Luk 11 - Nde-Nsele-Nta LP NT Portions

Jisɔs akpene Ateb Njɔ

¹ Ofo bibi Jisɔs ajɔ a akag njɔ ka ekpeghe mfo. Ngara sa akanna, nsɔgba wiwi atɔɛ, “Ntaa, kpene warr sa akag njɔ, nasi Jɔn akpene asɔgba ɛyɛ.”

² Atɔ mbɔ, “Ɛkpanna kag njɔ, rag si: “ ‘Nsɛ, nɔngɔ nogogho ɛjɔ ɛkɛ mbeng ɛya, nɔngɔ oton ɛba ɛba.

³ Kɛ warr jɛ ɛnɛghɛ kpere ofo.

⁴ Tamsighi warr ka abibi afɛ ɛyɛrɛɛ, si warr ɛmatamesighi anɛ ba ane warr ebibi. Ka fene warr ekigbɔ ka nagara.’ ”

⁵ Ka atɔ mbɔ, “Arenasi okpe ntɛ, ka omo ka nnuenokon ɔmɔ tɔɛ, ‘Ntɛ, kpɛnnɛm mgba brɛk ɛsa;

⁶ atebsi ntɛ waa aru ya nɛjɛn aba ka jaji mkpem ji nkiɛ.’

⁷ Ka ntɛ wɛ yɔ akpɛ ga ka nkɛbɛ, ‘Kim fegheayɔ. Mmagbanga mbu, abɔ baa anɔng ga nanaa ka ntefeghe. Mmam ntam nkia jaji.’

⁸ Ntɔ war, ɛjɔgasi amam atam akia brɛk atebsi ntɛ wɛ yɔ, ka ateb arigɔ nakara nsɔn afeɛ atam akia ji asɛbɛ.

⁹ “Ka ntɔ war: Bɔmmɔ sa akɛ war kɛ; sɛb sɛ ɛyɛyɛ; kar si mbu eribiribi.

¹⁰ Kpere nnɛ ya abɔmmɔ atabataba; nnɛ ya asɛb ayɛyɛ; ka nnɛ ya akar ka mbu eribiribi.

¹¹ “Bagha nsɛ yɔ yi mmɔ wɛ abɔmmɛ nnya alab, akiɛ nnyɔ?

¹² Sɛ abɔmmɛ eji nkɔk, akiɛ ɛnang?

¹³ War ba ebebbeb, enyi sa ɛkɛ abɔ brɛ anɔba mbe, kafanga nsɔjɛrɛ ya are ka bɔsɔ arighi kɛ anɛ ba abɔmmɔ Mbara Nɛfɛb!”

Jisɔs atɔngɔ si nsam ɛyɛ ariru ka mfo a nnam

¹⁴ Jisɔs ayighi ebibi etughu ka biji nnɛ ya arijɔ arag nono. Ngara yi ebibi etughu eru, munnu ya arijɔ arag nono arag, ɛbɔngɔ biji ɛkpɔ mbɔ.

¹⁵ Ka bantingi arag, “Ka mbeng Bɛlsɛbɔb, Nton a abibi atughu, yiyɛyi ya ayighi abibi atughu.”

¹⁶ Bantingi agarɛ si ane ejo ndenge ya aru ka bɔsɔ yi ɛtɔngɔ si Ɔsɔwɔ ya atoɛ.

¹⁷ Jisɔs agbɛrɛgbɛrɛ nkana mbɔ ka atɔ mbɔ: “Kpere oton bi erifɔ mkpa ayamayama, ka kpere nju yi arifɔ mkpa agbɔghɔgbɔ.

¹⁸ Ka nnam arinafɔ mkpa, nɔyɔ mbɔ enenang eyimi? Ndag na atebsi ɛkana si nkɔ nɔyɔ ka mfo Bɛlsɛbɔb nkama abibi atughu.

¹⁹ Munu nkamana abibi atughu ka mbeng a Bɛlsɛbɔb, bagha mbeng yi ya anɛ ɛbrɛ akɔghɔ akama mbɔ? Nɔngɔ mbɔ ajɔ bakpegha banaa ɛbrɛ.

²⁰ Ka arenasi nkama abibi atughu ka mbeng Ɔsɔwɔ, erusi oton Ɔsɔwɔ ɛmaba ɛtɔb war.

²¹ “Ngara yi nkora biji a munnu, amotongo biji na mbe nɔyɔ ababa nju ɛyɛ, anyaju anamam ayu mbe ɛbɛ.

²² Ka nnɛ yɔntingi ya akora agɛ, aba na ama alɔg ama nanɛ atabɛ mbe nɔyɔ bi yɛ akonoekpo afɛnɛ aton mbe ɛbɛ amo na bi.

²³ “Nnɛ ya arikpa nanaa are nnɛ ujing waa, ka nnɛ ya arimtɔb atongo, asamasama.

Baba si ebibi etughu ɛmama ɛfɛnɛ

²⁴ “Ngara yi ebibi etughu ɛmannaru ka biji nnɛ, emogho ka nyo a mfo asɛbɛ esiayɔ ka arina yɛ. Ka aragsi, ‘nfɛnɛ ka nju yi ntamsighi.’

²⁵ Ngara yi ebibi etughu esi, ɛyɛ amɛ fɛngɛ nju afɔ atongo mfo.

²⁶ Ka amakɔ abibi atughu asimma yantingi ya abeb agɛ yɛfɔnɔ, amanam ajɔ fa. Nekpen ni munnu yɔ ɛfan ebeb ɛga ni eyoghoyogho.”

²⁷ Si Jisɔs ajɔ arag mbe bi, manka wiwi ka ɛbɔngɔ ji arag, “Ɔsɔwɔ anara nnaja ya awɛn na afɛnɛ afena.”

²⁸ Akpɛ, “Nɔngɔ ɛnara nayɛ ɛjɔ ɛkɛ anɛ ba ayog nono Ɔsɔwɔ afɛnɛ ane na.”

Ndenga Jona

²⁹ Si ɛbɔngɔ ɛfanga, Jisɔs arag, “Eying jifa ebebbeb. Abɔmmɔ ndenge ɛkpɔgisi ejo, ka ndenge yayi arem erising ya Jona.

³⁰ Si Jona ajɔ ndenge akɛ anɛ ba Ninifɛ, nayɔ Mmɔ a Munnu atamajɔ akɛ eying jifa.

³¹ Nton a manka ka ɛka Sɛba ayimi na anɛ ba eying jifa ka ofo banaa atɔngɔ mbɔ si arima nene, atebsi aru ka ndaba mba ɛka amakɔ ɛwag ka mfo a Sɔlɔmɔn, ka munu nnɛ ya afang aga Sɔlɔmɔn are fa.

³² Anɛ ba Ninifɛ ayimi na anɛ ba eying jifa ka ofo banaa atɔngɔ mbɔ si arima nene, anɛ ba Ninifɛ ayanga nekpen ka ngara yi ayog nono Ɔsɔwɔ ni Jona atɔ mbɔ, munu nnɛ ya afang aga Jona are fa.

Ɔmɔnɔ Biji

³³ “Nnɛ wawi arem ya amɔnɔ ɔmɔnɔ abar ka mfo bi nnɛ arighi yɛ, sɛ akɔ nsɛ akongo. Erising akono ka mfo bi anɛ wɔɔ ayɛ, sɔng kpere nnɛ ya anam ayɛ ɛfɔngɔ.

³⁴ Amar ɛyɛrɛ ya are ɔmɔnɔ biji ɛbrɛ. Ka amar ɛyɛrɛ anɔbna, biji ɛbrɛ wɔɔ ɛjɔ ɛfɔngɔ. Ka amar ɛyɛrɛ arinanɔb, biji ɛbrɛ wɔɔ ɛjɔ ka ejighi.

³⁵ Nɔngɔ ɛjɔ si, ɛfɔngɔ ji ere a ka biji ejighi sang.

³⁶ Ka, biji ɛbrɛ wɔɔ ɛjɔ na ɛfɔngɔ, ekpeghe jaji erigbɔ ejighi, biji wɔɔ ɛjɔ ɛfɔngɔ, nasi ɔmɔnɔ ɛyagha na ka biji ɛbrɛ.”

Jisɔs atuu Bafarisi na bekpena ejighi ɔtɔng

³⁷ Ngara yi Jisɔs ama rag wɔɔ, nnɛ a Farisi abengɛ sa ama anɛ ejonɛnɛghɛ nanɛ; anam ama jɔ sa anɛ ejonɛnɛghɛ.

³⁸ Ka biji ɛkpɔ nnɛ a Farisi, yi Jisɔs arigbɔmba asu abɔ ka anɛ ejonɛnɛghɛ.

³⁹ Ka Ntaa atɔɛ. “Munu, war Bafarisi ɛsɛnnɛ njam a mkpogho na mgbanggbang, nna ga ason na abibi na ɛbara nkɔng.

⁴⁰ Ka war adɛmmɛ anɛ! Nnɛ ya ane njam sang ane nna?

⁴¹ Kɔ ji ekpe ɛkɛ akpak, sɔng kpere ejo ɛfɔ ɛkɛ war.

⁴² “Esiyiri akɛ war Bafarisi, atebsi ɛrɛghɛ ɛkɛ Ɔsɔwɔ ejo jiji ka ɛbɔngɔ wobo ka akokomo mbe bi eru ka ɛgbɛ, nasi nnyan, abakpara na agu ɛtɛn nɛkɛ mbe biga nasi eyima ka ɛdɛdɛghɛ na nɔkɔrɔ Ɔsɔwɔ. Ma kpene mbe bi wɔɔ jaji ekisa.

⁴³ “Esiyiri akɛ war Bafarisi, atebsi atakpa nji akɔr war ka buju mfa Jus na nakagha ka kpere mfo bi emo.

⁴⁴ “Esiyiri akɛ war Bafarisi, atebsi ere nasi anam, ya anɛ ayanga aramagbɛrɛ sa anam ya.”

⁴⁵ Mgbɛra ejighi wiwi akpɛ Jisɔs, “Nkpekpene, si ɔrag mbe bifa, yo otogho warr to titi.”

⁴⁶ Jisɔs akpɛ, “War ba ɛgbɛra ejighi, esiyiri akɛ war, atebsi ɛkɛ anɛ nɔsɔn ni arighima asɔn, warafɔnɔ ɛmam ɛkɔ nnyighibɔ yiyi ɛtɔb mbɔ.

⁴⁷ “Esiyiri akɛ war, atebsi esii anam abono Ɔsɔwɔ, ya akuansisi ɛyɛrɛ ayon mbɔ.

⁴⁸ Yɛ ɛtɔngɔ si ɛmatama ka ji akuansisi ɛyɛrɛ ane; ayon abono Ɔsɔwɔ ka war esii anam a mbɔ.

⁴⁹ Ateb abibi mbɔ, Ɔsɔwɔ ka ɛwag ɛjɛ arag, ‘Nto abono Ɔsɔwɔ na afɔsil nkɛ anɛ ba Isɛrɛl, bamɔng ayonyon bamɔng ane mbɔ niyiri.’

⁵⁰ Erusi Ɔsɔwɔ afe eying jifa ka abono ɛyɛ ya ayon, tɔɔngɔ ka ɛjamannab eying,

⁵¹ jam ka anɔng Ebɛl sii ka anɔng sakaria, ya ayon ka etingting ekpom na mfɔ a mfo bi ere ka nna nju Ɔsɔwɔ. Ntɔ war ɛdɛdɛghɛ, mfe eying jifa ka mbe bi wɔɔ.

⁵² “Esiyiri akɛ war ba ɛgbɛra ejighi, atebsi ɛmagbanga mba yi anɛ ka asing agbɛrɛ Ɔsɔwɔ. Warafɔnɔ erising fa ɛgbɛrɛ Ɔsɔwɔ, ɛfɛnɛ ɛgbanga anɛ ba ka agbɛrɛ Ɔsɔwɔ.”

⁵³ Ngara yi Jisɔs atam asighi mbɔ, Bafarisi na ba ekpena ejighi agɔngɛ nafaba nkoronkoro na abɔmmɔ ya asaghɛ nete,

⁵⁴ ɛyagha arikɛ sɔng abɔbɛ ka ja amanna rag.