Luk 5 - Nde-Nsele-Nta LP NT Portions

Jisɔs Abeng Agbɔghamba Asɔgba Ɛyɛ

¹ Ofo bibi Jisɔs ayimi ka nkɔ a ɛtɔ Jɛnnɛsarɛt, anɛ agba asibi Jisɔs ayongo atɔng ka nono Ɔsɔwɔ.

² Ayɛ agbaa aba ka nkɔ a ɛtɔ, ya ba ɔsɛrɛ alab atam asighi, ama su atamfok a mbɔ.

³ Amanam ka ɔgbaa bibi, bi Simɔn, atɔɛ sa ajara atɛmɛ egbok kɛm. Ka Jisɔs ajɔ nji ka ɔgbaa akpene mbɔ.

⁴ Ngara ya akan na nekpene amanga atɔ Simɔn, “Fii sɔng ka mfo bi alab asɛbɛsɛbɛ, ɛmɛtob atamfok ɛbɔb ɔnya.”

⁵ Simɔn akpɛ, “Ntaa, emene nkora noto tɛtɛ ɛkpara jaji eribɔb. Sɔ ɔmaragna nfɛnɛ tobtob atamfok.”

⁶ Ngara sa ame ne na, abɔb ebe ɔnya alab atamfok mbɔ ajam nɛkɛbbɛ.

⁷ Abeng anɛ a mbɔ ka ɔgbaa biga sa ama tɔb mbɔ, aba ama tɔb mbɔ ayighi ɔnya agbaa ababa ason ka ɛkpɛsɛmɛ.

⁸ Ngara yi Simɔn Fita ayɛ ji ɛmɛwɛmɛ, akɛmɛ agba akɛ Jisɔs aragsi, Ntaa; “Tamsighim si ndifɔ!”

⁹ Fita na anɛ ɛbɛ ɛkpɔ mbɔ biji ka ebe ɔnya alab bi abɔbɔ,

¹⁰ ɛtamɛkpɔ mbɔ abɔ a Sɛbɛdɛ Jemsi na Jɔn, ba ajɛn na ane ɔsɛrɛalab na Simɔn biji. Ka Jisɔs atɔ Simɔn, “Ki bɛ ɔbɔn; eyogho ɔjɔ ɔbɔb ɔnya jam munu sɔng isi ɔbagha na anɛ ka nju Ɔsɔwɔ.”

¹¹ Simɔn na anɛ ɛbɛ ama tɛmɛ agbaa mbɔ ka egbok, atam mbe mbɔ asighi atɔɔngɔ Jisɔs.

Jisɔs atab nnɛ a Abini

¹² Ɛfɔ ngara yi Jisɔs ajɔ ka ɛjɛbɛ jiji, munnu aba ya aya abini. Ngara ya ayɛ Jisɔs akɛmɛ agba ajɛbɛ isi ka nsisi agɔrɛ, “Ntaa, ɛkɔrana, ne mmɛ mfɔ.”

¹³ Jisɔs atinni ɔbɔ akono munnu yɔ. “Ɛkɔrɔmkɔr,” arag. “Mma tab.” Naosunosu abini akan.

¹⁴ Ka Jisɔs atɔɛ, “Ki tɔ nnɛ wawi, sɔng, tɔngɔ Njɔ Ɔsɔwɔ nana kɛ mbe bi bi Mosis aragsi ɛkɛ ɔmannatam ɔya abini, sa ejonagam akɛ mbɔ.”

¹⁵ Ka oteb ateb Jisɔs ɛjɛn ɛkɔnɔ, ebe anɛ aba ama yog sa akpene na anɛ ba ayaya sɔng anɔb.

¹⁶ Ka Jisɔs akɛnnɛ nomogho ka akpeghe ya anɛ arijɔ ama kag njɔ.

Jisɔs Atab Nnɛ ya Akpɔ Ɛja

¹⁷ Ofo bibi si Jisɔs ajɔ akpene, Bafarisi bantingi na bekpena anɛ ejighi ba aru ka bɛjɛbɛ Galili, Judia na Jɛrusalɛm ajɔ fa. Ka nsam a Ntaa ajɔ nanɛ sa tab anɛ ba aya,

¹⁸ Abunu bantingi aba na nnɛ ya akpɔ ɛja ka ɛrakpa alɔg si akɔɛ anam ka nju amaboɛ ka ata Jisɔs.

¹⁹ Ngara si ariyɛ ɛyagha anam nanɛ ateb oson anɛ, ayar ka nobono nju anam ɛbanga ka nobono akɛnnɛ alighi ka ɛrakpa asɛnɛ akag ka ɛbɔngɔ anɛ, ka ata Jisɔs.

²⁰ Ngara yi Jisɔs ayɛ ntama mbɔ, arag, “Ntɛ, mmatamnsigha ka abibi afɛ ɛya.”

²¹ Bafarisi na ba ekpena ejighi ajam nakana ka nete mbɔ, “Yɛnnɛ arag na sa are na Ɔsɔwɔ? Ɔsɔwɔ nanting ya atamasighi nnɛ ka abibi afɛ?”

²² Jisɔs agbɛrɛgbɛrɛ ji mbɔ ajɔ akana ka abɔmmɔ, “Jɛ ɛsɛrɛ ka ɛkana mbe bifa ka nte ɛyɛrɛ?

²³ Ɔkana si ere ndɛndɛ: naragha, ‘Mmatamnsigha ka abibi afɛ ɛya,’ sɛ naragha ‘Tam yimi wɔ ɔjɛn?’

²⁴ Nne war ɛgbɛrɛ si Mmɔ a Munnu akpe nɔyɔ ka eying na atamasighi nnɛ ka abibi afɛ.” Atɔ munnu ya akpɔ ɛja, “Mmatɔ, tam yimi, ton ɛrakpa ɛja, kru etek.”

²⁵ Naosunosu atam ayimi ka nibri mbɔ, aton ɛrakpa ja anɔngɔ akru etek atighi Ɔsɔwɔ.

²⁶ Kpere nnɛ biji ɛkpɔɛ atig Ɔsɔwɔ. Nɔyɔ Ɔsɔwɔ ene mbɔ ɔbɔn ka arag, “Ɛmɛyɛ njɛn ejo ɛnɛji.”

Nebenge Lɛbi

²⁷ Si mbe bi ɛkanna Jisɔs aru amakɔrɔ nkia taksi abengɛ si Lɛbi ajig ka mfo a noto taksi “Tɔɔngɔm,” Jisɔs atɔɛ,

²⁸ ka Lɛbi atam kpere ejo asighi atɔngɛ.

²⁹ Ka Lɛbi ane eyighi akɛ Jisɔs ka nju ɛyɛ, ka ɛbɔngɔ ba ɛkia taksi na anɛ baga ajɔ fa anɛ na mbɔ.

³⁰ Bafarisi na anɛ a mbɔ bekpena ejighi Mosis akpɛn atɔ asɔgba ɛyɛ: “Jɛ ɛsɛrɛ ka ɔnɛghɛ ɔwɔ na ba ɛkia taksi na ba ‘ene abibi afɛ’?”

³¹ Jisɔs akpɛ mbɔ, “Anɛ ba are ka ekoro biji sang ba asɛb ntaba anɛ ka aya, erising anɛ ba aya.

³² Ndiba si mandak na anɛ ba afɔfɔ, erising mba si mandak ntɔ ba ene a abibi afɛ ayanga.”

Abɔmmɔ Jisɔs Ateb Ɛjɔ a Njan

³³ Anɛ bantingi atɔɛ, “Asɔgba Jɔn ajɔ ajɔ njan akag njɔ kpere ngara, nayɔ ya asɔgba Bafarisi, ka asɔgba ɛya anɛghɛ ka awɔghɔ.”

³⁴ Jisɔs akpɛ, “Ɛmama ɛnɔngɔ atɛ a nkɔgha manka ajɔ njan ka ngara si yɛfɔnɔ are na mbɔ? Eˈe!

³⁵ Ka ngara aragha bagha ya akɔghɔ mfɔna manka amo nanɛ asighi atɛ bɛ, ka afo ya ajɔ jɔ njan.”

³⁶ Jisɔs atuu mbɔ ɛbɛɛ jifa: “Nnɛ wawi arem ya akɛbɛ ɛja mbɔ́ mfɛmfɛ ama jam lagha ka ɛkokono ɛnɛmɛ. Ane nana, ama sagha mbɔ́ a mfɛmfɛ, ɛja mbɔ́ mfɛmfɛ efumum na ɛkokono.

³⁷ Nnɛ wawi arem ya ayanga amam a mfɛmfɛ akag ka ekokono ɛba ngu. Ane nana, amam a mfɛmfɛ ane ɛba ngu ata; amam awuru ɛba ngu ɛfɛnɛ ɛsagha.

³⁸ Nasang, amam a mfɛmfɛ ayanga akag ka ɛba ngu mfɛmfɛ.

³⁹ Ka nnɛ wawi arem ya awɔghɔ akokono amam akpɛsɛb ya mfɛmfɛ, ka arag si, ‘Akokono anɔb aga.’ ”