Luk 3 - Nde-Nsele-Nta LP NT Portions

Jɔn nwura anɛ alab atongo mba

¹ Sisa Tibɛrus afe oton ɛka Rom ka nnya wobo na ɛnɛ, Ɛtɔɔngɔ nnya noko ka ngara yi Fɔntus Falet ajɔ nton a Judia. Ɛrɔd ajɔ nton a Galili, mmɔannyɛ ji Filib ajɔ nton a Itura na Trakonitis, ka Lasanias nton a Abilɛnɛ,

² ka ngara yi Annas na Kafas ajɔ aton a baɛjɔ Ɔsɔwɔ, Ɔsɔwɔ atebe Jɔn mmɔ a Sakaria oteb ka ngara yi are ka eyomo.

³ Ajɛn asibi baka wɔɔ bi ere ɛlagha aya Jɔdan, aragha ano Ɔsɔwɔ na mbɔ sa ayanga nekpen na ewura alab sɔng Ɔsɔwɔ atamasighi abibi afɛ.

⁴ Si ayɛnɛ ka nwɛr mbono Ɔsɔwɔ Asaya: “Nnɛ ya ajɔ atebe ka eyomo, ‘Tongo mba Ntaa, one ntinni a mba ɔkiɛ!

⁵ Sono abrɛbrɛ akonkon; sana akonkon asɛnɛ. Ne aba ya agɛdɛgɛdɛ atinni; kpere ɛyagha ɛsɔbɔ.

⁶ Anɛ kpakpa ayɛ nanagha Ɔsɔwɔ!’ ”

⁷ Jɔn atɔ ɛbɔngɔ ji aba si awuru mbɔ alab, “Warr ba ere nasi abɔ a ɔnyɔ bi akpe bisi: Yɛnnɛ atuu war atɔng sɛ ɛbɛ niyiri ni Ɔsɔwɔ ama kɛ war*?

⁸ Ne ejo ɛtɔngɔ si ɔmayanga nekpen. Ba kijɔfa ɛtɔ nɛnɛrɛ si, ‘Ekpe Abraam si nsɔjɛrɛ.’ Ntɔ warr si Ɔsɔwɔ amama akɔghɔ atan yafa ayanga abɔ akɛ Abraam.

⁹ Nofok ɛmɔnɔngɔ ka abangannab nte, kpere ete ji erikab etingi nkab akɛbɛ atob ka ngon.”

¹⁰ “Ka munu ene nang?” Ɛbɔngɔ ɛbɔmmɔ.

¹¹ Jɔn akpɛ, “Kpere nnɛ ya akpe ɛnɛmɛ baba akɛ nnɛ ya arifɔ, ka nnɛ ya akpe ejonɛnɛghɛ atam ane na.”

¹² Araggasi ba ɛkɛ a taksi bamɔng atam aba ama wuru alab, “Nkpekpene,” abɔmmɔ, “war ene nang?”

¹³ Jɔn akpɛ, “Kikɔ ɔga si atɔa si ɔkɔ.”

¹⁴ Ɔsɔja bamɔng abɔmmɛ, “ka war ene nang?” Akpɛ, “Kikɔ akpugha anɛ ka nsam, ki ne adɛ ɔlagha anɛ nɔngɔ ji akpegha ebenga.”

¹⁵ Anɛ ajɔ akonoekpo ka nte mbɔ si Jɔn amama ajɔ Kras.

¹⁶ Jɔn akpɛ mbɔ wɔɔ, “Mmɛ nwuru alab yaga. Nnɛ ya aga afang agam aragha bagha mmɛ ndisi yi fɔngɔ alighi akpaghata ɛyɛ. Awuru war alab a Mbara Nfɛb na ngon.

¹⁷ Akpe ɛfɛfɛb ka ɔbɔ ya afɛb wit ka mfo ba abo ka ɔgbara sa akɔ anɔbɔ akag ka baba, ka akɔ akpanfab akag ka ngon bi erijɔ ɛnɛmɛnɛmɛ.”

¹⁸ Jɔn arag ajɛn ano etuu ɔtɔng ya akɛ mbɔ nsam ayanga nekpen.

¹⁹ Ka Jɔn ayam nton a Ɛrɔd ya akɔ nka mmɔannyɛ Ɛrɔdias na abibi yaga wɔɔ ya ane,

²⁰ Ɛrɔd afɛnɛ ane ebibi ji afang aga ya ga sa akɔ Jɔn akag ka mgbɔkɔbɔ.

Ewuru alab na Ɛbangannab Jisɔs

²¹ Ngara yi anɛ wɔɔ ajɔ awuru alab Jisɔs atam aba awurɛ alab. Nsɛrɛ si Jisɔs ajɔ akag njɔ, nobo eribi,

²² ka Mbara Nɛfɛb asɛnɛ amakuɛ ka biji nasi ɛmɛb. Ntɔng aru ka nobo: “Wɔ Mmɔ ɛwaa yɔ ɔkɔrɔm, nete ɛyɛbɛm nana.”

²³ Munu Jisɔs are nnya natan na wobo ya agɔngɔ noto ɛnɛ. Ajɔ mmɔannu a Josɛf, sa anɛ akana, mmɔannu a Ɛli,

²⁴ mmɔannu a Mattat, mmɔannu a Lɛbi, mmɔannu a Melki, mmɔannu a Janna, mmɔannu a Josɛf,

²⁵ Mattatiyas, mmɔannu a Emɔs, mmɔannu a Naum, mmɔannu a Esli, mmɔannu a Naggai,

²⁶ mmɔannu a Maat, mmɔannu a Mattatiyas, mmɔannu a Sɛmɛyin, mmɔannu a Josɛk, mmɔannu a Joda,

²⁷ mmɔannu a Joanan, mmɔannu a Resa, mmɔannu a Jɛrubabɛl, mmɔannu a Sealtiel, mmɔannu a Neri,

²⁸ mmɔannu a Melki, mmɔannu a Addi, mmɔannu a Kosam, mmɔannu a Ɛlmadam, mmɔannu a Ɛr,

²⁹ Josua, mmɔannu a Eliesa, mmɔannu a Jorim, mmɔannu a Mattat, mmɔannu a Lɛbi,

³⁰ mmɔannu a Simiɔn, mmɔannu a Juda, mmɔannu a Josɛf, mmɔannu a Jonam, mmɔannu a Eliyakim,

³¹ mmɔannu a Melea, mmɔannu a Menna, mmɔannu a Mattata, mmɔannu a Natan, mmɔannu a Debid,

³² mmɔannu a Jesi, mmɔannu a Obed, mmɔannu a Boas, mmɔannu a Salmɔn, mmɔannu a Nason,

³³ mmɔannu a Aminadab, mmɔannu a Ram, mmɔannu a Ɛsrɔn, mmɔannu a Feres, mmɔannu a Juda,

³⁴ mmɔannu a Jɛkɔb, mmɔannu a Asik, mmɔannu a Abraam, mmɔannu a Tɛra, mmɔannu a Nawɔ,

³⁵ mmɔannu a Serug, mmɔannu a Reu, mmɔannu a Feleg, mmɔannu a Eber, mmɔannu a Sɛla,

³⁶ mmɔannu a Kainan, mmɔannu a Afasad, mmɔannu a Sɛm, mmɔannu a Nua, mmɔannu a Lamek

³⁷ mmɔannu a Mɛtusɛla, mmɔannu a Ɛnɔk, mmɔannu a Jared, mmɔannu a Maalalel, mmɔannu a Kenan,

³⁸ mmɔannu a Ɛnɔs, mmɔannu a Sɛt, mmɔannu a Adam mmɔannu a Ɔsɔwɔ.