Luk 3 - Nde

Jɔn ntoŋa mbaa

¹ Ka ɛnumu nnya néko yi ɛtono Nton Aton Tiberus, Pɔntus Panet ajɔnɔ Ntona Judiya, Ɛrɔd Antipas ara atɨma abába ɛja Ganini, na ka ɛkɨno ɛjɛ ji Finip ara baaba ɛja ji abɨŋi si Ituriya ka Trakonitis. Nisania atɨmɛ ababa ɛjɨbɛ ji abiŋi si Abinin.

² Nden yi Anas ka Kefas ajɔnɔ nton atona ba ɛjɔɔ Ɛsɔwɔ ɛtebe Ɛsɔwɔ ɛsi Jɔn, mmɔa Sakariya ka ɛkpan ɛmɛɛ ji ánɛ arɨma jɔnɔ.

³ Ka Jɔn ajen ka bɛjɨbɛ bi ɛre ka ɛja Jɔdan atebe abɔɔ si agɔɔ abibia nsɔn, ayaŋa ntem, awura anab kasɔŋ Ɛsɔwɔ atam asig abɔɔ ka abibia nsɔn abɔɔ.

⁴ Ɛsika áyɛnɛ ka nwɛra Asaya ji ɛsɔgba Ɛsɔwɔ, “Ntɨŋa nnɛ yɔ ára bere ka ɛmɛɛ: “Toŋo mbaa anɔb nɨŋɔ, ‘Ntaa ya akpi ba! Ba tini mbaa.

⁵ Ba són abrɛbrɛ, kpam bɛgon, tini abɨnɛ, ba sɛnɛ mbaa anɔb.

⁶ Ɛru fa anɛ kpakpa ayɛ nɛfɔrɔ ni Ɛsɔwɔ akɛɛ.’ ”

⁷ Ɛsika anɛ áwuru na ama kɔŋɛ si awuru abɔɔ anab. Awura abɔɔ anab. Ɛre mbaa yi nnɛ animɛ ka ɛbɨŋɔ abɔɔ Ɛsɔwɔ. Yɛ abɔmɔ abɔɔ si “Abibia anɛ na ka abɔɔ ɛfɔmtɛ! Yɛnnɛ atɔ war si ɛbɛ sik ɛsɨgha netem Ɛsɔwɔ ni ɛkpi ba?

⁸ Ba tɔ́ŋɔ mbaa nekpen ya atɨŋɔ si ɛmi ɛyaŋa ka abibia nwɛmɛ ɛjɔn ka nɛwɛmɛ Ɛsɔwɔ. Krɛ yɔr nnyɔ ka ntem si, ‘Ɛkpe nɛnagha atubsi ɛre abɔɔ Ebragham.’ War ɛnagham atubsi Ɛsɔwɔ amama anem ataan nnya ayaŋa abɔɔ Ebragham.

⁹ Aragasi maŋ nɛfɔk Ɛsɔwɔ ɛre ka nnab ete ɛbri si ɛkɨbɛ ndɔk ka ete jiku ji ɛrɛ kab atiŋi akab kasɔŋ agbak atub ɛyaŋa nkon ya afɔghɔ ngon.”

¹⁰ “Ɛne ŋang?” Anɛ abɔmɛ.

¹¹ Jɔn akpɛ abɔ si, “Wɔ ɔkpɛna ɛnɨmɛ bɨba, kɔ ɛji kɛ nnɛ yɔ arɛ bɛn, ɔkpɛna ɛjonɛnɨghɛ baŋa ka nnɛ yɔ arɛ bɛn.”

¹² Ba ɛtaba ntab ɛjibɛ, ba abaa si yɛ awuru abɔɔ anab abɔmɛ, “Nkpikpɨne, war ɛne naŋ?”

¹³ “Ba krɛ taba akpugha ɛgá ka ɛjɨghi ɛtɔŋɔ war si ɛkɔ,” Jɔn atɔ abɔɔ.

¹⁴ Anɛ ba akpakaŋ atɨma abɔmɛ sɨ war ma titi? Jɔn afɨna akpe abɔɔ si, “Ba krɛ taba nsɔn anɛ ka nsam, kre dere anɛ ɛtaba akpugha, ka nɔŋɔ akpugha ya ara kɛa ka nɛtom ábeŋa.”

¹⁵ Ɛsika ntem ane ɛra briɛ, abembem anɛ ara ter si mkpɛnɛmɔŋɔ Jon yɔ are Kɨras nyɔ.

¹⁶ Jɔn akpɛ abɔɔ sɨ, “Mmɛ nkɨghɔ ɛwuru anab nso war, ka nnɛ are ga yɔ abɨgha yɔ afɨŋa agaam kɛtiŋi tiŋi yɔ ndɨghɛ ma njɔn njó ɛyɛɛ ka mfan mbeŋe yi njɨghɔ akpɨghata ayɛ. Yɛɛ ákɨghɔ Nɛfɛb Ɛsɔwɔ ka ɛnono ngon awuru war anab.

¹⁷ Áre nna ka mmbɔma arasi yɔ afɛbɛ afifɛ ka ɛkpikpa kasɔŋ amɔg arasi kantiŋ asá. Amɨna saŋ amɔg kprɔb ka akpo akak ka bɛbam anɔŋɔ ka njo, ara fɛŋɛ afifɛ áfi ka ngon bi ɛrɛ jɔnɔ nimɛ nɨmɛ.”

¹⁸ Jɔn afɨne abembem abaa atebe anɛ nnɔbɔ ateb Ɛsɔwɔ.

¹⁹ Atɔ Ɛrɔd ji nton si ere ebibi ɛjom ketiŋi tiŋi nɛ kɨghɔ Ɛrɔdia ji ŋkaa ɛkɨno ɛja ka nɛban. Afɨnɛ terɛ ka abembem abibia nsɔn yi ami nem.

²⁰ Ɛrɔd afɨna akpɛnɛ ka abibia nsɔn ɛyɛɛ ka nɛgbaŋa ni agbaŋa Jɔn ka mgbakɔbɔ.

²¹ Ka nden yi Jɔn ara wuru anɛ kpakpa anab, Jisɛs amu si atɨma áwurɛ. Ɛsika Jisɛs ara kak njɔm, nɛbo ɛjibi,

²² ka Nɛfɛb Ɛsɔwɔ ɛsɨnɛ wusi ɛmɛb ɛma kuɛ. Ntɔŋ aruu ka nɛbo: “Wɔ yɔ ɔre mmɔ ɛwɨŋa yɔ akɔrɔm, nkpe ɛyɛbɛ netem ka na.”

²³ Maŋ Jisɛs ka kpisi nnya nɛtan ka wobo ka nden yi ajɨmɛ nɛtom ɛnɛ. Anɛ agbɛrɛ ka mɔa Josɛf, ji mɔa Ɛni,

²⁴ ji mɔa Matat, ji mɔa Nɛfi, ji mɔa Mɛnki, ji mɔa Jannai, ji mɔa Josɛf

²⁵ ji mɔa Matayas, ji mɔa Emɔs, ji mɔa Nahum, ji mɔa Ɛsni, ji mɔa Nagai,

²⁶ ji mɔa Maat, ji mɔa Matayas, ji mɔa Sɛmɛn, ji mɔa Jɔsɛk, ji mɔa Joda,

²⁷ ji mɔa Joanan, ji mɔa Rɛsa, ji mɔa Sɛrubabɛn, ji mɔa Sinten, ji mɔa Neri,

²⁸ ji mɔa Mensi, ji mɔa Addi, ji mɔa Kosam, ji mɔa Ɛnmadam, ji mɔa Ɛr,

²⁹ ji mɔa Sɔsua, ji mɔa Ɛniɛser, ji mɔa Jɔrim, ji mɔa Matat, ji mɔa Nɛfi,

³⁰ ji mɔa Simiɔn, ji mɔa Juda, ji mɔa Jɔsɛf, ji mɔa Jonam, ji mɔa Ɛniakim,

³¹ ji mɔa Menea, ji mɔa Mɛnna, ji mɔa Matata, ji mɔa Natan, ji mɔa Dafid,

³² ji mɔa Jɛsɛ, ji mɔa Ebɛd, ji mɔa Bɔas, ji mɔa Sanmɔn, ji mɔa Nasɔn,

³³ ji mɔa Amminadab, ji mɔa Admin, ji mɔa Ami, ji mɔa Hesron, ji mɔa Pɛrɛs, ji mɔa Juda,

³⁴ ji mɔa Jekɔb, ji mɔa Asik, ji mɔa Ebragham, ji mɔa Tɛra, ji mɔa Naghɔ,

³⁵ ji mɔa Serug, ji mɔa Reu, ji mɔa Penɛg, ji mɔa Ɛbar, ji mɔa Sena,

³⁶ ji mɔa Kenan, ji mɔa Afasad, ji mɔa Sem, ji mɔa Noa, ji mɔa Namɛk,

³⁷ ji mɔa Mɛtusɛna, ji mɔa Inɔk, ji mɔa Jared, ji mɔa Maghananɛn, ji mɔa Kɛnan,

³⁸ ji mɔa Enɔs, ji mɔa Sɛt, ji mɔa Adam, ji mɔa Ɛsɔwɔ.