Sɔlɔmɔn Edwɛne 3 - BAEBOLO ANZƐƐ BULUKU NWUANZANWUANZA

¹ Nɔɔzo mɔɔ mela me ɛkpa ne azo la, menganle me kulovolɛ ne anwo ɛlalɛ. Memkpondɛle ye, na meannwu ye, menvɛlɛle ye, na yeambua.

² Kɛkala akee medwazo meahɔkpɔsa suakpole ye azo, gua ne mɔ azo nee ɛleka wienyi ne mɔ, meakpondɛ me kulovolɛ ne. Memkpondɛle ye, na meannwu ye.

³ Sinzavolɛma mɔɔ sinza suakpole ne la nwunle me, mekɛ mɔɔ bɛbɔ suakpole ne azo mgbɔlɔka la. Membizale bɛ, “Bɛ nye ɛbɔ me kulovolɛ ne anwo zo ɛleka bie ɔ?”

⁴ Mevi bɛ nwo ɛkɛ ne ala la, menwunle me kulovolɛ ne. Menzɔle ye kɛ menrɛmaa ɔnrɛhɔ, kɔkpula kɛ me nee ye ɛhɔ ɔmɔ sua nu, ekpumgbunli ne mɔɔ bɛwole me nu la anu.

⁵ O Gyɛlusalɛm mraalɛ, mese, bɛva weɛlɛ nee ahɛtɛboɛ anwondɛne ne mɔ bɛha ndane kɛ bɛnrɛpele ɛhulolɛ nwo kɔkpula kɛ ɛhulolɛ ne mekɛ kpalɛ kɛdwu la.

Edwɛne mɔɔ tɔ zo nsa Raalɛ ne

⁶ Duzu a vi fienemgbole ne anu ɛlɛba, mɔɔ le bolonwonwo kɛ esike, na ɛyɛlɛ nee alufuanlɛ evuanlɛ ɛyɛ ye mukumuku, ɛyɛlɛ mɔɔ gualilɛma a tɔne la?

⁷ Bɛnlea, Sɔlɔmɔn ɛlɛba, bɛzo ye wɔ belemgbunli bonrane nu; katakyiema abulasia a le ye sinzavoma a, bɛle Yizilayɛ ɛlɔne nu katakyiema ne mɔ bie.

⁸ Bɛ kɔsɔɔti bɛdedɛ konle dadeɛ; yɛɛ bɛze konle nye zo kpalɛ kpalɛ. Nɔɔzo arɛlevilɛ nu ɛtetalɛ ti, ko biala lɛ dadeɛ zia ɔ nwo.

⁹ Belemgbunli Sɔlɔmɔn yɛle bonrane, ɔvale Lɛbanɔn mbaka a ɔyɛle a.

¹⁰ Ɔvale dwɛtɛ fufule ɔfɔlele ye mbaka ne mɔ anwo, ɔvale ezukoa nvutuke ɔfɔlele ɔ nzi ne, ɔvale ɛdanlɛ buluwu nee kɔkɔlɛ afonla mɔɔ Gyɛlusalɛm mraalɛ ɛnwo nu la ɔzɛle ɛleka mɔɔ bɛtɛnla la.

¹¹ O Zayɔn mraalɛ, bɛranlea Belemgbunli Sɔlɔmɔn, nee ye belemgbunli kyɛlɛ mɔɔ ɔ nli vale zoale ye kenle ko ne mɔɔ bɛdie ye atɔfolɛ la, kenle ko ne, fɛlɛko nee anyelielɛ yile ye ahonle tɛkɛɛ.