Luk 4 - Nde

Nɛgara Jisɛs ka ɛmɛɛ

¹ Jisɛs aru ka aya Jɔdan akru ka Nɛfɛb Ɛsɔwɔ ni sonɛ; ɛfɨnɛ ɛtonɛ ɛmu ka ɛmɛɛ,

² ka afo atan abaa yi Sɔtan agarɛ fa. Jiku árɛ̀ nɛ ka afo nya. Ka nkɨnɛsi, njan áyɛ́ kɛtiŋi tiŋi.

³ Sɔtan ama tɔɛ si, “Ɔrena mmɔa Ɛsɔwɔ tɔɔ nɛtan ni si ɛyaŋa mgba brɛd.”

⁴ Jisɛs akpiɛ “Ayɛnɛ si, ‘Nnɛ arɨma kpene ka brɛd kantiŋ.’”

⁵ Sɔtan afɨna akɔɛ ka ma nden amu ka nyira mfom ama tɔŋɛ frifri ba ɛjɨbɛ kpakpa bi re ka ɛyiŋ.

⁶ Ka Sɔtan atɔɛ, “Mmɛ nkɛa nɛyɔ kpakpa ka nɛnɔbɔ ɛnɛ atubsi ami sɨghi abɔ ka nsɔn nyi kpakpa akɛm, ka nnɛ yɔku yɔ ɛkɔrɔm si nnkɛ.

⁷ Wɔ tama na si ɔkɨmɛ bɛrɔŋ ɔkɛm, kpakpa nsɔn nnyi ɛjɔnɔ yiya.”

⁸ Jisɛs akpiɛ si, “Ayɛnɛ giga giga si: ‘Ɛrɛsi ɛre ɛkɛ Ɛsɔwɔ, ka yɛ kantiŋ yɔ nnɛ arɔghɔ.’ ”

⁹ Sɔtan akɔɛ amu ka Jɛrusɛnɛm ka ɛsi Njoa njɔm ya ɛgaa yirɛ ka ɛjɨbɛ. Atɔɛ si, “ɔrena yi wɔ ɔre mmɔ Ɛsɔwɔ, fɛb sɨnɛ.

¹⁰ Atubsi ayɛnɛ si: “ ‘Atɔɔ bɛsɔn-ateb abɛ si abaaba;

¹¹ akpɨba ka abɔ, ɛsika ɔrɨghɛ krɛ ɛta ka nɛtaan.’ ”

¹² Jisɛs akpɛɛ si, “Ayɛnɛ ka ntɔrɔ Ɛsɔwɔ si, ‘krɛ gara Ɛsɔwɔ ji Nton ɛya.’ ”

¹³ Esika Sɔtan akɨnɛ ka nɛgara nni ka mbaa mbaa yiku, atɔghɔ tam asighɛ, anɔŋɛ ka nɛkporo si yɛ abɛnɛ ɛyigha.

Átɛnɛ Jisɛs ka Nasarɛt

¹⁴ Nɛfɛb Ɛsɔwɔ ɛsɔnɔ Jisɛs akru ka Ganini: ka ɛka ɛbɛ ɛsuk ka ɛjɨbɛ kpakpa.

¹⁵ Ama kpɨne ka ntakpa Ɛkɔnɔ ba Jus ji ɛre ka Ganini. Ɛma nem anɛ kpakpa ákarɛ.

¹⁶ Jisɛs atam amu ka Nasarɛt, ka mfom bi yɛ abeŋe, ka ɛfo bi ba Jus anɔŋɔ si Ɛfo-Ɛsiayɔ, ama nam ka njoa njɔm ɛsika ára ne nden nden yiku. Ɛsika atɨmɛ si abiŋ Ntɔrɔ Ɛsɔwɔ,

¹⁷ akiɛ Ɛkpɨgha nwɛr Ɛsɔwɔ ji Ɛsɔgba Ɛsɔwɔ, Asaya, ayɛnɛ. Ajibi ama yɛɛ ɛkpighi ji ayɛnɛ si:

¹⁸ “Nɛfɛb Ɛsɔwɔ ɛmmɛ bɨno atubsi amimɛ kɛ nɛyɔ si nkɔ ɛtiŋi ɛteb Ɛsɔwɔ mkpaŋ ntɔ anɛ ba áre ka ɛrɨnɛ. Amimɛ tɔ si ntebe anɛ ba árɛ ka mgbakɔbɔ si mbaa nɛfɔrɔ ami jɔn, ba ɛnaga amar ayɛ mfom, si mfɔŋɔ anɛ ba áre ka neyiri,

¹⁹ ntam ntebe nnya yi Ɛsɔwɔ akɛ nɛnagha.”

²⁰ Ka Jisɛs afu ɛkpɨgha nwɛr ji, afɨna akɛ ndɔgha nɛtom ka mfom bi, ka ajɔn nji. Ɛnem amar anɛ kpakpa ba rɛ ka Ɛkɔnɔ Jus akpeghe abriɛ.

²¹ Agbɔ mbaa atɔ abɔɔ si “Ɛnɛ ntɔrɔ Ɛsɔwɔ ami wɛmɛ ɛsika ɛyɔghɔ.”

²² Anɛ kpakpa ba ajɔnɔ fa akarɛ ka njɛna nɛgbɛrɛ ɛjom ji ɛruɛ ka nnyɔ, ajam nɛbɔmɔ atɛm si mɔa Josef saŋ nna?

²³ Jisɛs atɔ abɔɔ si, “Mmɛ nyinyi si war ɛtubu nɛgana ɛkagham si ‘Mgbɨghara ya atɨgha dɨghadɨgha!’ Tam nem nsɔn ka ɛjibɛ ɛja yi ɛrɛ yɔghɔ si ɔnɛ ka Kapanum.

²⁴ “Nntɔ war ɛdidɨghɛ Ɛsɔgba Ɛsɔwɔ ɛrem ji ɛrɛ bɛnɛ nɛkɨgha ka ɛjɨbɛ ɛjɛ.

²⁵ Nɔŋɔ mmɛ nntɔ war ɛdidɨghɛ, abakaa ba anoa abɔɔ akpɔ asig atutu ka Isren ka nden yi Ɛnaija agbaŋa nɛbo ka nnya ɛsaa ka amɛɛ asɨghasa, njɛn ɛgba ama jɔn ka ɛjɨbɛ kpakpa.

²⁶ Ka árɛ tom Ɛnaija akɛ maŋka yɔku kɛ ɛbɔŋɔ abɔɔ, ara tóɛ akɛɛ maŋka ɛwi yɔ nnom atɨma akpɔ ka Sarafat ka ɛsisɔk Sidon.

²⁷ Abembem anɛ ba abini ajɔjɔn ka Isrɛn ka nden Ɛnisa ji Ɛsɔgba Ɛsɔwɔ, ara tɨmɛ abɔɔ asig ama ánagha Namaan yɔ áru Siria.”

²⁸ Nɛyɨghɔ ni anɛ ba ajɔnɔ ka Ɛkɔnɔ Jus ayɔghɔ nna, netem ɛsagha abɔɔ kɛtiŋi tiŋi.

²⁹ Atam, akamɛ si aru ka ɛjibɛ, ka atuɛ amu ka bɛsɔ ɛgon ji asii ɛjɨbɛ, ajarɛ atub ka mfom ba agaa yirɛ kasɔŋ akpɔghɔ akpɨna biŋi asinɛ.

³⁰ Ka Jisɛs ajɛnɛ jɛn ɛjɛ asiŋ ka ɛbɔŋɔ abɔɔ amu ɛjɛ.

Jisɛs ka Kapanɔm

³¹ Ara mu ka ɛjibɛ ji abɨŋi si Kapanɔm ka ɛsisɔk Ganini. Ka ka Ɛfo-Ɛsiayɔ ba Jus ajam nɛkpɨne abɔɔ.

³² Ɛjɔnɔ ɛjom njɛnnjɛn ɛkɛ abɔɔ nɛyɨghɔ kpakpa ji yɛ arɨgha atɔ abɔɔ, atubsi ntɔrɔ ɛyɛ abɛnɛ nɛnubu ka nɛyɔ.

³³ Mannom ɛwi ajɔnɔ ka Ɛkɔnɔ Jus ka Kapanom yɔ abɛnɛ ɛbibi ɛtughu ji ɛra beŋe,

³⁴ “Ruu mfa! Ɔba si ɔma nem war jɛ, Jisɛs nnea Nasarɛt? Ɔmi ba oma rɔbɔ war? Nnyianyi si wɔ ɔre Nɛfɔɔ Ɛsɔwɔ!”

³⁵ “Bɨno nyɔ!” Jisɛs atɔɛ ka ɛkoro koro “Ruu sighɛ!” Ɛbibi ɛtughu ji ɛtubɛ ka nse ka ɛsiamar anɛ kpakpa, ka aru asɨghɛ, yɛ arɛ te ɛnɛn jiku.

³⁶ Nɛyɔ ɛkan abɔɔ, afɨna atɔ atɛm si bɨgha nɛgana ntɔrɔ ka nɛyɔ ni ara arɨgha akama abibi atughu!

³⁷ Nsɔn yi anee ɛsuk ka ɛjɨbɛ.

³⁸ Jises aru ka Ɛkɔnɔ Jus amu ka njoa Samɔn. Nnyɛɛ ŋkaa Samɔn ama gbɔ ntakpa ɛyam; ama tɔ Jisɛs si anaghɛ.

³⁹ Jisɛs atam ama yimi ka nkɔ ɛsimi ji maŋka nyɔ anɔŋ ka anya si ɛyam bi ɛru ɛsighɛ. Ɛyam ɛkan fifa fifa: yɛ atam akɛ abɔɔ ɛjonɛnɨghɛ.

⁴⁰ Ka ndena nego, anɛ abá ka anɛ kpakpa ba ábɛnɛ ayam ka ngana ngana ka mfoa Jisɛs, yɛ akɨno abɔɔ abɔ ka ɛwi ka ɛwi ataba abɔɔ ka ayam.

⁴¹ Abibi atughu atɨma aru abembem anɛ ka bɛji, abere si “Wɔ ɔre mmɔ Ɛsɔwɔ.” Ka Jisɛs ayama abɔɔ si árɛ kpɛ rak, atubsi abɔɔ amigbɛre si yɛ yɔ áre Kɨras.

Jisɛs amumu ka nɛkpɨne kɛsi

⁴² Ka Jisɛs atam amu ka mfom ya áre kóŋ. Anɛ asɛbɛ tɛtɛ ama kɔŋɛ fa agɔrɛ si arɛ tam asig abɔɔ.

⁴³ Ka yɛ atɔ abɔɔ si, “Mtam ntebe ɛteb ɛton Ɛsɔwɔ mbi ka bɛjibɛ bɨga titi, atubsi nɛtom ni nna ni Ɛsɔwɔ atom.”

⁴⁴ Ka áfɨna kpɨne kpɨne ka akɔnɔ ba Jus ka Judiya.