Wulu 1 - BAEBOLO ANZƐƐ BULUKU NWUANZANWUANZA

Yilemɛlɛke nee ye abusua ne tu ahɔ Mowabe

^1-2 Mekɛ mɔɔ ɛnee maanlebuvolɛma a bu Yizilayɛ maanle ne la, ɛhɔne kpole bie zile maanle ne anu. Zɔhane ati nrenya bie mɔɔ vi Bɛtelɛhɛm mɔɔ wɔ Dwuda maanle nu na ɔbɔ Ɛfelate abusua ne bie la vale ɔ ye nee ɔ mra mrenya nwiɔ mɔɔ ɔlɛ bɛ la lɔle nu hɔle Mowabe maanle nu. Bɛfɛlɛ nrenya ne Yilemɛlɛke, bɛfɛlɛ ɔ ye Nawome yɛɛ ɔ mra mrenya nwiɔ ne noko aluma a le Maalɔn yɛɛ Kaeleɔn. Bɛhɔle Mowabe maanle nu bɛhɔdɛnlanle ɛkɛ ne.

³ Na Nawome ɔ hu Yilemɛlɛke wule manle ɔhale ye nee ɔ mra mrenya nwiɔ ne.

⁴ Mgbavolɛ nwiɔ ɛhye gyale Mowabe mraalɛ; bɛfɛlɛ ko Ɔpa yɛɛ bɛfɛlɛ ko Wulutu. Kɛyɛ ɛvolɛ bulu anzi

⁵ Maalɔn nee Kaeleɔn bɛdabɛ noko bɛwule na ɔhale Nawome angome; ɔ hu ɛwu yɛɛ ɔ mra mrenya nwiɔ ne noko ɛvi ɔ sa.

Nawome nee Wulutu sia ahɔ Bɛtelɛhɛm

⁶ Mekɛ guale nu la Nawome dele ye wɔ Mowabe ɛkɛ ne kɛ Ɛdɛnkɛma ɛlo ye menli Yizilayɛma na yemaa bɛnyia aleɛ dɔɔnwo. Zɔhane ati ɔ nee ahunlanvolɛ mraalɛ nwiɔ ne boɔboale bɛ nwo kɛ bɛvi Mowabe bɛsia bɛahɔ Dwuda.

⁷ Yemɔti ɔ nee ahunlanvolɛ mraalɛ nwiɔ ne vile ɛleka mɔɔ bɛde la na bɛzile nuhua kɛ bɛsia bɛahɔ Dwuda maanle nu. Na mɔɔ bɛdwule adenle nu la

⁸ Nawome zele ahunlanvolɛ mraalɛ ne mɔ kɛ, “Bɛzia, awie biala ɛhɔ ɔ nli sua nu. Ɛdɛnkɛma nee bɛ ɛdɛnla gyɛlɛɛnye, kɛmɔ bɛ nee me nee menli mɔɔ ɛwu ɛhɔ la dɛnlanle la.

⁹ Ɛdɛnkɛma ɛmaa bɛnyia mrenya bɛgya, na bɛkyekye awuke.” Akee ɔvale bɛ ɔbɔle ye ɛbolɛ, ɔyɛle bɛ atuu na ɔhɛlale bɛ. Na bɛdukuele nu bɛzunle.

¹⁰ Ahunlanvolɛ mraalɛ ne mɔ zele Nawome kɛ, “Kyɛkyɛ, yɛ nee wɔ kɔ ɛleka mɔɔ ɛvi la.”

¹¹ Nawome zele bɛ kɛ, “Me mra mraalɛ, bɛzia. Duzu ati a bɛ nee me kɔ a? Asoo mebawo mralɛ mrenya bieko na bɛarayɛ bɛ hu mɔ?

¹² Me mra mraalɛ, bɛzia bɛhɔ, ɔluakɛ meyɛ kpanyinli, mebo agyalɛhɔlɛ zo. Na saa melɛ anyelazo bɔbɔ yɛɛ megya nrenya na ɛnɛ nɔe ala meawo mralɛ mrenya a,

¹³ asoo ɛhye ati bɛkɛhendɛ toonwo bɛkɛmaa bɛkɛyɛ mgbanyinli? Ɛhye ati bɛnrɛhɔ agyalɛ ko ɔ? Kyɛkyɛ, me mra mraalɛ, ɔyɛ se ɔmaa me na ɔmaa medi nyane wɔ bɛ ti, kɛ Ɛdɛnkɛma ɛmaa menwu me nyunlu totohyia zɛhae a.”

¹⁴ Na bɛzunle bieko kpole kpalɛ; Ɔpa metanle ɔ hu ɔ nli ne, ɔyɛle ye atuu na ɔziale ɔhɔle. Na Wulutu ɛdeɛ, yeamkponle kɛ ɔkɛzia.

¹⁵ Na Nawome zele Wulutu kɛ, “Nea, ɛ hola ɛzia ɛhɔ ye sua zo ɔkazonle ye abusua bozonle ne mɔɔ ɔsonle ye dɛba la. Ɛdawɔ noko toa ye ɛ nee ye bɛhɔ.”

¹⁶ Wulutu zele ye kɛ, “Mmafoa me kɛ mengyakyi wɔ mengɔ anzɛɛ menzia na memmatoa wɔ. Ɔluakɛ me nee wɔ yɛkɔ ɛleka mɔɔ ɛlɛkɔ la, mebadɛnla ɛleka mɔɔ ɛkɛdɛnla la. Wɔ menli bayɛ me menli, na wɔ Nyamenle ne ayɛ me Nyamenle.

¹⁷ Ɛleka mɔɔ ɛkɛwu ɛkɛla la, ɛkɛ ne yɛɛ medame mebawu meala a. Ɛdɛnkɛma ɛdua me kakɛ ɛgua me bie zo kɛ menwɔgyakyi wɔ menwɔzia a, kyesɛ ewule na akpakye yɛ mu nwiɔ yɛ avinli!”

¹⁸ Mɔɔ Nawome nwunle kɛ Wulutu ɛzi ye ɛbolɛ kɛ ɔ nee ye kɔ la, yeandɛ ɔ nloa anu bieko.

¹⁹ Yemɔti bɛ mu nwiɔ bɛzile nuhua na bɛrale Bɛtelɛhɛm. Na mɔɔ bɛradwule la sua ne azo kpudwule, na mraalɛ ne mɔ zele kɛ, “Nawome ɛhye ɔ?”

²⁰ Nawome zele bɛ kɛ, “Bɛmmafɛlɛ me Nawome bieko; bɛvɛlɛ me Maala. Ɔluakɛ Ɛdɛnkɛma nee me ɛli ye ɛnwonle zo kpalɛ kpalɛ.

²¹ Mekɔ la ɛnee megyi boɛ, na Ɛdɛnkɛma ɛmaa meva me sa mgbane mezia mera. Duzu ati a bɛkɛvɛlɛ me Nawome a, wɔ mekɛ mɔɔ Ɛdɛnkɛma annwu me ɛralɛ nu na Nyamenle Tumivolɛ ne asa ɛyɛ ɛnlomboɛ wɔ me nwo zo la?”

²² Ɛnee Nawome nee ɔ ra ne aye Mowabenli Wulutu bɛ ɛralɛ ne mɔɔ bɛziale bɛvi Mowabe maanle nu bɛrale Bɛtelɛhɛm la kɛ yɛle la ɛne. Mekɛ ne anu ɛnee Yizilayɛma aleɛ ma bie mɔɔ bɛfɛlɛ ye baale la ɛbolo na bɛbɔ ɔ bo kɛ bɛte.