Luk 24 - Nde-Nsele-Nta LP NT Portions

Jisɔs aminyimi

¹ Ka efurusu bribri ka mgbɔghamba ofo ka nsɛ, abaka ba akɔ nnyan yi eyughu nyɛbɛ nasan yi mbɔ atongo amo na yi ka ɔnam.

² Sa asi, ayɛ sa amibingi natan ka ɔnam abo ka nkɔ,

³ ka ngara yi anam ka ɔnam ariyɛ iku Ntaa Jisɔs.

⁴ Sa ajɔ akana ateb ji ɛmɛwɛmɛ ɛkɛ iku Jisɔs, naosunosu ayɛ abunu aba ayɔbɔ abɔ́ ya ayagha nasi mgbambri ayim alagha mbɔ.

⁵ Ɔbɔn ene abaka ba ajɛbɛ bisi ka nsisi, ka abunu ba atɔ mbɔ, “Jɛ ɛsɛrɛ ka ɛsɛb nnɛ a mber ka ɛbɔngɔ akuanɛ?

⁶ Jisɔs fa arem; aminyimi ka nuku! Ba gbɔnter ji atɔ war ngara yi yɛ akpagha re nanɛrɛ ka Galili:

⁷ ‘Asighi Mmɔ a Munnu abɔ akɛ ba ene a abibi afɛ, akoɛ, ka ɛtɔɔngɔ afo asa afɛnɛ anyimi.’ ”

⁸ Ka abaka ba agbɔnter a ano ya Jisɔs atɔ mbɔ.

⁹ Ngara yi abaka ba aru ya ɔnam afɛnɛ ya etek, atɔrɔ mbe bi wɔɔ atɔ asɔgba Jisɔs wobo na wiwi na anɛ baga wɔɔ.

¹⁰ Abaka ba atɔrɔ mbe bi atɔ afɔsil a Jisɔs ajɔ Meri Magdalin, Jɔana, Meri ji nnyɛ Jemsi, na abaka baga ba ajɔ na mbɔ.

¹¹ Ka asɔgba aritama ji abaka ba atɔ mbɔ, atebsi ano ya ajɔ nasi ɔdɛmmɛ akɛ mbɔ.

¹² Ka Fita atam abɛ ɛban amo ka ɔnam. Ngara yi asi ka ɔnam, agɔngɔ ayɛ anɔba abɔ́ ya afu Jisɔs anɔng nanting, ka Fita afɛnɛ njam, akana ka nete ɛnɛ ji ɛmɛwɛmɛ.

Ka mba ya amogho Ɛmmas

¹³ Ka ofo bi asɔgba Jisɔs aba ajɔ amo ka ɛjɛbɛ ji abeng si Ɛmmas, ekpere mal esimma ka usi ka Jɛrusalɛm.

¹⁴ Ajɔ arag na atɛ ateb kpere ejo ji ɛmɛwɛmɛ.

¹⁵ Sa ajɔ arag mbe bi na atɛ, Jisɔs fɔnɔ aba ama ajɛn na mbɔ;

¹⁶ ka ane mbɔ si akiɛ renge.

¹⁷ “Jisɔs abɔmmɔ mbɔ, Yɛ ɛrag jɛ na atɛ ɛjɛnɛ emogho?” Mbɔ asa ayimi, ajɛbɛ bisi nasi anɛ ba are ka esiyiri.

¹⁸ Nsɔgba wiwi yi abengɛ si kleofas, abɔmmɔ Jisɔs, “Wɔ yɔ nanting yɔ ore njɛnanɛ fa ka Jɛrusalɛm ya akagha yog mbe bi ɛmɛwɛmɛ ka afo ya asingsing.”

¹⁹ Jisɔs abɔmmɔ, “Bagha mbe?” “Mbe bi ɛwɛmɛ ateb Jisɔs nnɛ a Nasarɛt,” mbɔ akpɛ. “Ajɔ mbono Ɔsɔwɔ, na nsam ka naragha nono na nene ka nibri Ɔsɔwɔ na anɛ wɔɔ.

²⁰ Nton a Baɛjɔ Ɔsɔwɔ na anɛ bisi ɛbrɛ asighɛ abɔ akɛ sa ayon, ka akoɛ ka ete njang ɛnɛ;

²¹ Ka warr ɛjɔ ekonoekpo si yɛyɔ ya abagha ama anagha warr Isɛrɛl, ka abɔ anɛ ba ujing ɛbrɛ. Kpɛnɛfa, ɛnɛji ka afo asa yi mbe bi wɔɔ ɛwɛmɛ.

²² Ka kpɛnɛfa, abaka ɛbrɛɛ bamɔng ane biji ɛkpɔ warr. Ɛnɛji ka efurusu bribri mbɔ amo ka ɔnam.

²³ Ka iku Jisɔs ariyɛ. Ka abaka ba aba ama tɔ warr sa ayɛ baɛnjɛl nasi amaranju, ba arag si Jisɔs are mber.

²⁴ Ka abunu bamɔng ka ɛbɔngɔ ɛjɛrɛɛ amo ka ɔnam, ayɛ nsɛrɛ si abaka ba aragha, ka ariyɛ iku Jisɔs.”

²⁵ Ka Jisɔs atɔ mbɔ, “War adɛmmɛ anɛ, nang ka eritama ɛbanɛban ji mbono Ɔsɔwɔ aragha!

²⁶ Ka Kras ayɛyɛ niyiri mbe bi sɔng afɔ negere ɛnɛ.”

²⁷ Ka Jisɔs ajam nɔtɔrɔ mbe bi Mosis na Abono Ɔsɔwɔ wɔɔ ayɛnɛ ka nwɛr Ɔsɔwɔ atebɛ atɔ mbɔ.

²⁸ Si Jisɔs na asɔgba ɛyɛ aba akpere ɛjɛbɛ ji ajɔ amo, Jisɔs ane nasi akpagha na amogho kisi.

²⁹ Ka mbɔ agɔrɛ kɛtingitingi, “Ka fa nanɛrɛ, nogo emekpere; ofo ɛmakan.” Ka Jisɔs amo ama ka na mbɔ.

³⁰ Ngara yi ajig na mbɔ ka okpokoro, akɔ brɛk, akag Ɔsɔwɔ same, akɛbɛ ajam mbɔ nɛkɛ.

³¹ Ka amar asar mbɔ arengɛ, ka atara asighi mbɔ.

³² Ka arag na atɛ nɔyɔ ka, “Nete ɛjɔ ɛyɛbɛ warr sa aribi mbe bi ayɛnɛ ka nwɛr Ɔsɔwɔ atɔ warr sɛ ɛjɔ ɛjɛn ka mba.”

³³ Asɔgba ya aba atam naosunosu afɛnɛ ya Jɛrusalɛm, gayɔ ya akɔrɔ asɔgba wobo na wiwi, na baga ba ajɔ na mbɔ, agba mfo bibi

³⁴ ka arag “Ɛdɛdɛghɛ ji! Ntaa amɛ fɛnɛ anyimi ajɔ ka nekpen, Simɔn amɛ yɛ.”

³⁵ Ka asɔgba ɛyɛ aba ba afɛnɛ Emmas atɔ mbɔ ji ɛwɛmɛ ka mba si mbɔ arengɛ ka ngara yi akɛbɛ brɛk.

Jisɔs aru asɔgba ɛyiɛ

³⁶ Si mbɔ akpagha ragha ateb mbe bi, Jisɔs fɔnɔ aru ama yimi ka ɛbɔngɔ mbɔ ka atɔ mbɔ, “Nanaa ɛjɔ nanɛrɛ.”

³⁷ Ɔbɔn ene mbɔ, ateb akana si mbɔ ya ayɛ nkuanɛ.

³⁸ Ka atɔ mbɔ, “ɔbɔn ene war jɛ, ka nang ka nete ɛnɛrɛ eson na mfab?

³⁹ Sɛngɛ abɔ ɛyaa na ajaa ɛyaa, Mmɛ fɔnɔ yɔ! Ba kɔmɔm ɛyɛ; nkuanɛ emumu na ɛkab akpem, ka mmɛ mkpekpe.”

⁴⁰ Ka ngara yi ama rag mbe bi wɔɔ, atɔngɔ mbɔ abɔ ɛyɛ na ajaa.

⁴¹ Ɛyɛbɛ nete na ɛkpɔghɔ biji ɛsɛrɛ mbɔ ariwanga atama, ka abɔmmɔ mbɔ, “Ekpekpe jɛ ɛnɛghɛ fa?”

⁴² Ka akiɛ nnya alab ya ananaa,

⁴³ ka ataba anɛ fa ka nibri mbɔ.

⁴⁴ Ka Jisɔs atɔ mbɔ, “Jina ji ntɔ war ngara yi mkpagha nde nanɛrɛ: Kpere ejo ji ayɛnɛ atebem ka nwɛr a ejighi Mosis na Abono Ɔsɔwɔ na Sam ɛwɛmɛwɛmɛ.”

⁴⁵ Ka ane mbɔ, ka sɔng kpere ji ayɛnɛ ka nwɛr Ɔsɔwɔ eribi mbɔ.

⁴⁶ Ka atɔ mbɔ, “Jina ja ayɛnɛ: Kras ayɛ niyiri akpɔ ka ɛtɔɔngɔ afo asa afɛnɛ anyimi ajɔ ka nekpen,

⁴⁷ anɛ arag ano Ɔsɔwɔ ka mbeng ɛyɛ atɔ eying kpakpa, ya abagha na ɛyanga nekpen na ɛtamasighi abibi afɛ jam ka Jɛrusalɛm.

⁴⁸ War ba ɛjɔayɛ mbe bi ɛwɛmɛ.

⁴⁹ Nto Mbara Nɛfɛb nkɛ war yi Nsɔjaa atama sa ato: ka ba jɔ fa ka Jɛrusalɛm tɛtɛ Ɔsɔwɔ akɛ war nsam ya ru ka bɔsɔ.”

Akɔ Jisɔs amo ya bɔsɔ

⁵⁰ Ka atɔɔngɔ Jisɔs aru ya Jɛrusalɛm amo ya Bɛtani, ka atab abɔ ɛyɛ ka bɔsɔ akag njɔ anara mbɔ.

⁵¹ Sa ajɔ anara mbɔ, atamasighi mbɔ ka akɔɛ amo ya bɔsɔ.

⁵² Ka asɔgba Jisɔs akɛmɛ agba akagɛ ka afɛnɛ ya Jɛrusalɛm na ntakpa ɛyɛbɛ nete.

⁵³ Ka ajɔ ka nju Ɔsɔwɔ akagha Ɔsɔwɔ kpere ngara.