Luk 13 - Nde

Yaŋa nɛwɛmɛ kasɔŋ ɛrɛkpɔ ɛtan

¹ Anɛ bantiŋi ba ajɔnɔ fa atɔɛ atub anɛ ba Ganini ba Panet ató anɛ ba akpakaŋ abɛ si ama yon, ka ara kɔŋɔ abɔɔ áyon ka njoa njɔm ɛsika ara ajɔm Ɛsɔwɔ.

² Jisɛs akpɛ abɔɔ si, “Ɛkɨnoamar si anɛ ba Ganini mba ba áyono ka nɛyiri na ane abibia nsɔn aga anɛ ba árɛ yon?

³ Na saŋ, ka war titi ɛrena yaŋa netem ɛgɔ abibia nsɔn, ɛtɨmɛ kpɔkpɔ

⁴ Kasɛ ɛkɨnoamar si anɛ nɛko ka asaa ba njo agbɔɔ ayón ka Sinom abɨbi agá anɛ baga ka Jɛrusanɛm?

⁵ Na saŋ, ka ɛrena yaŋa nɛwɛmɛ war kprɔb ɛtɨmɛ kpɔkpɔ.”

⁶ Afɨna atub nɛgana si, “Nnɛ ábɨmɔ ɛte ji ɛ́rɛ ka akaab ka ɛgbɛ ɛjɛ, ka nden yi amuu si ama bɔŋ ára yɛɛ si ɛrɛ kaab.

⁷ Ára tɔɔ mbaba ɛgbɛ si ‘Mmi ba mfa ka nnya ɛsaa ya asiŋisiŋ si mma mbɔŋ akab ɛte nji, ka nkab yiku ndɛyɛ. Gbak tub, ɔja ka arɔg arɔg; ɛjɔnɔ fa ɛkɔ mfom ka nɛfa?’

⁸ “Ka mbaba ɛgbɛ akpɛɛ si, ‘Nnɨŋɔ ɛkpɛgara ka nya ɛyi, Ntaa, mmɛ mmbu nsise nsibi, nkak nsɔn yi ka ɛneɛ anɔb.

⁹ Ɛkaba na akab nnya wɔɔ, ɛnɔnɔb, ka ɛrena kaab, ɛgbak ɛtub.’ ”

Jisɛs ataba maŋka yɔ akpukɔŋ ka ɛyaam ka Ɛfo-Ɛsiayɔ

¹⁰ Jesus ará kpɨne ka Ɛkɔnɔ ba Jus ka Ɛfo-Ɛsiayɔ.

¹¹ Ka maŋka ɛwi ajɔnɔ fa yɔ ɛbibi ɛtughu ɛmiɛ bo ɛyaam ka nya nɛko ka ɛsaa; akpunkɔŋ ji ami nɔk si ɛtini árɛ maa.

¹² Ka nden yi Jisɛs ayɛɛ, abiŋɛ atɔɛ si, “Maŋka, mmia yighi ka ɛyaam mbi”

¹³ Akɔ abɔanyɛ akono maŋka nyɔ, fifa fifa njam atini, ára jam nɛkɨgha Ɛsɔwɔ sam.

¹⁴ Ka nton ɛkɔnɔ Jus asak netem si ɛgbɔnaŋ ka Jisɛs ane bɛji ɛkoro nnɛ ɛyam ka Ɛfo-Ɛsiayɔ, ɛtɔŋɔ fa yɛ atɔ anɛ ba ájɔnɔ fa si, “Ɛkpe afo asɨghasa ya ɛre ne ntom, ba ba nem beji ɛkoro war ka afo nya, ka ɛfonjɔm bi ɛrɛ ɛsiayɔ saŋ.”

¹⁵ Ka Nton akpɛɛ si “War ba ɛrɨgha nkam ɛnem mkam! War saŋ ka ɛwi ɛwi ɛrɛ́ fɔŋɔ ɛfɔŋ ka ɛbon ɛbrɛ ɛton abɔɔ ɛma kɛɛ anab ka Ɛfo-Ɛsiayɔ?

¹⁶ Ka ɛrɛ nɔb si ɛfɔŋɔ maŋka nyɔ ka Ɛfo-Ɛsiayɔ, mɔ Ebragham yɔ Nton-ajɛ amiɛ tugu ka nya nɛko ka ɛsaa ka ɛyaam?”

¹⁷ Nsɔn afɨne anɛ ba ɛjiŋ ka ntɔrɔ yi arɨgha; ka abembem anɛ baga ayɛbɛ netem ka atiŋa nsɔn ya ami nem.

¹⁸ Ɛtɔŋɔ fa yɛ arag si “Ɛton Ɛsɔwɔ ɛfɔŋɔ jɛɛ? Mfá ŋgara ka bɨgha ɛjom?

¹⁹ Ɛre nna ka mɔg akɔŋɔdɔr yi nnɛ abɨmɔ ka ɛgbɛ ejɛ; ɛme ram tɛtɛ ɛyaŋa ntakpa ɛte yi nsisɔk ɛrɛ sighi bɛjo ka ája.”

²⁰ Akpɛ bɔmɔ, “Ngara jɛɛ ka ɛton Ɛsɔwɔ?

²¹ Ɛre nna ka ɛjom ji ara kɨgha ka brɛd kasɔŋ átoó ji maŋka akɔɔ aburu ka ɛbembem ábughu tɛtɛ ɛyɛnnɛ ka mgba nyi ɛneɛ atoó.”

Nnyama mbu

²² Ka Jisɛs ajen ka asisɔk ka bɛjibɛ akpɨne anɛ ɛsika ára mu ka Jɛrusanɛm

²³ Nnɛ ɛwi abɔmɛ si, “Ntaa, ɛjɨgha anɛ kantiŋ ba áfɔrɔ?” Átɔ abɔɔ,

²⁴ Ba nyɔghɔ war ɛnam ka nnyama mbu bi si abembem anɛ anɔghɔnɔk si anam ka amam.

²⁵ Mfɔna njo amɨna tam ama gbaŋa mbu bi, ɔsa ka nina ɔra gbak mbu ka ɔgɔrɔ si, “Ntaa, jibi mbu kɛɛ war.” “Ka yɛ akpɛa si, ‘War nnyim ka mma mgbɛrɛ mfom bi ɛru.’

²⁶ “Nden nyi ɔrɔ rɨgha si, ‘Ɛjɔnɔ na ka na, ka ɛwɔghɔ ka na, ka nden yi ɔra kpɨne anɛ ntɔrɔ Ɛsɔwɔ ka asisɔk ayɨrɛ.’

²⁷ “Ka yɛ ákpɛ si, ‘Nntɔa si, war nnyim ka mma mgbɛrɛ mfom bi ɛru. Ruum ka ɛsiamar, ba anea abibia nsɔn!’

²⁸ “Ɛren ka nɛyiri ɛjɔjɔn ɛmina yɛɛ Ebragham, Asik, ka Jekɔb kpɛnɛ ka Asɔgba Ɛsɔwɔ ka ajik ka ɛton ɛbɛ, ára yighi war atub ka nina.

²⁹ Anɛ aru ka ɛja jiku jiku ka ɛyiŋ aba ama kɔ nji abɔɔ ka ɛyighi ji ɛtono Ɛsɔwɔ.

³⁰ Nsiaa, abembem anɛ ba ákɨnɛjam ayáŋa agbɔghɔmba, ka agbɔghɔmba ayáŋa akɨnɛjam.”

Ɛya nɛtem Jisɛs ɛkɛ Jɛrusanɛm

³¹ Fifa fifa ba Farasi bantiŋi amu ama kɔŋɔ Jisɛs atɔɛ si “Ru ka ɛjibɛ nji sɔŋ ka mfom bintiŋi si Ɛrɔd asɛbɛ si ayona.”

³² Yɛ atɔ abɔɔ si, “Ba sɔŋ tɔ ɛkponya ji, ‘Mkpɨgha nkama abibia atughu ka nne beji ɛkoro anɛ ɛnɛ ka ɛwana, ka ɛnumu afo asaa yɔ nkɨnɛ ka nɛtom ni nda nne.’

³³ Ɛru naŋ naŋ, mkpigha ne ɛnɛ ka ɛwana ka afo abaa, ka ɛdidɨghɛ ɛsɔgba Ɛsɔwɔ jiku ɛkpɔghɔm ji ɛrɛ jɔn ka Jɛrusanɛm!

³⁴ “Jɛrusanɛm, Jɛrusanɛm, war ɛre yono asɔgba Ɛsɔwɔ, ɛtubu anɛ ba Ɛsɔwɔ atoo akɛ war ataan, ɛrɛ kɔrɔm si ntuu abɔɔ ba nkak ka akpɔŋkpɔŋ nna ka nkɔk ára bɨno abɔɔ ɛbɛ ka ɔrɨmɛ tama.

³⁵ Ɔyɛyɛ, ɛjibɛ ɛja ɛmi gbɔ. Ntɔa si mɔkpimɛ yɛɛ tɛtɛ ɔrag si ‘Ɛnɔnɔb ɛkɛ nnɛ yɔ abaa ka mbiŋa Ntaa.’ ”