Yekile 14 - BAEBOLO ANZƐƐ BULUKU NWUANZANWUANZA

Boaneralɛ ne nee ye menli

¹ Akee mekado me nye la ɛnee Boaneralɛ ne gyi Boka Zayɔn azo; ɔ nee menli apenle ngoko ɛya ko, abulanla nee nna (144,000) mɔɔ bɛhɛlɛ ɔdaye ye duma yɛɛ Selɛ ne duma wɔ bɛ nwoma azo la a gyi ɛkɛ a.

² Na mendele ɛnelɛ bie vi anwuma mɔɔ dielie kɛ azule mɔɔ lua awolɛ zo ɛlɛsonyi agua na ɔlɛkulu kɛ bokile ezule la. Eza ɛnelɛ ne mɔɔ mendele la le kɛ menli dɔɔnwo ɛlɛbɔ getaa,

³ na bɛlɛto edwɛne fofolɛ bie wɔ belemgbunli ebia kpole ne anyunlu wɔ tease abɔdeɛ nna ne nee mgbanyima ne mɔ anwo ɛkɛ. Bɛdabɛ menli apenle ngoko ɛya ko abulanla nee nna ɛhye, mɔɔ bɛlie bɛ ngoane bɛvi azɛlɛ ye azo la ala a ɛhola ɛzukoa edwɛne ne a.

⁴ Bɛmɛ a bɛle menli mɔɔ bɛzie bɛ nwo bɔkɔbɔkɔ mɔɔ bɛanva bɛ nwo bɛanga raalɛ biala a; bɛle amunli bɔkɔɔ. Bɛmɛ yɛɛ ɛleka biala mɔɔ Boaneralɛ ne ɛlɛkɔ la bɛdoa ye a. Bɛmɛ a bɛlie bɛ ngoane bɛvi aleɛabo amra avinli kɛ bɛle menli mɔɔ bɛlumua bɛva bɛ bɛrɛlɛ Nyamenle nee Boaneralɛ ne a.

⁵ Bɛtɛbɔle adalɛ ɛlɛ, ɔluakɛ bɛ nwo te bɔkɔɔ.

Nyamenle soanvolɛma nsa ne

⁶ Eza menwunle kɛ Nyamenle soanvolɛ ko ɛdu faa lua anwomanyunlu, na ɔlɛ damɛnlangoate nrɛlaleɛ ne, mɔɔ le Edwɛkpa ne ɔlɛba yearabɔ ye nolo yeahile menli ngakyile, mbusua ekpunli ekpunli, aneɛ ngakyile, nee maanle maanle kɔsɔɔti mɔɔ wɔ aleɛabo la.

⁷ Na ɔdeanle nu ɔhanle kɛ, “Bɛzulo Nyamenle, na bɛye ye ayɛlɛ. Ɔluakɛ mekɛ ne ɛdwu mɔɔ ɔbabua aleɛabo amra ndɛne a. Bɛzonle Nyamenle mɔɔ bɔle anwuma, azɛlɛ, nyevile, nee azule muala la.”

⁸ Nyamenle soanvolɛ ko noko ɔdaye ɔdoa ye na ɔse, “Yebɔ! Suakpole Babelɔn mɔɔ ɛlie duma la ɛbɔ bɔkɔɔ! Ɔmanle maanle maanle kɔsɔɔti anu amra zukoale ye na bɛvale adwɔmanebɔlɛ bɛhakyile nza bɛnlonle!”

⁹ Nyamenle soanvolɛ ne mɔɔ tɔ zolɛ nsa la ɔdaye ɔdoa alumua ɛdeɛ nwiɔ ne, na ɔlɛka ye kpole kpalɛ kɛ, “Mɔɔ kɛzonle nane ne nee ye ananze ne, na ɔkɛva ye sɛkɛlɛneɛ ne bie ɔkɛyɛ ɔ nwoma azo anzɛɛ ɔ sa anwo la

¹⁰ kɛnwu kɛ Nyamenle ɛya ne mɔɔ gyi ye ɛya dwora ne anu la ɛzulolɛ si de la. Bɛdabɛ mɔɔ bɛyɛ zɔhane deɛ ne la, bɛbahile bɛ nyane wɔ senle nee sɔlefa nu wɔ soanvolɛma nwuanzanwuanza nee Boaneralɛ ne anyunlu.

¹¹ Senle ne mɔɔ yelɛyela bɛ la anu esike ne kɔ anwuma anwuma dahuu mɔɔ ɔ bo ɛmpɛ ɛlɛ a. Bɛdabɛ mɔɔ bɛsonle nane ne nee ye ananze ne, na bɛlɛ ye duma ne sɛkɛlɛneɛ ne bɛ nwo la anwo ɛnrɛdɔ bɛ ɛlɛ alehyenlɛ nee aledwolɛ muala.”

¹² Ɛhye kile kɛ ɔwɔ kɛ Nyamenle menli ne mɔɔ di ye mɛla ne azo na bɛdi nɔhalɛ bɛmaa Gyisɛse la bɔ mɔdenle gyinla kpundii.

¹³ Akee mendele ɛnelɛ vi anwuma, ɔse, “Kɛlɛ ɛhye: Nyilalɛ ɛha bɛdabɛ mɔɔ ɔvi ɛnɛ mɔɔ kɔ la Awulae ɛzonlenlɛ ti bɛkɛwu la!” Na Sunsum ne liele zolɛ kɛ, “Nyilalɛ ɛha bɛ amgba! Bɛbalie bɛ ɛnwomenle wɔ bɛ gyima ɛsesebɛ ne mɔ mɔɔ bɛyɛ la anwo, ɔluakɛ bɛ gyima kpalɛ mɔɔ bɛdi la li bɛ nzi.”

Azɛlɛ ye azo bɛyɔba ne

¹⁴ Akee mendole me nye, na menwunle amungu fufule nwohyee bie, na debie bie mɔɔ le kɛ sonla la de zolɛ, ɔbɔ ezukoa abɔtile na ɔlɛ ɛdedadeɛ nlane bie ɔ sa nu.

¹⁵ Nyamenle soanvolɛ ko noko vi Ɛzonlenlɛ Sua ne anu vindele na ɔdeanle nu ɔzele mɔɔ de amungu ne azo la kɛ, “Fa wɔ ɛdedadeɛ ne te bɛyɔba ne; ɛbuhenle ne ɛdwu, ɔluakɛ azɛlɛ ye azo bɛyɔba ne ɛwie bolo.”

¹⁶ Na mɔɔ de amungu ne azo la denrɛle ɔ sa na ɔdele azɛlɛ ye azo bɛyɔba ne.

¹⁷ Menwunle kɛ Nyamenle soanvolɛ ko noko ɔdaye ɔvi anwuma lɔ Ɛzonlenlɛ Sua ne anu yevinde. Ɔdaye noko ɔlɛ ɛdedadeɛ nlane ko ɔ sa nu.

¹⁸ Akee Nyamenle soanvolɛ ko, mɔɔ yemɔ a ɔnea senle ne la vi azukponle ne abo vindele. Ɔdeanle nu ɔzele mɔɔ lɛ ɛdedadeɛ nlane ne la kɛ, “Ewiade vanye ma ne ɛbolo na fa wɔ dadeɛ ne te bɛ muala!”

¹⁹ Zɔhane ati Nyamenle soanvolɛ ne denrɛle ɔ sa wɔ azɛlɛ ye azo, ɔdele vanye ma ne mɔ amuala, na ɔvuandinle ɔguale Nyamenle ɛya kpole ne nwanye melahyinli ne anu.

²⁰ Melahyinli ne hwihwinle vanye ma ne anu nzule guale suakpole ne kandiba lɔ, na mogya mɔɔ ye kuma kɛyɛ mita nwiɔ la denrɛle zenle kɛ azule mɔɔ ye tendenle kɛyɛ kilomita ɛya nsa (300) la.