Yekile 22 - BAEBOLO ANZƐƐ BULUKU NWUANZANWUANZA

¹ Nyamenle soanvolɛ ne eza hilele me nzule ne mɔɔ maa ngoane la azudenle ne. Ɔ nye le kɔngyekɔngye kɛ neanleɛ, na ɔse ɔvi Nyamenle nee Boaneralɛ ne belemgbunli ebia kpole ne abo,

² ɔdua suakpole ne awɔdenle ne mɔɔ la sua ne avinli la azo. Ngoane baka ne ɛfifi azudenle ne anloa nwiɔ ne, na bɛso ma ngakyile fane bulu nee nwiɔ ɛvolɛ ko biala; siane ko biala ɔso ko, na bɛ nya ne mɔ maa maanle maanle ne mɔ ngoane.

³ Debie biala mɔɔ Nyamenle anye ɛnlie nwolɛ la ɛnle suakpole ne azo. Nyamenle nee Boaneralɛ ne belemgbunli ebia kpole ne wɔ suakpole ne azo, na ye sonvolɛma sonle ye.

⁴ Bɛnwu ɔ nyunlu, yɛɛ ye duma wɔ bɛ nwoma azo.

⁵ Aleɛ ɛndwo ko wɔ ɛkɛ, yɛɛ bɛngyia kɛnlaneɛ anzɛɛ ewia nwo wɔ ɛkɛ, ɔluakɛ Awulae Nyamenle ne a le bɛ kɛnlaneɛ a, na bɛbali belemgbunli mekɛ mɔɔ ɛnlɛ awieleɛ.

Gyisɛse ɛralɛ ne

⁶ Na Nyamenle soanvolɛ ne zele me kɛ, “Edwɛkɛ ɛhye mɔ le nɔhalɛ na bɛfa bɛ rɛle bɛwula nu a ɔyɛ boɛ. Awulae Nyamenle ne mɔɔ fa ye Sunsum ne wula ye kpɔmanvolɛma la yɛɛ ɛzoa ye soanvolɛma ne mɔ anu ko kɛ ɔraye mɔɔ ɛnrɛhyɛ biala na yeazi la ɔhile ye sonvolɛma ne mɔ a.”

⁷ Na Gyisɛse zele kɛ, “Bɛdie, ɔnrɛhyɛ biala na meara!” Nyilalɛ ɛha bɛdabɛ mɔɔ bɛkɛli Nyamenle edwɛkɛ ne mɔɔ wɔ buluku ɛhye anu la azo la.

⁸ Medame Dwɔn a mendele na menwunle ninyɛne ɛhye mɔ amuala a. Na mendiele na menwunle ninyɛne ɛhye mɔ menwiele la, mendule mendɔle Nyamenle soanvolɛ ne mɔɔ ɛhilehile me ninyɛne ɛhye mɔ la agyakɛ anu kɛ mesonle ye.

⁹ Na ɔzele me kɛ, “Mmayɛ! Medame mele sonvolɛ kɛ ɛdawɔ nee ɛ mediema Nyamenle kpɔmanvolɛma ne mɔ, nee bɛdabɛ mɔɔ bɛdi edwɛkɛ mɔɔ wɔ buluku ɛhye anu la azo la. Sonle Nyamenle na mmasonle me!”

¹⁰ Eza ɔzele me kɛ, “Mmafa Nyamenle edwɛkɛ ne mɔɔ wɔ buluku ɛhye anu la ɛfea, ɔluakɛ mekɛ mɔɔ ɛha na ɛhye azi la le ekyi.

¹¹ Mɔɔ le musuɔfoɔ la ɛhɔ zo ɛyɛ ye munzule ninyɛne ne, mɔɔ yɛ ninyɛne ɛtane ɛtane la ɛhɔ zo ɛyɛ. Mɔɔ le kpalɛ noko la ɛhɔ zo ɛyɛ ye ahunlunyele gyima ne, yɛɛ mɔɔ anwo te nwuanzaanwu la ɛhɔ zo ɛyɛ nwuanzanwuanza.”

¹² Gyisɛse zele kɛ, “Bɛdie! Ɔnrɛhyɛ biala na meara! Melɛ me sa nu ahatualɛ mebara na mearadua awie biala kakɛ wɔ gyima mɔɔ yeli la anwo.

¹³ Mame a mele ‘Alefa’ nee ‘Omiga’ ne a, mɔlebɛbo ne nee awieleɛ ne.”

¹⁴ Nyilalɛ ɛha bɛdabɛ mɔɔ bɛkpo bɛ ndanlɛ ne mɔ bɔkɔbɔkɔ na ɔlua zolɛ bɛnyia adenle bɛli ngoane baka ne ma ne bie, na bɛwolo bɛhɔ suakpole ne azo la.

¹⁵ Wɔ suakpole ne kandiba lɔ, amumuyɛma, ahɔdiawu, ngonyiayelɛma, adwɔmanema, awozonle ɛzonlenlɛma, yɛɛ adalɛma wɔ nyɛleɛ nee ɛdendɛlɛ nu la a wɔ ɛkɛ ne a.

¹⁶ “Medame Gyisɛse, yɛɛ mezoa me soanvolɛ kɛ ɔrabɔ ɛhye mɔ nolo ɔhile bɛ wɔ asɔne ne mɔ ati a. Mele Devidi anlɔnra; mame a mele nwonlomɔ ɛwɔlɔra ne mɔɔ ta kpole la a.”

¹⁷ Na Sunsum ne nee Atɔfolɛ ne se, “Bɛla!” Awie mɔɔ kɛde la ɔdaye ɔha kɛ, “Bɛla!” Bɛdabɛ mɔɔ nzuhɔne ɛlɛku bɛ la, bɛrɛla bɛralie nzule mɔɔ maa ngoane la bɛnlo. Ɔle ahyɛlɛdeɛ, bɛndɔ. Bɛdabɛ mɔɔ bɛkulo la, bɛranlo bie.

Adwulaleɛ

¹⁸ Medame Dwɔn, mekakye bɛdabɛ mɔɔ bɛkɛde Nyamenle nrɛlaleɛ ɛhye mɔɔ wɔ buluku ɛhye anu la ɛsesebɛ kɛ: saa awie fa bie boka nrɛlaleɛ ɛhye anwo a, Nyamenle bava amaneɛnwunlɛ ngakyile ne mɔ mɔɔ bɛha nwolɛ edwɛkɛ wɔ buluku ɛhye anu la bie aboka ye amaneɛnwunlɛ nwo.

¹⁹ Saa awie noko ye bie fi Nyamenle nrɛlaleɛ ne mɔɔ wɔ buluku ɛhye anu la anu a, Nyamenle baye ye afoa nu ngoane baka ne nee ye ɛleka ne mɔɔ wɔ suakpole nwuanzanwuanza ne azo, mɔɔ bɛha nwolɛ edwɛkɛ wɔ buluku ɛhye anu la avi ɛkɛ.

²⁰ Sonla ne mɔɔ di ɛhye mɔ kɔsɔɔti anwo daselɛ la se, “Nɔhalɛ, ɔnrɛhyɛ biala na meara!” Amen! Awulae Gyisɛse, bɛla!

²¹ Awulae Gyisɛse ɛlo Nyamenle menli ne amuala na ɔ nee bɛ ɛdɛnla. Amen.