Yekile 7 - BAEBOLO ANZƐƐ BULUKU NWUANZANWUANZA

Yizilayɛma apenle ngoko ɛya ko abulanla nee nna ne

¹ Ɛhye anzi menwunle Nyamenle soanvolɛma nna kɛ bɛgyigyi azɛlɛ ye muleɛ nna ne mɔ azo na bɛdedɛ ewiade anwoma ngakyile nna ne anu, amaa anwoma biala ambɔ azɛlɛ ye azo, nyevile nye anzɛɛ baka nwo.

² Na menwunle Nyamenle soanvolɛ ko kɛ ɔlɛ tease Nyamenle ne nzonlɛyɛlɛ sɛkɛlɛneɛ ne, ɔvi aduduleɛ ɔlɛba. Ɔdeanle nu ɔvɛlɛle Nyamenle soanvolɛma nna ne mɔɔ Nyamenle ɛmaa bɛ tumi kɛ bɛzɛkye azɛlɛ ye nee nyevile la,

³ na ɔzele bɛ kɛ, “Bɛmmafa bɛ sa bɛka azɛlɛ ye, nyevile, anzɛɛ mbaka biala bɛsɛkye bɛ, kɔkpula kɛ yɛkɛwie yɛ Nyamenle ne sonvolɛma ne mɔ amuala nzonlɛ yɛ wɔ bɛ nwoma zo la.”

⁴ Na mendele menli mɔɔ bɛvale Nyamenle sɛkɛlɛneɛ ne bɛyɛle bɛ nzonlɛ wɔ bɛ nwoma zo la dodo. Menli apenle ngoko ɛya ko, abulanla nee nna (144,000) a bɛyɛle bɛ nzonlɛ a. Bɛ muala bɛvi Yizilayɛ mbusua ekpunli ekpunli bulu nee nwiɔ ne anu.

^5-8 Apenle ngoko bulu nee nwiɔ vi mbusua ekpunli ɛhye mɔ ko biala anu: Dwuda, Wulubɛn, Gaade, Ahya, Nafetalae, Manasɛ, Semɛyɔn, Livae, Yesakaa, Zɛbulɛn, Dwosefi, yɛɛ Bɛngyaman abusua nu.

Menli pemgbenleamgbe ne

⁹ Ɛhye anzi memanle me nye zo, na menwunle menli pemgbenleamgbe bie mɔɔ awie ɛngola bɛ tia la! Bɛvi mbusua, maanle, aneɛ nee menli ngakyile kɔsɔɔti anu. Bɛgyigyi belemgbunli ebia kpole ne nee Boaneralɛ ne anyunlu ɛkɛ ne, bɛwula adɛladeɛ fufule na bɛdedɛ mrɛlakɛ bɛ sa nu.

¹⁰ Bɛdeanle nu bɛzele kɛ, “Ngoanelielɛ vi yɛ Nyamenle ne mɔɔ de belemgbunli ebia kpole ne azo la nee Boaneralɛ ne.”

¹¹ Nyamenle soanvolɛma ne mɔ amuala rabɔle yiale belemgbunli ebia kpole ne, mgbanyima ne mɔ nee tease abɔdeɛ nna ne. Bɛbutubutule bɛ nyunlu aze wɔ belemgbunli ebia kpole ne anyunlu na bɛzonlenle Nyamenle,

¹² bɛzele kɛ, “Amen! Ayɛlɛyelɛ, anyunlunyia, nrɛlɛbɛ, moyɛlɛ, enililɛ, tumi nee anwosesebɛ kɔsɔɔti le yɛ Nyamenle ne ɛdeɛ wɔ mekɛ mɔɔ ɛnlɛ awieleɛ! Amen.”

¹³ Mgbanyima ne mɔ ko bizale me kɛ, “Na nwane mɔ a le menli ɛhye mɔ mɔɔ wula adɛladeɛ fufule la, yɛɛ bɛvi nienwu a bɛra a?”

¹⁴ Membuale ye kɛ, “Yɛmenle, ɛdawɔ yɛɛ ɛze a.” Na ɔzele me kɛ, “Menli ɛhye mɔ a le bɛdabɛ mɔɔ bɛho bɛdɔ zolɛ wɔ amaneɛnwunlɛ kpole ne anu la. Bɛkpole bɛ adɛladeɛ ne mɔ nwohyee wɔ Boaneralɛ ne mogya ne anu.

¹⁵ Ɛhye ati yɛɛ bɛgyigyi Nyamenle belemgbunli ebia kpole ne anwo na bɛsonle ye alehyenlɛ nee aledwolɛ wɔ ɔdaye ye Ɛzonlenlɛ Sua ne anu a. Mɔɔ de belemgbunli ebia kpole ne azo la banlea bɛ nwo zo.

¹⁶ Ɛhɔne nee nzuhɔne ɛnrɛhu bɛ bieko, ewia ɛnrɛbɔ bɛ, anzɛɛ wuluwulu kpole biala ɛnrɛhu bɛ bieko.

¹⁷ Ɔluakɛ Boaneralɛ ne mɔɔ de belemgbunli ebia kpole ne azo la bayɛ mboaneneavolɛ anlea bɛ, na ɔbayɛ bɛ tataa yeahɔ nzubula mɔɔ maa ngoane la anwo. Na Nyamenle bakyikyi bɛ nye anwo monle.”