Luk 2 - Nde

Ɛsika awɛnɛ Jisɛs

¹ Ka nden yí Nton Ɔgɔstus ajɔnɔ Nton Aton ka ɛyiŋ ji abɨŋi si Rom, akɛɛ̀ ɛjighi si afan anɛ kpakpa ba are ka neyɔ ɛnɛ.

² Ɛjɔnɔ́ mgbɔghamba ɛfana anɛ ka nden yi Kuinirius ajɔnɔ̀ nton ɛjɨbɛ ji abɨŋi si Siriya, ka nɛyɔ Rom.

³ Ɛrufa ka anɛ kpakpa amu ɛfana anɛ ji, nɛnnɛɛ amu kɛ ɛsisok ɛjɛ.

⁴ Ɛru na ka Josɛf atɨmɛ ka ɛsisok ji abɨŋi si Nasarɛt ka ɛja Ganini amu ka Bɛtnɛghɛm, ɛsisɔkɔ Dafid ka ɛja Judiya atubsi yɛ aruu ɛbanab ɛjii ka Dafid.

⁵ Amuu ka Meri yɔ ámi tama si ábanɛ kasoŋ akak abiŋ abɔɔ ka ɛfana anɛ. Ɛjɔnga si ákɨgha ka nɛɛ yɔku, Meri abɛnɛ ɛna bi ɛkpi si ka nɛwɛnɛ.

⁶ Ɛsika áre fa, ɛwɛn ɛboɛ.

⁷ Awɛnɛ mgbɔghamba mɔwɛ, mɔa nnom. Áfuɛ ka abɔɔ abom ka ɛkpaghante ji ara kɛɛ ɛjɔɔ anab ka ɛbru ɛnyam, atubsi mfom arɛ jɔn ka nna njo yi abɔɔ ka anɔŋɔ.

Ba ɛbaba ɛjɔɔ ka Bɛsɔna ateb Ɛsɔwɔ

⁸ Ba Ɛbaba ɛjɔɔ ajɔnɔ ka ɛyɨgha abɔɔ akpere mfombi ka ɛnokon.

⁹ Nsɔna-ateb Ɛsɔwɔ abru-bru, nɛgam Ɛsɔwɔ ɛnem mfom aya asibi abɔɔ. Ɛkub ɛbɔb ba ɛbaba ɛjɔɔ.

¹⁰ Nsɔna-ateb Ɛsɔwɔ atɔ abɔɔ: “Ba krɛ bɛ! Si mbaa ka nyɛbɛ ɛteb ka ntakpa ɛyɛbɛ netem ma nkɛɛ anɛ kpakpa

¹¹ si ɛnɛ ka ɛsisɔkɔ Defid ami wɛn Nninagha akɛɛ war; yɛ yɔ áre Kɨras ji Ntaa.

¹² Ji ɛkɔghɔ ɛgbɛrɛ ɛresi ɛyɛ mɔɔ yɔ afuɛ ka abɔɔ abom ka ɛkpaghante ji ára kɛɛ ɛnyam ɛjonɛnɛghɛ.”

¹³ Fifa fifa, abembem Bɛsɔna-ateb Ɛsɔwɔ abru akpɛnɛ ka mgbɔghamba Nsɔna-ateb ákara Ɛsɔwɔ si,

¹⁴ “Nɛgam ka Ɛsɔwɔ ka bɛsɔ bi ɛyɨre ɛgaga, ka nɛna ɛjɔn ka nse ɛkɛ anɛ ba yɛ atɨŋɔ nɛnɔbɔ.”

¹⁵ Ɛsika Nsɔna-ateb Ɛsɔwɔ afɛnɛ akru ka bɛsɔ, ba ɛbaba ɛjɔɔ atɔ atɛm, “Ɛmu ka ɛsisɔkɔ Bɛtnɛghɛm ɛmɛ yɛ njɛna ɛteb bi Agaga-Nton átebe war na.”

¹⁶ Ajɛjɛn frifri asi ama yɛ Meri ka Josɛf ka mɔɔ yɔwɛ ka anɔŋ kɛ ɛkpaghante ɛjɔɔ.

¹⁷ Nden yi abɔɔ ayɛ mɔɔ nyɔ, atɔ anɛ ba ajɔnɔ fa ji Nsɔnɔ ateb Ɛsɔwɔ atɔ abɔɔ atubɛ,

¹⁸ ɛma jɔn ɛjo njɛnnjɛn ɛkɛɛ anɛ ba ayɔghɔ ji bɛ ba ba ɛjɔɔ atɔ abɔɔ.

¹⁹ Ka Meri akɔkɔ ji ayɔghɔ akak ka netem afɨna nɔŋɔ ka nkater.

²⁰ Bɛ ɛbaba ɛjɔɔ afɛnɛ fɛnɛ ka ɛyɛbɛ netem, ɛyighi ka nɛkara akɛ Ɛsɔwɔ ka ɛjom ji abɔ áyɔghɔ afɨna áyɛ kanakan ka Nsɔnɔ eteb Ɛsɔwɔ atɔ abɔɔ.

²¹ Ɛnumu afo anɨghanɛ, akɨbɛ ndor, abɨŋɛ si Jisɛs ɛsika Nsɔna-ateb Ɛsɔwɔ atɔ nnyɛɛ kà ayibi ɛna ɛbɛ.

²² Nden ama si yi Meri aru ka njo abuk ɛsika ɛjɨghi Mosis ɛrɨgha, Josɛf ka Meri akɔ Jisɛs amu ka Jɛrusanɛm ama sɨghi abɔ akɛ Agaga Nton.

²³ Áne ɛsika ayɛnɛ ka nwɛr ajɨghi Agaga Nton si, “Abri mgbɔghamba mɔa nnom yɔku ka nɛɛ yɔ afɔfɔm ka amar Ɛsɔwɔ.”

²⁴ Áfɨna akɔɛ asɨgha abɔ akɛɛ Agaga Nton, akpɛnɛ ka nɛjɔɔ ɛmɛb bɨba. Árɛna yɛɛ ɛmɛb, akɔghɔ ɛbɨnagu bibaa, “Ɛsika ɛjɨghi Agaga Nton ɛrɨgha.”

²⁵ Nnɛ ɛwi ájɔnɔ ka nden nyi ka Jɛrusanɛm yɔ abɛnɛ nnɔbɔa nɛwɛmɛ afɨna ajɔn nea atiŋi nsɔn ka amar Ɛsɔwɔ yɔ ánɛ si Simiɔn, ará bri si áyɛ nɛnagha ni ɛbɨgha ka Isren atubsi Nɛfɛb Ɛsɔwɔ ɛjɔnɔ ka nɛ.

²⁶ Ka Nɛfɛb Ɛsɔwɔ ɛjibi ɛtɔɛ si yɛ akpɔghɔm akɨghana fɨnɛ amar ayɛ́ ayɛ Kɨras ji Nton áto.

²⁷ Nɛfɛb Ɛsɔwɔ ɛfɨnɛ sɔn Simiɔn ɛmu ka nkɔa njoa njɔm. Nɛyɛ ni ayɛ nnyɛ ka nsɛ Jisɛs ka abɨgha ka nɛ si ama nem ka nɛwɛmɛ abɔɔ ɛsɛbɛ.

²⁸ Simiɔn atáb mɔɔ nyɔ ka abɔ akara Ɛsɔwɔ si:

²⁹ “Agaga Nton, ɛsika ɔragha, Nton nɔŋɔ nnea nɛtom ɛna akru ka nɛna si mmi yɛ nɛnagha ɛna.

³⁰ Ka amar ayɨŋa mmi yɛ Nninagha,

³¹ yɔ ɔtɔŋɔ ka amar ane kpakpa:

³² ɛfɔŋɔ ji ɛbɨgha ka nɛnagha ɛkɛɛ ɛyiŋ ka nɛgam akɛɛ anɛ ba Isrɛn.”

³³ Nsɛ ka nnyɛ anɔŋɔnɔŋɔ nsɔn ya arɨgha atubɛ ka nkater.

³⁴ Ka Simiɔn ánara abɔɔ afɨna atɔ Meri ji nnyɛ si: “Mmɔ nnyɔ abaa ma nem abembem anɛ agbɔ, bantiŋa ayar ka Isren, afɨna jɔn ɛjo ndɛŋe ji anɛ arɨgha abibia nsɔn atub,

³⁵ yi ɛtɨŋɔ nkater abɔɔ. Wɔ ɔwagha netem nna wɔsi ájima akparija.”

³⁶ Ɛjɔnɔ Ɛsɔgba Ɛsɔwɔ ji maŋka yɔ anɛ si Ana, mmɔa Penuen ka abɔanyɛ Asa. Akokon ka ɛtiŋi tiŋi; akaa ka nɛbana nnom ka nya ɛsima ka nnom ɛwɛ akpɔ asighɛ

³⁷ asa ka ɛgɔn tɛtɛ aka nnya atɨna anɛ ka ɛnɛ. Ára kà ka njoa njɔm ka njan ɛfen ka ɛnokon jiku jiku akɨgha njɔm.

³⁸ Atɨma atɔŋɔ abɔɔ akak Ɛsɔwɔ sam afɨna arag atub mɔɔ ka nɛnagha ɛnɛ ni anɛ ara bri ka Jɛrusanɛm.

³⁹ Ka nden yi Josɛf ka Meri ami nem kpakpa nsɔn ka ɛjighi Nton ɛsɛbɛ, afɛnɛ akru ka ɛja Ganini ka ɛjɨbɛ abɔɔ ji Nasarɛt.

⁴⁰ Fa yɔ mɔɔ arɨmɛ ka nɛyɔ ka ɛgbɛrɛ ɛjom ɛsika Nɛfɛb Ɛsɔwɔ ɛkɛɛ.

⁴¹ Nnyɛ ka Nsɛ ara mughu ka Jɛrusanɛm ka nyagha nnya ama yighi ɛfo nɛfɔrɔ.

⁴² Nden yi mɔɔ abeŋe nnya wobo ka ɛbaa, amu ka nɛ ɛsika ɛtɔŋɔ.

⁴³ Ka nden yi ɛyighi ɛkɨnɛ, ɛsika nnyɛɛ ka nsɛ ajɛnɛ na akru, Jisɛs asaa ka Jɛrusanɛm. Nnyɛ ka Nsɛ arɛ gbɛrɛ.

⁴⁴ Esika akɨno ɛkpo si arɨgha tɔŋɔ abɔɔ, ajɛn ɛfo tutu ka ama agbɛrɛ. Yi ariɛ yɛ, asɛbɛ ka ɛbɔŋɔ abɔanyɛ ka atɛm abɛ.

⁴⁵ Ɛsika ariɛ yɛ kɛ ɛbɔŋɔ anɛ abɛ, abɔɔ afɨna fɛnɛ ama sɛbɛ ka Jɛrusanɛm.

⁴⁶ Ɛkɔɔ afo asaa ka ayɛɛ ka njoa njɔm ka ajik ayoŋo atɔŋ akɛ ba akpikpɨne ká abɔmɔ abɔɔ abɔmɔ.

⁴⁷ Ɛjɔnɔ njɛn ɛjom ka atɔŋ anɛ nɛyɨghɔ nɛgana nɛgbɛrɛ ɛjom ka nɛkpɛ ni ɛrɛruɛ ka nnyɔ.

⁴⁸ Ka nden yi nsɛ ka nnyɛɛ akɔŋɛ, bɛji ɛkpɔ abɔɔ. Nnyɛ abɔmɛ, “Mmɔ, nnaŋ ka oné war na? Nsɔja ka naŋa ɛmia sɛb kɛtiŋi tiŋi.”

⁴⁹ Ka yɛ abɔmɔ abɔɔ si “Ɛgbɔnaŋ ka ɛsɛbɛm? Ɛnyim si ɛre yi ka nda jɔnɔ ka netom nsɔjɨŋa?”

⁵⁰ Abɔɔ ɛrɛ jibi ji yɛ arɨgha atɔ abɔɔ.

⁵¹ Atɔŋɔ abɔɔ akru ka Nasarɛt, ane nsɔn ka ɛtiŋi mɔɔ; nnyɛɛ akɔ kpakpa nsɔn nyi akak ka netem.

⁵² Ka Jisɛs aram afɨna beŋe ka nɛgbɛrɛ ɛjom ka Ɛsɔwɔ akɛɛ.