Luk 19 - Nde-Nsele-Nta LP NT Portions

Jisɔs na Sakieus

¹ Jisɔs anam ka Jɛriko ajɛn asing ka ɛjɛbɛ ji.

² Munnu wiwi ajɔ nton a ba ɛkiɛ taksi abengɛ si Sakieus ka ajɔ ɛfanga nnɛ.

³ Ajɔ alɔg sa ayɛ nagana nnɛ yɔ Jisɔs are, ka arima ayiɛ atebsi agbɛnɛgbɛnɛ sɛ ɛbɔngɔ esono.

⁴ Ka abɛ amo kisi ama ayar ntakpa ete sɔng ayɛ Jisɔs, atebsi asing ka mba yi.

⁵ Ngara yi Jisɔs asi ka mfo bi, atab amar abri ka bɔsɔ atɔa, “Sakieus, sɛnɛ ba ɛbanɛban. Ɛnɛji njɔ ka nju ɛyɛ.”

⁶ Ka Sakieus asɛnɛ ɛbanɛban ama kpere Jisɔs na ɛyɛbɛ nete.

⁷ Anɛ wɔɔ ba ayɛ ji ɛwɛmɛ ajam kpɛn, “Jisɔs amomo nereb ka nju a nne a abibi afɛ.”

⁸ Ka sakieus atam ayimi atɔ Ntaa, “Ntaa, yɛ! Nkɔghɔ ɛja mbe ɛbaa nkɛ akpak, ka kpere nnɛ yi nneɛ amar, ntɔnɔ tɔnɔ nkiɛ ka mkpɛ ɛnɛ.”

⁹ Ka Jisɔs atɔɛ, “Ɛnɛji nanagha ɛma ba ka nju yi, atebsi munnu yɔ, atama, re mmɔ a Abraam.

¹⁰ Ka Mmɔ a Munnu aba ama sɛb afɛnɛ anagha anɛ ba atantan.”

Ɛbɛɛ akpugha ya abeng si Mina

¹¹ Sa anɛ ajɔ ayongo atɔng ka kpere ejo ji Jisɔs ajɔ arag, Jisɔs atuu mbɔ ɛbɛɛ ngara yi ame kpere Jɛrusalɛm ka anɛ akana si oton Ɔsɔwɔ ɛjam munu.

¹² Ka arag: “Munnu wiwi ya aru ka ɛyagha oton amo ka ndaba mba ɛka sɔng akonɛ oton ka afɛnɛ.

¹³ Sɔng atam abeng abɔanju ɛbɛ wobo ka akɛ kpere nnɛ akpugha mina. Ka atɔ mbɔ, ‘Kɔ akpugha yafa ene nigbingi, tɛtɛ mmannafɛnɛ.’

¹⁴ “Ka munnu yɔ asagga anɛ ɛbɛ sagga, ka ato bɛrɔghanto sa ama tɔɛ, ‘Warr erisɛb munnu yɔ sa ajɔ nton ɛwɛrɛɛ.’

¹⁵ “Ka akono kono munnu yɔ oton, ka afɛnɛ njam. Naosunosu abeng abɔanju ɛbɛ ba akɛ akpugha ama yimɛ ka nibri, sɔng agbɛrɛ nsing asɛ ya anɛ.

¹⁶ “Mgbɔghamba nnɛ aba ama rag, ‘Ntaa, akpugha yɔ ɔkɛm nnɛ nsing akpugha mina wobo mkpɛnɛ na yɔ ɔkɛm.’

¹⁷ “Nsɛnju arag, ‘Omene etingi mmɔanju ɛwaa! Si omene nkokomo noto yi nkia, kɔ ɛjɛbɛ wobo wɔ ofe.’

¹⁸ “Ɛtɔɔngɔ mmɔanju aba ama rag, ‘Ntaa, nnɛ nsing mina ɛrɔn mkpɛnɛ na yɔ ɔkɛm.’

¹⁹ “Nsɛnju ɛwɛ akpɛ, ‘Wɔ fe ɛka bɔrɔn.’

²⁰ “Ka mmɔanju yɔga aba ama rag, ‘Ntaa, yɛ mina ɛya; nkɔ mbar ka afiafɔng.

²¹ Ɔbɔn enem ɛkia, atebsi wɔ nkora munnu yɔ. Ɔkɔghɔ ji erijɔ jaja ɔfɛnɛ ufu ji ori bɔm.’

²² “Nsɛnju atɔɛ, Wɔ ebibi mmɔanju! ‘Nkɔghɔ ano nnyɔ ɛyɛ nnuma. Wɔ yɔ onyi si mmɛ nde nkora munnu, nkɔghɔ ji erijɔ jajaa nfɛnɛ nfu ji ndi bɔm?

²³ Nang ka orikag akpugha ɛyaa ka nju etonga akpugha, sɔng nkru mankɔ na nkonanjam?’

²⁴ “Ka atɔ anɛ ba ayim fa, ‘Tabɛ mina ɛyɛ ɔkɛ mmɔanju ya akpe mina wobo.’

²⁵ “Ka atɔɛ, ‘Ntaa, eyoghoyoghoga akpe mina wobo!’

²⁶ “Ee nton yi akpɛ, ‘Nɔngɔ mmɛ ntɔ kpere nnɛ ya anɛ nsing ka ji akiɛ, akpɛnɛ ɛga, ka nnɛ ya arinɛ nsing a jaji, araggasi mankokomo ya akpe atabɛtaba.

²⁷ Ka anɛ baujing ɛbaa ba arisɛbsi mmɛ njɔ nton a mbɔ, ba na mbɔ fa eyon mbɔ ka nibri ɛnaa.’ ”

Jisɔs anam ka Jɛrusalɛm si Nton

²⁸ Si Jisɔs akan nutuu ɛbɛɛ ji, ajɛn amo kisi, amogho ya Jɛrusalɛm.

²⁹ Sa ajɛn akpere Bɛtfej na Bɛtani ka nkɔa Nkonkon a Olib, ato asɔgba aba amo kisi, atɔ mbɔ,

³⁰ “Sɔng ga ka ɛjɛbɛ ji ere kisi, sɔ ɔnama, ɔyɛ ndɔra nnyanɔsɔn ya akan fa, yi nnɛ akaghatɔghɔ komo. Fɔngngɔ ɔba nabi fa.

³¹ Ka kpere nnɛ ya abɔmma si, ‘Nang ka ɔfɔngngɔ?’ Tɔɛ si, ‘Ntaa asɛbsɛb.’ ”

³² Ka anɛ ba ato mbɔ amo kisi amayɛ nsɛrɛ si Jisɔs atɔ mbɔ.

³³ Sa ajɔ afɔngngɔ, abɔfɔnɔ abɔmmɔ mbɔ, “Nang ka ɛfɔngɔ ndɔra nnyanɔsɔn yi?”

³⁴ Asɔgba akpɛ, “Ntaa asɛbsɛb.”

³⁵ Ka aba na ndɔra nnyanɔsɔn ama kɛ Jisɔs. Ka akɔ akpagha bɛnɛmɛ mbɔ abono ka mfo bi anɛ ajɔ afɛnɛ afe Jisɔs akomo.

³⁶ Sa ajɔ amo, anɛ ajug akpagha bɛnɛmɛ mbɔ ayan ka mba.

³⁷ Ngara yi akpere Jɛrusalɛm, ka mfo bi mba asɛnɛ amo ya Nkonkon a Olib, ntakpa ɛbɔngɔ asɔgba ɛyɛ agɔngɔ niyighi ka atighi Ɔsɔwɔ gbogbo ka akpɔgisi a mbe ya amene amar mbɔ ayɛ.

³⁸ “Ɛnara ɛjɔ ɛkɛ Nton ya abagha ka mbeng a Ntaa!” “Nanaa ka etek Ɔsɔwɔ na negere ɛjɔ ɛkɛ Ɔsɔwɔ ya are ka bɔsɔ!”

³⁹ Ka Bafarisi bamɔng ka ɛbɔngɔ atɔ Jisɔs. “Nkpekpene, yam asɔgba ɛya agɔ ɛkan!”

⁴⁰ Jisɔs akpɛ, “Ntɔ war, agɔ na ɛkan, atan agɔngɔ nitighi Ɔsɔwɔ gbogbo.”

⁴¹ Sa aba akpere Jɛrusalɛm ayɛ ɛjɛbɛ, anan ateb ji ɛwɛmɛ ɛkɛ anɛ ba ɛjɛbɛ ji

⁴² arag, “Nasi enyinyi ji ɛbagha na nanaa ɛnɛji, ka munu ɔyɛm, atebsi amawarbar.

⁴³ Ka ngara aragha bagha yi anɛ baujing ɛbrɛ akag ɛba asibi war, ka agbanga war asibi, aba war akag.

⁴⁴ Arɔbɔ war kapakpa na anɛ ɛbrɛ. Nju yayi asam ka ɛyagha ɛjɛ, atebsi eritama ngara yi Ɔsɔwɔ aba sa ama nagha war.”

Jisɔs amo ka Nju Ɔsɔwɔ

⁴⁵ Ngara yi Jisɔs anam ka Nju Ɔsɔwɔ ka ajam nakama ba egora mbe ka nna nju sa aru.

⁴⁶ Atɔ mbɔ, “Ayɛnɛ ka nwɛr Ɔsɔwɔ si, ‘Nju ɛyaa ajɔ nju a njɔ’ ka ɛmɛfɛnɛ ɛkɔ ɛnɔngɔ ‘mfo bi anyaju abibi.’ ”

⁴⁷ Jisɔs ajɔ akpene ka nju Ɔsɔwɔ kpere ofo. Ka nton a Baɛjɔ Ɔsɔwɔ, bekpena ejighi na anɛ bisi ka ɛbɔngɔ anɛ ba ajɔ alɔg sa ayonɛ.

⁴⁸ Ka ariyɛ mba, atebsi anɛ wɔɔ ajɔ ayongo atɔng akiɛ, arisɛbsi nono nani esing mbɔ.