Luk 17 - Nde-Nsele-Nta LP NT Portions

Abibi afɛ, Ntama, Noto

¹ Jisɔs atɔ asɔgba ɛyɛ: “Mbe bi ɛsɛrɛ anɛ agbɔ ɛwɛmɛwɛmɛ, ka esiyiri akɛ nnɛ yi mbe bi esing ka biji ɛbɛ ɛba.

² Ka ɛnɔnɔb akɛnnɛ atan ɛgɔgha mbe ka ɛmɛn asibi ama tob ka aya sa ama sɛrɛ abɛnsɛ bafa agbɔ ka abibi afɛ.

³ Ma baba nɛnɛrɛ. “Ka mmɔannaja yɔnu si yɔka ane a na ebibi ejo, yamɛ; ka ayangana, tamsighɛ.

⁴ Araggasi agbɔ a mkpɛ esimma ka ofo, ka mkpɛ yi esimma afɛnɛ njam ama tɔa si ‘Mmayanga,’ tamsighɛ.”

⁵ Bafɔsil atɔ Ntaa, “Ne ntama ɛyɛrɛ aram!”

⁶ Ntaa akpɛ, “Araggasi ntama ɛyɛrɛ asɛb nasi mmog mɔsta, ɔmɔma ɔtɔ ntakpa ete yifa, ‘si yab ɔmɔ yimi ka aya,’ eyoghayog.

⁷ “Arena nnɛ wiwi ka ɛbɔngɔ ɛjɛrɛ akpe mmɔanju ya ababa ɔjɔ. Ka aru ya ɛgbɛ akru, ‘Ɔtɔ tɔ mmɔanju si ba ma jɔ nji ɔnɛ ejonɛnɛghɛ’?

⁸ Ɔtɔɛ si ‘Tɔghɔm kɛ jajaa, otongo biji ɔjɔ ubrim mmanna nɛ wɔɔ nwɔ; ka ɔmɔ ɔnɛ jaja’

⁹ Nsɛnju akagkag mmɔanju same atebsi ane ji aragsi ane?

¹⁰ Wɔ titi, ngara si ɔmannane kpere ejo ji atɔa si one, ragsi, ‘Warr abɔanju erisi; ka ene noto ɛnɛrɛɛ nanting.’ ”

Jisɔs atab anɛ ba abini wobo

¹¹ Munu Jisɔs are a mba amogho ya Jɛrusalɛm, asing ka aranga Sameria na Galili.

¹² Ngara si ajɔ amo ya ɛjɛbɛ, anɛ wobo ba afɔ abini arag sa abagha akɔrɛ. Ayimi ga daghadagha

¹³ ka abenge gbogbo, “Jisɔs, Ntaa, fɔ ɛkpɔgisi kɛ warr!”

¹⁴ Ngara ya ayɛ mbɔ, arag, “Sɔng, ɛmɛ tɔngɔ Baɛjɔ Ɔsɔwɔ nɛnɛrɛ.” Nsɛrɛ sa amo, abini akan.

¹⁵ Wiwi ka ɛbɔngɔ mbɔ, ngara si ayɛ si amɔnɔb, afɛnɛ njam, atighi Ɔsɔwɔ gbogbo.

¹⁶ Ajɛrɛ akpere Jisɔs akaghɛ nnyɔ ka ji ane akiɛ ka nnɛ Sameria yɔ.

¹⁷ Jisɔs abɔmmɔ, “Anɛ wobo wɔɔ sang anɔbɔ? Ka baga asibawobo ma?

¹⁸ Nnɛ wawi arifɛnɛ ama tig Ɔsɔwɔ erising njɛnanɛ yɔfa nanting ya afɛnɛ amager Ɔsɔwɔ?”

¹⁹ Ka atɔɛ, “Tam sɔng; ntama ɛya amane ɔnɔb.”

Jisɔs akpene ateb ngara Oton Ɔsɔwɔ aragha ɛbagha

²⁰ Mkpɛyiyi, Bafarisi abɔmmɔ bagha ngara yi oton Ɔsɔwɔ ɛbagha, Jisɔs akpɛ, “Oton Ɔsɔwɔ erem ejo ji ɔyɛ ka amar,

²¹ ka anɛ ama ragsi ‘Fayɔ yi ere,’ ‘Kɛfɛnɛ ɛjɔ fa,’ atebsi oton Ɔsɔwɔ ere fa nanɛrɛ.”

²² Ka arag na asɔgba ɛyɛ, “Ngara araghabagha yi ɛsɛb si ɛyɛ ofo bi Mmɔ a Munnu abagha, ka ɛyɛm.

²³ Anɛ atɔ war, ‘Fayɔ ya are!’ Ka ‘Afana ajɔ fa!’ Kimbɔ tɔɔngɔ.

²⁴ Nsɛrɛ si mgbambri anyanga bɔsɔ ɛfɔngɔ ɛjam ka nkannisi yiga etob ka nkannisi yiga, nayɔ yi Mmɔ a Munnu ajɔ ka ofo ɛbɛ.

²⁵ Ka oterem ɔsɔ niyiri, eying jifa atɛnɛtɛn.

²⁶ “Nsɛrɛ si ɛjɔ ka afo Nua, nayɔ yi ɛtammɛ ɛjɔ ka ofo Mmɔ a Munnu.

²⁷ Ka afo ya amisingsing anɛ ajɔ anɛ, awɔghɔ, ane mban akia abɔ ka mban tɛtɛ isi ka ofo bi Nua anam ka ɔgbaa, Ka nnyɛn aba ama tanna mbɔ wɔɔ.

²⁸ “Ɛtammɛ ɛjɔ na ka afo a Lɔt. Anɛ ajɔ anɛ awɔghɔ, ago mbe agoro, abɔmmɔ asii buju.

²⁹ Ka ofo bi Lɔt atam ka Sɔdɔm ngon eru ka bɔsɔ ɛsɛnɛ ifi mbɔ wɔɔ.

³⁰ “Ɛtammɛ ɛjɔ na ka ofo bi Mmɔ a Munnu afɛnɛ ka negere.

³¹ Ka ofo bifa nnɛ wawi arem ya akomo ka bɔsɔ nobono nju, na mbe ɛbɛ ka nnanju, ya asɛnɛ ama ton. Ɛtammɛ ere na, wawi arem ya are ka ɛgbɛ ya afɛnɛ njam ateb mbe.

³² Gbɔntera nka Lɔt!

³³ Kpere nnɛ ya alɔg sa ababa nekpen ɛnɛ ɛtanɛtan, ka kpere nnɛ ya asighi abɔ ka nekpen ɛnɛ akɛ Ɔsɔwɔ, yɛ ya afɔ nekpen.

³⁴ Nɔngɔ ntɔ war, ka enokon jifa anɛ aba ajɔ ka ntefeghe yiyi; akɔ wiwi, wiwi asa.

³⁵ Abaka aba ajɔ na agɔg mbe; akɔ wiwi yɔga asa.

³⁶ (Abunu aba ajɔ ka ɛgbɛ; akɔ wiwi yɔga asa).”

³⁷ “Ntaa, fangyɔ?” Asɔgba abɔmmɔ. Jisɔs akpɛ, “Mfo bi iku nnɛ ɛnɔng, fayɔ yi atɛrɛ agba.”