Wulu 4 - BAEBOLO ANZƐƐ BULUKU NWUANZANWUANZA

Bowaze gya Wulutu

¹ Bowaze hɔle suakpole ne anlenkɛ kpole ne anloa, ɛleka mɔɔ ɔyɛ a bɛyia la na ɔdɛnlanle aze. Yeangyɛ biala yɛɛ kɔliagya ne mɔɔ Bowaze lile ye edwɛkɛ la rale ɛkɛ ne a. Bowaze zele ye kɛ, “Ayi, bɛla badɛnla aze.” Na ɔradɛnlanle aze.

² Bowaze vɛlɛvɛlɛle suakpole ne azo mgbanyima bulu na ɔmanle bɛradɛnlanle aze wɔ ɛkɛ ne.

³ Akee ɔzele kɔliagya ne kɛ, “Nawome vi Mowabe ɛra, na yeyɛ kɛ ɔtɔne yɛ busuanli Yilemɛlɛke azɛlɛ ne.

⁴ Yemɔti medwenle nwolɛ kɛ meka meahile wɔ kɛ tɔ azɛlɛ ne maa menli mɔɔ wɔ ɛke nee mgbanyima mɔɔ mehɔvɛlɛvɛlɛ bɛ la ɛli nwolɛ daselɛ. Saa ɛkɛlie azɛlɛ ne a ɛnee die, saa ɛnrɛlie noko a ɛnee ka kile me maa menwu ye, ɔluakɛ awie bieko ɛnle ɛkɛ ne kɛ wɔmɔ yɛɛ mame.” Na nrenya ne mɔɔ di agya ne la zele Bowaze kɛ, “Mebalie azɛlɛ ne.”

⁵ Bowaze zele ye kɛ, “Saa ɛtɔ azɛlɛ ne na ɛdie ɛfi Nawome asa anu a, ɛnee ɔwɔ kɛ ɛgya Wulutu, Mowabenli kunlanvolɛ ne, amaa mɔɔ lɛ azɛlɛ ne la duma amminli ye agyadeɛ ne anwo.”

⁶ Kɔliagya ne zele Bowaze kɛ, “Saa zɔhane ɛdeɛ a ɛnee mekpɔlɔkpɔla me sa anwo wɔ debie biala anwo. Ɔluakɛ ɔkɛgyegye me mra ne mɔ agyalilɛ. Yemɔti memaa wɔ nwolɛ adenle. Tɔ azɛlɛ ne na mame, menrɛdɔ.”

⁷ Mekɛ ne anu ɛnee Yizilayɛma amaamuo ne mɔ ko mɔɔ fane agyadeɛ ɛdɔnenlɛ nee agyalilɛ nwo la a le ɛhye: saa ɔba ye kɛ bɛtɔne agyadeɛ bie a, ahenle mɔɔ ɛlɛtɔne deɛ ne la ye ɔ gyakɛ mgbɔlaboa maa ahenle ne mɔɔ ɛlɛtɔ agyadeɛ ne la. Bɛyɛ ɛhye bɛfa bɛdi daselɛ kɛ ahenle mɔɔ anrɛɛ lɛ agyadeɛ ne la ɛye ɔ sa nwolɛ bɔkɔɔ.

⁸ Yemɔti kɔliagya ne yele ye mgbɔlaboa ne na ɔzele Bowaze kɛ, “Kɔdɔ fa.”

⁹ Bowaze zele mgbanyima nee menli mɔɔ wɔ ɛkɛ ne la amuala kɛ, “Bɛdabɛ bɛdi daselɛ kɛ ɛnɛ kenle ye, medɔ debie biala mɔɔ anrɛɛ le Yilemɛlɛke ɛdeɛ la, nee debie biala mɔɔ le Kaeleɔn nee Maalɔn ɛdeɛ la amuala mevi Nawome asa anu.

¹⁰ Bieko, ɛnɛ Mowabenli Wulutu mɔɔ anrɛɛ le Maalɔn aye la le me ye, amaa yeawo mralɛ wɔ agyadeɛ ne mɔɔ melie la duma nu, na mɔɔ ɛwu ɛhɔ la duma amminli ɔ mediema avinli anzɛɛ ye sua zo; bɛ muala bɛdi ɛhye mɔ anwo daselɛ ɛnɛ.”

¹¹ Na bɛdabɛ mɔɔ bɛyiale ɛkɛ ne la amuala nee mgbanyima ne mɔ hanle kɛ, “Ɛhɛe, yɛdi nwolɛ daselɛ. Yɛsɛlɛ kɛ Ɛdɛnkɛma ɛmaa raalɛ ne mɔɔ ɛlɛba wɔ sua nu la ɛyɛ kɛ Relahyɛle nee Liya mɔɔ bɛ kunlu mralɛ a kyekyele Yizilayɛ maanle ye la. Nyamenle ɛmaa ɛkpazi wɔ Ɛfelate na ɛyɛ mandimase wɔ Bɛtelɛhɛm ɛke.

¹² Ngakula mɔɔ Ɛdɛnkɛma bava amaa ɛdawɔ nee ɛ ye kakula ɛhye la ɛmaa wɔ sua nu ɛyɛ gbudugbudu kɛ Dwuda nee ɔ ye Teemaa ara Pɛlɛze sua nu la.”

Bowaze nee ɔ bo zo amra

¹³ Na Bowaze vale Wulutu yɛle ɔ ye na ɔ nee ye hɔdɛnlanle. Ɛdɛnkɛma manle ɔvale ɛkolɛ na ɔwole ralɛ nrenya.

¹⁴ Mraalɛ mɔɔ wɔ suakpole ne azo la zele Nawome kɛ, “Yɛyɛ Ɛdɛnkɛma mo; ɛnɛ yemaa wɔnyia anlɔnra nrenya. Yɛsɛlɛ kɛ ɔnyia duma kpole wɔ Yizilayɛ.

¹⁵ Ɛ ra ne aye ne mɔɔ kulo wɔ la ɛyɛ mɔɔ hyia wɔ tɛla mralɛ mrenya nsuu bɔbɔ la ɛmaa wɔ. Kɛkala yemaa wɔ ralɛ nrenya mɔɔ bamaa wɔ sua nu ayɛ gbudugbudu na yeazɔ wɔ, wɔ wɔ mrelera nu a.”

¹⁶ Na Nawome liele kakula ne bɔle ye ɛbolɛ, na ɔliele ye ɛnleanlɛ ɔdole ɔ nwo zo.

¹⁷ Mraalɛ mɔɔ wɔ kpalɛ ne azo la noko hanle hilele menli kɛ, “Bɛwo ralɛ nrenya bɛmaa Nawome.” Bɛdonle kakula ne Obɛde. Obɛde wole Gyɛsi mɔɔ wole Belemgbunli Devidi la.

^18-22 Akee Pɛlɛze abusuandoazo ne, bɛmɛ ɛne: Pɛlɛze wole Hɛzelɔn, Hɛzelɔn wole Relam, yɛɛ Relam wole Amenadabe. Amenadabe wole Nahyɔn, Nahyɔn wole Salemɔn, Salemɔn wole Bowaze, Bowaze wole Obɛde, Obɛde wole Gyɛsi, yɛɛ Gyɛsi wole Belemgbunli Devidi.