Luk 20 - Nde

Abɔmɔ mfom bi Jisɛs akɔ nɛyɔ ɛnɛ

¹ Ɛfobi, ɛsika Jisɛs ará kpine anɛ ka arɨgha atub ɛtiŋi nɛwɛmɛ Ɛsɔwɔ ka nkɔa njoa njɔm, atona ba ɛjɔɔ Ɛsɔwɔ ka ba akpine ajighia Jus, akpɛnɛ ka abakoghoa Jus akɔŋɛ.

² Abɔmɛ si “Tɔ war mfom bi ɔrɔkɨghɔ nɛyɔ ɔnem nsɔn nyi.” “Yɛnnɛ akɛa nɛyɔ ni?”

³ Jisɛs akpɛ abɔ si “Ntam bɔmɔ war mbɔmɔ. Ba tɔm:

⁴ ɛwurua anab ji Jɔn ara wuru anɛ ɛru ka ɛtik Ɛsɔwɔ kasɛ nnɛ?”

⁵ Abɔɔ agbɔju ka ajɛnɛ akpɛɛ, ɛrighana si, “Ɛru ka ɛtik Ɛsɔwɔ, abɔmɔ war si ‘Nnaŋ ka ɛrɛ tama ɛkɛ Jɔn?’

⁶ Ka ɛrɨgha na si ‘Ɛru ka anɛ’ anɛ mba kpakpa atubu war atan atubsi abɔɔ kprɔb ami tama si Jɔn ajɔnɔ ɛsɔgba Ɛsɔwɔ.”

⁷ Ka abɔɔ akpɛɛ, “War ɛnyim mfom bi nɛyɔ ɛnɛ ɛru.”

⁸ Ka Jisɛs atɨma akpɛ abɔɔ si “Mmɛ war titi ntɔm mfom bi nɛyɔ ɛnɨŋa ni nda nkɨghɔ nnem nsɔn nyi ɛru.”

Nɛgana atub ba ɛkɨghɔa bɛ ɛgbɛ ka mbaŋa

⁹ Jisɛs atub nɛgana si: Mannom ɛwii abɨmɔ ɛgbɛ akabante akɔ akɛ ba ɛbaŋa ɛgbɛ ka amu nɛjɛn ni akaá abembem anya.

¹⁰ Ka nden yi akabante abini, yɛ atom mɔanjo ɛwɛ si ama tɔ ba ɛkɔghɔa bɛ ɛgbɛ ka mbaŋa si akɛɛ akab ya áre mbaŋa ɛyɛ. Ɛnyɔ ji ka akɛɛ mbaŋa ɛyɛ, ba ɛkɔghɔa ɛgbɛ ára mɔbɛ mɔb ka akamɛ akru abɔabɔ.

¹¹ Afɨna atom mɔanjo yɔntiŋi yɔ abɔɔ mɔbɛ, anyɛɛ akpɛnɛ fa ka afɨna akamɛ akru abɔabɔ.

¹² Mfɔnɔ ɛgbɛ afɨna kpɛɛ tom mɔanjo yɔntiŋi ka ɛnumu nkpɛnɛ ɛsaa, yɔ ára fɨnɛ amɔb tɛtɛ ateɛ bɛnɛn ka ajarɛ ka amara nɛkɔ si akru.

¹³ “Ka mfɔnɔ ɛgbɛ arag si, ‘Nne naŋ? Nto mɔ ɛwɨŋa yɔ ara kɔrɔm; mkpɛnɛmɔŋɔ yɛ yɔ áto abɔɔ ka ámar amiɛ na yɛɛ.’

¹⁴ Ka nden yi ba ɛkɨghɔa ɛgbɛ ayiɛ, agbɔju ka atɛm. ‘Nnyɔ mɔa mfɔnɔ ɛgbɛ yɔ akɔghɔ ɛgbɛ nji nsɛ amina kpɔ,’ Ɛyonɛ kasɔŋ ɛgbɛ nji ɛjon jijɨrɛ.

¹⁵ Ka atuɛ aru ka ɛgbɛ, áyonɛ. “War ɛtere si mfɔnɔ ɛgbɛ ane abɔɔ jɛ?

¹⁶ Abɨgha ama yon ba ɛkɨghɔa ɛgbɛ akabante ji, akɔ ɛgbɛ akɛ anɛ bantiŋi.” Ɛsika anɛba ayɔghɔ na, arag si, “Ɛsɔwɔ krɛ tama!”

¹⁷ Jisɛs abri abɔɔ ka ámar ka abɔmɔ abɔɔ si, “Ka ji ayɛnɛ na ɛru naŋ: “ ‘Nɛtan ni bɛ sigha njo atɛnɛ ninɛ ni ɛmi fɛnɛ ɛyaŋa nkora nɛtan ni ɛfɨne ɛsi ntana njo?’

¹⁸ Nnɛ yɔku yɔ agbɔ akomo nɛtaan ni ajɔghɔjɔghɔ ka ajaja; nnɛ yoku yɔ nɛtaan ni ɛgbɨghɔ ɛkomɛ ɛgɔghɛgɔg.”

¹⁹ Ba ɛkpina ɛjighi Mosis ka atona ba ɛjɔɔ Ɛsɔwɔ asɛb mbaa yi abɔbɛ fri fri atubsi agbɛrɛ gbɛrɛ si atubu nɛgana ni akɛ abɔɔ. Ka arɛ sab abɔbɛ atubsi abɛ ntakpa ɛbɨŋɔ ɛjɔnɔ fa.

Nɛkɛ Sisa akpugha mfam

²⁰ Ɛsika ára kporɛ na, atom anɛ ba aderɛ si ayim ka nɛ. Atimi si aneɛ ya arag ji abɔɔ atɔgɔ fa abɔbɛ akɛ Maŋkogha mfam yɔ akpe nɛyɔ ni ayono nnɛ yɔku.

²¹ Ka anɛ ba nkpor abɔmɛ: “Nkpikpɨne, war ɛnyinyi si wɔ ɔrɔ rɨgha ɔfine okpine ji ɛre ka ɛdidɨghɛ, si ɔrɔ kɨghɔ nnɛ yɔku kanakan, ɔfine kpɨne mbaa Ɛsɔwɔ ka ɛdidɨghɛ.

²² Ɛnɔnɔb ka mbaa Ɛsɔwɔ si war ɛrɛ kɛɛ Sisa, ji Nton atona Rom, akpugha mfam kasɛ ɛrɛ nɔb?”

²³ Jisɛs ayɛ ɛwak bi abɔɔ atɨŋɔ ka akpɛ abɔɔ si

²⁴ “Ba tɨŋɔm ɛkpugha ya ɛrɛ kɛɛ. Ɛsiamár ka mbiŋa yɛnnɛ yi áre ka akpugha nnya?” “Ji Sisa”, abɔɔ akpɛɛ.

²⁵ Ka Jisɛs atɔ abɔɔ si “Ba kɛɛ Sisa ɛjom ji ɛre jijɛ, ɛkɛ Ɛsɔwɔ ji ɛre ji Ɛsɔwɔ.”

²⁶ Mbaa yi asɨŋi akpɛ abɔɔ ane arɛ kpɛma afɨnɛ ka ɛjighi ka ɛbɨŋɔ anɛ, ára saa abɨno nyɔ.

Mbɔmɔ arena akuanɛ akpɨgha nyimi

²⁷ Abakoghoa Jus ba abɨŋi si Sadusi ba arɛ tama si nnɛ amɨna kpɔ akpɨgha fɛnɛ ajɔn ka nekpen, ámu ama bɔmɔ Jisɛs mbɔmɔ.

²⁸ Abɔmɛ, “Nkpikpɨne, Mosis ayɛnɛ akɛ war si mɔa nnaja yɔ nom akpɔna asig ŋkaa yɔ arɛ wɛn abɔɔ, ɛkɨnojɛ ɛkɔ ŋkawɛ kasɔŋ awɛn abɔɔ ka mbiŋa mɔanyɛɛ

²⁹ Maŋ, árena akɨno asima ji abɔanom ka mgbɔghamba akɔ maŋka ka ama kpɔ árɛ fon mɔɔ.

³⁰ Ɛkɨno ɛjɛ ji ɛtɔŋɛ ɛkɔ maŋka nyɔ, atɨma kpɔ árɛ fon abɔɔ,

³¹ ɛnumu ɛkɨno bɛsaa nji nom ɛtɨmɛ kɔ maŋka nyɔ árɛ wɛn abɔɔ, ɛjɔnɔ na ɛkɛ akɨnɔ asimma nya kprɔb, yɔku árɛ fon abɔɔ.

³² Ka ɛkɨnanjam, maŋka akru kpɔ.

³³ Ka maŋ, ka ɛfo bi akuanɛ anyimi maŋka nnyɔ ajɔnɔ yɔ yɛnnɛ, atubsi akɨno nya asimma ájɔnɔ anobɛ?”

³⁴ Jisɛs akpɛ abɔɔ si “Nɛban ɛre ɛkɛɛ anɛ ba áre mfa ka ɛyiŋ.

³⁵ Ka anɛ ba afɔfɔm asii ka amar Ɛsɔwɔ ajɔnɔ ka nekpen ka nden yi amɨna kpɔ amu ka ɛyiŋ ji anɛ arɛ jɔnɔ akɔghɔ nɛban,

³⁶ ka akpimɛ kpɔ; atubsi ajɔnɔ na ka ba asɔn ateb Ɛsɔwɔ ba áre ka nɛwɛmɛ nɛwɛmɛ. Ami yaŋa abɔɔ Ɛsɔwɔ atubsi áre abɔɔ ba anyimi ajɔn ka nekpene nɛwɛmɛ nɛwɛmɛ.

³⁷ Ka nden yi Mosis ayɛ ngono ɛmɛ bi ɛrɛ jɔno ɛfi ɛkonogbɛ, yɛ arɨgha rak atub nɛnyimi ka nden yi abɨŋi Ntaa si ‘Ɛsɔwɔ Ebragham, ka Ɛsɔwɔ Isaac, ka Ɛsɔwɔ Jekɔb.’

³⁸ Yɛ árem Ɛsɔwɔ akuanɛ, áre Ɛsɔwɔ anɛ ba áre mber atubsi ka ɛsiamar ɛjɛ anɛ kpakpa áre mber.”

³⁹ Ba akpɨne ɛjighi Mosis bantiŋi atama akɛɛ si “Ɔmi rag ɛnɔb, Nkpikpɨne!”

⁴⁰ Ka nnɛ yɔku arɛ kpɛma abɔmɛ abɔmɔ yantiŋi.

Yɛnnɛ áre nsɛ Ninagha?

⁴¹ Ka Jisɛs abɔmɔ abɔɔ si ɛgbɔnaŋ ka ára rɨgha si Kɨras áre mɔa Defid?

⁴² Defid mfɔnɔ ane ɛjibi ka nwɛra Sams si, “ ‘Ntaa atɔ Ntaa ji jɨŋa. Jɔn ka ɛbɔnom ɛbɨŋa,

⁴³ tɛtɛ mmɛ nem anɛ ba ɛjiŋ ɛba, asɨnɛ bɛji ajɔna ka ete ji ɔkɨno ajaa aya.’ ”

⁴⁴ Defid abiŋɛ si Ntaa. Ánenaŋ akpɛ jɔn mmɔ ɛwɛ.

Ba baaba ɛnɨrɛ ka ba Akpɨne ajighi

⁴⁵ Ɛsika anɛ kpakpa ára yoŋo atɔŋ na, Jisɛs atɔ ɛkan ɛjɛ si,

⁴⁶ “Ba baaba ɛnɨrɛ ka ba Ákpɨne anɛ ɛjighi Mosis. Ɛrɛ kɔrɔa abɔɔ nɛjɛnɛ asibi ka akpaŋa ɛnebe asɛbɛ anɛ ba akɛ abɔɔ nɛkɨgha ka mfom mfom biku ka asɛbɛ agbɔghamba nnji ka ɛkɔnɔ ba Jus.

⁴⁷ Ára rɔbɔ agɔn ba anom abɔɔ akpɔ asig ka araba ajijɔm nna wusi abɔɔ ba agaa fɔm. Anɛ mba abɛnɛ ntakpa nɛyiri aga anɛ kprɔb.”