Luk 7 - Nde

Nnjɛn ɛkɨnoamar nɛa akpakaŋ

¹ Nden yi Jisɛs akɨnɛ nɛrɨgha ntɔrɔ ka anɛ ba ara yɔghɛ, asiŋ amu ka Kapanum.

² Fa yɔ mɔa njoa nnɛ a ɛbɨŋɔ aton akpakaŋ ka Rom, yɔ ara kɔrɔ nsɛnjo kɛtiŋi tiŋi ára yám na wusi akpi kpɔ.

³ Nton akpakaŋ nyɔ atóm abakógho Ajus si abiŋ Jisɛs ama nem bɛji ɛkoro mɔanjo ɛwɛ.

⁴ Nden yi ákɔŋɔ Jisɛs, ágɔrɛ si amu ama nágha mɔa Ntona akpakaŋ nyɔ

⁵ si “Nsɛnjo áre ɛtiŋi nnɛ yɔ ɛjɨbɛ ɛrɛ kɔrɛ ka yɛ yɔ asi ɛkɔnɔ ɛjɨrɛ”

⁶ Jisɛs atam, ajam nɛmughu ka abɔɔ. Ɛsika akpere njo, Nton akpaakaŋ atom atɛm abɛ si atɔɛ si yɛ árɛ beŋɛ yi Jisɛs afeghe ɛnɛ ayɔ si anam ka njo ɛyɛ,

⁷ Ɛruna ka ndɛɛ yɛɛ si mfɔm mfɔm yi nkɔŋa: ka rak ntɔrɔ si bɛji ɛkoro koro mɔanjo ɛwɨŋa.

⁸ Si nde ka nɛyɔ anɛ ntam mbɛn anɛba akpaakaŋ ba áre ka nɛyɔ ɛnɨŋa. Áné jiku ji ntɔɔ abɔɔ si anem; ntɔɔna nnɛ yɔku si sɔŋ amughu mughu, ntɔɔ yɔntiŋi si ba, abɨghaba; arena mɔanjo si nem ji, ánenem.

⁹ Nɛyɨghɔ ni Jisɛs ayɨghɔ nɛrɨgha ni, bɛji ɛkpɔɛ, akpeghe abri anɛ ba atɔŋɛ, atɔɔ abɔɔ si, “Ntɔ war si, nkɨgha yɛ nɛgana ɛkɨnoamar ji fa aragasi ka Isrɛn”

¹⁰ Ɛsika anɛ ba aba ka ɛteb afɛnɛ ka njoa nton akpaakaŋ nyɔ, ara kɔŋɔ mɔanjo ɛwɛ ka ɛkoro bɛji.

Jisɛs anyimi nkuanɛ ka ɛjibe ji abiŋi si Nen

¹¹ Ɛfrusu ɛkpara, Jisɛs amu ka ɛjɨbɛ ji abɨŋi si Nain; ɛkan ɛjɛ ka ntakpa ɛbɔŋɔ amu ka nɛ.

¹² Ɛsika akpere ɛsi ɛjɨbɛ, akɔŋɔ anɛ ba asɔnɔ nkuannɛ mmɔ ɛwiwi yɔ ngɔn awɛnɛ. Ntakpa ɛbɔŋɔ ji njoa nɛku ɛtɔŋɛ tɔŋɔ.

¹³ Nɛyɛ ni mɔɔ Ɛsɔwɔ ayɛɛ na, ɛsi ɛkpɔɛ, ka atɔɛ, “Krɛ bere.”

¹⁴ Ka atam akɔmɔ ɛbɔɔ ka ɛkpɨghante ji akɨno nkuannɛ, bɛ ɛsisɔnɔ ayimi. Ka arag si, “Mɔanom, Nsi nyimi!”

¹⁵ Nkuannɛ anyimi, ajɔn ji, ajam nɛrɨgha ntɔrɔ. Jisɛs akɔɛ afɨna kɛɛ nnyɛɛ.

¹⁶ Ɛkub ɛbɔb anɛ kpakpa ara kar Ɛsɔwɔ: afɨna rak atɔ atɛm nɛyɔ ni Ɛsɔwɔ akpe, “Ɛsika ntakpa Ɛsɔgba Ɛsɔwɔ ami wɛmɛ ka ɛjɨbɛ ɛjɨrɛ, ka Ɛsɔwɔ ami ba ama nagha anɛbɛ.”

¹⁷ Nɛ ne Jisɛs ɛsuk ka Judiya kpakpa tɛtɛ ɛsika bɛjɨbɛ bi ɛkpere fa.

Jisɛs ka Jɔn ji nwuruannɛ anab

¹⁸ Anɛ ba ɛkanɛ Jon, ji nwuranɛ anab, ama tɔɛ atub ajɛna nsɔn ya Jisɛs ara ne.

¹⁹ Nɛyɨghɔ ni ayɔghɔ nna, atom abɔɔ si ama bɔmɔ Jisɛs si “Wɔ yɔ ɔre nnɛ yɔ ɛrɛ bri si aba, kasɛ ɛjɔn ɛbri nnɛ yɔntiŋi?”

²⁰ Nden yi anɛ ba ákɔŋɔ Jisɛs, átɔɛ si “Jɔn, ji nwuru anɛ anab, asi abɔma si, ‘Wɔ yɔ ɛrɛ bri si aba, kasɛ ɛbri nnɛ yɔntiŋi?’ ”

²¹ Fifa fifa yi arɨgha na bɛji ɛkoro abembem anɛ ba ayaam ka ngana gana, bá ajɛ afɨne, ka ba anaga amar.

²² Ka Jisɛs ara kpɛ abɔɔ si “Ba fɛnɛ Ba sɔŋ tɔ Jɔn nsɔn yi ɛmi yɛɛ ɛfɨnɛ ɛyɔk; ɛsika ba anaga amar ami yɛɛ mfom, abɛnɛ ajɛn, anɛ ba abini afɔm, anɨgha atɔŋ ayɔk ntɔrɔ, ba kpɔɔkpɔ ami nyimi, akpak anɛ afɨna ayɔk ɛtiŋi ɛteb.

²³ Ka ɛnɔnɔb ɛkɛɛ nnɛ yoku yɔ ɛrɨghɛ sag netem ka nɨŋa.”

²⁴ Nden yi asɔgba Jɔn afɛnɛ, Jisɛs ajam nɛtɔ anɛ atub Jɔn: “Ɛmughu ka ɛmɛɛ si ɛmɛ yɛɛ jɛɛ? Nnɛ yɔ ára rɨgha ŋga arag ga nna ka nɛwɛn ni mfɛb ara nyɛŋɛ?

²⁵ Ɛrɨnajɔn na, ɛmu si ɛyɛ jɛɛ? Nnɛ ya ayɔbɔ anɔba nsɔn? Na saŋ, afɨŋa anɛ ba ayɔbɔ anɔba nsɔn áre ka bɛjo aton.

²⁶ Ka ɛmu si ɛma yɛɛ jɛɛ? Ɛsɔgba Esɔwɔ? Ɛréna na, nɔŋɔ ntɔ war si yɛ agaa Ɛsɔgba Ɛsɔwɔ.

²⁷ Asɔgba Ɛsɔwɔ ayɛnɛ atub ɛmɨnɛ si, “Ntó ɛsɔgba ɛjɨŋa ji ɛgbɨghɔ mbaa, yɔ atoŋo mbaa akɛa.

²⁸ Ndɨghá si, nnɛ yɔku arem yɔ maŋka awɛnɛ yɔ agaá Jɔn; ka nnɛ yɔ agaá wɨri ka ɛtono Ɛsɔwɔ afɨŋa agaá yɛ.”

²⁹ Anɛ kpakpa ba ayɔghɛ, aragasi ba ɛtaba akpugha ɛjibɛ, atama ka mbaa Ɛsɔwɔ, atubsi Jɔn awuru abɔɔ anab.

³⁰ Ka anɛ ba Farasi ka ba akpɨne ajighi atɛnɛ mbaa yi Ɛsɔwɔ atɨŋɔ abɔɔ atubsi árɛ tama Jɔn awuru abɔɔ anab.

³¹ “Jisɛs amu ka ntɔrɔ ka ɛsi, ngara anɛ ba nɛmaŋ ka jɛ?? Afɔŋɔ jɛ?

³² Áre na ka abɔnsɛ ba ajik ka nɛkaa asɛ abɨŋi atɛm, ka arɨgha: “Ɛkubu ɛkɛɛ abɔɔ atɛn nɛbɨnɛ; ɛkpɛn ɛkuwa ɛkɛɛ abɔɔ atɛn nɛbere.

³³ Si Jɔn, ji nwuru anɛ anab arɨma nɛghɛ nsɔn ɛyiŋ ka ama wɔ amɔm jam ka abaa, ka ɛkɔɛ nna ka njɛ.

³⁴ Ka Mɔannɛ yɔ Ɛsɔwɔ akɨno ara nɛghɛ ɛjonɛnɛghɛ ka awɔghɔ amɔm, war ɛfɨne ɛbiŋɛ si mbaraŋkɔŋ ka nwɔgha amɔm, ntia abibi anɛ ba abɔɔbɔ anɛ ataba akpugha.

³⁵ Ka ɛgbɛrɛ ɛjom nnɛ ɛtɨŋɔ ka ɛbɔɔ nɛtom ɛnɛ.”

Maŋka asasaa asɔr atáa Jisɛs

³⁶ Nnɛ ɛwi ka ɛbɨŋɔ Farasi atebe Jisɛs nɛkak. Ka nden yi Jisɛs akpɨgha ajɔnɔ ka ɛte agrɛ atá, abri si ajam nɛnɛghɛ ɛjonɛnɛghɛ,

³⁷ Maŋka asasaa ka ɛjɨbɛ ji yɔ ayɔghɔ si Jisɛs arɨbe nnɛa Farasi, amu ka mmuk akua mfɔm ya akoro asɛ.

³⁸ Ayimi ka njɨma Jisɛs aberé, amibi ayɛ awuru Jisɛs ka atá ya agrɛ. Ka akɔ nnu ɛyɛ asɛnɛ, afɨna asɔrɛ ka atá, ka awurɛ akua mfɔ́m nya ka atá abaaba.

³⁹ Nden yi nɛa Farasi yɔ atebɛ nɛkak ayɛ́ na, abɛn nkater si, “Nnɛ nnyɔ ka árena re Ɛsɔgba Ɛsɔwɔ, ka agbɛrɛgbɛrɛ nɛgana nnɛ yɔ ára kɔmɔ, si áre maŋka asasaa.”

⁴⁰ Ka Jisɛs abiŋɛ, “Samɔn, mkpe ɛjom ji ntɔa.” Ntaá tɔɔm, si mmi yoŋo atɔŋ.

⁴¹ “Anɛ abaa akpɨnɛ akpugha. Nnɛ ɛwi akpinɛ ɛbam akpugha biba ka ɛjá, nnɛ yɔga akpinɛ ɛkpugha atan abaa ka wobo.

⁴² Anɛ abaaba arɛ bɛn akpugha ya agana abibɔɔ abɔɔ, ɛnem yɛ abri abɔɔ ɛkpɔghɔsi atam asighi abɔɔ. Ɔyɛɛ si nnɛ nyɔŋ yɔ agaaɛ tɨŋɔ nɛkɔrɔ?”

⁴³ Samɔn akpɛɛ si, “Nnɔŋɔ si nnɛ yɔ átɨmɛ asighɛ ka mbɔ́ ya agaa faŋ.” “Ɔmi rak ka ɛtiŋi.” Jisɛs atama akɛɛ.

⁴⁴ Jisɛs akpeghe abri maŋka nyɔ, ka atɔ Samɔn, “Ɔmi yɛɛ maŋka nnyɔ? Mbá ka njo ya, mɔrɛkɛɛ anab ya nsogha atá, ka yɛ́ akɔ amibi ayɛ asom atá, afɨna akɔ nnu yɛ asɛnɛm ata.

⁴⁵ Wɔ mɔrɛ kɛmmɛ, ka maŋka nyɔ jam ka mbaa mfa akpɨgha yighim, ka asɔrɔ atá ayɨŋa.

⁴⁶ Aku mɔrɛ wuru ka ɛsi, ka yɛ amɛɛ wuru akua mfɔm ka atá.

⁴⁷ Nɨŋɔ ntɔa, ɛru si, nɛkɔrɔ ni yɛ atɨŋɔ ɛmi sama abibia nsɔn ɛyɛ kprɔb. Ɛrimem ka nnɛ yɔ atɨŋɔ nɛkɔrɔ tinim ɛsika anɨŋɔ nkater si abibia nsɔn ɛyɛ ɛrɛ tu.”

⁴⁸ Akpeghe atɔ maŋka nyɔ, “Mmi tam nsɨgha ka abibia nsɔn ɛya.”

⁴⁹ Anɛ ba ajɔnɔ fa ara jɨbɛ nnyɔ abɔmɔ atɛm, “Yɛnɛ yɔ nna, yɔ atɨmɛ asig anɛ ka abibia nsɔn?”

⁵⁰ Jisɛs atɔ maŋka nyɔ, “Ɛkɨno netem ɛna ɛmia yighi ka agbaghagbɨgha, sɔŋ ka nɛnaa.”