Luk 18 - Nde-Nsele-Nta LP NT Portions

Jisɔs akpene asɔgba ɛyɛ sa ayiri ka njɔ

¹ Ka Jisɔs atuu ɛbɛɛ akɛ asɔgba ɛyɛ yɛ ɛtɔngɔ si ayiri ka njɔ ekimbɔ yongo.

² Jisɔs arag: “Ɛfɔ mkpegha banaa ya ajɔ ka ɛjɛbɛ jiji ya arijɔ abɛghɛ Ɔsɔwɔ ka afana afɔ ngara ka ji anɛ akana.

³ Ka ɛfɔ manka yi nnu akpɔ asighɛ ka ɛjɛbɛ ji ajɔ aba sa abagha ama gɔrɔ mkpegha banaa, aragha, ‘Nagham ka efegheayɔ ji mkpe na nnɛ a ujing ɛwaa.’

⁴ “Atɔghɔ tɛn ka ma ngara. Kɛkannanjam atɔ nɛnɛ, ‘Ɛjɔgasi ndambɛghɛ Ɔsɔwɔ ka mfɔ ngara nkɛ anɛ,

⁵ ka ateb efegheayɔ ji manka yɔ ya akɛm, nɔngɔ mmɛ nkana nkiɛ ɛdɛdɛghɛ, sɔng akikpɛ ba ama feghem ayɔ!’ ”

⁶ Ka Ntaa arag, “Yongo atɔng ka ji ebibi mkpegha banaa aragha.

⁷ Ka erusi Ɔsɔwɔ amam aba na nanagha ma kɛ anɛ ɛbɛ, ba anan abengɛ efen na enokon? Arɔbɔrɔbɔ ngara ka anagha mbɔ?

⁸ Nɔngɔ ntɔ war, mkpegha banaa akpeghe ɛnɔb akɛ anɛ a ɛbɛ ɛbanɛban. Ka Mmɔ a Munnu ayɛyɛ ntama ka eying ngara ya abagha?”

Ɛbɛɛ nnɛ Farisi na nkia Taksi

⁹ Jisɔs atuu ɛbɛɛ ji akɛ anɛ ba akpe ntama ka biji mbɔ si mbɔ afɔfɔ abri anɛ baga ɛsara amar:

¹⁰ “Ɛfɔ ngara yi abunu aba amo ka nju Ɔsɔwɔ ama kag njɔ: Wiwi ajɔ nnɛ Farisi, yɔga nkia taksi.

¹¹ Nnɛ Farisi atam ka biji ɛbɛ akag njɔ: ‘Ɔsɔwɔ, same atebsi ndem nasi anɛ baga anyaju, bene a abibi afɛ, na ba ɛka na aka anɛ na anu anɛ sɛ nkia taksi yɔfa.

¹² Yin njɔ njan afo aba ka nsɛ nkag njɔ, nfɛnɛ nkɛ ejo jiji ka ɛbɔngɔ wobo ka mbe bi mkpe wɔɔ.’

¹³ “Ka nkia taksi ayimi ga daghadagha. Ari tab amar ɛyɛ abri ka bɔsɔ, ka afu abɔ ɛyɛ ka nggang akag njɔ arag ‘Ɔsɔwɔ, fɔ ɛkpɔgisi kɛm, mmɛ nne a abibi afɛ!’

¹⁴ “Nɔngɔ mmɛ ntɔ war, nkia taksi, akru etek na ɛyɛbɛ nete, atebsi amɔsɔ ka ɔbɔ Ɔsɔwɔ, nnɛ Farisi sang ya atab biji. Ka kpere nnɛ ya atab biji asɛnɛ mbɔ sɛnɛ, ka ba asɛnɛ nimbɔ atab mbɔ tab ayar.”

Jisɔs anara abɛnsɛ

¹⁵ Anɛ bantingi aba na abɔ a mbɔ sɔng Jisɔs akono mbɔ ɔbɔ. Ngara yi asɔgba ɛyɛ ayɛ ji ɛwɛmɛ, ayam mbɔ.

¹⁶ Ka Jisɔs abeng abɔ aba ka arag, “Nɔngɔ atɔtɔng abɛnsɛ aba, kimbɔ gbanga, atebsi Oton Ɔsɔwɔ are ɛkɛ anɛ ba atama oton Ɔsɔwɔ nasi abɛnsɛ.

¹⁷ Kɛdɛdɛghɛ ntɔ war! Kpere nnɛ ya arikɔ Oton Ɔsɔwɔ nasi mmɛnsɛ ka etek Ɔsɔwɔ anamam.”

Ɛfanga nnɛ na Oton Ɔsɔwɔ

¹⁸ Nnɛ isi abɔmmɔ Jisɔs, “Etingi nkpekpene, munu nne nang ka mfɔ nekpen niˈnkankan?”

¹⁹ Jisɔs akpɛɛ “Nang ka obengem si etingi? Wawi arem ya are etingi erising Ɔsɔwɔ nanting.

²⁰ War enyinyi ajighi: ‘Kika na nnu a nnɛ si nka nnɛ, kiyon nnɛ, kiyu uju, kirag adɛ ɔlagha nnɛ wawi kag nnaja na nsɔja.’ ”

²¹ Munnu yɔ akpɛ, “Mmɔ nɔngɔ ajighi ya wɔɔ jam ka ngara yi mkpagha nde nsɔbanɛ.”

²² Si Jisɔs ayog mkpɛ ɛyɛ, arag, “Ekpe ejo jiji jɔ ɔkagha ne. Goro kpere ejo ji okpe ɔkɔ akpugha ɔkɛ akpak, sɔng ɔfɔ afang ka etek Ɔsɔwɔ. Ka ɔba ɔmɔtɔɔngɔm.”

²³ Ka ngara yi munnu yɔ ayogho ejo ji, ajɔ kam, atebsi ajɔ ntakpa ɛfanga nnɛ.

²⁴ Jisɔs asɛngɛ ka arag, “Ekorokoro ka ɛfanga nnɛ ɛnam ka Oton Ɔsɔwɔ!

²⁵ Kɛdɛdɛghɛ, ere ndɛndɛ si nnyanɔsɔn asing ka ɛbanga nga si ɛfanga nnɛ ɛnam ka etek Ɔsɔwɔ.”

²⁶ Ka anɛ ba ayogho abɔmmɔ, “Ka yɛnnɛ yɔ ya asɔ?”

²⁷ Jisɔs akpɛ, “Ji nnɛ arighima ane Ɔsɔwɔ anene.”

²⁸ Ka Fita atɔɛ, “Ɛmatam esighi ji ekpe wɔɔ ɛtɔɔnga.”

²⁹ Jisɔs atɔ mbɔ, “Kɛdɛdɛghɛ ntɔ war kpere nnɛ ya atam etek ɛjɛ sɛ nka sɛ abɔannyɛ sɛ nnyɛ na nsɛ sɛ abɔ bɛ ateb Oton Ɔsɔwɔ

³⁰ akpeghɛ ka ebe ngara ka eying jifa na ji ɛbagha ba na nekpen niˈnkankan.”

Jisɔs arag mkpɛ ɛsa ateb nuku ɛnɛ

³¹ Jisɔs abeng asɔgba wobo na aba ayimi ka nkɔ ka atɔ mbɔ, yongo atɔng! “Ekpomo ya Jɛrusalɛm, yi kpere ejo ji Abono Ɔsɔwɔ ayɛnɛ ateb Mmɔ a Munnu ɛbagha ɛmɛwɛmɛ.

³² Asighɛ abɔ akɛ anɛ ba arigbɛrɛ Ɔsɔwɔ ayɔnɛ, atoɛ, ka asu atɛn awurɛ;

³³ amɔbɛ mɔb ayonɛ. Ka afo asa afɛnɛ anyimi.”

³⁴ Ka asɔgba erimbɔ ribi mbe bi Jisɔs ajɔ arag ateb, ano ya sa aru abibbib arigbɛrɛ.

Jisɔs atab nnagga amar mbɔɔ a mbɔɔ

³⁵ Si Jisɔs ajɔ aba ame kpere Jɛriko, nnagga amar munnu ajig ka nkɔa mba abɔɔ mbɔɔ.

³⁶ Ngara ya ayogho ɛbɔngɔ esingi, abɔmmɔ ga jɛji.

³⁷ Atɔɛ, “Jisɔs nnɛ a Nasarɛt ya asing ga.”

³⁸ Abenge gbogbo, “Jisɔs, Mmɔ a Debid, fɔ ɛkpɔgisi kɛm!”

³⁹ Anɛ ba ajɔ atɔɔngɔ Jisɔs ayamɛ gɔ ɛkan, ka abenge gbogbo, “Mmɔ a Debid, fɔ ɛkpɔgisi kɛm!”

⁴⁰ Ka Jisɔs ayimi atɔ anɛ ma ba nanɛ. Ngara ya ajɛn akpere, Jisɔs abɔmmɛ,

⁴¹ “Jɛji ji ɔsɛb si nne nkia?” Akpɛ “Ntaa, nsɛb si nyɛ mfo.”

⁴² Ka Jisɔs atɔɛ, “Yɛ; ntama ɛyɛ amane ɔnɔb.”

⁴³ Naosunosu ayɛ mfo ka atɔɔngɔ Jisɔs, atighi Ɔsɔwɔ. Ngara sa anɛ wɔɔ ayɛ, ji ɛwɛmɛ atama atig Ɔsɔwɔ.