Yekile 13 - BAEBOLO ANZƐƐ BULUKU NWUANZANWUANZA

Nane nwiɔ ne

¹ Akee menwunle kɛ nane bie vi nyevile ne anu ɛlɛfo ara file zo. Ɔlɛ mɛne bulu yɛɛ ɔ ti le nsuu. Bɛbɔ ye mɛne ne mɔ ko biala abɔtile na bɛhɛlɛ duma ɛtane bie mɔɔ tia Nyamenle la bɛgua nwolɛ.

² Nane ɛhye anyunlu le kɛ sobolɛ nyunlu, ɔ gyakɛ le kɛ ezizile gyakɛ, yɛɛ ɔ nloa le kɛ awenade nloa. Na nane anwo ɛzulolɛ ne mɔɔ zɔho ɛlɛnrɛne la vale ye tumi ne, ye belemgbunli ebia ne, yɛɛ ye anwosesebɛ kpole ne manle ye.

³ Nane ne ati ne mɔ ko zɔho debie mɔɔ bɛbɔle ye hanlɛ kpole bie na hanlɛ ne ɛhɔ la. Ɔ nwo yɛle ewiade amra amuala ɛzulolɛ na bɛdule bɛdoale ye.

⁴ Menli zonlenle nane anwo ɛzulolɛ ne mɔɔ le kɛ ɛlɛnrɛne la, ɔluakɛ yemɔ a yeva tumi yemaa nane ɛhendeɛ ne a. Bɛzonlenle nane ne ɔdaye, na bɛhanle kɛ, “Nwane a nee nane ye sɛ a? Nwane a kɛhola kɛgyinla ɔ nyunlu a?”

⁵ Nane ne lile ɔ ti siane abulanla nee nwiɔ, na bɛmanle ye adenle bɛmanle ɔhehanle munzule edwɛkɛ ɛtane ɛtane ɔtietiale Nyamenle.

⁶ Ɔdendɛle ɛtane ɔtiale Nyamenle, ɔbɔle ye duma ɛtane, na ɔhanle munzule edwɛkɛ ɔtiale ɛleka mɔɔ ɔde, nee bɛdabɛ mɔɔ bɛwɔ anwuma lɔ la amuala.

⁷ Bɛmanle ye adenle kɛ ɔ nee Nyamenle menli ne ɛho na ɔli bɛ nwo zo konim, na bɛmanle ye tumi wɔ maanle biala, aneɛ biala, abusua ekpunli biala nee menli ngakyile kɔsɔɔti anwo zo.

⁸ Menli mɔɔ wɔ ewiade la amuala bazonle ye. Bɛdabɛ mɔɔ bɛangɛlɛ bɛ aluma wɔ Boaneralɛ ne mɔɔ bɛhunle ye la ngoane buluku ne anu kolaa na bɛabɔ ewiade la a bazonle ye a.

⁹ Zɔhane ati, ɛdawɔ mɔɔ ɛlɛ ɛnzonlɛ la, tie!

¹⁰ Awie mɔɔ ɔwɔ kɛ bɛkye ye nuokɛ la, bɛbahye ye nuokɛ; awie mɔɔ ɔwɔ kɛ wu dadeɛ nloa la, bawu dadeɛ nloa. Ɛhye kile kɛ ɔwɔ kɛ Nyamenle menli ne nyia abotane, gyinla bɛ nwo, si ahonle, na bɛnyia diedi.

¹¹ Akee menwunle kɛ nane ko noko vi azɛlɛ bo ɛlɛfinde ara. Ɔlɛ mɛne nwiɔ kɛ boane ɛdeɛ ne la, noko ɔtendɛ a ɔ ne le kɛ nane anwo ɛzulolɛ ne mɔɔ le kɛ ɛlɛnrɛne la.

¹² Tumi kpole ne mɔɔ alumua nane ne lɛ la yɛɛ ɔfa ɔyɛ gyima a. Na ɔmanle bɛdabɛ mɔɔ bɛde azɛlɛ ye azo la amuala zonlenle alumua nane ne mɔɔ bɛbɔle ye hanlɛ na hanlɛ ne ɛhɔ la.

¹³ Nane ɛhye mɔɔ tɔ zolɛ nwiɔ la yɛle nwanwane ninyɛne mgbole; ɔmanle senle bɔbɔ vi anwuma rale azɛlɛ ye azo manle menli kɔsɔɔti nwunle ye.

¹⁴ Ɔluale ngonyia ɛhye mɔ mɔɔ bɛmanle ye adenle bɛmanle ɔluale alumua nane ne anwo zo ɔyele la azo ɔbɛlɛbɛlale menli mɔɔ wɔ ewiade la amuala. Nane ɛhye mɔɔ tɔ zolɛ nwiɔ la zele menli kɔsɔɔti kɛ bɛyɛ ananze mɔɔ zɔho nane ne mɔɔ bɛbɔle ye hanlɛ kpole noko ɔtɛte ngoane nu la.

¹⁵ Bɛmanle adenle bɛmanle nane ɛhye mɔɔ tɔ zolɛ nwiɔ la liele ɛnwomenle guale alumua nane ne ananze ne azo, amaa ananze ne adendɛ. Eza bɛmanle ye adenle bɛmanle ɔhunle bɛdabɛ mɔɔ bɛanzonle alumua nane ne ananze ne la amuala.

¹⁶ Nane ne manle menli kɔsɔɔti, ngakula nee mgbanyinli, sukoavolɛma nee ehyianvolɛma, ahanra nee alehelɛ, nyianle nzonlɛ wɔ bɛ sa fema ne anwo anzɛɛ bɛ nwoma azo.

¹⁷ Ɛdawɔ mɔɔ ɛnlɛ nzonlɛ ne mɔɔ le nane ne duma anzɛɛ ye sɛkɛlɛneɛ ne bie la, ɛngola ɛnli gua.

¹⁸ Ɛhye hyia maa nrɛlɛbɛ. Mɔɔ lɛ ndelebɛbo la kola sese nwu nane ne nɔma ne abo, ɔboalekɛ nɔma ne le sonla duma. Nɔma ne a le ɛya nsia abulasia nee nsia (666)