Yekile 6 - BAEBOLO ANZƐƐ BULUKU NWUANZANWUANZA

Ɛyɛlɛ ne mɔɔ bɛvale bɛzɔle nwoma ne anloa la

¹ Akee menwunle kɛ Boaneralɛ ne ɛwaye ɛyɛlɛ ne mɔɔ bɛva bɛsosɔ nwoma ne anloa fane nsuu la anu ko, na mendele kɛ tease abɔdeɛ nna ne anu ko lɛ ɛnelɛ mɔɔ ye kpole le kɛ ezule mɔɔ ɛlɛkulu la hanle kɛ, “Bɛla!”

² Memanle me nye zo, na menwunle kɛ sonla de ɛkpɔnwɔ fufule zo na ɔlɛ ɛda ɔ sa nu ɔlɛba. Bɛbɔle ye abɔtile, na ɔvindele ɔhɔle kɛ katakyie mɔɔ ɛli konim dɔɔnwo na eza ɔlɛkɔ yeahɔho yeali konim bieko la.

³ Boaneralɛ ne eza wayele ɛyɛlɛ ne mɔɔ bɛva bɛsosɔ nwoma ne anloa la anu mɔɔ tɔ zolɛ nwiɔ la; na mendele kɛ tease abɔdeɛ nna ne anu mɔɔ tɔ zolɛ nwiɔ la se, “Bɛla!”

⁴ Na sonla ko mɔɔ bɛmaa ye konle dadeɛ kpole ko la de ɛkpɔnwɔ kɔkɔlɛ mɔɔ bolo kpalɛ la azo rale. Na bɛmanle ye adenle kɛ ɔye anzonudwolɛ ɔvi azɛlɛ ye azo, amaa menli ahu bɛ nwo.

⁵ Boaneralɛ ne akee wayele ɛyɛlɛ ne mɔɔ tɔ zolɛ nsa la, na mendele kɛ tease abɔdeɛ ne mɔɔ tɔ zolɛ nsa la se, “Bɛla!” Na menwunle kɛ sonla lɛ tone ɔ sa nu na ɔde ɛkpɔnwɔ bile bie azo ɔlɛba.

⁶ Akee mendele debie mɔɔ le kɛ ɛnelɛ la wɔ tease abɔdeɛ nna ne mɔ anwo lɔ, ɔse, “Bɛbadɔ hwiiti ‘litili’ ko etaku nna, yɛɛ bɛbadɔ baale ‘litili’ nsa etaku nna. Na anrɛɛ bɛmmasɛkye nwole nee nwanye!”

⁷ Boaneralɛ ne wayele ɛyɛlɛ ne mɔɔ tɔ zolɛ nna la; na mendele kɛ tease abɔdeɛ ne mɔɔ tɔ zolɛ nna la se, “Bɛla!”

⁸ Meneanle, na menwunle sonla bie mɔɔ bɛfɛlɛ ye Ewule, kɛ ɔde ɛkpɔnwɔ nzonle bie azo ɔlɛba. Ɛbolɔ li ɔ nzi ɛkɛ ne ala. Bɛhyɛle azɛlɛ ye anu nna na bɛmanle bɛ tumi kɛ bɛva dadeɛ, ɛhɔne, anwonyane nee nanemgbole bɛhu menli mɔɔ wɔ ko azo la amuala.

⁹ Boaneralɛ ne eza wayele ɛyɛlɛ ne mɔɔ tɔ zolɛ nnu la. Na menwunle kɛ bɛdabɛ mɔɔ Nyamenle edwɛkɛ ne ati, nee bɛdabɛ mɔɔ bɛlile daselɛ nɔhalɛ nu la ati bɛhu bɛ la ɛkɛla ne mɔ dede azukponle ne abo.

¹⁰ Bɛdeanle nu kɛ, “O Tumivolɛ Awulae! Ɛle nwuanzanwuanza nee nɔhalɛnli. Na kenlenzu yɛɛ ɛkɛbua azɛlɛ ye azo amra ndɛne na wɔadea bɛ kɛ bɛhunle yɛ a?”

¹¹ Na bɛmanle ko biala tɛladeɛ fufule, na bɛhanle bɛhilele bɛ kɛ bɛlie bɛ ɛnwomenle ekyii, kɔkpula kɛ bɛ gɔnwo mɔ sonvolɛma nee mediema mɔɔ bɛdabɛ noko bɛbahu bɛ kɛ bɛdabɛ la, bɛ muala bɛ nloa kɛdɔ nu la.

¹² Eza menwunle kɛ Boaneralɛ ne ɛwaye ɛyɛlɛ ne mɔɔ tɔ zolɛ nsia la. Na nea, azɛlɛ kpusule kpole bie, na sɛnzɛne ne yɛle bile kɛ ɛdanlɛ dokyi anzɛɛ bilizi, na siane ne yɛle kɔkɔlɛ yɔɔnwo kɛ mogya.

¹³ Nwɔlɔra dudule vi anwomanyunlu raguale aze kɛ feege baka ma mɔɔ ahumu kpole bie ɛdu ɛkpolo bɛ ɛgua la.

¹⁴ Bɛnyenyanle anwomanyunlu kɛ ɛkpa la na ɔminliminlinle, na boka nee bɔra biala dudule vile bɛ bo zo ne mɔ.

¹⁵ Ewiade arelemgbunli, mgbanyima, sogya mgbanyinli, sukoavolɛma nee tumivolɛma amuala nee menli kɔsɔɔti, ahanra nee alehelɛ, nriandile veɛveale awolɛ mbɔne nu nee awolɛ mɔɔ wɔ awoka ne mɔ azo la abo.

¹⁶ Na bɛdeanle bɛvɛlɛle awoka nee awolɛ ne mɔ kɛ, “Bɛragua yɛ nwo zo na bɛva yɛ bɛvea bɛmaa yɛvi mɔɔ de belemgbunli ebia kpole ne azo la anye zo, na bɛye yɛ bɛvi Boaneralɛ ne ɛya ne anu!

¹⁷ Ɔluakɛ bɛ ɛya kenle kpole ne ɛra na nwane bɔbɔ a kɛhola kɛgyinla ɔ nloa a?”