Luk 23 - Nde

¹ Ka ɛbɔŋɔ ji ɛtam, amu ka Jisɛs ka mfoa Panet.

² Ka ajam nɛbibi atɔrɔ anɨghɛ, arag si, “Ɛmi yɛ si mannom nyɔ asɛbɛ ɛfegheayɔ akɛ ɛjibɛ. Árɛ sɛb si anɛ akɛ Mfɨne Ɛjibɛ akpugha mfam, afɛnɛ arag si yɛ áre Kɨras, nton.”

³ Ka Panet abɔmɔ Jisɛs si, “Wɔ rɛ ntona ba Jus?” “Wɔ ɔrɨgha na”, Jisɛs akpɛɛ.

⁴ Ka Panet atɔ atona ba ɛjɔɔ Ɛsɔwɔ ka ɛbɔŋɔ, “Ndɛyɛ ɛjighi jiku ji mannom nyɔ agbɔɔ.”

⁵ “Ka ayimi ka aja ya akpaa anɛghɛ si nɛkpɨne ɛnɛ jam ka Judiya ɛrɛ ɛtɔŋɔ anɛ ɛsika abɨgha ka ɛfegheayɔ ka ɛjibɛ ka ami ba ka ji mfa.”

⁶ Ɛsika Panet ayɔghɔ na, abɔmɔ ana Jisɛs aruu Ganini

⁷ Nden yi agbɛrɛ si ɛja ji Jisɛs aru ɛre ka nɛyɔ Ɛrɔd, atoɛ akɛ Ɛrɔd, yɔ atɨma jɔn ka Jɛrusanɛm ka nden nyi.

⁸ Nden yi Ɛrɔd ayɛ Jisɛs, netem ɛyɛbɛ yɛbɛ atubsi mba ami rab yi ara sɛbɛ si ayiɛ. Ára ter si Jisɛs amiɛ na yɛ ane nsɔnɔ ndeŋe atubsi ayɔghɔ abembem nsɔn atubɛ.

⁹ Ɛrɔd abɔmɛ abembem abɔmɔ, ka Jisɛs jiku yarɛkpɛɛ.

¹⁰ Atona ba ɛjɔɔ Ɛsɔwɔ ka Ba akpɨna ajighi ajɔnɔ fa, abiba atɔrɔ anɨghɛ. Ɛrɔd ka asɔja ayɛ anyiɛ afɨna atɔŋɔ ayɔghɛ.

¹¹ Nden yi Ɛrɔd ka anɛ ba akpakaŋ abɛ amiɛ yɔbɔ nsɔn ɛnyɛ nna ka nton, ka afɨna atoɛ akɛ Panet.

¹² Jam ka ɛfo bi Ɛrɔd ka Panet akɔnɔ ajɔn ka atɛm, atubsi ɛyɨghɔ yɨghɔ ajɔnɔ ka ɛjiŋ.

¹³ Panet abiŋ atona ba ɛjɔɔ Ɛsɔwɔ, aton ka anɛ kpakpa,

¹⁴ atɔ abɔɔ si, “War ɛba ka nnɛ nyɔ ɛma kɛm si ara kpine anɛ ebibia nsɔn yi ɛne abɔɔ anɔk ka ɛjibɛ. Mmiɛ bɔmɔ abɔmɔ ka ɛsiamar ɛjɨrɛ ka ndɛyɛ ɛjighi jiku ji agbɔɔ.

¹⁵ Ɛrɔd titi árɛ yɛ ɛbibi jiku yi sɛrɛ ka afɨna atoɛ akɛ war; ɛbrina nnɔbɔnɔbɔ, árɛ nem jiku ji ɛne nnɛ áyonɛ.

¹⁶ Ka mkpi tɔ amɔbɛ ka nsighɛ abɔ.

¹⁷ (Ɛjɔnɔ nɛyɔ Mfɨne Ɛjibɛ si ayighi nea mgbakɔbɔ ɛwi asighi abɔɔ ka ɛyighi Nɛfɔrɔ jiku jiku.)”

¹⁸ Ka anɛ kpakpa abeŋe si “Ba sɔŋ ka nnɛ yɔ mfa! Ba sighi Barabas abɔɔ ɛkɛ war!”

¹⁹ (Akɨgha Barabas ka mgbakɔbɔ atubsi ajɔnɔ ka ɛbɔŋɔ anɛ ba anɔghɔ ka ɛjibɛ ɛnem nnɛ akpɔ).

²⁰ Atubsi ásɛbɛ si asighi Jisɛs abɔɔ, Panet akpɛ gɔrɔ abɔɔ.

²¹ Ka arɛgɔɔ nɛbeŋe si “Ba koɛ! Ba koɛ!”

²² Ka ɛnumu mkpɛnɛ ɛsaa, yɛ abɔmɔ abɔɔ si “Ɛgbɔnaŋ? Mannom nyɔ agbɔ bɨgha ɛjighi? Ndɛyɛ ji ɛsɛrɛ ɛyonɛ. Ka mkpiɛ mɔb ka nsighɛ abɔ.”

²³ Ka ára gaa beŋebeŋe gbogbo si akoɛ ka ɛte ɛnem Panet arɛ kpɛma atɛn.

²⁴ Ka ɛkɨna njam, Panet anem ka abɔɔ asɛbɛ.

²⁵ Ásɨghi nnea mgbakɔbɔ abɔ yɔ abɔɔ asɛbɛ ɛjɔn ga si akɛ agbɨghagbɨgha ka ɛjibɛ ɛnem nnɛ akpɔ, ka atɛmɛ Jisɛs akɛ abɔɔ si akom ka ɛte.

Akom Jisɛs ka ɛte

²⁶ Ɛsika asɔja ára mu ka Jisɛs, akɔɔŋɔ mannom ɛwi yɔ abɨŋi si Samon yɔ aru Sirin, ára mu Jɛrusanɛm, aneɛ asɔn ɛte ajaŋ atɔɔŋɔ Jisɛs ka njam.

²⁷ Abembem anɛ atɔŋɔ Jisɛs ɛsika ara muna ka nɛ, abere ka akaghɛ.

²⁸ Jisɛs akpeghe atɔ abɔɔ si, “Abakaa Jɛrusanɛm, ba krɛ mmɛ kpɛbere; ba bere bɛji ɛbrɛ ka abɔɔ brɛ.

²⁹ Atubsi nden arɨgha bɨgha yi ɛrigha si, ‘Ɛnɔbɔ ka abakaa ba áre agum, nna ya árɛ wɛn mmɔ ka abɛn ya mmɔ árɛ yaab!’ ”

³⁰ Ka nden nyi, “Atɔɔ atakpa bɛgon si, ‘Gbɔ nyɛghɛ war!’ Afɨna atɔ abra bɛgon si, ‘Bɨno war!’ ”

³¹ “Ka ánem mmɛ nna yɔ nde ɛte mber, ane war naŋ ba ɛre nkpaku ɛte ji ɛmi kpɔ ɛyom?”

³² Ɛsika amu ka Jisɛs, atɨma mu ka abanom abaa ba ane abibia nsɔn si ama yon.

³³ Nden yi asi ka mfom bi abɨŋi si Ɛkpɨgha ɛsi, akom Jisɛs fa, ka abibi anɛ ba, ɛwi ka mgbaŋa ɛbonom, yɔga ka ɛbɔ biŋ ka.

³⁴ Jisɛs akak njɔm si, “Nsɔjɨŋa, tam fa sɨghi abɔɔ, si anyim ji ára ne.” Ka atub nɛfaŋa kasɔŋ agbɛrɛ ɛsika abaŋa ábɔɔ ayɛ.

³⁵ Anɛ agbaa fa ára yɛɛ, aton ayɔɔghɛ. Afɨna arag, “Si yɛ anaagha anɛ baga, atɨma naagha ninɛ arena áre Kɨras, nne yɔ Ɛsɔwɔ akɨno.”

³⁶ Asɔja atima ayɔɔghɛ. Átɔɔnɔ anuna amɔm akɛɛ si awɔ

³⁷ ka atɔɛ “Ɛrena si wɔ ɔre ntona ba Jus, nagha bɛji ɛba.”

³⁸ Ayɛnɛ ntɔrɔ ɛnyɛ ka bɛso ɛte ji akoɛ si NTONA JUS YƆ NNA.

³⁹ Nnea abibi afɛm ɛwii yɔ atɨma akom ka ɛte akpere Jisɛs anyiɛ si: “Wɔ saŋ ɔre Kɨras? Nagha bɛji ɛba ɔtɨma ɔnagha war!”

⁴⁰ Ka nne abibi afɛm yɔga ayama nea abibia nsɔn nyɔ si, “Wɔ Ɛsɔwɔ ɔrimɛ bɨghɛ atubsi ɛkpi kpɔ nɛku ni?

⁴¹ Ára numu war ka ɛbibi ji ɛne, ka nnɛ nyɔ árɛ nem ɛbibi jiku.”

⁴² Ka akpeghe arag si, “Jisɛs, gbɔnter ɛyɨŋa ɔmina ba ka nɛyɔ ɛton ɛba.”

⁴³ Ka Jisɛs akpɛɛ si, “Ntɔa ka ɛdidɨghɛ, ɛnɛ ɔjɔnɔ ka nɨŋa ka mfo ɛyɛbɛ netem ka Ɛsɔwɔ bi abiŋi si paradais.”

Nɛkuu Jisɛs

⁴⁴ Ka ɛjo nkaniŋka wobo ka ɛbaa, ɛjiŋi ɛbɨno kpakpa mfom tɛtɛ ɛsi nkaniŋka ɛsaa ka ɛfen,

⁴⁵ atubsi njon agɔɔ nɛyɨgha. Ka ɛkpighi njoa njɔm ɛya ka nji mbaa.

⁴⁶ Jisɛs abeŋe si, “Nsɔjɨŋa, mmi sighi ɛtughu ɛjɨŋa nkak ka abɔ aya.” Ɛsika arɨgha na, asɨrɛ.

⁴⁷ Maŋkogho ka ɛbɨŋɔ anɛ ba akpakaŋa Rom yɔ ajɔnɔ fa ayɛɛ nna ji ɛmi wɛmɛ, akar Ɛsɔwɔ arɨgha si “Ka ɛdidɨghɛ nnɛ nnyɔ ajɔnɔ ɛfɔfɔa nnɛ ka amar Ɛsɔwɔ.”

⁴⁸ Ɛsika anɛ kpakpa ba agbaa si ayɛ ji ɛru, ayɛ ji ɛwɛmɛ, ára kɨno abɔ ka ngaŋ asama ka ɛkpɔghɔsi.

⁴⁹ Ka anɛ ba agbɛrɛ nnɛ yɔ Jisɛs áre, kpɛnɛ ka abakaa ba atɔŋɛ jam ka Ganini, ayimi dɨghadɨgha ayɛɛ kpakpa ji ɛwɛmɛ.

Ɛsika asimɛ Jisɛs

⁵⁰ Ka mannom ɛwii ya ane si Josɛf, ɛtiŋi nnɛ yɔ ajɔno ka ɛbɨŋɔ abakoghoa Jus,

⁵¹ ka árɛ tama ka ji ɛjibɛ ane Jisɛs. Aru ka ɛjibɛ ji abɨŋi si Arimatiya, ka Judiya, ara bri ɛton Ɛsɔwɔ si ɛba.

⁵² Yɛ amu ka mfoa Panet ama bɔɛ si akɛɛ ɛku Jisɛs yɛ ama sam.

⁵³ Josɛf akɔ ɛku Jisɛs asɨnɛ, afuɛ ka ɛtiŋi mbɔɔ ka akak ka ɛnam bi asimɛ ka nkpanɛtan, ɛnam bi akɨgha tɔghɔ sam nnɛ yɔku.

⁵⁴ Ɛjɔnɔ ɛfo ɛtoŋa nsɔn anɨŋɔ ɛfo-ɛsiayɔ bi ɛkpi jam.

⁵⁵ Abakaa ba aba ka Jisɛs jam ka Ganini atɔŋɔ Josɛf ama yɛ ɛnam ka ɛsika yɛ aboó Jisɛs.

⁵⁶ Ka afɛnɛ ka bɛjo ama toŋo nsɔn ka akua nɛsan yi atama ɛku Jisɛs. Ka abɔɔ ásiayɔ ka ɛfo-ɛsiayɔ ɛsika ɛjighi ɛrɨgha.