Luk 4 - Nde-Nsele-Nta LP NT Portions

Nagara na Ɛmɛtɔb Jisɔs

¹ Jisɔs, ason na Mbara Nɛfɛb, aru ya Jɔdan ka Mbara Nɛfɛb asɔnɛ amanam ka eyomo,

² ajɔ fa ka afo atanaba, jaji arinɛ ka afo ya, ngara yi njan ayaɛ, nnam ɛmɛgarɛ sɔng agbɔ.

³ Ka nnam atɔɛ, “wɔ orena Mmɔ a Ɔsɔwɔ, tɔ natan nifa ɛyanga ejonɛnɛghɛ.”

⁴ Jisɔs akpɛ, “Ayɛnɛ si: ‘Nnɛ arama kpen ka ejonɛnɛghɛ nanting.’ ”

⁵ Nnam ɛsɔnɛ ayar ka bɔsɔ nkonkon amɛ ɛtɔngɛ oton eying kpakpa.

⁶ Ka nnam atɔ Jisɔs, “Nkia nɔyɔ mbɔ wɔɔ na negere; atebsi amimkɛ nɔyɔ, ka nkɛ kpere nnɛ yi nsɛbsi nkiɛ.

⁷ Ka Ɔkaghamna, nɔyɔ ni wɔɔ ɛjɔ nana.”

⁸ Jisɔs akpɛ, “Amɛyɛnɛ si: ‘Kag Ntaa Ɔsɔwɔ ɛba, rɔghɔ yɛ nanting.’ ”

⁹ Nnam ɛsɔnɛ amo ka Jɛrusalɛm eneɛ ama komo ka nɔkɔngɔ nju Ɔsɔwɔ. Atɔ Jisɔs “Orena Mmɔ a Ɔsɔwɔ, fɛb ma gbɔ fa.

¹⁰ Ayɛnɛ ka nwɛr Ɔsɔwɔ si: “ ‘Atɔ baɛnjɛl sa ababa nnɔbɔnnɔbɔ;

¹¹ agbeba ka abɔ a mbɔ, sɔng oki te ɛnɛn ka natan.’ ”

¹² Jisɔs akpɛ, “Nwɛr Ɔsɔwɔ arag si: ‘ki gara Ntaa Ɔsɔwɔ ɛba.’ ”

¹³ Ngara yi nnam ɛkan na nagara ɛnɛ kpakpa, atamasighi Jisɔs ka ma ngara.

Atɛn Jisɔs ka Nasarɛt

¹⁴ Jisɔs afɛnɛ ya Galili ka nsam a Mbara Nɛfɛb, ka oteb atebɛ ɛkɔnɔ ka ekpeghe ya wɔɔ.

¹⁵ Ajɔ akpene mbɔ ka buju mfa Jus, ka anɛ wɔɔ ajɔ atighɛ.

¹⁶ Jisɔs amo ka Nasarɛt ɛjɛbɛ ji abenge, ka ofo esiayɔ amo ka nju a mfa Jus si nɛwɛmɛ ɛnɛ ɛtɔngɔ. Jisɔs atam sa abeng nwɛr Ɔsɔwɔ.

¹⁷ Akiɛ nwɛr Asaya mbono Ɔsɔwɔ. Atinni, ayɛ mfo ba ayɛnɛ:

¹⁸ “Mbara Nɛfɛb Ntaa are nanaa, atebsi amim sang si ndag nyɛbɛ ɔka ntɔ akpak. Amimto si ndag nanagha ntɔ agbɔkɔbɔ ba anagga amar ayɛ mfo, na anɛ ba niyiri afɔ nanagha,

¹⁹ si atɔ anɛ ngara yi Ntaa ama sang sa atɔngɔ anɛ ɛbɛ ɔfa.”

²⁰ Ka Jisɔs afu nwɛr, asighi abɔ akɛ nnɛ a noto fa ama jɔ nji. Anɛ wɔɔ ka nju a mfa Jus amanga abriɛ,

²¹ ka Jisɔs atɔ mbɔ, “Ɛnɛji ano ya aru ka nwɛr Ɔsɔwɔ yi mbeng na eyog amɛwɛmɛ.”

²² Anɛ wɔɔ arag anɔba mbe atebɛ ɛfɛnɛ ɛkpɔmbɔ biji ka anɔba ano ya ajɔ arag. “Mmɔ a Josɛf sangna?” Abɔmmɔ.

²³ Jisɔs atɔ mbɔ, “Kɛdɛdɛghɛ nnyinyi si ɛtɔm na: ‘Ntaba anɛ ka aya, gbɔmba tab nana! Ne fa ka ɛjɛbɛ ɛja ji eyog si one ka Kafɛnum.’ ”

²⁴ “Ntɔ war kɛdɛdɛghɛ,” “mbono nakagha akpem ka ɛjɛbɛ ɛjɛ.

²⁵ Ntɔa ɛdɛdɛghɛ ebe abaka ba anu a mbɔ akpɔ ajɔ jɔ ka Isɛrɛl ka ngara Ɛlija, yi alab arina ka nnya ɛsa na ɛja ka nkoro ɔgba ajɔ ka nsisi.

²⁶ Ka Ɔsɔwɔ arito Ɛlija akɛ mbɔ, ato akɛ manka yi nnu akpɔ ka ɛjɛbɛ Sarafat ka ekpeghe Sidɔn.

²⁷ Ebe anɛ ba abini ajɔ jɔ ka Isɛrɛl ka ngara Ɛlisa mbono Ɔsɔwɔ, Ɔsɔwɔ aritab wawi erising Nɛman nnɛ a Siria nanting ya anɔbɔ.”

²⁸ Anɛ wɔɔ ka nju mfa Jus nete ɛsag mbɔ ka ji ayogho ji Jisɔs aragha.

²⁹ Atam ayimi, akamɛ aru ka ɛjɛbɛ mbɔ, akɔɛ amo ka bɔsɔ nkonkon ya asi Nasarɛt sɔng ajarɛ atob ka nɛsɛrɛ.

³⁰ Ka ajɛn asing fa ka ɛbɔngɔ mbɔ amo mba ɛyɛ.

Jisɔs Akama Abibi Atughu

³¹ Asɛnɛ amo ka Kafɛnum, ɛjɛbɛ ka Galili, ka ofo esiayɔ agɔngɔ anɛ nekpene.

³² Nekpene ɛnɛ ɛkpɔmbɔ biji, atebsi oteb ɛbɛ ekpe nɔyɔ.

³³ Munnu wiwi ajɔ ka nju a mfa Jus yi ebibi etughu eboɛ ɔsan. Abenge gbogbo,

³⁴ “Sɔng! Jisɔs nnɛ a ɛjɛbɛ Nasarɛt jɛji ofeghe warr ayɔ? Ɔmaba ɔmɔrɔbɔ warr? Nnyinyi nnɛ yi wɔ ore Mfɔ a nnɛ Ɔsɔwɔ!”

³⁵ “Gɔ ɛkan!” Jisɔs arag nkoronkoro “Ruɛ ka biji!” Ka ebibi etughu ɛtɛmmɛ etob ka ɛbɔngɔ anɛ wɔɔ ka aru arite ɛnɛn.

³⁶ Anɛ wɔɔ ɛkpɔmbɔ biji arag na atɛ, “Fa bagha nekpene ni? Afe nɔyɔ na nsam atɔ abibi atughu aru!”

³⁷ Ka oteb ateb Jisɔs emo ɛkɔnɔ wɔɔ.

Jisɔs Atab Ebe ka Aya

³⁸ Jisɔs atam ka nju a mfa Jus amo ka etek Simɔn. Ntakpa nefeb abɔb nnyɛ nka Simɔn, ka agɔrɔ Jisɔs sa ayighɛ nefeb ni.

³⁹ Ajɛrɛ akperɛ atɔ nefeb si ru, nefeb ɛkan. Atam naosunosu ajam ejonɛnɛghɛ nanaa akɛ mbɔ.

⁴⁰ Ka ngara nkruanjon, anɛ aba na anɛ ba akpe aya ka nganangana amakɔrɔ Jisɔs, akono kpere nnɛ ɔbɔ aya ɛkan.

⁴¹ Abibi atughu aru ebe anɛ ka biji, abenge, “Wɔ ore Mmɔ a Ɔsɔwɔ!” Ka ayam mbɔ sa aki rag atebsi anyinyi si are nnanagha.

⁴² Ngara yi efurusu ɛmakpara Jisɔs amo ka mfo ba ajɔ nanting. Anɛ ajɔ asɛbɛ ka ngara ya asi ka mfo ba are, alɔg si ajɔ fa nanɛ sɔng akimo asighi mbɔ.

⁴³ Ka Jisɔs atɔ mbɔ, “Noto ɛnaa ni si ndag nyɛbɛ ɔka oton Ɔsɔwɔ ka bɛjɛbɛ biga, atebsi jina ja atom si nne.”

⁴⁴ Ka ajɛn aragha ano Ɔsɔwɔ ka buju mfa Jus ka ekpeghe Judia.