Yekile 18 - BAEBOLO ANZƐƐ BULUKU NWUANZANWUANZA

Babelɔn ɛbɔlɛ

¹ Ɛhye anzi menwunle kɛ Nyamenle soanvolɛ ko noko vi anwuma ɛlɛdwu aze. Ɔlɛ tumi kpole, na kɛ ɔ nwo si ta la manle ewiade ye amuala yɛle wienyi.

² Ɔvale ɛnelɛ kpole ɔhanle kɛ, “Yebɔ! Suakpole Babelɔn ɛbɔ bɔkɔɔ! Yeyɛ suadu, ɛnɛ sunsum ɛtane nee mbɔnsam a wɔ zolɛ a, yɛɛ nloma ɛtane anwo kpokpɔtɔɔ a wɔ zolɛ a.

³ Ɔluakɛ ɔvale adwɔmanebɔlɛ anyebolo ɔhilehilele menli kɔsɔɔti, ɔmanle bɛzɛkyele. Ewiade arelemgbunli kɔsɔɔti nee ye bɔle adwɔmane, yɛɛ ewiade gualilɛma luale ye anyebolo zo nyianle bɛ nwo!”

⁴ Na mendele ɛnelɛ bieko vi anwuma, ɔse, “Bɛvinde, me menli, bɛvi zolɛ bɛye bɛ nwo, anrɛɛ bɛkɛyɛ ye ɛtane ne bie, bɛkɛmaa ye munzule ne bie kɛha bɛ.

⁵ Ɔluakɛ bɛhuohua ye ɛtane ne mɔ anloa bɛmaa yehɔ anwuma kpalɛ, na Nyamenle ɛhakye ye amumuyɛ ne mɔ.

⁶ Bɛva mɔɔ ɔvale ɔyɛle bɛ la bie bɛyɛ ɔdaye, bɛdua ye kakɛ fane nwiɔ wɔ ye nyɛleɛ nwo, bɛmaa ɔnwu amaneɛ fane nwiɔ ɔdɛla mɔɔ ɔvale ɔhilele bɛ la.

⁷ Bɛmaa ɔde nyane na ye amaneɛnwunlɛ ne ɛyɛ kpole kɛ ye anyunlunyia nvoanle ne mɔɔ ɔnyianle, nee ye anwoneɛ ne mɔ mɔɔ ɔvale ɔyɛle ɔ nwo la. Kɛmɔ ɔde a ɔka ɔkile ɔ nwo kɛ, ‘Mele belemgbunli raalɛ! Menle kunlanvolɛ raalɛ, menrɛnwu nyane deɛ holɛ’ la,

⁸ zɔhane ala yɛɛ bɛmaa anwubɛnyunlu ɛdo ye dahuu a, ɔnwu nyane, anwonyane ɛbɔ ye, na ɔli sane, na bɛdo ye senle nu bɛyela ye, ɔboalekɛ Awulae Nyamenle ne mɔɔ bua ye ndɛne la le bedevinli.”

⁹ Bɛdabɛ arelemgbunli mɔɔ bɛwɔ ewiade, mɔɔ bɛ nee ye bɔle adwɔmane ɛbɛla, bɛyɛle anyebolo la, saa bɛnwu kɛ sua ne ɛlɛsi ayela la a, bɛbazu bɛadedɛ bɛ nwo bonrane nu.

¹⁰ Bɛ ahonle badu wɔ ye amaneɛnwunlɛ ne ati na bɛagyinla amozi bɛaha kɛ, “Ɔyɛ ɛzulolɛ! Ɔyɛ nwanwane! Sua bɔdenle mɔɔ le kɛ Babelɔn! Bɛva dɔnehwele ko ala bɛdea wɔ, bɛbɔ wɔ tɔɔ!”

¹¹ Ewiade ye anu gualilɛma noko bali nyane na bɛazu ye, ɔluakɛ bɛnrɛnyia awie ɛnrɛdɔ bɛ ninyɛne ne bieko;

¹² awie ɛnrɛdɔ bɛ ezukoa nvutuke, dwɛtɛ fufule anwoneɛ, nee avikpa, lenen ndanlɛ, arelemgbunli ndanlɛ kɔkɔlɛ, selekye, yɛɛ ago; bɛ adwinli ngɛnlɛma mɔɔ bɛva mbaka ngakyile bɛze, nee ninyɛne mɔɔ bɛva ɛzɛlɛ, ayera, kɔbele, bulalɛ, yɛɛ bolɛ memeamemea bɛyɛ la;

¹³ bɛ ninyɛne evuanlɛ mɔɔ le kɛ kabɛlɛ, dazia, ɛyɛlɛ, alufuanlɛ, yɛɛ sakyeɛ; nwanye, nwole, esamo, yɛɛ hwiiti; nlankɛ nee mboane, mgbɔnwɔ nee konle ehwili, ahanra, yɛɛ menli bɔbɔ, bɛnrɛnwu bie.

¹⁴ Bɛbaha bɛahile ye kɛ, “Wɔ anyelazo ne amuala ɛminli, yɛɛ wɔ anwonyia nee wɔ anwofɛlɛko kɔsɔɔti ɛminli, na ɛnrɛnyia bɛ bieko ɛlɛ!”

¹⁵ Gualilɛma ɛhye mɔ mɔɔ luale ye nee bɛ gualilɛ zo nyianle bɛ nwo la bagyinla amozi amozi, ɔboalekɛ bɛ ahonle badu wɔ ye amaneɛnwunlɛ ne ati. Bɛbazu bɛali nyane,

¹⁶ na bɛaha kɛ, “Ɔyɛ ɛzulolɛ! Ɔbo suakpole ɛhye anwo zo! Anrɛɛ ɔheda lenen ɛdakpa, arelemgbunli ndanlɛ kɔkɔlɛ nee buluwu nee akɔlɛ ɛnlome afonla na ɔfa anwoneɛ mɔɔ le kɛ ezukoa nvutuke nee avikpa ɔsiezie ɔ nwo!

¹⁷ Yemɔ a dɔnehwele ko ala ye anwonyia ne amuala ɛminli la!” Menli mɔɔ ka meli nee bɛdabɛ mɔɔ bɛyɛ gyima wɔ nu nee adendulɛma nee bɛdabɛ mɔɔ nyevile nye a bɛdidi la amuala gyinlanle amozi moa moa,

¹⁸ na mɔɔ bɛnwunle kɛ sua ne ɛlɛsi azɔ la, bɛhanle kɛ, “Suakpole biala ɛnle ɛkɛ mɔɔ nee suakpole ɛhye sɛ a.”

¹⁹ Bɛvale bɛ sa bɛguale bɛ ti zo bɛzunle bɛweweɛle bɛ nwo aze bɛhanle kɛ, “Ɔyɛ ɛzulolɛ! Ɔyɛ nwanwane, ɔbo suakpole ne anwo zo! Yemɔ ala a ɔle suakpole mɔɔ nyevile nu amra kɔ zolɛ a bɛnyia anwonyia a! Dɔnehwele ko ala yeyɛ suadu.”

²⁰ Anwuma amra, bɛli fɛlɛko kɛ yebɔ a! Nyamenle menli, bɛli fɛlɛko; ɛzoanvolɛma nee Nyamenle kpɔmanvolɛma, bɛli fɛlɛko! Ɔboalekɛ bɛdabɛ bɛ ti Nyamenle ɛdea ye wɔ mɔɔ ɔyɛle bɛ la anwo.

²¹ Akee Nyamenle soanvolɛ anwo ɛzulolɛ ko manle bolɛ totohyia ko mɔɔ le kɛ ɛdibolɛ la zo na ɔvuandinle ɔdole nyevile ne anu, ɔse: “Kɛ bɛbavuandi suakpole Babelɔn bɛado la ɛne, na bɛnrɛnwu ye bieko.”

²² Bɛdabɛ mɔɔ bɛbɔ getaa, dono nee edwɛnedolɛma; bɛdabɛ mɔɔ bɛbɔ fulutu nee aweɛne ndendenle la amuala, bɛnrɛde bɛ ne wɔ ɛkɛ ne bieko. Bɛnrɛnwu dwinvolɛ biala wɔ ɛkɛ ne bieko; abɛlɛ melahyinli mgbole ne mɔ amuala bagyinla!

²³ Bɛnrɛzɔ kɛnlaneɛ wɔ zolɛ bieko ɛlɛ, yɛɛ bɛnrɛde atɔfolɛ nee ɔ hu bɛ ne wɔ zolɛ. Wɔ gualilɛma a ɛnee le menli mgbole wɔ ewiade a, na ɔvale ngonyia ɔbɛlɛbɛlale menli mɔɔ wɔ ewiade la amuala.

²⁴ Ɔluakɛ Babelɔn yɛɛ bɛnwunle Nyamenle kpɔmanvolɛma nee Nyamenle menli ne mogya a, yɛɛ bɛdabɛ mɔɔ bɛhunle bɛ wɔ ewiade la amuala mogya wɔ zolɛ.