Bhusetuli 18 - ULwitikano uLupya

Akaaya akakulu aka Bhaabheli kakughwa

¹ Bhwo isho shaakinda, ingamubhona ughwandumi umunine akwika ukufuma kumwanya. Ughwandumi uyo akabha na maka amakulu, soona ukungʼangʼa kwake kukachibhalisha ichiisu chooshi.

² Ughwandumi uyo akayugha ku ishu ilya pamwanya ngaani akati, “Kaghwile! Kaghwile lwoshi akaaya akakulu aka Bhaabheli! Ulu kaabha bhuyo ubhwa bhoseetano. Kaabha bhuyo ubhwa kwimama umwo imbepo imbiibhi, nu bhuyo ubhwa kwimama kooshi akayuni akabhiibhi kaako kakukalalisha.

³ Paapo abhandu abha fyisu fyoshi bhangʼwile ubhwalwa ubhukali nu kubhomba ubhushipani naghwe. Bhoope abhomalafyale abha pa chiisu bhabhombite ubhushipani naghwe. Soona bhoope abhachulushi abha pa chiisu bhabhwaghite ubhukabhi ku nongwa iya bhushipani bhwake bhuubhwo bhukindiliile.”

⁴ Po ingapulika ishu inine ukufuma kumwanya likuti, “Mwe bhandu bhangu, fumagha kukwake, manye mubhange pamupeene naghwe ukubhomba imbiibhi shaake, ukuti manye mwise mulwaghe ulupyuto pamupeene naghwe.

⁵ Paapo imbiibhi shaake nyingi soona shifikite kumwanya. UChaala atalekite ukushikumbuka imbombo shaake imbiibhi.

⁶ Isa muumwo akabhabhombela bhamu, nuumwe mubhombelaghe bhubhuubhwo. Soona mubhombelaghe kabhili ku shila shiisho akabhabhombela. Mu chikombe chaake chiicho akabhongaanikisha, nuumwe mwongaanikishange kabhili ukukinda ubhukali ubhwo bhuubhwo akabhabhiikila abhandu abhanine.

⁷ Mupange ulufundo nu kumufulasha mu ndumbula yaake ukukongana na muumwo akiipaalagha nu kukongana nu bhukabhi bhwake. Umwene akiipaalagha mu ndumbula yaake akatingi, ‘Niikiile ungati ghwi malafyale umukolo, indiikiile ungati mukolo umufwile!’ Ku nongwa iya kuti indali nu mulume, indaaingaswimaane naalumo.

⁸ Ku nongwa iyo, indiakashaaghe imbyuto shooshi ishi ku ishiku limolyene, ulupyuto ulwa bhufwe, ulwa chililo nu lwa sala ingali. Indiakapembighwe mu mulilo ku nongwa iya kuti uMalafyale uChaala yuuyo akumulonga ghwe yuuyo ghwa maka ghooshi.”

⁹ Abhomalafyale abha pa chiisu bhaabho bhakabhombagha ubhushipani pamupeene naghwe nu kubha bhakabhi ku nongwa iya bhushipani bhwake, indibhakalile nu kukalilila akaaya ako bhwo bhakutesha ilyoshi ilya kulungula kwake.

¹⁰ Abhomalafyale abho indibhakiime kubhutali na kaaya ako ku nongwa iya kwoghopa indamyo shaake. Indibhakalilaghe bhakatingi, “Lwako, lwako kaaya akakulu aka Bhaabheli, akaaya akafumukwe na ka maka! Ubhulongi bhwako bhwakufikila ku kabhalilo aka sala yimoyeene.”

¹¹ Abhachulushi abha pa chiisu indibhakamulililaghe nu kuswimaana ku nongwa iya kuti bhataliipo abhandu abha kughula utundu twabho soona.

¹² Ataliipo soona umundu ughwa kughula utundu twabho utwa sahabhu, utwa ndalama, amayondo agha mutengo na mambo agha mutengo ghaagho ghakungʼangʼa ngaani. Soona ataliipo umundu ughwa kughula abhokamba abhiisa, imyenda iya langi iya mandongomela pamu imikesamu ni myenda iya saatini. Ataliipo umundu ughwa kughula amakokwe agha lunuushi ulwisa, ifiliilo ifya matapwa agha mutengo, ifiliilo fiifyo fitendekeshiighwe ni mbembe, icheela pamu imalumalu.

¹³ Ataliipo umundu ughwa kughula umundalasini, iliki, ifyakufuukisha ulunuushi ulwisa pamu inyemba isha kunuukila, soona ataliipo ughwa kughula indifaayi, inyemba isha mishunguti, ubhufu ubhwisa pamu ingano. Soona ataliipo ughwa kughula ingʼombe, abhonangʼooshi, ifalaasi, amaghali agha kughuusighwa ni falaasi pamu ughwa kughula abhatumwa.

¹⁴ Po abhachulushi abho indibhakatingi, “Ifindu fiifyo ukafinyonywanga leka, fisobhite. Ubhukabhi nu lughindiko lwako fisobhite bhwila na bhwila.”

¹⁵ Abhachulushi bhaabho bhakabhwagha ubhukabhi kukwake, indibhakiime kubhutali ku nongwa iya kwoghopa indamyo isho. Indibhakalilaghe nu kuswimaana,

¹⁶ indibhakatingi, “Lwako, lwako kaaya akakulu. Ukiisubhila ukufwala imyenda iya bhokamba abhiisa, iya mandongomela nu mwenda umukesamu. Ukabha ghwitendekeshiishe akiisa ukubhombela isahabhu na mayondo agha mutengo.

¹⁷ Loole ubhukabhi bhwoshi ubhwo, bhukomanikite ku sala yimoyeene.” Abhaghendesha ngalabha, abhandu bhooshi bhaabho bhakuchuula ni ngalabha, abhabhombi bhooshi abha mu ngalabha na bhaabho bhakubhomba imbombo mu nyanja, indibhakiime kubhutali,

¹⁸ indibhakalile bhwo bhakulibhona ilyoshi ilya kulungula kwake. Indibhakalile ku ishu ilya pamwanya bhakati, “Kataliipo akaaya akanine naakamu isa akaaya akakulu kala!”

¹⁹ Abhandu abho indibhakiikupulile ulufumbi pa mitu yaabho bhwo bhakulila ku ishu ilya pamwanya nu kuswimaana bhakuti, “Lwako, lwako kaaya akakulu! Akaaya kaako kakabhapelela abha ngalabha ubhukabhi ku nongwa iya bhukabhi bhwake. Loole akaaya ako kooshi kaakomanika ku sala yimoyeene.”

²⁰ Sekelagha umwe mwe mukwikala kumwanya ku nongwa iya kupyutighwa kwake. Sekelagha mwe bheelu, abhatumighwa na bhasololi! Paapo uChaala aakalonga akaaya ako ku nongwa iya shila shiisho kakabhabhombela umwe.

²¹ Po ughwandumi ughwa maka akiinula iyondo ikulu isa ulwala, akalitaagha mu nyanja nu kuyugha ukuti, “Ku maka amingi isa ulu, akaaya akakulu aka Bhaabheli indikakataaghighwe nu kusobha lwoshi.

²² Mu kaaya mula litaalikapulikighwe naalumo ishu ilya bhandu ukwimba, ukukoma ichinanda, imbiliiti pamu amalongi. Ataaakabheepo umumanyi ughwa luko lwoshi lula yuuyo indiakabhonekaghe mu kaaya ako. Litaalikapulikighwe soona ishu ilya nyaala mu kaaya ako.

²³ Kutaakukabheepo soona ukubhalisha ukwa bhwelu ubhwa nyaale. Lutaalukabheepo ulusekelo ulwa kweghana, paapo kutaakukabheepo soona ukweghana. Paapo abhachulushi bhaake bhakabha bhosongo abha chiisu, soona ku nongwa iya bhuloshi bhwake, akabhashimbula abhandu abha fyisu fyoshi.

²⁴ Mu kaaya ako mukabhoneka ibhanda ilya bhasololi, ibhanda ilya bhiitiki pamupeene ni ibhanda ilya bhandu bhooshi bhaabho bhakaghoghighwa pa chiisu.”