan aya mbɔ?

⁴ Anam ka nju Ɔsɔwɔ, aton ejonɛnɛghɛ ja akɛ Ɔsɔwɔ anɛ. Ka atam akɔ bintingi akɛ anɛ ɛbɛ anɛ. Anɛ ejonɛnɛghɛ ji baɛjɔ Ɔsɔwɔ nanting anɛghɛ”

⁵ Ka Jisɔs atɔ mbɔ, “Mmɔ a munnu are Ntaa ofo esiayɔ.”

⁶ Ofo esiayɔ bintingi, amo ka nju a mfa Jus ama jɔ akpene, ka munnu wiwi ajɔ a fa yi ɔbɔ bunu ɛnyaba.

⁷ Bafarisi na bekpena ejighi, ajɔ asɛb ejo ja alaghɛ sa amɔgbɔ ejighi, ajɔ afan ababɛ sa ayɛ arena atabtab nnɛ ɔya ka ofo esiayɔ.

⁸ Ka Jisɔs agbɛrɛgbɛrɛ ji mbɔ ajɔ akana ka atɔ nnɛ yɔ ɔbɔ ɛnyaba, “Tam yimi fa ka nibri anɛ wɔɔ ayia.” Ka atam ayimi fa.

⁹ Jisɔs atɔ Bafarisi na bekpena ejighi, “Nɔngɔ mbɔmmɔ war, jɛ ere ejo ejighi ka ofo esiayɔ: Nene nnɔbɔ fasɛ ebibi, ɛnagha nekpen fasɛ nɔrɔbɔ”?

¹⁰ Abri mbɔ kpakpa asibi, ka atɔ munnu yɔ, “Tinni ɔbɔ ɛba.” Anena, ɔbɔ ɛbɛ ɛnɔb.

¹¹ Ka Bafarisi na bekpena ejighi ɛsag mbɔ ka agɔngɔ naragha na atɛ ja ane Jisɔs.

Nasanga Wobo na Aba

¹² Ofo bibi Jisɔs ayar ka bɔsɔ nkonkon ama kag njɔ, akɔ enokon tutu akag njɔ akɛ Ɔsɔwɔ.

¹³ Ngara yi ɛmakpara abeng asɔgba ɛyɛ asang anɛ wobo na aba ka ɛbɔngɔ mbɔ, ba abeng mbɔ si Afɔsil.

¹⁴ Anɛsi: Simɔn ya abengɛ si Fita, mmɔannyɛ Andru, Jemsi, Jɔn, Filib, Batolomiu,

¹⁵ Matiu, Tɔmɔs, Jemsi mmɔannu a Alfaeus, Simɔn ya ajɔ abengɛ si Silɔt,

¹⁶ Judas mmɔannu a Jemsi, na Judas Iskariot ya agoro Jisɔs ka Kɛkannanjam.

Ɛnara na Esiyiri

¹⁷ Akɔ mbɔ asɛnɛ ka mfo bi ɛnɔng bag. Ntakpa ɛbɔngɔ Asɔgba ɛyɛ ajɔ fa na ebe anɛ ba aru ka baka Judia wɔɔ na ka Jɛrusalɛm, na akpeghe ya are ka akɔkɔ aya asibi Taya na Sidɔn,

¹⁸ ba aba sa ama yogɛ bantingi aba sa ayighi mbɔ aya. Jisɔs atab anɛ ba abibi atughu afegheayɔ,

¹⁹ anɛ wɔɔ alɔg sa akɔmmɛ, atebsi akpe nsam ya atab mbɔ wɔɔ.

²⁰ Atab amar asɛngɛ asɔgba ɛyɛ, arag: “Ɛnara ɛjɔ ɛkɛ akpak, atebsi oton Ɔsɔwɔ ere nanɛrɛ.

²¹ Ɛnara ɛjɔ ɛkɛ anɛ ba njan munu, atebsi ɛfɔfɔ. Ɛnara ɛjɔ ɛkɛ war ba anan ɛnan munu, atebsi ɛyɔnasɔn.

²² Ɛnara ɛjɔ ɛkɛ war ba ɛsagga anɛ asagga, anyɛ war arɔbɔ war mbeng, ateb Mmɔ a Munnu.

²³ “Yɛbɛ nete, ban ka ofo bifa, atebsi ntoro ɛya afangfang ka etek Ɔsɔwɔ. Nayɔ yi akuansisi a mbɔ ane akɛ abono Ɔsɔwɔ.

²⁴ “Ka Esiyiri ɛjɔ ɛkɛ war afang anɛ, atebsi ɛmɔkɔ nnɔba mbanga ɛyɛrɛ.

²⁵ Esiyiri akɛ war ba ɛnɛghɛ eyuruyuru namunu, ngara kisi ɛjɔ njan. Esiyiri ɛkɛ anɛ ba ayɔnasɔn munu, ngara amannasi ɛnan ɛwura amibi.

²⁶ Esiyiri ɛkɛ war bi eying arag nnɔbɔ akɛ war, nayɔ yi akuansisi a mbɔ ane akɛ abono ya adɛ.

Nɔkɔrɔ ɛkɛ Anɛ baujing

²⁷ “Ka ntɔ war anɛ ba eyoghom, nnɛ ujing ɛwɛrɛ akɔr war, ne nnɔbɔ kɛ anɛ ba ɛsagga mbɔ,

²⁸ nara ba asimi akɛ war, kag njɔ kɛ anɛ ba ane war ebibi.

²⁹ Nnɛ ata na nsab ka ɛkpɔghɔ kpeghe ɛkpɔghɔ jiga kɛ ata. Nnɛ akɔna ɛkpagha ɛnɛmɛ ɛja, kruɛ kɛ ɛnɛmɛ.

³⁰ Nnɛ abɔɔ a na ejo kiɛ, ka nnɛ akɔna ejo ɛja kikpɛ kɔ.

³¹ Ne kɛ anɛ sɔ ɔsɛb sa ane akiɛ.

³² “Okpena nɔkɔrɔ ɔkɛ anɛ ba ɔkɔr mbɔ nanting, jɛ ɛjɔ nsing ɛya? Afanggasi ba ane a abibi afɛ akpe nɔkɔrɔ akɛ anɛ ba akpe nɔkɔrɔ akɛ mbɔ.

³³ Ka onena nnɔbɔ ɔkɛ anɛ ba ane nnɔbɔ akia; yɛ ere nsing ɛya? Afanggasi ba ene a abibi afɛ atam anena.

³⁴ Ɔkpɛnnɛ na anɛ akpugha ba ate agana, jɛ ere nsing ɛya? Afanggasi ba ene abibi afɛ, abrisi akɛ mbɔ wɔɔ sa akpɛnnɛ.

³⁵ Ka anɛ baujing ɛba akɔra, ne nnɔbɔ kɛ mbɔ, ɔfɛnɛ ɔkpɛnnɛ anɛ ba arighima agana. Ntoro ɛyɛrɛ afangfang, ka war ɛjɔ abɔ Ɔsɔwɔ bi ɛgagaga, atebsi yɛ anɔnɔb ɛkɛ anɛ ba arijɔ akaghɛ na ba abebbeb.

³⁶ Fɔ ɛkpɔgisi si nsɔja akpe ɛkpɔgisi.

Nanaa Banaa Anɛ

³⁷ “Kinaa banaa anɛ, sɔng akinaa jaja. Kirɔbɔ anɛ abeng, sɔng arighirɔbɔ yaya. Tamsighi mbɔ, sɔng atamtamasigha.

³⁸ Kɛ, sɔng atam akia: Nnɔbɔ a nagara, ɔnyɛghɛ ɛsɛnɛ, okpo ɔkpɛnɛ eson ewuru ɛnam, ka ejo ji ɔyana. Sɔ ɔgara ɔkɛ nnɛ na ya atam agara akia.”

³⁹ Atam atuu ɛbɛɛ ji atɔ mbɔ: “Nnagga amar aragha atɔngɔ nnagga amar mba? Mbɔ anɛ ababa agbɔghɔm anam ka nebe?

⁴⁰ Mmɔ a nwɛr aramagbɛrɛ aga nkpekpene, ka kpere nnɛ yi akpene nnɔbɔnnɔbɔ ajɔ nasi nnɛ ya akpenɛ.

⁴¹ “Jɛ ɛsɛrɛ ka ɔyɛ ɛfɛfɛrɛ ka namar mmɔannaja orikana ntakpa eningi ete ya ayɔb ka namar ɛna?

⁴² Nang yɔ yɔtɔ mmɔannaja, ‘Mmɔannajaa, nɔngɔ mmɛ nyighi ɛfɛfɛrɛ ka namar ɛna,’ yi wɔfɔnɔ oriyɛ ntakpa eningi ete ya ayɔb ka namar ɛna? Wɔ nnɛ a njam ɛba, gbɔmba yighi ntakpa eningi ete ya ayɔb ka namar ɛna, sɔng ɔyɛ nnɔbɔnnɔbɔ uyighi ɛfɛfɛrɛ ji ere ka namar mmɔannaja.

Ete na Akab Ɛyɛ

⁴³ “Nnɔbɔ ete yayi arem ya akab ebibi nkab, sɛ ebibi ete ɛkab nnɔbɔ a nkab.

⁴⁴ Kpere ete ɔgbɛrɛ ka nkab ɛyɛ. Anɛ arama sanga akab ekokonadu ka ɛmɛnɛgbɛ ajɔjɔngɔ, sa amuruku ka akpor.

⁴⁵ Nnɔbɔ a nnɛ abagha na anɔbɔ a mbe ya atongo ka nete ɛnɛ, ka ebibi nnɛ abagha na abibi mbe ya atongo ka nete ɛnɛ. Ji eson nnɛ ka nete jɛjɛji ji nnyɔ ɛbɛ aragha.

Nwagha na Ndɛmmɛ Nsii a Nju

⁴⁶ “Erunang ka obengem si ‘Ntaa, Ntaa,’ ka orijɔ one ji ntɔa si one?

⁴⁷ Kpere nnɛ ya aba ka mfo ɛbaa ayog ano ɛyaa, ane si ndagha, ntɔngɔ war tɔngɔ sa are.

⁴⁸ Are nasi nnɛ yi asii nju, ka asam niwinju ɛsɛbɛ akono ka atan. Ngara yi nyɛn aba, nsam alab ama tob arima abo, atebsi ama nisii.

⁴⁹ Ka nnɛ ya ayog ano ɛyaa ka arine si ndagha are nasi nnɛ ya asii nju ka nsisi ya arisam niwinju ka asii. Nsɛrɛsi nyɛn aba, ɛbanɛban nsam alab abo nju yi atob.”