Luk 14 - Nde

Jisɛs ka njoa nnɛa Farasi

¹ Ka Ɛfo-Ɛsiayɔ ɛbii, atebe Jisɛs si amu ka njoa ntakpa nnɛ ka ɛbɔŋɔ ba Farasi ama nɛ ɛjonɛnɛghɛ, naŋga anɛ áre fa ára kporɛ.

² Nnɛ ɛwi yɔ atotó ajɔnɔ ka ɛsiamar ɛjɛ.

³ Jisɛs abɔmɔ ba Farasi ka ba gbɛrɛ ajighi si, “Ɛrɛre ka ɛjighi kasɛ ɛrem nɛ ne bɛji ɛkoro nnɛ ka Ɛfo-Ɛsiayɔ bi ɛnɔŋɔ si ɛkak Ɛsɔwɔ?”

⁴ Ka abɔɔ arɛ ma akpɛɛ. Ka Jisɛs agbɔɛ ɛjam, atabɛ ka ɛyaam, atɔɛ si sɔŋ kruu.

⁵ Ka abɔmɔ abɔɔ, “Arena yi nnɛ yɔku ka ɛbɨŋɔ ɛja akpe mmɔa mfoŋ ya agbɔɔ anam ka nɛbe anab ka Ɛfo-Ɛsiayɔ, yɛ ɛyighim frifri?”

⁶ Ka árɛ ma akpɛɛ jiku.

⁷ Ɛsika áyɛɛ anɛ ba átebe ɛyighi ka ára saŋa afom ba agá nɔb nɛjɔnɔ anɛ ɛjonɛnɛghɛ, Jisɛs atub nɛgana nni atɔ abɔɔ:

⁸ “Nnɛ ateba na nɛban, krɛ jɔn ka nji bi anɛ ba ɛsi ajɔnɔ, atubsi nkpɛnɛmɔŋɔ nnɛ arɨgha bɨgha yɔ ayɨrɛ agaa.

⁹ Ka ɛjɔnɔ na na, mfɔnɔ ɛyighi yɔ atebe war anɛ abaaba, abɨgha ama tɔa si ‘Tam ete kɛɛ nɛɛ.’ Ɔrɔ tɨmɛ ka ɛnyɛɛ ɔmu ka nji ɛbɨŋɔ.

¹⁰ Ka nden yi ateba na, jɔn ka nji bi anɛ Ba ŋga ajik kasɔŋ mfɔnɔ ɛyighi amɨna ba atɔa si ‘Nno, tam sɔŋ ka nnji abakogho.’ Nden nnyi yi ɔrɔ fɛnɛ nɛkɨgha ka ɛbɨŋɔ anɛ baga.

¹¹ Atubsi, nnɛ yɔ atába na bɛji asɨnɛ sɨnɛ, ka nnɛ yɔ asɨnɛ na bɛji atábɛ táb.”

¹² Ka Jisɛs atɔ nnɛ yɔ atebe ɛyighi, “Ɔkpɨna tebe anɛ ɛyighi, krɛ tebe atɛm ɛba, akɨno aya yanom si abakaa, abɔanaja si afaŋa anɛ ba áre akpera; onena na atɨma ateba ɛru si amia fɛrɛ.

¹³ Ka ɔkpɛna yighi, tebe akpak, abɛnnɛ, ba ra jɔŋɔ ata, ba anaga amar,

¹⁴ kasɔŋ wɔ bɛn nɛnɔbɔ. Ɛjɔ́nga si abɔɔ amam afɛra, Ɛsɔwɔ aganagan ka ɛfo bi ba nea anɔbɔa nsɔn anyimi ajɔn ka nekpen.”

Negana atub ntakpa ɛyighi

¹⁵ Ɛsika nnɛ ɛwi ka ɛbɔŋɔ anɛ ba ajɔnɔ ka ɛte ɛjonɛnɛghɛ ka Jisɛs ayɔghɔ nna, atɔɛ, “Ɛnɔnɔb ka nnɛ yɔ anɛghɛ ka ɛyighi ji ɛton Ɛsɔwɔ.”

¹⁶ Ka Jisɛs akpɛɛ: “Nnɛ ɛwi aboo si anem ntakpa ɛyighi ka atebe abembem anɛ

¹⁷ Ka nden ɛyighi ji átom mɔanjo ɛwɛ si ama biŋ anɛba átebe si ‘Ba ba si ɛmi toŋɔ nsɔn ɛkan.’

¹⁸ “Ka nɛnnɛ ára kɛɛ agbɨghaghɨgha ayɛ. Mgbɔghamba asi ‘Ngoó ɛgbɛ maŋ maŋ, mkpi mu ma mbri. Nnɨŋɔ ndɛ ba.’

¹⁹ “Yɔga asi ‘Ngoó mfɔŋ ɛbaa ɛbaa ka nji ndɔn maŋ maŋ si ama bɔm ɛgbɛ, ka nda mughu si ma nyɛɛ ka ágara nɛbɨmɔ. Nnɨŋɔ ndɛ ba.’

²⁰ “Ɛwi atɔɛ nkɨbɛ nkɨbɛ si ‘Nkɔ maŋka maŋ maŋ, mmam ba.’

²¹ “Mɔanjo ɛwɛ afɛnɛ ama tɔrɔ ji átɔɛ atɔɔ nsɛnjo. Ka mfɔna njo asak netem atɔ mɔanjo, ‘Sɔŋ frifri ka ɛno mbaa ka nna ɛjibɛ ɔma biŋ akpak, abɛnnɛ, ba anaga amar ka ba ɛjɔŋɔ ata.’

²² “ ‘Ntaa,’ mmi nem ka ɔrɨgha si nnem, ‘ka ɛyigha ɛkpagha re ji anɛ ajɔnɔ nji.’

²³ “Ka nsɛnjo atɔ mɔanjo ɛwɛ, ‘Sɔŋ ka abaa ka ayɨgha ka ɛjɨbɛ wɔ ɔwɛrɛ abɔɔ si aba, kasɔŋ ɛyighi ɛjɨŋa ɛson.

²⁴ Yoŋo atɔŋ, nnɛ yɔku arem ka ɛbɔŋɔ anɛ ba ntebe na ka árɛ ba yɔ ayoŋo ɛjonɛnɛghɛ ɛjɨŋa.’ ”

Nɛyoŋo nɛjɔnɔ Ɛsɔgba Ɛsɔwɔ

²⁵ Ntakpa ɛkan ára jɛn ka Jisɛs, ɛsika amaŋá abri abɔɔ, árag si:

²⁶ Nnɛ yɔku yɔ arɨgha si atɔŋɔm ka árɛ̀ tan ntera nsɛ ka nnyɛɛ, nkawɛ ka abɔɔ bɛ, akɨno ayɛ bannom ka abakaa-aragasi nekpen ɛnɛ mfɔnɔ-amam ajɔn ka ɛkan ɛjɨŋa.

²⁷ Ka nnɛ yɔku yɔ arena tama nɛyiri ka nɛku amam atɔŋɔm ka ɛkan ɛjɨŋa.

²⁸ “Arena nnɛ ɛwi ka ɛbɨŋɔ ɛja asɛbɛ si asi ɛnyɔŋ, átɨghɔmɛ ajɔn ji agbɛrɛ akpugha ya animɛ kasɔŋ agbɛrɛ ɛrena yɛ amama asi njo nyi akan?

²⁹ Atubsi ɔjimɛ na atana njo ka ɔrɛkpɛma ɔkan ka yi, ɔjɔnɔ ka asɔn

³⁰ si, ‘Nnɛ nnyɔ anɔghɔ si asi njo ka árɛ maa.’

³¹ “Árena yi nton akpi nɔk bɛta ka nton yintiŋi, agbɔghɔmba ajɔn anem nkater atub arena anɛ ɛbɛ ba áre ɛgɔr atan aba amama aga anɛ ba atu asi ɛgɔr atan anɛ ba ayim ka nton yiga?

³² Arena yi arɛghɛ maa, atoó anɛ ama kɔŋɔ nton yiga ka nden yi bɛta ɛkɨgha jam ɛsika abɛnɛ nɛna.

³³ Ɛtɨmɛ ɛre kanakan na ka war bantiŋi ba ɛrɛ sɛb si ɛjom ɛtana war ɛmam ɛjɔn ka ɛkan ɛjɨŋa.

³⁴ “Akaŋ anɔnɔb, ka nɛyɛbɛ enɛ ɛrɛnakpɛjɔn, ane naŋ akpɛ njɔn akaŋ?

³⁵ Arɛkpɛ nɔb si akɔ awuru kasɔŋ nsise anɔb ka afɨna nem nsɔn yi ga ɛnɔb. “Nnɛ yɔku yɔ akpe na atɔŋ ya yɔghɔ ɛjom, ayɔk.”