Yekile 21 - BAEBOLO ANZƐƐ BULUKU NWUANZANWUANZA

Anwuma fofolɛ ne nee azɛlɛ fofolɛ ne

¹ Akee menwunle anwuma fofolɛ nee azɛlɛ fofolɛ. Ɔluakɛ alumua anwuma ne nee alumua azɛlɛ ne ɛze ɛhɔ, na nyevile ne ɛnle ɛkɛ bieko.

² Na menwunle Suakpole Nwuanzanwuanza ne, mɔɔ le Gyɛlusalɛm fofolɛ ne, kɛ ɔvi Nyamenle ɛkɛ ne wɔ anwuma na bɛlɛdwula ye aze, bɛziezie ye kɛ atɔfolɛ mɔɔ bɛyɛ ye hyeleenyi na ɔkayia ɔ hu adenle la.

³ Mendele ɛnelɛ kpole bie wɔ belemgbunli ebia kpole ne anwo, ɔse, “Kɛkala, akee Nyamenle sua nu a le ye menli avinli. Ɔ nee bɛ badɛnla na bɛayɛ ye menli. Nyamenle mumua ne nee bɛ badɛnla na yeayɛ bɛ Nyamenle.

⁴ Ɔbakyikyi bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko. Ɔluakɛ alumua ninyɛne ne mɔ ɛze ɛhɔ.”

⁵ Na mɔɔ de belemgbunli ebia kpole ne azo la hanle kɛ, “Kɛkala, meyɛ ninyɛne kɔsɔɔti fofolɛ!” Eza ɔzele me kɛ, “Kɛlɛ ɛhye, ɔluakɛ edwɛkɛ ɛhye mɔ le nɔhalɛ yɛɛ bɛfa bɛ rɛle bɛto zolɛ a ɔyɛ boɛ.”

⁶ Na ɔzele me kɛ, “Bɛwie debie biala yɛ! Mame a mele ‘Alefa’ nee ‘Omiga’ ne a, mɔlebɛbo ne nee awieleɛ ne. Awie mɔɔ nzuhɔne ɛlɛku ye la mebamaa ye nzubula ne mɔɔ maa ngoane la anu nzule ne bie yeanlo mɔɔ ɔndua ɛhwee a.

⁷ Mɔɔ kɛli konim la banyia agyadeɛ ɛhye avi me ɛkɛ: mebayɛ ye Nyamenle na yeayɛ me ra.

⁸ Na avoanvoanle, menli mɔɔ ɛnlɛ diedi, ngunzima, ahɔdiawu, adwɔmanema, nindavoma, awozonle ɛzonlenlɛma, nee adalɛma amuala, bɛ ɛleka a le tandane ne mɔɔ senle nee sɔlefa ɛlɛsɔ nu la anu. Senle tandane ɛhye a le ewule ne mɔɔ tɔ zolɛ nwiɔ la.”

Gyɛlusalɛm fofolɛ ne

⁹ Nyamenle soanvolɛma nsuu ne mɔɔ lɛ amaneɛnwunlɛ dwora nsuu ne la anu ko rale me nwo ɛkɛ na ɔzele me kɛ, “Bɛla maa mengile wɔ Atɔfolɛ ne, mɔɔ le Boaneralɛ ne aye ne.”

¹⁰ Sunsum ne wolole me, na Nyamenle soanvolɛ ne vale me hɔle boka tendenle bie azo. Ɔhilele me Suakpole Nwuanzanwuanza Gyɛlusalɛm, kɛ ɔvi Nyamenle anwo lɔ anwuma na bɛlɛdwula ye aze,

¹¹ na ɔlɛta wɔ Nyamenle anyunlunyia nu. Sua bɔdenle ne ta memeamemea kɛ ezukoa bolɛ ne mɔɔ bɛfɛlɛ ye “gyasepa” la, na ɔ nye le kɔngyekɔngye zɛhae.

¹² Bɛlie nwolɛ bane mɔɔ ye anwumahɔlɛ le tendenle kpalɛ a, ɔlɛ anuhɔlɛ bulu nee nwiɔ, yɛɛ Nyamenle soanvolɛ gyi ko biala anloa. Wɔ anuhɔlɛ ne mɔ azo, bɛhɛlɛ Yizilayɛ mbusua ekpunli bulu nee nwiɔ ne aluma bɛgua zolɛ.

¹³ Anuhɔlɛ nsa a wɔ bɛ tɛbanu ko biala a: nsa wɔ adɔleɛ, nsa wɔ aduduleɛ, nsa wɔ nyevile nu, yɛɛ nsa wɔ ɛbɔ nu.

¹⁴ Suakpole ne bane ne, bɛhyele ye wɔ adiabo awolɛ bulu nee nwiɔ mɔɔ bɛhɛlɛ Boaneralɛ ne ɛzoanvolɛma bulu nee nwiɔ ne aluma wɔ nwolɛ la azo.

¹⁵ Nyamenle soanvolɛ ne mɔɔ dendɛle hilele me la lɛ ezukoa nvutuke baka ɛzuzudeɛ kɛ ɔfa yeazuzu suakpole ne, anuhɔlɛ ne mɔ, yɛɛ ye bane ne mɔ.

¹⁶ Suakpole ne le anianna, ye tɛbanu tɛbanu ne mɔ sɛ, ye tendenle nee ye tɛtɛlɛ sɛ. Nyamenle soanvolɛ ne vale ye baka ɛzuzudeɛ ne zuzule suakpole ne: ɔnyianle ye tendenle nu kilomita apenle nwiɔ, ɛya nna (2,400), yɛɛ ye tɛtɛlɛ nee ye anwumahɔlɛ noko le kɛ ye tendenle nu.

¹⁷ Nyamenle soanvolɛ ne eza zuzule suakpole ne bane ne, na ye ɛzamo le mita kɛyɛ abulasia (60), kɛmɔ bɛ ɛzuzudeɛ ne mɔɔ bɛlɛ la kile la.

¹⁸ Bɛvale “gyasepa” a bɛdole suakpole ne bane ne a, yɛɛ bɛvale ezukoa nvutuke kpalɛ mɔɔ anye le kɛ neanleɛ la a bɛkyekyele sua bɔdenle mumua ne a.

¹⁹ Suakpole ne adiabo ne, bɛvale ezukoa awolɛ ngɛnlɛma mɔɔ sonle bolɛ la a bɛwulale a. Mɔɔ lumua la a le “gyasepa”, mɔɔ tɔ zolɛ nwiɔ la le sanyia bolɛ, bɛfɛlɛ ye “safaya”, mɔɔ tɔ zolɛ nsa la le ezukoa nvutuke bolɛ, bɛfɛlɛ ye “agɛte”, mɔɔ tɔ zolɛ nna la le bolɛ ɛsesebɛ anye asuomenle, bɛfɛlɛ ye “ɛmelade”,

²⁰ nnu ne le ezukoa bolɛ, bɛfɛlɛ ye “ɔnese”, nsia ne bɛfɛlɛ ye “kanɛlea”, nsuu ne le ezukoa bolɛ anye asuomenle, bɛfɛlɛ ye “kelesɔlaete”, mɔtwɛ ne le bolɛ ɛsesebɛ anye asuomenle, bɛfɛlɛ ye “bɛlele”, ngɔnla ne le ezukoa nee sanyia bolɛ, bɛfɛlɛ ye “topaze”, bulu ne le ezukoa bolɛ, bɛfɛlɛ ye “kelesɔpelase”, bulu nee ko ne le bolɛ ɛsesebɛ anye buluwu, bɛfɛlɛ ye “gyasente”, yɛɛ mɔɔ tɔ zolɛ bulu nee nwiɔ ne la le bolɛ ɛsesebɛ anye kɔkɔlɛ, bɛfɛlɛ ye “ametese”.

²¹ Bɛvale ezukoa awolɛ ngakyile bulu nee nwiɔ mɔɔ sonle bolɛ la a bɛyɛle suakpole ne anuhɔlɛ ɛbonle ne mɔ a; asolo ko biala ɛdeɛ. Suakpole ne awɔdenle ne mɔ noko bɛvale ezukoa nvutuke kpalɛ mɔɔ anye le kɔngyekɔngye kɛ neanleɛ la a bɛyɛle a.

²² Meannwu ɛzonlenlɛ sua wɔ suakpole ne azo, ɔboalekɛ ye Ɛzonlenlɛ Sua a le Awulae Nyamenle Bedevinli ne ɔdaye mumua ne nee Boaneralɛ ne.

²³ Suakpole ne azo amra ɛngyia sɛnzɛne anzɛɛ siane nwo, ɔluakɛ Nyamenle anyunlunyia ne a le zolɛ wienyi ne a, yɛɛ Boaneralɛ ne a le ye kɛnlaneɛ a.

²⁴ Maanle maanle kɔsɔɔti balua ye wienyi ne anu yɛɛ ewiade arelemgbunli bava bɛ anyunlunyia ne ara ɛkɛ.

²⁵ Suakpole ne nlenkɛ ne mɔ badeda nwolɛ dahuu, bɛnrɛtoto nuhua ɛlɛ, ɔluakɛ aleɛ ɛndwo ɛkɛ ne ɛlɛ.

²⁶ Maanle maanle kɔsɔɔti lɛ bɛ kpoleyɛlɛ nee bɛ anyunlunyia bara suakpole ne azo.

²⁷ Na debie biala mɔɔ anwo ɛnde la ɛnrɛhɔ suakpole ne azo. Zɔhane ala yɛɛ mɔɔ bɔ anyiemgba ɛbɛla na ɔbɔ adalɛ la ɛnrɛhɔ ɛkɛ a. Bɛdabɛ mɔɔ bɛhɛlɛ bɛ aluma wɔ Boaneralɛ ne teasema buluku ne anu la angome a bahɔ suakpole ne azo a.