Luk 10 - Nde

Jisɛs atom Asɔgba atan asaa ka wobo ka ɛbaa

¹ Ɛtɔ́ŋɔ ɛjom, Jisɛs ayighi anɛ atan asaa ka wobo ka ɛbaa ka ɛkan ɛjɛ atom abɔɔ ka abaa abaa si agbɔɛ mbaa ka ɛjɨbɛ ka mfom biku bi akpɨna na mu.

² Jisɛs atub nɛgana si, “nden ka nsɔn yi nɛfughu ami si ka anɛ ba nɛtom árɨmem. Bɔɔ Ɛsɔwɔ yɔ áre mfɔnɔ ɛgbɛ si atom anɛ ba nɛtom ama afu ɛgbɛ, abɔŋ nsɔn.

³ Ba sɔŋ, si mmi war tom na ka mɔa njɔɔ ka ɛda ɛjɔɔ.

⁴ Ba krɛ fɨne ɛbam ɛbɔ, si ɛbam nɛjɛn, si akpɨghata; ka krɛ kak nnɛ yɔku nnyɔ ka mbaa.”

⁵ Njo yiku yi ɛnimɛ, gbɔmbaa rak si “nɛnaa ɛjɔn ka njo nnyi.”

⁶ Arena yi nnɛa nɛnaa áre fa, nɛnaa ɛna ɛtɔŋɛ; árɛna jɔn, ɛfɛnɛ ɛtɔŋa.

⁷ Jɔ́n ka anɛ ba akpera, ɛnɛghɛ ka ɛwɔghɔ jiku ji ákɛɛ war, atubsi mfughu ɛgbɛ anɛghɛ nsiŋi ɛgbɛ. Ba krɛ bɛmɛ ka bɛjo anɛ.

⁸ Ɛmɨna nam ka ɛjɨbɛ ji ɛkpere war, ba nɛ jiku ji akɛɛ war.

⁹ Taba anɛ ba áyam ba ɔyɛ fa, tam tɔ abɔɔ si “Ɛtono Ɛsɔwɔ ɛmi ba ɛkpere war.”

¹⁰ Ka ɛnimɛ na ɛjɨbɛ ji ɛtɛnɛ war, sɔŋ ka abaa ɛjɨbɛ ji wɔ rak si.

¹¹ “Aragasi ɛbubu ɛjɨbɛ ka atá áyirɛ ɛmi kom ɛwuru kasɔŋ ɛtɔŋɔ si Ɛsɔwɔ akpɨghe bɛnam ɛba. Ka ba krɛ tan nter: Ɛtono Ɛsɔwɔ ɛmi ba ɛkpere war.”

¹² Ntɔ war, Ɛsɔwɔ atɔŋɔm ɛjɨbɛ ji ɛkpɔghɔsi nná ka atɔɔŋɔ Sodom.

¹³ Ɛbibib ɛkɛ anɛ ba Korajin! Ɛbibib ɛkɛɛ Bɛtsaida! Atubsi, nsɔnɔ nɛgam yi ɛmi nem ka bɛjɨbɛ ɛja ka ɛne na ka Tyre ka Sidon, ka agɔɔ abibia nwɛmɛ mbaa arab, áyɔbɔ ásɨgha nsɔn ka ntɔŋ yi ɛtɔ́ŋɔ nɛgbɛrɛ abɔɔ si ane ɛbibi.

¹⁴ Ɛjɔn ga si anɛ ba Tyre ka Sidon atɨma nem abibia nsɔn, ɛgá bib ka Korajin ka Bɛtsaida, ka ɛfo bɛnam ɛgá abɔɔ.

¹⁵ Ka wɔ, Kapanɔm, nɛwɛmɛ ɛna ɛrɨghɛ yɛbɛ Ɛsɔwɔ netem? Na saŋ, ásɨgha netem átɛma akak ka ngono ngɔŋa nebe.

¹⁶ “Nnɛ yɔku yɔ ayɔghɔ na war afɨna atama ji ɛtɔɛ ɛru si atama akɛm; ka nnɛ yɔ atɛnɛna war ɛru si atɛnɛ mmɛ; ka nnɛ yɔku yɔ atɛnɛm ɛru si atɛnɛ nnɛ yɔ atóm.”

¹⁷ Asɔgba nya afɛnɛ ka ɛyɛbɛ netem ama tɔɛ si “Ntaa, ɛmɨna mama ɛbiŋ mbiŋ ɛya, aragasi ajɛ ara yɔghɔ war.”

¹⁸ Jisɛs akpɛ abɔɔ si, “Nnyɛɛ Nton-ajɛ agbɔ na ka nsan aru ka nɛbo.

¹⁹ Mmi war kɛɛ nɛyɔ si ɛnyighɛ ɛnyɔɔ ka anaŋta ka ajaa, ɛfɨnɛ ɛga nɛyɔ nnɛjiŋ ka mbaa yiku yiku; ka jiku war ɛkɛm agbaghagbɨgha.

²⁰ Ka ba krɛ yɛbɛ netem si ajɛ ara bɛghɛ war; ba yɛbɛ netem si ami yɛnɛ abiŋ ɛyirɛ ka bɛsɔ.”

²¹ Ɛsika Nɛfɛb Ɛsɔwɔ ɛkɛɛ ɛyɛbɛ netem, Jisɛs arag si, “Ntaa, mia kar, wɔ Nton ka bɛsɔ ka nsise atubsi ɔrɛ nɔŋɔ ba agbɛra nsɔn agbɛrɛ nsɔn nyi yi mmi jibi ntɔɔ anɛ ba asɛnɛ beji na ka abɔnsɛ. Ntaa, nnyi nnyi si ɔne ji ɛkɔra.

²² “Nsɔjɨŋa amɛɛ kɛɛ nɛyɔ ka ɛgbɛrɛ ɛjom ká nsɔn nnyi. Nsɛ kantiŋ yɔ anyi nɛgana nnɛ yɔ mɔɔ ɛwɛ áre, ka nnɛ yɔku yɔ anyi Nsɛ arem yɔ agaa mɔɔ ka anɛ ba ɛkɔ́rɔ mɔɔ si ajibi atɔɔ.”

²³ Akpeghe atɔ ɛkan ɛjɛ ka nkɔ si, “Ɛminɔb ɛkɛɛ amar ya yɛɛ ji ɔmi yɛɛ.

²⁴ Atubsi, abembem Asɔgba Ɛsɔwɔ ka Aton ba ɛkɔrɔ abɔɔ si ayɛɛ ka árɛ yɛɛ ji war ɛmi yɛɛ. Ɛtɨmɛ ɛkɔr abɔɔ si ayɔk nɛkpɨnɛ ni ɛmi yɔk ka árɛ yɔk.”

Nɛgana atub ɛtiŋi nɛ ne nɛa Samariya

²⁵ Nden ɛyi, ngbɛrɛ ajighia Jus atɨma ayimi si ágara Jisɛs. “Nkpikpɨne,” yɛ abɔmɛ, “Nne jɛɛ ka mbɛn nekpen ka nɛwɛmɛ nɛwɛmɛ?”

²⁶ “Ji ayɛnɛ ka ájighi?” Jisɛs akpɛɛ. “Ɛjiba naŋ?”

²⁷ Nkpikpɨne árag si, “Nɨŋɔ Nton yɔ áre Ɛsɔwɔ ɛba akɔra ka netem ɛna, ka nɛwɛmɛ ɛna kprɔb, ka nɛyɔ ɛna kprɔb, ka nɛgbɛrɛ ɛna kprɔb; ɔfɛnɛ ɔnɨŋɔ nnɛnnɛ yɔku akɔra nna ka bɛji ɛba ɛrɛ kɔra.”

²⁸ “Ɔmi kpɛɛ ka ɛtiŋi tiŋi” Jisɛs átɔɛ. “Nem na kasɔŋ wɔ ɔkpen.”

²⁹ Atubsi átimi si anɛ áyɛɛ ka ɛfɔfɔɔ nɛɛ, ábɔmɔ Jisɛs si, “Yɛnnɛ áre nnɛnɛ yɔku nyɔ?”

³⁰ Jisɛs akpɛɛ ka nɛgana si, “Nnɛ áru ka Jɛrusanɛm sa amu Jɛriko, ama kɔŋɔ anyaju. Ba ájɔghɛ nsɔn, amɨbɛ tɛtɛ áyɛɛ si ákpikpɔ ka atɨmɛ asig si asɨrɛ.

³¹ Njɔɔ Ɛsɔwɔ yɔ ama siŋ mbaa nyi áyɛɛ na, ásiŋ ɛjɛ ka nkɔɔ amu.

³² Nnea nɛtom ka njoa njom atima siŋ mbaa nyi. Ayɛɛ na, atɨma siŋ ka nkɔɔ amu jɛ.

³³ Ka nnɛ yɔ aru Sameriya ama si ka mfom bi nnɛ nyɔ anɔŋ; nɛyɛɛ ni áyɛɛ na, ɛsi kpɔɛ.

³⁴ Átonɛ, ásoɛ bɛnɛn, áwurɛ aku ka amɔm ka bɛnɛn. Ásɔnɛ akɨno ka ɛnyinya, ámu ka ɛjɨbɛ ji ɛkpe bɛkpɔ bi anɛ ára kɛɛ akpugha ka ákaa.

³⁵ Ka ɛtɔŋɔ ɛfo, yɛ ayighi ɛkpugha bibaa akɛɛ mbába bɛkpɔ. ‘Babɛ,’ yɛ átɔɛ, ‘Ka mmɨna fɛnɛ mfɛra jiku jiku ji ɔrɔbɔ ka ɛsijɛ.’

³⁶ “Yɛnnɛ ka ɛbɨŋɔ anɛ asaa mbá yɔ áre ɛtiŋi nnɛ akɛɛ nnɛ yɔ anyaju ka akpi yon?”

³⁷ Ngbɛrɛ ájighi nyɔ ákpɛ si, “Nnɛ yɔ átɔŋɛ ɛkpɔghɔsi,” Jisɛs átɔɛ si, “Sɔŋ tam nem na.”

Ka njoa Mata ka Meri

³⁸ Ɛsika Jisɛs ka ɛkan ɛjɛ ɛra jɛn nna, ámasi ka ɛjɨbɛ ji maŋka ɛwi yɔ ánɛ si Mata ákperɛ ka ɛyɛbɛ netem ákak ka njo ɛyɛ.

³⁹ Ábɛ́nɛ ɛkɨno ji ɛnɛsi Meri, yɔ ájɔnɔ ka nsise akpere atá Ntaa áyoŋa atɔŋ akɛɛ.

⁴⁰ Ka Mata ára nem abembia nsɔn yi ɛtɔŋɔ ɛyɛbɛ netem ka nɛbɨgha ni Jisɛs ábaa. Átɨma ama bɔmɔ Jisɛs, Ntaa, ɔmi yɛɛ ka ɛkɨno ɛjɨŋa ami tam ɛsighim si nnem nsɔn kantiŋ? Tɔɛ si atɔbɔm!

⁴¹ “Mata, Mata,” Ntaa ábiŋɛ kasɔŋ akpɛɛ, “Ɔrɔ feghe ɛna ayɔ atub abembem nsɔn,

⁴² ka ji nɔbɔ ji nɛnnɛ yɔku asɛbɛ maŋ ɛre ɛjo ɛji. Meri ami saŋ ɛjom ji ɛgaa nɔb maŋ, ji nnɛ arɨghɛ ma atabɛ.”