Yekile 20 - BAEBOLO ANZƐƐ BULUKU NWUANZANWUANZA

Ɛvolɛ apenle ne

¹ Akee menwunle kɛ Nyamenle soanvolɛ ko vi anwuma ɛlɛdwu, na ɔlɛ azɛlɛ kuma ne mɔɔ ɛnlɛ ɔ bo la sanvɛ ne nee nwɔnzɔnwɔnzɔ kpole bie ɔ sa nu.

² Ɔhyele nane anwo ɛzulolɛ ne mɔɔ le kɛ ɛlɛnrɛne la, ɛwɔlɛ dɛba ne, mɔɔ bɛfɛlɛ ye Abɔnsam anzɛɛ Seetan la, na ɔguale ye anga mɔɔ kyesɛ ɛvolɛ apenle ko pɛ nu kolaa na bɛazianyi ye la.

³ Nyamenle soanvolɛ ne vuandinle ye dole azɛlɛ kuma ne mɔɔ ɛnlɛ ɔ bo la anu, ɔhanle kuma ne ɔnwinle nwolɛ, na ɔzɔle ɔ nloa, amaa yeangola finde na yeabɛlɛbɛla maanle maanle bieko kyesɛ ɛvolɛ apenle ko ne pɛ nuhua. Ɛhye anzi bɛbazianyi ye mekɛ ekyi bie anu bɛamaa yealuolua.

⁴ Eza menwunle arelemgbunli mbia, na bɛmanle bɛdabɛ mɔɔ bɛdede zolɛ la tumi kɛ bɛbua ndɛne. Menwunle bɛdabɛ noko mɔɔ ɔluakɛ bɛbɔle Nyamenle Edwɛkpa ne nee nɔhalɛ ne mɔɔ Gyisɛse yele hilele la nolo la ati bɛhunle bɛ la ɛkɛla ne mɔ. Bɛanzonle nane ne anzɛɛ ye ananze ne, yɛɛ bɛanyɛ bɛ nane ne nzonlɛ ne bie wɔ bɛ nwoma azo anzɛɛ bɛ sa anwo. Menli ɛhye mɔ ziale rale ngoane nu bieko na bɛ nee Kelaese lile belemgbunli ɛvolɛ apenle.

⁵ Mɔwuamra mɔɔ hale la anzia amba ngoane nu toonwo ɔhɔdwule ɛvolɛ apenle ko ne awieleɛ. Ewudwazo ne mɔɔ lumua la ɛne.

⁶ Nyilalɛ nee anyunlunyia ɛha bɛdabɛ mɔɔ bɛboka alumua ewudwazo ne anwo la. Ewule ne mɔɔ tɔ zolɛ nwiɔ la ɛnlɛ bɛ nwo zo tumi; bɛbayɛ Nyamenle nee Kelaese sɛlɛvolɛma na bɛ nee Kelaese ali belemgbunli ɛvolɛ apenle.

Seetan azedɔlɛ

⁷ Ɛvolɛ apenle ne anzi, bɛbaye Seetan bɛavi efiade ne,

⁸ na ɔbahɔ yeahɔbɛlɛbɛla maanle maanle mɔɔ wɔ aleɛabo la amuala, meka Gɔgo nee Magɔgo, na ɔ nee bɛ ahɔ konle. Bɛ somaa bayɛ kɛ ɛnweazo anwea.

⁹ Bɛzile nu bɛhɔle azɛlɛ ye azo ɛleka biala na bɛbɔle bɛyiale ɛleka ne mɔ mɔɔ Nyamenle menli ne de nee suakpole ne mɔɔ Nyamenle anye die nwolɛ la. Na senle vi anwuma razɛkyele bɛ.

¹⁰ Na bɛvuandinle Abɔnsam ne mɔɔ rabɛlɛbɛlale bɛ la bɛdole sendɔlɔra nee sɔlefa tandane ne mɔɔ bɛguale nane ne nee ye kpɔmanvolɛ alane ne nu la anu; na bɛbahile bɛ nyane alehyenlɛ nee aledwolɛ mekɛ mɔɔ ɛnlɛ awieleɛ.

Ndɛnebualɛ mɔɔ li amozi

¹¹ Akee menwunle Belemgbunli ne nee ye belemgbunli ebia fufule ne mɔɔ ɔde zolɛ la. Anwuma nee azɛlɛ minliminlinle ɔ nyunlu ɛkɛ ne na bɛannwu bɛ bieko.

¹² Na menwunle mɔwuamra, mgbole nee ngyikyi kɔsɔɔti, kɛ bɛgyigyi belemgbunli ebia kpole ne anyunlu, na bɛbukebuke mbuluku nu wɔ ɛkɛ. Eza bɛbukele teasema buluku ne noko anu, na bɛbuale mɔwuamra ndɛne wɔ mɔɔ bɛyɛle na bɛhɛlɛ bɛ wɔ mbuluku ne mɔ anu la anwo.

¹³ Nyevile kpule menli mɔɔ yeva bɛ la. Ewule nee Ɛbolɔ yele bɛ ɛdeɛ mɔɔ bɛvale bɛziele la vindele, na bɛbuale bɛ muala ndɛne wɔ mɔɔ bɛyɛle la anwo.

¹⁴ Akee bɛvuandinle Ewule nee Ɛbolɔ bɛguale senle tandane ne anu. Senle ɛhye a le ewule ne mɔɔ tɔ zolɛ nwiɔ la.

¹⁵ Awie biala mɔɔ bɛangɛlɛ ye duma wɔ teasema buluku ne anu la, bɛvuandinle ye bɛdole senle tandane ne anu.