Luk 22 - Nde

Judas atama nɛgoro Jisɛs

¹ Ɛsika ɛyighi ji ɛnɛghɛa brɛd yi arɛ kak yist ɛrɛ kpere, ka ji ɛrɛ bɨgha ka ɛyighi Nɛfɔrɔ,

² atona ba ɛjɔɔ Ɛsɔwɔ ka ba ɛkpɨna ɛjighi Mosis ára sɛb mbaa si ayon Jisɛs ka mbaa yi anɛ arɛghɛgbɛre, atubsi ára bɛ ámar anɛ.

³ Ka Nton-ajɛ anam ɛsɔgba Jisɛs ɛwii ka ɛbɨŋɔ anɛ wobo ka abaa yɔ ane si Judas, yɔ atɨma abiŋɛ si Iskariɔt

⁴ Yɛ amu ama kɔɔŋɔ atona ba ɛjɔɔ Ɛsɔwɔ ka ba ɛbaba njoa njɔm Ɛsɔwɔ ɛsika atama yɛ agoro Jisɛs.

⁵ Abɔɔ atama ka ɛyɛbɛ netem si akɛɛ kɛ akpugha.

⁶ Judas atima atama si yɛ asɛbɛ ɛtiŋi nden yi anɛ arɨghɛ gba akighɛ ɛsika yɛ atɔ abɔɔ abɔbɛ.

Nkɨnanjam ɛjonɛnɛghɛ ka asɔgba ayɛ

⁷ Ɛfo nɛnɛghɛ brɛd yi arɛ jɔna toó, bi ayono njɔɔa ɛyighi nɛfɔrɔ ɛmɛsi.

⁸ Jisɛs atom Pita ka Jɔn si, “Ba sɔŋ toŋo mfom bi ɛneghɛ ɛyighi Nɛfɔrɔ.”

⁹ “Ɔsɛbɛ si ɛtoŋo ka faŋ?” Abɔɔ abɔmɛ.

¹⁰ Jisɛs akpɛ abɔɔ si, “Ɛkpina nam ka ɛjibɛ, ɛyɛɛ mannom ɛwi yɔ asɔnɔ anab, ba tɔŋɛ sɔŋ ka njo yi ánɨmɛ,

¹¹ ka ɛtɔ mfɔna njo si, ‘Nkpikpɨne asi war ɛbɔma: Ɛkpɔ ajɛnanɛ maa, ji njɔnɔ nnɛ ɛyighi Nɛfɔrɔ ka ɛkan ɛjɨŋa?’

¹² Átɨŋɔ war nkpaŋa ɛkpɔ ka bɛsɔ ji ɛkpe kpakpa nsɔn yi ɛsɛbɛ. Ba toŋo nsɔn fa.”

¹³ Abɔɔ atam amu ama yɛɛ mfom ɛsika Jisɛs atɔ abɔɔ. Átoŋo nsɔn ɛyighi Nɛfɔrɔ fa.

¹⁴ Ɛsika nden ama si, Jisɛs ka asɔgba abɛ ama jɔn si anɛ ɛjonɛnɛghɛ.

¹⁵ Ka Jisɛs atɔ abɔɔ si, “Nda mbri si nnɛ ɛyighi Nɛfɔrɔ ji ka nɨrɛ ka njam nɛyiri.

¹⁶ Ka ntɔ war si, mkpɨmɛ nɛ ɛyighɨ nji tɛtɛ ɛjɔn ka nkater ɛton Ɛsɔwɔ ɛtɔŋɔ.”

¹⁷ Jisɛs atab mkpogho yi akɨgha amɔm akabante, akak Ɛsɔwɔ sam ka atɔ asɔgba abɛ si “Ba kɔ ɛbaŋa ɛkɛ ɛnɨrɛ.

¹⁸ Si ntɔ war si mkpɨmɛ wɔ amɔm ya aru ka ɛgbɛ akaba nte nnya tɛtɛ ɛton Ɛsɔwɔ ɛba.”

¹⁹ Ka áton brɛd, ákak Ɛsɔwɔ sam, ákɨbɛ brɛd nyi, ka akɛ abɔɔ ka arɨgha si, “Bɛji ɛbɨŋa bi nna bi nkɛ ka ɛsi jɨrɛ; ba ra nem na kasɔŋ ɛrɛ gbɔm nter.”

²⁰ Nden yi akinɛ ka ɛjonɛnɛghɛ, afɨna ton mkpogho nyi, ka arag si, “Nkpogho nnyi atɨŋɔ nɛwɛmɛ ni mfɛ ni anɔŋ ayɨŋa awuru akɛ war.

²¹ Ka ɛbɔ nnɛ yɔ ágorom ɛre mfa ka ɛbɨŋa ka ɛte ɛjonɛnɛghɛ.

²² Mɔanɛ yɔ Ɛsɔwɔ akɨno amughu ɛsika ɛsɔwɔ agara. Ka ɛbibib ɛkɛ nnɛ nyɔ ya agorɛ!”

²³ Asɔgba ayɛ ajam nɛbɔmɔ atɛm, atere nnɛ ka ɛbɔŋɔ abɔɔ yɔ ane ɛjom ji.

²⁴ Mfab atɨma agbɔ abɔɔ atub nnɛ yɔ áre ka ɛsi ka ɛbɨŋɔ abɔɔ.

²⁵ Jisɛs atɔ abɔɔ si, “Aton anɛ ba arɛ gbɛrɛ Ɛsɔwɔ ára komo abɔɔ ka ɛsi anem abɔɔ nɛyiri; asaa abiŋ nabɔɔ si árɛ ba ɛnagha anɛ.

²⁶ Ka war, ba krɛ jɔn na. Ba nɨŋɔ nnɛ yɔ ágaa yar ka ɛbɨŋɔ ɛja ajɔn na ka mɔnsɛ, ka nnɛ yɔ afɨne anɛ atɨma jɔn na ka ndɔghanɛtom.

²⁷ Maŋ yɛnnɛ áre ka ɛsi, nnɛ yɔ ára nanam ama kɨnoɛ kasɛ nnɛ yɔ anaa ama kɨnoɛ? Nnɛ yɔ ára naa ama kɨnɛ kɨno saŋ? Ka mmɛ nde ka ɛbɔŋɔ ɛjɨrɛ nna ka ndɔghanɛtom.

²⁸ War ba ɛre anɛ ba ami yimi ka nɨŋa ka ndena nɛgara ɛnɨŋa.

²⁹ Ka mmi war kɛɛ nɛyɔ ɛton nna ka Nsɔjiŋa akɛm,

³⁰ kasɔŋ war ɛnɛ ɛfɨna ɛwɔ ka nɨŋa mmina jɔn ka ɛton ɛbɨŋa. Ka war ɛjɔnɔ ka ɛton ɛkpe nnam ɛkɛ bɛjibɛ Isrɛn wobo ka biba.

³¹ “Samɔn, Samɔn, Nton-ajɛ si akiɛ nɛyɔ yɛ ajak war na ka ajɨgha arasi ayighi afifɛ.

³² Ka mmia kak ka njɔm si ɛkɨnoamar ɛja ji ɔrakɛm ɛrɛ sɨnɛ. Ka nden yi ɔmina fɛnɛ ɔyimi nnɔbɔnɔbɔ ka nɨŋa, ra kak abɔanaja ɛkoro bɛji.”

³³ Ka Saimɔn Pita akpɛɛ si, “Ntaa, mmitoŋo bɛji si ntɔŋa mmu mgbakɔbɔ ɛruna nɛkpɔghɔ ka na mkpɔ.”

³⁴ Jisɛs akpɛɛ si, “Pita ntɔa si jam ka nɛmaŋ si ka nden yi nkɔk ákogho ɛnɛ, ɔtɛnɛm mkpɛnɛ ɛsaa si mɔnyim.”

³⁵ Ka Jisɛs abɔmɔ abɔɔ si “Nden yi ntó war si ɛmɛ rag ntɔrɔ Ɛsɔwɔ abɔabɔ, ɛrɛ fɨne ɛbam si akpɨghata, ɛrɨnɛran ɛjom jiku?” “Jiku,” abɔɔ akpɛɛ.

³⁶ Yɛ atɔ abɔɔ si “Ka nɛmaŋ, ɔkpe na akpugha sɔŋ ka aya, sɔŋ ka ɛbam; ka ɔrɛna bɛn akparija, goro ɛnebe ɛba wɔ ɔgó ayi.

³⁷ Áyɛnɛ ka nwɛr Ɛsowɔ si: ‘Ka afanɛ akak ka ɛbɔŋɔ ane ba abibi afɛm;’ ka ntɔ war si ji ayɛnɛ ɛtubum ɛkpi bɨgha nɛwɛmɛ.”

³⁸ Asɔgba ayɛ atɔɛ, “Ntaa yigha, akparija abaa areŋga.” “Ɛmi beŋɛ,” yɛ akpɛ abɔɔ.

Jisɛs akak njɔm ka ɛgon Onif

³⁹ Jisɛs aru ɛsika ama nɛ ne amu ka ɛgon Onif, ka ɛkan ɛjɛ atɔŋɛ.

⁴⁰ Ɛsika asi ga, atɔ abɔɔ si “Ba kak njɔm si ɛrɛ gbɔ ka nɛgara.”

⁴¹ Jisɛs ajɛrɛ asig abɔɔ amu na ka nnɛ atubu nɛtan, akɨmɛ bɛrɔŋ akak njɔm si,

⁴² “Nsɔjiŋa, ɛkɔra na kɔr, yighim nɛyiri nni, ka ɛrɛ jɔn ka ɛkɔrɔm, nɔŋɔ ɛjɔn ka ɛkɔra.”

⁴³ Nsɔn ateb Ɛsɔwɔ aru ka nɛbo ama kɛɛ ɛkoro bɛji.

⁴⁴ Ɛjɔn ga si ajɔnɔ ka ntakpa nɛyiri, akɨgha nkora njɔm ka ɛtiŋitiŋi ɛmɛ jɔn yi nɛyobo ɛnɛ ɛrɛ tɔŋɔ nse nna ka anɔŋ.

⁴⁵ Nden yi Jisɛs atɨmɛ ka njɔm afɛnɛ ka mfom bi ɛkan ɛjɛ ajɔnɔ, ára yɛɛ abɔɔ ka anana ɛsika bɛji ɛmi abɔɔ rɛɛ ka ɛkpɔghɔsi ji abɛnɛ.

⁴⁶ “Ɛgbɔnaŋ ka ɛrɛ nana?” Yɛ abɔmɔ abɔɔ. “Ba tam ba kak njɔm kasɔŋ ɛrɛ gbɔ nɛgara ɛmina ba.”

Abɔb Jisɛs

⁴⁷ Ɛsika Jisɛs akpɨgha rɨgha ka asɔgba abɛ, anɛ aru ka ɛbɔŋɔ ama yimi. Nnɛ yɔ agbɔɔ abɔɔ mbaa ajɔnɔ Judas yɔ are ka ɛbɔŋɔ asɔgba wobo ka abaa ya Jisɛs. Ajɛrɛ akpere Jisɛs si ama sɔrɛ ka ɛkpɔghɔ ka ndeŋe yi akɔghɔ agorɛ,

⁴⁸ ka Jisɛs abɔmɛ si, “Judas, ɔkpi goro Mmɔanɛ yɔ Ɛsɔwɔ akɨno ka ɛsɔrɔ akpɔghɔ?”

⁴⁹ Ɛsika ɛkana Jisɛs ayɛ ji ɛkpi wɛmɛ, abɔmɛ si “Ntaa, ɛkɔ akparija ayɨrɛ ɛbɔm abɔɔ?”

⁵⁰ Ka nsɔgba ɛwi abɔm mmɔa njoa atona ba ɛjɔɔ Ɛsɔwɔ ɛwi akɨbɛ ɛtɔŋ bi nom.

⁵¹ Ka Jisɛs atɔ abɔɔ si “Ba krɛ kpɛ nem na!” Ka akɔmɔ mannom nyɔ ka ɛtɔŋ ɛfɨnɛ ɛnɔb.

⁵² Jisɛs akpeghe abɔmɔ atona ba ɛjɔɔ Ɛsɔwɔ, ka ba ɛba ba njoa Ɛsɔwɔ ka abakogho ba abá si ama bɔbɛ si, “Mmɛ nde ne abibia nsɔn ka ɛbigha ka akparija ka akpɨno?

⁵³ Njɔnɔ ka nɨrɛ ka kpakpa afo ka bɛkpɔ njoa Ɛsɔwɔ ka ma rɛkɔmɔm ɛbɔ. Ka nden ɛyirɛ yi na yi nnɛjiŋ ara bɛnɛ nɛyɔ ka ɛjiŋi.”

Pita atɛn nɛgbɛrɛ Jisɛs

⁵⁴ Ka ba ɛba ba njoa Ɛsɔwɔ abɔb Jisɛs akɔɛ amu ka njoa ntona atona ba ɛjɔɔ Ɛsɔwɔ. Pita ajɛnɛ dɨghadɨgha atɔŋɔ abɔɔ.

⁵⁵ Ka nden yi bantiŋi ami kɔnɔ ngon ka neka ɛtik ajɔn ji, Pita atima jɔn ka abɔɔ.

⁵⁶ Ɛsika ngon ɛyɨgha na, mɔanjo ɛwi yɔ nka ayɛ Pita ka ajik ka nkɔa ngon. Abriɛ nnɔbɔnɔbɔ ka arag si, “Nnɛ nnyɔ ajɔnɔ ka nɛ.”

⁵⁷ Ka yɛ atɛn. “Maŋka, yɛ nyim,” yɛ arag.

⁵⁸ Ka nden kɛɛm, nnɛ yɔntiŋi afɨna yiɛ ka árag si, “Wɔ ɔyɔb ka ɛbɔŋɔ asɔgba Jisɛs.” Pita atɛn si, “Mɔanom, mmɛ saŋ!”

⁵⁹ Ɛkpɛ njɔn ma nden, nnɛ yɔntiŋi arag ka ɛkoro koro si “Ka ɛdidɨghɛ, mɔanom nyɔ ajɔnɔ ka nɛ, atubsi áru Ganini.”

⁶⁰ Pita akpɛɛ si, “Mɔanom, mmɛ nyim jiku atub ji ɔrɔ rɨgha!” Ɛsika arɨgha na, nkɔk akok.

⁶¹ Ntaa amaŋa abriɛ ka ámar. Ka Pita agbɔnter ji Ntaa atɔɛ: “Sɔŋ nkɔk akok ɛnɛ, ɔtɛnɛm mkpɛnɛ ɛsaa.”

⁶² Ka Pita aru ka nina ama bere atubsi ɛmaŋɛ ɛsiŋisiŋ.

Ba ɛbaba mfom ayɔn Jisɛs

⁶³ Anɛ ba ára baba Jisɛs ajimɛ nɛyɔghɔ ka amɨbɛ.

⁶⁴ Abɔbɛ mbɔɔ ka amar ka abɔmɛ, “Ɔnyinanyi, tɔ war si ɔrɔyɛ nɛbri amar! Yɛnnɛ amɔba?”

⁶⁵ Ka anyiɛ ka abembem abibia nsɔn ya akpaa anighɛ.

Akɔ Jisɛs amu ka aton ɛjibɛ

⁶⁶ Ka ɛfrusu, abakogho ɛjibɛ, atona ba ɛjɔɔ Ɛsɔwɔ ka ba Ɛkpina ajighia Jus akɔn, ka akɔ Jisɛs ama kɛɛ abɔɔ.

⁶⁷ “Arena wɔ yɔ ɔre Kɨras,” Abɔɔ abɔmɛ, “Tɔ war.” Jisɛs akpɛ abɔɔ, “Ntɔ na war ɛtamam,

⁶⁸ ka mbɔmɔ na war mbɔmɔ mɛkpɛm.

⁶⁹ Ka jam ka nɛmaŋ, Mmɔanɛ yɔ Ɛsɔwɔ akɨno ára jɔn ka ɛbonom Ɛsɔwɔ bi gaga.”

⁷⁰ Abɔɔ kpakpa abɔmɛ, “Ɛru si wɔ ɔre Mmɔ Ɛsɔwɔ?” Yɛ akpɛɛ abɔɔ si, “Ɛmi rak si ndere.”

⁷¹ Ka abɔɔ arag, “Nnaŋ ka ɛkpɛsɛb anɛ ba atɔ war atubɛ? War abafɔnɔ ɛmi yɔk ka nnyɔ ɛbɛ.”