Luk 17 - Nde

Jisɛs akpine atub nɛ ne abibia nsɔn, ɛkɨnoamar, ka nɛtom nnɛ nnɛ

¹ Jisɛs atɔ ɛkan ɛjɛ: “Nsɔnɔ nɛgara ɛrɛba ba ka ɛjɔnɔ ɛbibi ɛkɛ nnɛ yɔku yɔ ane nsɔn nyi ɛba.

² Ka ɛnɔbɔ nɛkinɛ abɔɔ nnubua nɛtan atub ka aya ɛga abɔɔ nɛ ne abɔnsɛ agbɔ ka nɛgara.

³ Ba baaba ninɨrɛ. “Arena yi ɛkɨno ɛja ji nnom, si ji ŋkaa agbɔ nɛgara ɛna, yama; ka amɨna yaŋa, tam sɨghɛ.

⁴ Aragasi agbɔa nkpɛnɛ ɛsimma ka ɛfo, afɨna ama gɔra nkpɛnɛ ɛsimma si ‘Mmi yaŋa,’ ɔtɨmɛ ɔsighɛ”

⁵ Asɔgba abɛ atɔɛ si Ntaa, kpɛnɛ war ɛkɨnoamar!

⁶ Ntaa akpɛ, “Ɛkpe na ɛkɨnoamar ji ɛwiri na ka mogha nduk. Mok ya awiri aga nduk, ɔmama ɔtɔ ntakpa ɛte nji ka arɔg si, ‘Ɛmɛnɛ ɛma mɛɛ ka aya,’ ɛtimɛ ɛjɔn ka ɔrɨgha.

⁷ “Kɔ si nnɛ ɛwi ka ɛbɨŋɔ ɛja akpe mɔanjo yɔ abɨmɔ ɛgbɛ ka yɔntiŋi ababa ɛjɔɔ. Yɛ atɔtɔ mɔanjo nyɔ yɔ kru ɛgbɛ si, ‘Ba ba jɔn nji ɔnɛ ɛjonɛnɛghɛ?’

⁸ Yɛ atɔghɔm mɛtɔ si, ‘Naam ɛjonɛnɛghɛ ɛjɨŋa ɔkɛm ka wɔ otoŋo bɛji ɔjɔnɔ brim mmɛ ntɨghɔ nɛ ka mɨna kan wɔ ɔnɛ ka ɔwɔ jija?’

⁹ Nsɛnjo akɨgha kak mɔanjo sam ka nden yi yɛ ane ji atɔɛ si anem?

¹⁰ Ɛtɨmɛ ɛre ɛkɛ war titi si, ɛmɨna nem kpakpa ji atɔ war si ɛnem, ɛrɨgha si, ‘War ɛre abɔanjo ba árɛsi; ɛtɨmɛ nem ji ka ane.’ ”

Jisɛs atab anɛ wobo ká ábini

¹¹ Ɛfobi, ɛsika Jisɛs ára mu Jɛrusanɛm, asiŋi ka ɛfaba Sameriya ka Ganini.

¹² Ɛsika akpere ɛjibɛ ɛjɨi, anɛ wobo ba ayá abini akɔŋɛ. Áyimi dɨghadɨgha

¹³ abéŋe “Jisɛs, Ntaa, bri war ɛkpɔghɔsi!”

¹⁴ Ɛsika Jisɛs ayɛ abɔɔ, arag si, “Ba sɔŋ tɔŋɔ ba Jus ka ba ɛjɔɔ Ɛsɔwɔ bɛji ɛbrɛ ka ɛre.” Ɛsika amu, abini akan.

¹⁵ Ɛwii ka ɛbɨŋɔ abɔɔ átɨma ayɛ nna ka bɛji ɛgbinɛ fɔm, afɛnɛ frifri, ka ayighi Ɛsɔwɔ gbogbo.

¹⁶ Agbɔ anɔŋɔ ka atá Jisɛs, akɨghɛ sam ka ji ane akɛɛ, yɛ aru Sameriya

¹⁷ Jisɛs abɔmɔ, “Árɛ jɔn anɛ wobo ba bɛji ɛkoro abɔɔ? Baga asimawobo ma?

¹⁸ Nnɛ yɔku arɛ fɛnɛ ama yighi Ɛsɔwɔ ɛrɛsiŋ yɔmfa yɔ áre njɛnannɛ?”

¹⁹ Ka akpeghe atɔɛ, “Tam sɔŋ; ɛkɨno amar ɛja ɛmi nem bɛji ɛkora.”

Jisɛs akpɨne atub ɛton Ɛsɔwɔ ji ɛkpi ba

²⁰ Nden ɛyi, yi ba Farasi abɔmɛ nden yi ɛton Ɛsɔwɔ ɛbɨgha, Jisɛs akpɛ abɔɔ si, “Nɛbɨgha ɛton Ɛsɔwɔ ɛrem ɛjom ji ayɛ ka ámar,

²¹ ka anɛ amam arag si, ‘Yigha jijɛ ŋga kasɛ yigha jijɛ ga’ atubsi ɛton Ɛsɔwɔ ɛre mfa ka nɛwɛmɛ ɛnɨrɛ.”

²² Ka atɔ ɛkan ɛjɛ, “Nden arɨgha bɨgha yi ɛfana war si ɛyɛ ɛfo Mɔanɛ yɔ Ɛsɔwɔ akɨno, ka yɛm.

²³ Anɛ átɔ war tɔɔ si, ‘Yigha yɛ ga!’ Yintiŋi, ‘Yigha yɛ ŋga!’ Ba krɛ ɛbɛ ɛtɔɔŋɔ abɔɔ.

²⁴ Atubsi ɛfo bi Mɔanɛ yɔ Ɛsɔwɔ akɨno ɛjɔnɔ nna ka nsan, ya atɨgha amɔnɔ nɛbo kprɔb, jam ka nkɔ ɛyii asi ka nkɨnɛsi.

²⁵ Ka yɛ ágbɔghɔmba áyɛ nɛyiri ka ɛtiŋitiŋi ka ɛyiŋ nji ɛtɛnɛ.

²⁶ “Ɛsika ɛjɔnɔ ka ndena Noa, na yɔ ɛtɨma ɛjɔn ka afoa Mɔanɛ yɔ Ɛsɔwɔ akɨno afɛ̀nɛ̀.

²⁷ Anɛ ára nɛghɛ ka áwɔghɔ, ka ane mban tɛtɛ ɛsi ɛfo bi Noa animɛ ka ɛgbaa. Ka nyɛ́n aba ama nsɔn abɔɔ kprɔb.

²⁸ “Ɛtɨmɛ ɛjɔn na ka ɛfo Nɔt. Ánɛ ára nɛ ka áwɔghɔ, ágo ka agóro, ábɨmɔ ka ásɨghi.

²⁹ Ka ɛfo bi Nɔt áru ka Sodom, ngon ka atana nsan aru ka bɛsɔ nna ka anab ara nɨgha, ama yon abɔɔ kprɔb.

³⁰ “Ɛtɨmɛ ɛjɔn na ka ɛfo bi Ɛsɔwɔ ájibi Mɔanɛ yɔ yɛ akɨno.

³¹ Ka ɛfo bifa nnɛ yɔku yɔ nɛbɛnɛ ɛnɛ ɛre ka naa njo yɛ akomo ka nɛbɨno árɛ mu si ama kɔ nsɔn ɛyɛ. Áraga si nnɛ yɔ áre ka ɛgbɛ árɛ fɛnɛ si ama kɔ ɛjom jiku.

³² Ba gbɔnter ji ɛru ɛkɛ ŋkaa Nɔt.

³³ Nnɛ yɔku yɔ anɨghɔ si abába nekpen ɛnɛ ɛtanɛtan, ka nnɛ yɔ asighi abɔ ka nekpen ɛnɛ akɛ Ɛsɔwɔ, yɛ yɔ abɛnɛ nekpen.

³⁴ Ba yoŋo atɔŋ, ka ɛnokon ji anɛ abaa anɔŋɔ ka ɛsimi ɛjii; ntono ɛwii asa ɛwii.

³⁵ Abakaa abaa ára gɔg nsɔn ka mfo bi, ntono ɛwii asa ɛwii

³⁶ Abanom abaa ajɔnɔ ka ɛgbɛ; nkɨghɔ ɛwii yɔga ásaa.”

³⁷ “Ntaa, ka faŋ?” Abɔɔ abɔmɔ. Jisɛs akpɛ abɔɔ si, “Mfom bi nkuannɛ anɔŋ, fa yɔ atɛrɛ ára gbaa.”