Luk 9 - Nde

Jisɛs ayighi Asɔgba abɛ

¹ Jisɛs ayighi anɛ wobo ka abá ka ɛkan ɛjɛ akɛ abɔɔ neyɔ ni ɛgɨgha ajɛ ɛfɨna ɛtab anɛ ka ɛyám biku biku.

² Ka atom abɔɔ si ama kpaŋ ɛtono Ɛsɔwɔ, afɨna atab anɛ ka ayám.

³ Atɔ abɔɔ si, “Ba krɛ fɨne jiku ka nɛjɛn nni, jiku na ka ɛjom nɛyɔ, ɛbam, ɛjonɛnɛghɛ, akpugha, ɛnimɛ ji ɛyaŋa bɛji.

⁴ Njo yiku yi ákɛ war si ɛjɔn, ba ra kaa fa tɛtɛ ɛtam ka ɛjɨbɛ ji.

⁵ Ka ɛjɨbɛ jiku ji ɛtɛnɛ na war, ba kom nsise ka atá ayɨrɛ ba wuru, ɛsika ɛtɨŋɔ ɛbibi abɔɔ.”

⁶ Asɔgba nya atam nɛjɛn, anɛmmɛ bɛjɨbɛ, akpaŋa nnɔbɔ ɛteb atub ɛtono Ɛsɔwɔ, ka ayighi anɛ ayám.

⁷ Ka Ɛrɔd yɔ ajɔnɔ Nton ka Ganini ama yɔk ngana nsɔnɔ nɛgam ni Jisɛs ka Asɔgba ayɛ áne: netem ɛburɛ atubsi árɛ gbɛrɛ nɛgana nnɛ yɔ Jisɛs ajɔnɔ. Abembem anɛ asi áre Jɔn yɔ ami ru ka ɛnam;

⁸ ka bantiŋi, asi Ɛnaija ami fɛnɛ, bantiŋi asi nnɛ ɛwi ka Asɔgba Ɛsɔwɔ ba ami kpɔkpɔ yɔ ami nyimi ka ɛnam ama nem nsɔn.

⁹ Ka Ɛrɔd abɔmɔ ɛnɛ si, mi tɔɔ akibɛ ɛsi Jɔn, nnda nkpɛ yɔk jɛɛ ntubɛ? Ɛneɛ asɛb si ayɛ Jisɛs.

Jisɛs akɛ anɛ ɛgɔr nɛtan ka ɛrɔn ɛjonɛnɨghɛ

¹⁰ Ka Asɔgba ayɛ akru ama tɔɛ kpakpa nsɔn ya abɔɔ ami nem. Akɔ abɔɔ ka nɛbrɛ́ amu ka ɛmɛɛ Bɛtsaida.

¹¹ Abembem anɛ ba agbɛrɛ atɔŋɛ. Yɛ akpere abɔɔ, afɨna akpɨne abɔɔ atub Ɛtono Ɛsɔwɔ, afɨna nem bɛji ɛkoro anɛ ba abɛnɛ ayám.

¹² Ka ndena nɛgo, Asɔgba wobo ka abaa ama kɔŋɛ si “Tɔɔ ɛbɨŋɔ nji ɛsama amu ka bɛjɨbɛ bi ekpere mfa ama sɛb afom bi akaa, ɛsika atɨma ayɛ ɛjonɛnɛghɛ anɛ si mfom bi ɛre na jiku ɛrem.”

¹³ Ka yɛ atɔɔ abɔɔ si, “War ba kɛɛ abɔɔ ɛjonɛnɨghɛ.” Abɔɔ akpɛɛ si “War ɛkpe ngbaa brɛd ɛrɔn ka nnyam anab ɛbaa kantiŋ, ɛrena na ɛmughu ɛma goó ɛjonɛnɨghɛ ji ɛbeŋe abembem anɛ mba”

¹⁴ Atubsi, anɛ asisi ɛgɔr nɛtan ka ɛrɔn. Yɛ afɨna atɔ ɛkan ɛjɛ si, “Nɔŋɔ abɔɔ ajɔn anɛ atan abaá ka wobo ka ɛbɨŋɔ ka ɛbɨŋɔ jiku.”

¹⁵ Nden yi Asɔgba ami nem na,

¹⁶ Jisɛs akɔ ngbáa brɛd ɛrɔn nyi ka nnyam anab ɛbaá, atab amar ka nebo, akak sam, abɛk agbaa brɛd nya akɛɛ́ anɛ ba ɛkan ɛjɛ si abaŋa anɛ kpakpa.

¹⁷ Anɛ ba kprɔb anɛɛ̀ tɛtɛ ayuru, ka Asɔgba ayɛ afɨna akpo arurughu ka abik ya asasaa afɨna soón ɛtaa wobo ka ɛbaa.

Pita ajibi Nɛgana nnɛ yɔ Jisɛs áre, si áre Nninagha

¹⁸ Ka nden yi Jisɛs ajɔnɔ kantiŋ akɨgha njɔm, ɛkan ɛjɛ ɛjɔnɔ ka nɛ: yɛ abɔmɔ abɔɔ si, “Anɛ ara rɨgha si mmɛ nde yɛnɛ?”

¹⁹ Abɔɔ akpɛɛ́ si, Jɔn Nwuru anɛ anab; bantiŋi asi, Ɛnaija; baga asi, ɔré nnɛ ɛwi ka agbɔghamba Asɔgba Ɛsɔwɔ ya ami nyimi aru ka ɛnam.

²⁰ Ka yɛ akpeghe abɔmɔ, “Ka war ɛrɨgha si mmɛ ndé yɛɛ?” Pita akpɛɛ si, “Kɨras yɔ Ɛsɔwɔ amitom.”

²¹ Ka Jisɛs atuú abɔɔ atɔŋ si árɛ nem nnɛ yɔku agbɛrɛ.

²² Afɨna atɔɔ́ abɔɔ si, “Mmɛ mɔanɛ yɔɔ, yɔ Ɛsɔwɔ ató nɛtom, si ma yɛ nɛyiri ka mba mba yiku, abakogho ɛjibɛ, atona ba ɛjɔɔ Ɛsɔwɔ, ka ba yɛna ɛjighi ba Jus atɛnɛm ka áyonom, ka mfɨna nyimi ka ɛnumu afo asaa.”

²³ Ka atɔɔ́ anɛ kpakpa si “Nnɛ yɔku arɨgha na si atɔɔŋɔm, atán ntera bɛji ɛbɛ, atán ntera nsɔn ɛyiŋ, atama nɛyiri ka ɛsi ɛjɨŋa nden nden yiku, ka atɔɔŋɔm.

²⁴ Atubsi, nnɛ yɔ anɔghɔ si ánagha ɛnɛ ɛtanɛtan: ka nɛɛ yɔ akɛm na nekpen ɛnɛ, abɛbɛn nekpen.

²⁵ Atubsi, bɨgha ɛjom ɛjɔnɔ nsiŋ ka nɛbɛnɛ nsɔn ɛyiŋ, wɔ mfɔnɔ ɔkpɔ ka amar Ɛsɔwɔ?

²⁶ Atubsi, nnɛ yɔku yɔ arɨmɛ tɔŋɔ, yɔ ntɔrɔ ɛyɨŋa ɛfɨne nsɔ́n, Mɔanɛ yɔ Ɛsɔwɔ ató si ama nagha ɛyiŋ ɛtɨmɛ ɛfɨnɛ nsɔ́n ka nden yi abɨgha ka nɛgam ɛnɛ, ka bi Nsɛ, ka bi afɔfɔm ba asɔn ateb abɛ.

²⁷ Ka ntɔ war ɛdidɨghɛ, bantiŋi ba áyim mfa akpɔghɔm ka ayɛ ɛton Ɛsɔwɔ.”

Nɛgam ka ɛgon

²⁸ Ɛnumu afo anɨghanɛ, Jisɛs akɔ Pita, Jɔn ka Jems amu ka ɛgon si ama kak njɔm

²⁹ Ɛsika ara kak njɔm, ɛsiamar ɛjɛ ɛyaŋa, nsɔn yi ayɔbɔ ɛbar kɛtiŋi tiŋi ɛfɨnɛ ya na ka ngonó nsan.

³⁰ Ákpɛ bribri, ara yɛɛ anɛ abá, Mosɛs ka Ɛnaija ka abara bɛ nimɛ arɨgha ntɔrɔ ka nɛ.

³¹ Arɨgha atub nɛku ɛnɛ ni akpi ma kpɔ ka Jɛrusanɛm.

³² Amar ara yɛbɛ Pita ka anɛba ajɔnɔ ka nɛ, ka nden yi ányimi, ayɛɛ nɛyɨgha ni Jisɛs ara ya, ka anɛ abaaba ayim ka nɛ.

³³ Nden yi anɛba ájimɛ nɛtɨmɛ asig Jisɛs, Pita atɔɛ si “Ntaa, ɛnɔnɔb yi ɛbá na mfa. Nɔŋɔ war ɛsi ɛkpikpa bɛsaa, ɛkia ɛjɨi, ɛkɛ Mosɛs ɛjɨi, Ɛnaija akru kɔ jika” (arɛ gbɛrɛ ji arɨgha rag na.)

³⁴ Ɛsika akpɨgha rɨgha na, ɛrɨbɛ ka nɛbo ɛmi bɨno abɔɔ. Nɛyɛɛ ni Asɔgba ba ayɛ ɛrɨbɛ ji ɛbɨno anɛba abaa, mfom akub abɔɔ.

³⁵ Ábeeŋe aru ka nɛbo si, “Mɔɔ ɛwɨŋa yɔ mmi yighi yɔ nna: ba yoŋo atɔŋ kɛɛ”

³⁶ Ɛsika ntɔrɔ nyi agɔɔ, ara yɛɛ Jisɛs kantiŋ. Nnɛ nnɛ yɔku ara bɨno nnyɔ, árɛ tɔ nnɛ yɔku titi ɛjom ji abɔɔ ayɛɛ.

Jisɛs atab mgbɔgha mgbigbɔghɔ

³⁷ Ɛtɔŋɔ ɛfo, ka nden yi abɔɔ asɨnɛ ka ɛgon, ntakpa ɛbɔŋo ɛma kɔŋɛ.

³⁸ Nnɛ ɛwi ka ɛbɔŋɔ abeŋe, “Nkpikpɨne, nagha mɔɔ ɛwɨŋa, si mkpe yɛ kantiŋ.

³⁹ Ajɛ amiɛ bom mgbigbɔghɔ yi ɛre neɛ agbɔ atiri nyɔn nyɔn nyɔ́n ka mfán ka nnyɔ ka abeŋe. Ɛkpɛɛ yon atubsi ɛrɛ jɔnɔ tɛtɛ ka ɛsighɛ abɔɔ.

⁴⁰ Ngɔrɔ́ ɛkan ɛja si atabɛ ka árɛ maa.”

⁴¹ War ɛre bɨgha nɛgana anɛ yi ɛrɛ jɔnɔ ɛkɨno netem ka nɛyɔ Ɛsɔwɔ. “Nkaa ɛrab mbaa naŋ ka ɛgbɛrɛm? Ba ŋga ka mɔɔ ɛwa.”

⁴² Ɛsika mɔɔ nyɔ aboo si abá, ɛjɛ bi ɛfɨnɛ tubɛ ka nsise ka ngbigbɔghɔ. Jisɛs akáma nnjɛ nyi, bɛji ɛkoro mɔɔ nnyɔ ka akɔɛ akɛ nsɛ.

⁴³ Nɛgana nɛyɔ ni Ɛsɔwɔ atɨŋɔ ɛkpɔ anɛ kpakpa bɛji. Ɛsika anɛ akpɨgha arɨgha atub ngana nsɔn yi yɛ ane, yɛ akpeghe atɔ ɛkan ɛjɛ si,

⁴⁴ “Ba yoŋɔ atɔŋ ka ji mkpi war tɔɔ: anɛ akpi ma agoro Mɔanɛ yɔ Ɛsɔwɔ ató akɛ anɛ ba ɛjiŋ”

⁴⁵ Ka ji arɨgha ɛrɛ jibi anɛ ba ɛkan ɛjɛ. Árɨgha ka ɛkak ka ɛkak kasɔŋ abɔɔ árɛ gbɛrɛ, ka mfom ára kubu abɔɔ árɛ sab abɔmɛ.

⁴⁶ Asɔgba ajam nɛfaba atɛm atub nnɛ yɔ ajɔnɔ ka ɛsi.

⁴⁷ Ɛsika Jisɛs até nkater abɔɔ, abiŋ ma mɔnsɛ ayimɛ ka ngbaŋa.

⁴⁸ Ka atɔ abɔɔ, si “Nnɛ yɔku yɔ akpere, afɨna anagha mɔnsɛ nna ka mbiŋ ɛyɨŋa, ákperé mmɛ, ka nnɛ yɔ akperem, atɨma akperé nnɛ yɔ atóm. Atubsi, nnɛ yɔ war ɛbri si awiri wiri yɔ agáa faŋ.”

⁴⁹ Jɔn abɔmɛ si, “Ntaa, ɛyɛ nɛɛ yɔ ara kama ajɛ ka mbiŋ ɛya, ɛnɔk si ɛgbaŋɛ atubsi áyɔbɔm ka ɛbɔŋɔ ɛjɨrɛ.”

⁵⁰ “Ba krɛ yɛ gbaŋa, atubsi nnɛ yɔku yɔ árɛ jɔn nnɛ ɛjiŋ ɛwa áyim ka na.”

Ɛjɨbɛ Samariya ɛtɛn Jisɛs

⁵¹ Ɛsika nden kpere yi Jisɛs akpi kru ka bɛsɔ, yɛ atoŋo bɛji ɛsika amughu Jɛrusanɛm.

⁵² Atom ba ateb ateb si agbɔ mbaa ka ɛjɨbɛ ji ka Sameriya ama toŋo mfom anɔŋɛ;

⁵³ ka anɛba ɛjibɛ ji atɛnɛ atubsi agbɛrɛ si asiŋi amu Jɛrusanɛm.

⁵⁴ Nden yi ɛkan ɛjɛ, Jems ka Jɔn, ayɛɛ ɛnyɛɛ ji, abɔɔ abɔmɔ, “Ntaa, ɛtom ngono bɛso ɛma rɔbɔ abɔɔ?”

⁵⁵ Jisɛs akpeghe áyama abɔɔ si naŋ ka arɨgha na.

⁵⁶ Ka atam ka Asɔgba ayɛ amu ka ɛjibɛ jintiŋi.

Ji ɔnee ka ɔtɔɔŋɔ Jisɛs

⁵⁷ Ɛsika amughu na ka mbaa, nnɛ atɔɛ si “Mkpi nam ɛkan ɛja nnda tɔŋa ka mfom mfom biku bi ɔmuu.”

⁵⁸ Jisɛs akpɛɛ si, “Akponya akpe abe ya ara kaa, nsisɔk abɛn bɛjo abɔɔ, ka Mɔanɛ yɔ Ɛsɔwɔ atɔ́ nɛtom akpem mfom bi akaa.”

⁵⁹ Ara kpeghe atɔ nnɛ yɔntiŋi, “Tɔŋɔm”. Nnɛ nyɔ ara tɔɛ si, “Ntaa, nɔŋɔ mmu ma ntɨghɔ sam nsɔjɨŋa.”

⁶⁰ Jisɛs atɔɛ si, “Nɔŋɔ akuanɛ asam bɛji abɔɔ, ka wɔ sɔŋ tebe anɛ ɛtono Ɛsɔwɔ.”

⁶¹ Nnɛ yɔntiŋi atɨma atɔ Jisɛs si “Ntɔŋa tɔŋɔ, ka nɨŋɔ mma ntɨghɔ kag anɛ ɛbɨŋa nnyɔ.”

⁶² Jisɛs afaŋɛ si “Nnɛ yɔku yɔ afɨne ɛro si abɔmɔ ɛgbɛ ka akpeghe abri ka njam amam anem nɛwɛmɛ ni ɛton Ɛsɔwɔ ɛsɛbɛ.”